Trainim Olketa Narawan for Duim Waka Long Kongregeson
“Student wea teacher barava lanem hem gud, bae hem olsem teacher bilong hem nao.”—LUKE 6:40.
1. Taem Jesus duim ministry, wanem nao hem duim for trainim narawan?
LASTFALA toktok wea aposol John raetem long Gospel bilong hem, hem sei: “Jesus duim staka nara samting tu wea sapos eniwan raetem evri samting hia long olketa scroll, ating full world bae no garem inaf spes fitim olketa scroll hia.” (John 21:25) Taem Jesus stap long earth hem barava waka hard for duim ministry. Bifor hem go bak long heven, hem waka hard for faendem and trainim olketa man for gohed duim datfala waka. Long 33 C.E., hem trainim smolfala grup nomoa. Bat kwiktaem nomoa staka thousand pipol joinim olketa disaepol for preach.—Acts 2:41, 42; 4:4; 6:7.
2, 3. (a) Why nao iumi needim staka brata moa for duim waka long kongregeson? (b) Wanem nao bae iumi storyim long disfala study?
2 Distaem winim 7 million brata and sista preachim gud nius. Iumi garem winim 100,000 kongregeson long world. Datwan showimaot iumi needim staka brata moa for duim waka long kongregeson. Olsem example, iumi needim staka elder. Taem olketa brata duim samting wea showimaot olketa laek for duim waka long kongregeson, ‘gud samting nao olketa laek for duim.’—1 Tim. 3:1.
3 Bat bifor wanfala brata savve duim waka long kongregeson, hem need for duim samfala samting firstaem. Nomata man skul gud and savve hao for duim staka samting, datwan no minim hem fit for duim olketa waka long kongregeson. Man wea laek duim waka long kongregeson mas duim olketa samting wea showimaot hem followim wanem Bible talem. Wanem nao iumi savve duim for helpem olketa brata for kamap strongfala Christian and fit for duim datfala waka? Jesus sei: “Student wea teacher barava lanem hem gud, bae hem olsem teacher bilong hem nao.” (Luke 6:40) Long disfala study, bae iumi storyim samfala samting wea Jesus duim for trainim olketa disaepol and wanem iumi savve lanem from datwan.
“Mi Kolem Iufala Olketa Fren”
4. Wanem nao Jesus duim for fren gud witim olketa disaepol?
4 Jesus hem fren gud witim olketa disaepol and no tingse hem gud winim olketa. Hem trustim olketa and laek stap witim olketa. Hem sei: “Mi talem iufala evri samting wea mi herem from Dadi bilong mi.” (Readim John 15:15.) Olketa disaepol mas hapi tumas taem Jesus talem olketa ‘wanem nao saen wea bae showimaot hem stap and world hem gogo for finis.’ (Matt. 24:3, 4) Hem laekem olketa for savve long tingting and feeling bilong hem. Olsem example, bifor olketa arrestim Jesus, Jesus tekem Peter, James, and John long garden bilong Gethsemane. Jesus prea bikos hem wari tumas. Maet thrifala aposol no herem wanem Jesus talem bat olketa luksavve hem barava wari. (Mark 14:33-38) Long narataem, Jesus strongim olketa taem olketa lukim lukluk bilong hem change. (Mark 9:2-8; 2 Pet. 1:16-18) Wei wea Jesus fren gud witim olketa disaepol strongim olketa for gohed duim important waka wea hem talem olketa for duim.
5. Wanem nao olketa elder savve duim for helpem narawan?
5 Olketa elder distaem tu followim example bilong Jesus and laek for helpem and fren gud witim olketa brata and sista. Olketa showimaot love and tingim olketa. Nomata olketa elder no savve storyim samfala samting wea happen long kongregeson, olketa hapi for storyim wanem olketa lanem long Bible. Olketa elder trustim olketa brata. Olketa no tingse olketa gud winim olketa ministerial servant wea young. Olketa luksavve olketa ministerial servant lovem Jehovah and savve gohed for duim gudfala waka long kongregeson.
“Mi Showim Wei for Iufala Followim”
6, 7. Wanem example nao Jesus showimaot for olketa disaepol and hao nao datwan helpem olketa?
6 Nomata olketa disaepol tinghae long olketa spiritual samting, samfala taem tingting bilong olketa hem followim kastom bilong olketa. (Matt. 19:9, 10; Luke 9:46-48; John 4:27) Bat Jesus no kros or tok spoelem olketa. Hem no talem olketa for duim samting wea hard for olketa duim. And hem no talem olketa for duim samting wea hemseleva les for duim. Jesus showimaot gudfala example for olketa followim.—Readim John 13:15.
