Olketa Idea for Famili Worship and Study Seleva
START long 2009, change kamap long olketa meeting bilong evri kongregeson bilong Olketa Jehovah’s Witness. Tufala meeting wea savve kamap long midol week olketa joinim for kamap long wanfala day. Governing Body encouragem evriwan for iusim datfala evening wea no eni meeting kamap for duim Famili Worship or study seleva. Waswe, iu mekius long datfala niu arrangement? Waswe, iu kasem gud samting from datwan?
Maet samfala no savve wanem for studyim long taem bilong Famili Worship. Governing Body no markem wanem famili mas duim long Famili Worship. From evri famili no semsem, hem stret for famili hed or man wanwan disaedem wanem for studyim long datfala taem.
Samfala prepare for olketa meeting long taem bilong Famili Worship, bat iumi savve duim samfala difren samting tu. Samfala readim story long Bible. Bihaen olketa storyim datwan olketa actim mekem olketa young wan kasem gud samting. Wei for duim Famili Worship hem no minim for evritaem askem olketa kwestin olsem long taem bilong meeting. Wei wea evriwan feel free for story savve mekem olketa talemaot tingting and idea bilong olketa. Wei for duim olsem savve mekem evriwan for enjoyim Famili Worship.
Wanfala dadi wea garem thrifala pikinini sei: “Staka taem mifala savve storyim samting wea mifala lanem long Bible reading. Each wan long mifala readim olketa chapter long Bible firstaem. Olketa pikinini chusim wanem olketa interest long hem and duim research long datwan and bihaen olketa storyim wanem nao olketa lanem. Michael [wea 7 year], bae evritaem drawim wanfala piksa or raetem wanfala paragraf. David [wea 13 year] and Kaitlyn [wea 15 year] savve raetem story bilong tufala seleva abaotem wanem olketa readim. Olsem example, mifala readim story abaotem Joseph taem hem minim dream bilong tufala slave bilong Pharaoh. Kaitlyn hem raetem datfala story olsem hem wanfala prisoner wea lukim evri samting wea happen.”—Gen., chap. 40
Hem tru, evri famili no semsem. Samting wea samfala duim for Famili Worship or study seleva maet difren from wanem narawan duim. Samfala idea stap long box wea iumi savve iusim long taem bilong Famili Worship or study seleva. Maet iu tu garem samfala nara idea.
[Box/Piksa long page 6, 7]
For famili wea garem teenager:
• Readim and storyim Questions Young People Ask—Answers That Work.
• Tingim sapos iu stap long taem bilong pipol bifor. (Lukim Wastaoa, May 15, 1996, page 14, paragraf 17-18.)
• Storyim olketa bigfala goal and smol goal.
• Samfala taem hem gud for lukim and storyim olketa video bilong organization.
• Storyim article long Wastaoa, “For Young Pipol.”
For hasband and waef wea no garem pikinini:
• Storyim chapter 1, 3, 11 go kasem 16 long buk Secret for Kasem Hapi Famili.
• Duim research long olketa point from Bible reading and storyim.
• Prepare for Kongregeson Bible Study or Wastaoa Study.
• Storyim olketa difren wei for iutufala savve duim moa samting long ministry.
For olketa wea singol or wea olketa seleva nomoa long truth:
• Studyim olketa niu buk wea iumi kasem long distrik convention.
• Readim niu and old Yearbook.
• Duim research long olketa kwestin wea pipol long territory savve askem.
• Preparem wanem for storyim long ministry.
For famili wea garem young pikinini:
• Actim olketa story long Bible.
• Pleim olketa game wea stap long page 30 and 31 long Awake! Magasin.
• Duim samting wea bae mekem pikinini tingting. (Lukim “Famili Bae Kasem Gud Samting!” long Wastaoa, February 15, 2011, page 11.)
• Storyim article long Wastaoa, “Lanem Pikinini Bilong Iu.”