Waswe, Iu Rest Long Day Bilong God for Rest?

“Toktok bilong God hem laef and hem garem paoa.”​—HEB. 4:12.

1. (a) Wanem nao iumi savve duim for rest long day bilong God for rest? (b) Why nao maet hem no isi for obey?

IUMI lanem finis iumi savve rest long day bilong Jehovah for rest sapos iumi obeyim hem and followim wanem organization bilong hem talem. Wei wea iumi obeyim Jehovah showimaot iumi laekem plan bilong hem for kamap tru. Bat samfala taem hem no isi for obey. Olsem example, sapos iumi luksavve Jehovah no laekem iumi for gohed duim samting wea iumi enjoyim, maet hem no isi for kwiktaem obeyim hem. Sapos olsem, iumi mas “willing for obey.” (Jas. 3:17) Long disfala study, bae iumi storyim samfala samting wea kamap long laef wea iumi savve showimaot iumi willing for obeyim God.

2, 3. Wanem nao iumi mas gohed duim for mekem Jehovah hapi?

² Taem iu lanem from Bible iu need for changem samfala samting, waswe, iu willing for obey? Bible sei pipol wea Jehovah leadim for kam insaed organization bilong hem, hem “olketa barava spesol samting bilong evri kantri.” (Hag. 2:7) God chusim pipol wea spesol long hem bikos olketa laek for duim samting wea stret. Hem tru, taem iumi start for studyim Bible, staka long iumi duim samting wea no stret. Bat from iumi lovem God and Son bilong hem and laek for mekem God hapi, iumi willing for changem tingting bilong iumi and samfala samting wea iumi duim. Iumi prea long Jehovah for helpem iumi and traem best for duim stret samting. Gogo iumi baptaes and Jehovah hapi long iumi.​—Readim Colossians 1:9, 10.

³ Nomata olsem, iumi no perfect. Iumi need for gohed changem samfala samting and traem best for duim stret samting. Bat Jehovah promis for helpem iumi sapos iumi waka hard for duim samting wea mekem hem hapi.

Taem Iumi Kasem Kaonsel

4. Wanem nao thrifala wei wea Jehovah savve kaonselem iumi?

⁴ Iumi need for savve firstaem wanem iumi need for changem long laef bifor iumi duim datwan. Jehovah helpem iumi long staka difren wei. Maet iumi herem wanfala tok long Kingdom Hall or readim article long magasin bilong iumi wea helpem iumi luksavve samting wea iumi duim hem no stret. Bat samfala taem maet iumi no minim kaonsel wea iumi herem or readim. So maet Jehovah iusim wanfala brata or sista long kongregeson for stretem iumi long kaenfala wei.​—Readim Galatians 6:1.

5. (a) Wanem nao maet iumi duim taem samwan kaonselem iumi? (b) Why nao olketa elder mas gohed for helpem iumi?

⁵ Taem narawan kaonselem iumi, maet hem no isi for acceptim datwan nomata hem givim long kaenfala wei. Bat Jehovah talem olketa elder, olketa mas “trae for stretem” iumi long kaenfala wei. (Gal. 6:1) Sapos iumi acceptim help bilong olketa, bae iumi barava “spesol” long Jehovah. Hem tru, taem iumi prea long Jehovah iumi talem hem iumi no perfect and iumi duim staka mistek. Bat taem wanfala elder sei iumi duim mistek, maet iumi talem excuse for wanem iumi duim or sei samting wea iumi duim hem no serious. Maet iumi sei datfala brata no laekem iumi or hem no story long iumi long kaenfala wei. (2 Ki. 5:11) Or maet iumi kros tumas sapos olketa elder talem samting wea iumi no laek herem. Olsem example, maet olketa sei samwan long famili bilong iumi duim samting wea no stret or kaleko wea iumi werem hem no fitim. Maet olketa talem iumi for keepim body bilong iumi klin or Jehovah heitim kaen hapitaem wea iumi duim. From iumi kros, maet iumi talem samting wea iumi shud no talem. Diswan savve mekem iumi sorre and olketa brata wea trae for helpem iumi tu for sorre. Bat bihaen, taem iumi no kros, iumi acceptim wanem olketa talem bikos iumi luksavve datwan hem stret samting.

