Helpem Olketa Man Fren Gud Witim God

“Start long disfala taem, bae iu fishing for kasem pipol.”—LUKE 5:10.

1, 2. (a) Wanem nao staka man duim taem olketa herem Jesus preach? (b) Wanem nao bae iumi storyim long disfala study?

JESUS and olketa disaepol barava busy for preach long Galilee. Long wanfala day, olketa go insaed boat and go long kwaet ples wea no eniwan stap. Bat staka pipol go bihaenem olketa. Evriwan wea kam hem “samting olsem 5,000 man, . . . witim olketa woman and pikinini tu.” (Matt. 14:21) Long narataem, staka pipol kam long Jesus bikos olketa laek for lisin long wanem hem teachim and for hem healim olketa. Bible sei “samting olsem 4,000 man, . . . witim olketa woman and pikinini tu” kam long hem. (Matt. 15:38) Staka man nao kam long Jesus and laek for lane abaotem wanem hem teachim. Jesus luksavve staka pipol moa bae acceptim truth bikos bihaen hem duim mirakol for fulimap net bilong olketa disaepol witim staka fish, hem sei: “Start long disfala taem, bae iu fishing for kasem pipol.” (Luke 5:10) Jesus comparem preaching waka witim waka for fishing. Hem minim olketa disaepol bae faendem pipol wea interest long truth. Hem no olketa woman nomoa bat staka man tu.

² Distaem tu staka man laek for herem message wea iumi preachim. Olketa hapi for studyim Bible. (Matt. 5:3) Bat samfala man wea start for study olketa no gohed. Wanem nao iumi savve duim for helpem olketa? Taem Jesus duim ministry, hem preach long olketa man and woman long sem wei. Bat hem storyim samfala samting wea olketa man savve wari abaotem. Long disfala study, bae iumi storyim thrifala samting wea olketa man savve warim and tingim. Olketa savve wari abaotem selen, hao olketa narawan ting long olketa, and samfala tingse olketa no fit for duim sem samting olsem olketa narawan. Bae iumi lanem wanem Jesus duim for helpem olketa man and hao iumi savve followim example bilong hem.

Wari Abaotem Selen

3, 4. (a) Long tingting bilong staka man, wanem nao important long olketa? (b) Why nao samfala man waka hard for kasem selen and gudfala waka winim wei for acceptim truth?

³ Wanfala man wea teachim law sei long Jesus: “Teacher, nomata long eni ples wea iu bae go long hem, mi bae followim iu.” Bat Jesus sei long hem: “Son bilong man no garem eni ples bilong hemseleva wea hem savve sleep long hem.” Bible no storyim sapos datfala man hem followim Jesus. Maet datfala man wari abaotem wea nao bae hem stap or wanem nao bae hem kaikaim.—Matt. 8:19, 20.

⁴ Staka man tingse hem important for garem selen and gudfala waka winim wei for studyim Bible and obeyim God. Olketa tingse for go long university and garem waka wea mekem olketa tekem big pei nao hem important. Olketa savve selen hem samting wea olketa needim evriday. Olketa tingse selen and gudfala waka bae helpem olketa winim wei for studyim Bible and fren gud witim God. Maet olketa interest long Bible, bat “olketa samting long laef wea man savve wari abaotem, witim riches wea savve switim man” hem mekem olketa no gohed lane abaotem God and no obeyim hem. (Mark 4:18, 19) Bat tingim wanem Jesus duim for helpem olketa disaepol luksavve long samting wea important.

5, 6. Wanem nao mekem Andrew, Peter, James, and John luksavve preaching waka hem barava important?

⁵ Tufala man for fishing nao hem Andrew and brata bilong hem Simon Peter. Tufala waka witim John, James, and dadi bilong tufala Zebedee. Andrew and Simon Peter garem gudfala bisnis, so olketa garem olketa nara wakaman tu. (Mark 1:16-20) Taem Andrew and John herem wanem John Baptaesa talem abaotem Jesus, olketa luksavve Jesus nao Messiah. Andrew go storyim nius long brata bilong hem Simon Peter, and maet John tu go talem brata bilong hem James. (John 1:29, 35-41) Long olketa month bihaen, Andrew, Peter, James, and John go witim Jesus taem hem preach long Galilee, Judea, and Samaria. Then fofala go bak long fishing bisnis bilong olketa. Olketa interest long wanem Jesus teachim, bat long datfala taem olketa no ting long preaching waka olsem important samting for duim.

