Waswe, Olketa Laea Long Iu?

TAEM iu faendaot samwan wea iu trustim hem laea long iu, datwan mekem iu feel nogud tumas. Maet iu feel shame, kros, and iu barava no trustim hem nao. Laea savve barava spoelem tufala wea fren gud and olketa wea marit. Pipol savve lusim staka million dollar bikos samwan laea long olketa.

Tingim sapos iu faendaot bigman long church bilong iu teachim samting wea no tru abaotem God. Sapos iu man wea lotu gud, bae iu barava feel nogud long datwan. Hem nao feeling bilong tufala wea kaen samting olsem happen long tufala:

● “Mi feel olsem church barava laea long mi and mi no savve trustim church nao.”—DEANNE.

● “Mi kros tumas. Mi feel olsem olketa trikim mi. Evri goal and hope bilong mi hem iusles nomoa.”—LUIS.

Maet iu tingse hem hard for eniwan laea long iu abaotem God. Maet samwan wea iu trustim olsem parents, priest, pastor or fren bilong iu nao teachim iu abaotem God. Maet iu bilivim wanfala samting for full laef bilong iu. Bat nomata staka pipol bilivim wanfala samting datwan no minim hem tru, iaman? Franklin Roosevelt wea president bilong America bifor, hem luksavve long diswan. Hem sei: “Nomata pipol talem olowe samting wea no tru, datwan no changem datwan for kamap tru.”

Wanem nao bae mekem iu luksavve sapos samwan hem laea long iu? Wantaem Jesus hem prea olsem long God: ‘Toktok bilong iu hem tru.’ (John 17:17) Tru tumas, Bible helpem iumi for luksavve long tru samting and samting wea no tru.

Olketa next article bae storyim faevfala samting wea pipol talem abaotem God wea no tru. Hem bae storyim tu gud samting wea iu savve kasem taem iu savve long tru samting abaotem God.