7 Wanem example nao Jesus showimaot? (1 Pet. 2:21) Jesus garem simpol laef mekem hem savve duim samting for helpem narawan. (Luke 9:58) Hem teachim pipol wanem hem lanem from Jehovah and no tingting bilong hemseleva. (John 5:19; 17:14, 17) Hem kaen long pipol and olketa no fraet for story witim hem. Wanem hem duim showimaot hem lovem pipol. (Matt. 19:13-15; John 15:12) Example bilong Jesus barava helpem olketa aposol. Olsem example, James no fraet bat hem faithful for worshipim God go kasem taem wea olketa soldia killim hem dae. (Acts 12:1, 2) John tu hem faithful for winim 60 year.—Rev. 1:1, 2, 9.
8. Hao nao olketa elder savve showimaot gudfala example for olketa young brata and olketa narawan?
8 Olketa young brata savve lanem gud samting from wei wea olketa elder hambol, showimaot love, and iusim taem and strong bilong olketa for helpem narawan. (1 Pet. 5:2, 3) Olketa elder luksavve gudfala example bilong olketa savve strongim faith bilong olketa nara brata. Olketa brata savve lanem gud samting from wei wea olketa elder teach long kongregeson, duim preaching waka, and wei wea olketa followim olketa Bible principle.—Heb. 13:7.
Jesus Talem Olketa Disaepol Wanem for Duim Taem Olketa Go Preach
9. Wanem nao showimaot Jesus trainim olketa disaepol for duim preaching waka?
9 Bihaen Jesus preach for tufala year, hem sendem 12-fala aposol for go preach tu. Bat bifor olketa go, hem talem olketa wanem for duim. (Matt. 10:5-14) Long narataem, bifor Jesus duim mirakol for feedim staka thousand pipol, hem talem olketa disaepol wanem for duim tu. Hem talem olketa for divaedem pipol hia long olketa difren grup mekem evriwan savve kasem kaikai. (Luke 9:12-17) Diswan showimaot Jesus trainim olketa disaepol taem hem talem stret wanem for olketa duim and hao for duim datfala samting. From Jesus trainim olketa aposol and olketa kasem holy spirit, datwan mekem olketa savve organizem preaching waka wea start long 33 C.E.
10, 11. Wanem nao olketa elder and narawan long kongregeson savve duim for trainim olketa brata?
10 Distaem tu iumi duim sem samting. Iumi teachim man taem hem start for studyim Bible. Maet iumi need for helpem hem for read gud. Bat iumi savve duim olketa nara samting tu for helpem hem. Taem hem start for kam long olketa meeting, bae hem kasem samfala training moa taem hem joinim Theocratic Ministry Skul, and taem hem kamap anbaptaes pablisa. Bihaen hem baptaes, olketa brata bae lanem hem for duim olketa nara samting. Olsem example, olketa savve lanem hem for repairim Kingdom Hall. And olketa elder savve helpem hem tu for savve wanem hem need for duim for kamap ministerial servant.
11 Taem wanfala brata wea baptaes kasem assignment from olketa elder for duim waka long kongregeson, olketa elder laek helpem hem for duim gud datfala waka. Olketa explainim hao for duim datfala waka and showim hem wanem for duim. Sapos hem no isi for brata duim datfala assignment, olketa elder no kwiktaem for sei hem no fit for duim datfala waka. Bat long kaenfala wei, olketa savve explainim moa wanem for duim and hao for duim datfala waka. Olketa elder hapi for helpem brata for duim waka bilong hem bikos olketa luksavve wei for helpem narawan long kongregeson bae mekem datfala brata hapi.—Acts 20:35.
“Man wea Lisin Long Kaonsel Hem Wise”
12. Why nao kaonsel wea Jesus givim helpem pipol?
12 Nara samting wea Jesus duim for trainim olketa disaepol hem for givim kaonsel wea olketa needim. Olsem example, taem James and John laekem fire for kam daon from skae for finisim pipol long Samaria from olketa no welkamim Jesus, Jesus tok strong long tufala. (Luke 9:52-55) Narataem, mami bilong James and John askem Jesus for mekem tufala boy bilong hem sidaon long raet saed and long left saed bilong Jesus taem hem rul long Kingdom. Bat Jesus luksavve tufala seleva nao laekem datwan. So hem sei: “Mi no garem paoa for disaedem hu nao bae sidaon long raet saed or long left saed bilong mi. Dadi bilong mi nao bae disaedem datwan.” (Matt. 20:20-23) Jesus evritaem givim kaonsel wea isi for pipol minim and wea helpem olketa. Evritaem hem givim kaonsel followim olketa Bible principle. Hem laekem olketa disaepol for ting raonem toktok bilong God and followim datwan. (Matt. 17:24-27) Jesus luksavve olketa disaepol no perfect and no fit for duim samfala samting. Hem lovem olketa dastawe hem givim kaonsel long olketa.—John 13:1.
13, 14. (a) Olketa elder need for givim kaonsel long hu? (b) Olketa wanem kaen samting nao maet olketa elder need for kaonselem brata long hem?