6. Long wanem wei nao toktok bilong God showimaot ‘tingting and samting wea heart bilong iumi laekem’?

⁶ Theme scripture for disfala study hem sei toktok bilong God “garem paoa.” Tru tumas, toktok bilong God savve helpem pipol changem laef bilong olketa. Hem helpem iumi for changem samfala samting bifor and bihaen iumi baptaes. Long leta wea Paul raetem for olketa Hebrew Christian, hem sei toktok bilong God “hem savve kat go deep insaed long man, hem savve showim wanem hem insaed long man and showim aotsaed bilong hem tu. Hem savve go deep insaed long olketa join and bon bilong man and hem luksavve tu long tingting bilong hem, and samting wea heart hem laekem.” (Heb. 4:12) So taem iumi luksavve long wanem God laekem iumi for duim, samting wea iumi disaed for duim bae showimaot wanem kaen man nao iumi. Waswe, samfala taem wanem pipol lukim long iumi hem difren from wanem iumi tingim and laekem? (Readim Matthew 23:27, 28.) Bae iumi storyim samfala samting wea savve kamap long laef and trae for tingim wanem iu bae duim.

Gohed Followim Organization Bilong Jehovah

7, 8. (a) Why nao maet samfala Christian wea Jew laek gohed followim samfala part long Law bilong Moses? (b) Why nao samting wea olketa duim hem againstim plan bilong Jehovah?

⁷ Staka long iumi savve gud long wanem Proverbs 4:18 talem. Hem sei: “Wei bilong olketa raeteous wan hem olsem braet laet wea kakamap braet go kasem big daylaet.” Datwan minim iumi gohed for minim gud plan bilong Jehovah and wanem hem laekem iumi for duim.

⁸ Iumi lanem finis hao nomata bihaen Jesus dae, staka Christian wea Jew laek gohed followim Law bilong Moses. (Acts 21:20) Paul talem stret hao olketa Christian no need for followim Law bilong Moses, bat samfala no acceptim wanem Jehovah laekem olketa for duim. (Col. 2:13-15) Maet olketa tingse sapos olketa followim samfala part long Law, bae olketa no kasem hard taem from olketa wea followim Jew religion. Bat Paul talem stret long olketa Hebrew Christian sapos olketa gohed for duim samting againstim plan bilong God, bae olketa no rest long day bilong God for rest.a (Heb. 4:1, 2, 6; readim Hebrews 4:11.) For Jehovah hapi long olketa, olketa mas acceptim hao Jehovah laekem olketa for worshipim hem long difren wei.

9. Sapos wakaman wea faithful and wise mekem change long hao iumi minim samfala teaching, iumi shud ting hao long datwan?

⁹ Long taem bilong iumi, samfala change kamap long hao iumi minim samfala teaching long Bible. Iumi shud hapi taem eni change olsem kamap bikos hem showimaot Jehovah iusim wakaman wea faithful and wise for teachim iumi tru samting. Taem Governing Body wea stand for wakaman wea faithful and wise duim research and luksavve wei wea iumi minim samfala teaching hem no stret or iumi need for minim gud moa datwan, olketa willing for mekem olketa change. Olketa brata hia savve samfala bae talem nogud samting abaotem wakaman wea faithful and wise bikos long olketa change wea kamap, bat main samting wea olketa tingim nao hem for followim plan bilong God. Wanem nao tingting bilong iu taem wakaman wea faithful and wise mekem change long hao iumi minim samfala teaching?​—Readim Luke 5:39.

10, 11. (a) Wanem nao samfala Bible Student duim taem olketa luksavve olketa shud traem olketa niu wei for preach? (b) Wanem nao iumi lanem from datfala example?

¹⁰ Tingim nara example. Samting olsem 100 year bifor, samfala Bible Student savve tumas for givim pablik tok and tingse datwan nao best wei for preach. Olketa laekem wei for story front long pipol and samfala laekem tumas taem pipol praisem olketa. Bat gogo pipol bilong Jehovah luksavve hem laekem olketa for duim moa samting winim wei for givim pablik tok nomoa. Jehovah laekem olketa for preach long haos tu haos and long olketa nara wei tu. Samfala wea savve tumas for givim pablik tok no laek for duim datwan. Tok wea olketa givim mekem narawan tingse olketa lovem and obeyim Jehovah, bat wanem olketa duim nating showimaot datwan. Iumi savve Jehovah no hapi long wanem olketa duim and olketa lusim organization bilong hem.​—Matt. 10:1-6; Acts 5:42; 20:20.