⁶ Bihaen datwan, Jesus askem Peter and Andrew for followim hem and for go “fishing for kasem pipol.” Wanem nao tufala duim? “Semtaem nomoa, tufala lusim olketa net hia and followim hem nao.” James and John tu duim sem samting. Bible sei: “Semtaem nomoa, tufala lusim dadi insaed long boat and go followim hem.” (Matt. 4:18-22) Wanem nao mekem fofala hia for laek duim full-taem ministry? Waswe, hem samting wea seknomoa olketa disaed for duim? Nomoa. Olketa go witim Jesus for samfala month finis and herem wanem hem teachim. Olketa lukim Jesus duim olketa mirakol, strong for duim stret samting, and hao pipol barava interest long wanem hem teachim. Samting wea fofala hia lanem strongim faith bilong olketa and olketa barava trustim Jehovah.

7. Wanem nao iumi savve duim for helpem olketa Bible study trustim Jehovah?

⁷ Wanem nao iumi savve duim for followim Jesus and for helpem olketa Bible study for trustim Jehovah? (Prov. 3:5, 6) Iumi savve helpem olketa taem iumi teachim olketa. Taem iumi study, iumi savve storyim hao Jehovah promis for blessim iumi sapos Kingdom nao first samting long laef. (Readim Malachi 3:10; Matthew 6:33.) Iumi savve showim olketa scripture wea pruvim Jehovah evritaem lukaftarem pipol bilong hem. Bat iumi mas tingim hao olketa Bible study savve lane from example bilong iumi tu. Taem iumi storyim hao Jehovah helpem iumi, datwan savve helpem olketa for trustim Jehovah. Iumi savve storyim tu olketa naesfala experience long olketa buk bilong iumi.a

8. (a) Why nao hem important for Bible study bilong iumi trustim Jehovah? (b) Wanem nao iumi savve duim for helpem Bible study luksavve Jehovah hem kaen tumas?

⁸ Taem Bible study bilong iumi readim and herem story hao Jehovah blessim pipol bilong hem, datwan bae strongim faith bilong hem. Bat hem tu need for lukim long laef bilong hemseleva hao Jehovah blessim hem. Psalm 34:8 sei: “Jehovah hem kaen tumas. Traem best bilong iufala for trustim hem and bae iufala luksavve diswan hem tru. Olketa wea trustim hem for lukaftarem olketa, olketa nao hapi.” Wanem nao iumi savve duim for helpem Bible study luksavve Jehovah hem kaen tumas? Tingim sapos hem wari tumas abaotem selen, or hem trae for lusim smoke, wei for gambol, or drink tumas. (Prov. 23:20, 21; 2 Cor. 7:1; 1 Tim. 6:10) Iumi savve lanem hem for prea long Jehovah for helpem hem. Taem hem lukim gud samting wea hem kasem, hem bae luksavve Jehovah hem kaen tumas. Iumi savve encouragem hem for duim samting for Jehovah firstaem. Iumi savve helpem hem for luksavve hem need for studyim Bible evri week, prepare for olketa meeting, and go evritaem long meeting. Taem hem lukim wei wea Jehovah blessim hem, datwan bae strongim faith bilong hem and bae hem no wari tumas abaotem olketa nara samting olsem selen.

Sapos Man Warim Hao Olketa Narawan Ting Long Hem

9, 10. (a) Why nao Nicodemus and Joseph no talem olketa narawan tufala disaepol bilong Jesus? (b) Why nao samfala man distaem fraet for followim Jesus?

⁹ Samfala man warim hao olketa narawan ting long olketa, so olketa fraet for followim Jesus. Tingim Nicodemus and Joseph wea hem man long Arimathea. From tufala fraetem olketa Jew, tufala no talem olketa narawan tufala disaepol bilong Jesus. (John 3:1, 2; 19:38) Tufala fraet bikos olketa bigman bilong religion barava heitim Jesus. Olketa sei eniwan wea biliv long Jesus bae olketa aotem from sinagog.—John 9:22.

