Followim Christ, Nambawan Leader
STAKA taem pipol wea followim olketa man wea rul no hapi long wanem olketa duim. Bat olketa wea followim Christ and stap anda long hem no olsem. Jesus sei: “Kam long mi, iufala wea waka hard and wea karem hevi samting, mekem mi savve strongim iufala. Iufala waka witim mi and lane from mi, bikos mi no savve raf and mi hambol. Wei for duim olsem bae strongim iufala.” (Matt. 11:28, 29) Wei wea Jesus leadim iumi mekem iumi satisfae and hapi. Hem interest tumas long olketa wea hambol and wea safa, and hem encouragem olketa for waka witim hem. Bat wanem nao iumi mas duim for followim leader bilong iumi Jesus?
Aposol Peter sei: “Christ hem safa for iufala. Hem showimaot example for iufala barava followim gud.” (1 Pet. 2:21) Why nao hem important for followim example bilong Jesus? Tingim sapos iu witim olketa narawan wakabaot go daon long hill followim road wea slippery, and wanfala nomoa hem savve tumas long ples for step long hem. Bae iu laek wakabaot followim hem, iaman? Semsem tu, for stap sef iumi need for followim example bilong Jesus. Datwan minim iumi mas lisin and obeyim Jesus and waka witim olketa wea hem iusim.
Lisin and Obey
Long Sermon long Maunten, Jesus sei: “Evriwan wea herem toktok bilong mi and followim datwan bae olsem wanfala man wea garem gudfala tingting wea wakem haos bilong hem antap long ston. Then rain witim bigfala flood and strongfala wind hem bangam datfala haos, bat hem no foldaon bikos man hia wakem datfala haos antap long ston.”—Matt. 7:24, 25.
Jesus sei man wea lisin and obeyim wanem hem talem, hem “man wea garem gudfala tingting.” Waswe, iumi showimaot iumi obeyim Jesus Christ long wei for respectim and tinghae long gudfala example wea hem showimaot? Or waswe, iumi chus for followim nomoa olketa law wea Jesus talem wea hem isi for followim? Jesus sei: “Mi evritaem duim samting wea [God] laekem.” (John 8:29) Hem gud for iumi followim example bilong Jesus.
Long first century, olketa aposol showimaot gudfala example long wei for followim Christ. Wantaem Peter sei long Jesus: “Mifala lusim evri samting and followim iu.” (Mark 10:28) Tru tumas, olketa aposol barava tinghae long wei wea Jesus leadim olketa. Olketa willing for lusim evri samting mekem olketa savve followim hem.—Matt. 4:18-22.
Waka Witim Olketa wea Christ Iusim
Bifor Jesus dae, hem storyim nara samting wea iumi savve duim for followim hem. Hem sei: “Man wea welkamim eniwan wea mi sendem kam hem welkamim mi tu.” (John 13:20) Jesus storyim olketa anointed Christian wea hem iusim olsem olketa “brata” bilong hem. (Matt. 25:40) Taem Jesus go bak long heven, hem markem olketa “brata” bilong hem for “talemaot toktok” bilong hem. Waka bilong olketa hem for talem pipol for fren bak witim Jehovah God. (2 Cor. 5:18-20) For followim Leader bilong iumi, Christ, iumi mas stap anda long olketa “brata” bilong hem.
Taem iumi kasem kaonsel long olketa buk bilong iumi, waswe, iumi followim datwan? Taem iumi studyim Bible and go long olketa meeting, iumi savve herem olketa toktok bilong Christ. (2 Pet. 3:1, 2) Iumi showimaot iumi tinghae long olketa spiritual kaikai hia taem iumi gohed for study and go long olketa meeting. Bat wanem nao iumi shud duim sapos iumi herem wanfala kaonsel staka taem? Olsem example, Bible talem olketa Christian for maritim nomoa “man wea worshipim God.” (1 Cor. 7:39) Winim wan handred year finis, Wastaoa storyim disfala subject staka taem. Wei wea olketa brata bilong Christ provaedem olketa article abaotem disfala subject and olketa nara kaonsel showimaot olketa laek helpem iumi for fren gud witim Jehovah. Taem iumi followim olketa kaonsel hia, datwan showimaot iumi followim nambawan Leader bilong iumi Jesus Christ.
Proverbs 4:18 sei: “Wei bilong olketa raeteous wan hem olsem braet laet wea kakamap braet go kasem big daylaet.” Tru tumas, Jesus helpem kongregeson for gohed kamap gud. Nara samting wea showimaot iumi waka tugeta witim olketa “brata” bilong Christ nao hem for garem gudfala tingting abaotem olketa change wea kamap abaotem hao iumi minim olketa tru samting long Bible wea “wakaman wea faithful and wise” pablisim.—Matt. 24:45.
Taem iumi waka tugeta witim olketa elder long kongregeson, datwan showimaot iumi stap anda long olketa “brata” bilong Christ. Aposol Paul sei: “Obeyim and stap anda long olketa mekem olketa hapi for lukaftarem iufala bikos sapos nomoa, datwan bae spoelem iufala.” (Heb. 13:17) Olsem example, maet wanfala elder encouragem iumi hao hem important for evritaem duim Famili Worship or maet hem talem samfala idea long hao for duim gud ministry. Maet wanfala traveling overseer storyim samfala kaonsel from Bible wea savve helpem iumi for kamap gud long hao iumi worshipim Jehovah. Taem iumi willing for followim kaonsel wea iumi kasem, datwan showimaot iumi followim Jesus, Leader bilong iumi.
World distaem no garem eni gud leader. Bat hem gud tumas for iumi followim Christ wea hem nao nambawan Leader! So gohed for obeyim Leader bilong iumi Jesus Christ and waka tugeta witim olketa wea hem iusim.
[Piksa long page 27]
Waswe, iu acceptim kaonsel from Bible for no kaban witim olketa wea no worshipim Jehovah?