¹¹ Long firstaem, hem no isi for olketa Bible Student wea faithful for preach from haos tu haos. Nomata olsem, olketa followim wanem organization bilong Jehovah talem. Gogo olketa getius for preach long haos tu haos and Jehovah barava blessim olketa. Wanem nao iu duim taem wakaman wea faithful and wise talem iu for traem wanfala niu wei for preach? Waswe, iu obey nomata hem no isi for duim datwan?

Taem Samwan wea Iumi Lovem Lusim Jehovah

12, 13. (a) Why nao Jehovah talem for “aotem man wea duim rabis samting from kongregeson”? (b) Wanem hard samting nao olketa Christian dadi and mami savve kasem?

¹² For mekem Jehovah hapi, iumi mas obeyim law bilong hem for klin long body, garem gudfala wei, and duim wanem hem laekem. (Readim Titus 2:14.) Bat samfala taem hem no isi for iumi obeyim datfala law. Tingim diswan. Wanfala hasband and waef wea faithful garem wanfala son nomoa and hem lusim Jehovah. Hem chus for “duim sin wea savve mekem man hapi for lelebet taem nomoa” winim wei for fren witim Jehovah and dadi and mami bilong hem. Samting wea hem duim mekem hem disfellowship from kongregeson.​—Heb. 11:25.

¹³ Datfala dadi and mami barava sorre long wanem hem happen! Tufala savve long wanem Bible talem. Hem sei: “No fren witim eni brata wea hem durong or hem greedy or worshipim idol or tok spoelem nara pipol or savve drunk or demandim selen. Nomata for sidaon and kaikai witim man olsem, iufala mas no duim tu.” Bible sei tu: “Aotem man wea duim rabis samting from kongregeson.” (1 Cor. 5:11, 13) Dadi and mami hia luksavve datfala toktok “eni brata” savve minim tu eniwan long famili wea no stap long sem haos witim olketa. Bat from tufala barava lovem son bilong tufala, maet tufala start for ting olsem: ‘Hard for son bilong iumi tufala kam bak long Jehovah sapos iumi no duim eni samting for helpem hem. Hem gud for iumi tufala story witim hem evritaem.’b

14, 15. Sapos dadi and mami need for story witim pikinini wea disfellowship, wanem nao tufala mas tingim?

¹⁴ Iumi sorre tumas long nogud samting wea happen long datfala dadi and mami. Son bilong tufala savve chus for duim stret samting, bat hem laek for gohed duim samting wea no stret and lusim dadi and mami and kongregeson. Dadi and mami laek for helpem son, bat tufala no savve kontrolem wanem son bilong tufala disaedem. Iumi luksavve why tufala barava sorre tumas.

¹⁵ Wanem nao datfala dadi and mami bae duim? Waswe, bae tufala obeyim wanem Jehovah talem? Or waswe, bae tufala tingse hem fitim nomoa for tufala gohed story witim son bilong tufala wea disfellowship and talem excuse hao olketa storyim important samting long famili? Taem dadi and mami mekem disison, tufala mas tingim wanem Jehovah laekem tufala for duim. Jehovah laekem organization bilong hem for klin dastawe hem sei for “aotem man wea duim rabis samting from kongregeson.” Hem laekem man wea duim nogud samting for changem wei bilong hem and for kam bak long kongregeson. Wanem nao olketa Christian dadi and mami savve duim for showimaot olketa laekem sem samting olsem Jehovah?

16, 17. Wanem nao iumi lanem from example bilong Aaron?