¹⁰ Long samfala ples, sapos man laek lane abaotem Bible, God, or religion, maet olketa fren, famili, or wakfren tok spoelem or againstim hem. Long olketa nara ples, pipol savve killim man dae sapos hem laek changem religion bilong hem. Samfala wea interest long Bible hem olketa man wea joinim army, olketa bigman long gavman, and chief long vilij. Bat taem olketa storyim religion, pipol savve tok spoelem olketa. Olsem example, wanfala man long Germany sei: “Wanem iufala olketa Witness talem abaotem Bible hem tru. Bat sapos mi joinim iufala olketa Witness, kwiktaem nomoa evriwan bae savve. Olketa long waka ples, neiba, and pipol wea savve long mi and famili bilong mi bae tok spoelem mi. Mi hard for deal witim datwan.”

11. Wanem nao Jesus duim for helpem olketa disaepol for no warim hao olketa narawan ting long olketa?

¹¹ Nomata olketa disaepol bilong Jesus no fraet for duim samting, samfala taem olketa warim hao olketa narawan ting long olketa. (Mark 14:50, 66-72) Wanem nao Jesus duim for helpem olketa disaepol? Jesus helpem olketa disaepol for redi for eni hard taem wea olketa bae kasem. Hem sei: “Iufala bae hapi nomata pipol heitim iufala, aotem iufala from grup bilong olketa, tok daonem iufala and talem samting wea mekem pipol ting nogud long iufala. Olketa bae duim diswan bikos iufala olketa disaepol bilong Son bilong man.” (Luke 6:22) Jesus sei pipol bae againstim olketa wea followim hem. Hem sei datwan bae happen bikos olketa nao ‘disaepol bilong hem.’ Bat Jesus sei God bae lukaftarem olketa sapos olketa askem God for helpem and strongim olketa. (Luke 12:4-12) Jesus encouragem olketa wea laek for followim hem for fren witim olketa disaepol bilong hem.—Mark 10:29, 30.

12. Wanem nao iumi savve duim for helpem Bible study no fraetem narawan?

¹² Iumi tu need for helpem Bible study for no fraetem narawan. Wanfala samting wea iumi savve duim, hem for helpem datfala man savve wanem for duim taem pipol againstim hem. (John 15:19) Olsem example, maet pipol long waka ples or olketa narawan no agree long wanem hem bilivim. Maet olketa askem kwestin abaotem biliv bilong hem. Iumi savve helpem datfala man for redyim olketa ansa from Bible wea hem isi for minim. Iumi savve fren witim hem and helpem hem for savve long olketa narawan long kongregeson. Maet hem meetim samfala wea hem savve fren witim olketa wea kasem sem samting olsem hem. Hem barava important for lanem Bible study for prea evritaem from heart. Datwan bae helpem hem for fren gud witim Jehovah and no fraetem pipol bikos Jehovah nao olsem sef ples for haed.—Readim Psalm 94:21-23; James 4:8.

Sapos Man Tingse Hem No Fit for Duim Sem Samting Olsem Narawan

13. Wanem nao savve mekem brata hol bak for storyim truth?

¹³ Maet samfala man wea studyim Bible tingse olketa no savve duim sem samting wea olketa narawan long kongregeson duim. Maet olketa no savve read gud or fraet for talemaot tingting bilong olketa. Maet olketa shame and no laek for storyim biliv bilong olketa front long staka pipol. So maet hem no isi for olketa duim study seleva, givim koment long meeting, or preach. Wanfala brata sei taem hem young hem no isi for hem preach. Hem sei taem hem go long haos hem laea nomoa for ringim belo long door and isisi wakabaot go bak mekem no eniwan herem or lukim hem. Hem sei: “Taem mi tingim nomoa for go preach, mi feel sik nao.”

14. Why nao olketa disaepol no savve raosem demon from wanfala boy?

¹⁴ Taem olketa disaepol no savve raosem demon from wanfala boy, maet olketa tingse hem hard for olketa duim wanem Jesus laekem. Dadi bilong datfala boy kam long Jesus and sei: “Lord, plis iu showimaot mercy long son bilong mi, bikos hem garem sik epilepsy. Plande taem hem savve foldaon insaed long fire or wata. Mi tekem hem kam long olketa disaepol bilong iu, bat olketa no savve healim hem.” Jesus raosem datfala demon and boy hia hem gud bak nao. Then olketa disaepol kam long Jesus and sei: “Hao nao mifala no savve raosem datfala demon?” Jesus sei long olketa: “Bikos faith bilong iufala hem smol tumas ia. Mi talem iufala tru samting: Nomata sapos faith bilong iufala hem smol olsem wanfala seed bilong mustard tree nomoa, iufala bae sei long disfala maunten, ‘Iu muv go long narasaed,’ and bae hem muv nao, and no eni samting bae hard for iufala nao ia.” (Matt. 17:14-20) Man wea garem faith savve duim olketa samting wea maet hem tingse hem hard for duim. Bat sapos man hem depend long savve bilong hemseleva bae hem no kasem eni gud samting. And datwan bae mekem hem feel wikdaon and tingse hem no fit for worshipim Jehovah.

15, 16. Wanem nao iumi savve duim for helpem Bible study sapos hem tingse hem no fit for worshipim Jehovah?

¹⁵ Sapos Bible study tingse hem no fit for worshipim Jehovah, iumi savve encouragem hem for trustim Jehovah and no depend long savve bilong hemseleva. Peter sei: “Iufala mas hambol for stap anda long God wea hem nambawan and garem bigfala paoa, mekem gogo, bae hem mekhae long iufala. Putim evri wari bilong iufala long hand bilong hem.” (1 Pet. 5:6, 7) Tru tumas, iumi need for helpem Bible study for lovem Jehovah and depend long hem. Diswan minim hem mas tinghae long wanem hem lanem long Bible and for showimaot olketa gudfala wei wea “spirit mekem man for garem.” (Gal. 5:22, 23) Hem mas tinghae long wei for prea. (Phil. 4:6, 7) Hem need for luksavve God nao bae strongim and helpem hem for duim eni assignment or taem hem kasem hard taem.—Readim 2 Timothy 1:7, 8.

¹⁶ Maet iumi need for helpem samfala Bible study bikos olketa no savve read gud or fraet for story. Maet samfala tingse olketa no fit for worshipim Jehovah bikos olketa duim nogud samting bifor. Iumi savve patient and showimaot love taem iumi helpem olketa. Jesus sei: “Pipol wea sik nao need for go lukim doctor, no olketa wea strong.”—Matt. 9:12.

Helpem Plande Man Moa for Lane Abaotem Jehovah

17, 18. (a) Wanem nao iumi savve duim mekem iumi story witim olketa man long territory? (b) Wanem nao bae iumi storyim long next study?

¹⁷ Iumi laekem staka man moa for acceptim message long Bible bikos datwan nao savve mekem iumi hapi. (2 Tim. 3:16, 17) So wanem nao iumi savve duim mekem iumi story witim olketa man long territory? Iumi savve preach long evening, long Saturday and Sunday aftanun, or long taem bilong holiday. Staka man savve stap long haos long taem olsem. Taem iumi preach iumi savve ask for story witim dadi long haos. Sapos fitim, iumi savve preach long olketa man wea iumi waka witim. Samfala sista long kongregeson maritim olketa man wea no Witness. Iumi savve storyim olketa samting wea maet mekem olketa man hia for interest long truth.

¹⁸ Iumi laek for helpem staka pipol for fren witim Jehovah. Olketa wea laek for savve long truth bae lisin long message wea iumi preachim. Iumi mas patient and gohed for helpem evriwan wea laek savve long truth. Bat wanem nao savve helpem olketa brata wea baptaes finis for laek duim waka long kongregeson? Bae iumi storyim diswan long next study.

[Footnote]

Wanem Nao Ansa Bilong Iu?

• Wanem nao iumi savve duim for helpem olketa man luksavve long samting wea barava important?

• Wanem nao iumi savve duim for helpem Bible study no warim hao olketa narawan ting long hem?

• Wanem nao iumi savve duim for helpem Bible study sapos hem tingse hem no fit for worshipim Jehovah?

[Piksa long page 25]

Waswe, iu traem best for storyim gud nius long olketa man?

[Piksa long page 26]

Wanem nao iu savve duim for helpem Bible study for redi taem pipol againstim hem?