¹⁶ Aaron wea hem brata bilong Moses, kasem hard taem from samting wea tufala son bilong hem Nadab and Abihu duim. From tufala son hia mekem sakrifaes wea Jehovah no hapi long hem, Jehovah mekem fire kam daon from heven and killim tufala dae. Tingim wei wea Aaron feel sorre tumas long samting wea happen. Hem no savve story moa witim tufala son bilong hem bikos tufala dae. Bat nara samting kamap wea mekem hem no isi for Aaron and famili bilong hem. Moses talem olketa Jehovah no laekem olketa for showimaot olketa sorre. Moses sei: “No mekem hair bilong iufala for olobaot or brekem kaleko bilong iufala, nogud [Jehovah] hem kros long evriwan and killim iufala dae.” (Lev. 10:1-6) Wanem nao iumi lanem? Iumi mas lovem Jehovah winim olketa long famili wea no faithful long hem.

¹⁷ Distaem Jehovah no killim dae stretawe olketa wea no obeyim olketa law bilong hem. Hem showimaot love and givim chance long olketa for repent from nogud samting wea olketa duim. Bat hao nao bae Jehovah feel sapos olketa dadi and mami no obeyim law bilong hem and tingse olketa garem staka reason for story witim pikinini bilong olketa wea disfellowship?

18, 19. Olketa wanem blessing nao famili bae kasem sapos olketa gohed faithful long Jehovah?

¹⁸ Staka wea disfellowship bifor sei olketa kam bak long kongregeson bikos famili and olketa fren gohed faithful long Jehovah and no story witim olketa. Olsem example, wanfala young wan talem olketa elder samting wea mekem hem changem laef bilong hem nao hem wanem brata bilong hem duim. Taem hem disfellowship, brata bilong hem gohed faithful long Jehovah and followim arrangement bilong Jehovah. Datwan mekem hem for laek kam bak long kongregeson.

¹⁹ So wanem nao iumi need for duim? Iumi mas obeyim Jehovah long evri samting. From iumi no perfect maet samfala taem hem no isi. Bat iumi mas bilivim wanem Jehovah talem hem best samting for iumi duim.

“Toktok Bilong God Hem Laef”

20. Wanem nao tufala wei wea iumi savve minim Hebrews 4:12? (Lukim footnote.)

²⁰ Taem Paul sei “toktok bilong God hem laef” hem no story abaotem Bible bikos olketa nara verse long datfala chapter showimaot Paul story abaotem olketa promis bilong God.c Paul sei olketa promis bilong God evritaem kamap tru. Jehovah sei olsem abaotem olketa promis bilong hem: “Mi no talem samting nating bat bae mi duim samting wea mi laekem, and samting wea mi talem hem nao samting wea bae happen.” (Isa. 55:11) Sapos God no mekem olketa promis bilong hem kamap tru long taem wea iumi laekem, iumi mas patient. Iumi savve Jehovah gohed waka for mekem plan bilong hem kamap tru.​—John 5:17.

21. Long wanem wei nao Hebrews 4:12 savve helpem olketa olo for gohed worshipim Jehovah?

²¹ Staka long “big crowd” worshipim Jehovah for plande year finis. (Rev. 7:9) Olketa tingse end bae kam taem olketa young yet. Nomata olsem, olketa gohed for duim best bilong olketa for worshipim Jehovah. (Ps. 92:14) Olketa savve “toktok bilong God hem laef” and Jehovah bae mekem olketa promis bilong hem kamap tru. (Heb. 4:12) Olketa savve Jehovah gohed waka for mekem plan bilong hem for earth and olketa man kamap tru. From plan bilong God barava important long hem, God hem hapi taem iumi duim samting wea showimaot iumi tinghae long datwan. Long mek-seven day bilong Jehovah for rest, no eni samting bae stopem plan bilong hem for kamap tru. Hem savve pipol bilong hem bae gohed waka tugeta for mekem plan bilong hem kamap tru. So waswe, iu rest long day bilong God for rest?

[Olketa Footnote]

Waswe, Iu Tingim Yet?

• Wanem nao iumi mas duim for rest long day bilong God for rest?

• Taem iumi minim wanem God laekem iumi for duim, wanem nao iumi savve duim for mekem hem hapi?

• Olketa wanem kaen samting wea happen nao savve mekem hem no isi for obeyim Jehovah, bat why nao hem barava important for obeyim hem?

• Wanem nao tufala wei wea iumi savve minim Hebrews 4:12?

[Piksa long page 31]

Dadi and mami savve sorre tumas!