13 Evri brata wea laek for duim waka long kongregeson bae needim kaonsel and advaes from Bible. Proverbs 12:15 sei: “Man wea lisin long kaonsel hem wise.” Tingim samting wea kasem wanfala young brata. Firstaem hem tingse hem no fit for duim waka long kongregeson. Bat wanfala elder helpem hem for luksavve no eniwan savve duim waka long perfect wei.
14 Sapos olketa elder luksavve wanfala brata start for go rong, bae olketa duim samting kwiktaem for stretem hem. Olketa bae duim diswan long kaenfala wei bikos olketa laekem hem for duim samfala waka long kongregeson for helpem narawan. (Gal. 6:1) Samfala taem olketa elder need for givim kaonsel for helpem samwan changem wei bilong hem. Olsem example, maet olketa elder luksavve wanfala brata no evritaem duim best bilong hem long preaching waka. Olketa savve encouragem hem for ting raonem example bilong Jesus. Jesus waka hard for duim preaching waka and hem talem olketa disaepol for followim example bilong hem. (Matt. 28:19, 20; Luke 8:1) Maet wanfala brata tingse hem gud winim narawan. Olketa elder savve explainim hao Jesus teachim olketa disaepol for no garem tingting olsem. (Luke 22:24-27) Or maet wanfala brata no savve forgivim narawan. Olketa elder savve storyim tokpiksa abaotem wakaman wea no laek for forgivim narawan nomata olketa forgivim hem. (Matt. 18:21-35) Sapos olketa elder luksavve olketa need for givim kaonsel long samwan, olketa shud duim datwan kwiktaem.—Readim Proverbs 27:9.
“Trainim Iuseleva”
15. Wanem nao famili bilong wanfala brata savve duim for helpem hem duim waka long kongregeson?
15 Olketa elder waka hard for trainim olketa brata for duim waka long kongregeson, bat olketa narawan savve helpem olketa tu. Olsem example, famili bilong datfala brata savve helpem hem. Sapos brata hem elder, waef and olketa pikinini bilong hem savve sapotim hem. Olketa luksavve hem need for iusim samfala taem bilong hem for helpem olketa narawan. Brata wea elder hem hapi taem famili bilong hem willing for sapotim hem for duim waka long kongregeson. Iumi tinghae long olketa famili olsem.—Prov. 15:20; 31:10, 23.
16. (a) Wanem nao Galatians 6:5 mekhae long hem? (b) Wanem nao wanfala brata need for duim sapos hem laek kamap ministerial servant or elder?
16 Nomata olketa narawan savve helpem and sapotim wanfala brata, hemseleva nao mas duim samting for showimaot hem laek for duim waka long kongregeson. (Readim Galatians 6:5.) Nomata man no ministerial servant or elder, hem savve helpem olketa narawan and duim best bilong hem long preaching waka. Bat sapos hem laek for kamap ministerial servant or elder, hem mas traem best for kasem olketa mark wea stap long Bible. (1 Tim. 3:1-13; Titus 1:5-9; 1 Pet. 5:1-3) Hem shud ting raonem samfala samting wea hem need for duim mekem hem fit for duim datfala waka. Wanem nao bae helpem hem? Hem need for readim Bible evriday, duim study seleva, ting raonem wanem hem lanem, prea long Jehovah, and duim best bilong hem long preaching waka. Sapos hem duim olketa samting hia, hem showimaot hem followim kaonsel wea Paul givim long Timothy. Hem sei: “Garem goal for faithful long God and trainim iuseleva for kasem datwan.”—1 Tim. 4:7.
17, 18. Wanem nao wanfala brata savve duim sapos hem tingse hem no fit or no interest for duim waka long kongregeson?
17 Bat waswe sapos wanfala brata tingse hem no fit for kamap ministerial servant or elder? Hem gud for hem tingim wanem Jehovah and Jesus duim for helpem iumi. Jehovah promis for helpem iumi. (Ps. 68:19) So Jehovah savve helpem wanfala brata for duim waka long kongregeson. Sapos brata hem no ministerial servant or elder yet, hem gud for hem luksavve iumi needim staka brata moa for lukaftarem olketa kongregeson. Hem gud for hem askem Jehovah for holy spirit bikos datwan bae helpem hem for garem peace, kontrolem hemseleva, and no wari. (Luke 11:13; Gal. 5:22, 23) Iumi savve Jehovah bae blessim olketa brata wea willing for helpem narawan.
18 Maet wanfala brata no interest for duim waka long kongregeson. Wanem nao savve helpem hem? Aposol Paul sei: “Samting wea mekem God hapi nao hem for givim paoa long iufala mekem iufala savve laek duim samting and for iufala duim datwan.” (Phil. 2:13) God nao helpem and strongim man for laek duim waka long kongregeson and for duim wanem God laekem. (Phil. 4:13) Hem savve askem God for helpem hem duim stret samting tu.—Ps. 25:4, 5.
19. Toktok long Micah 5:5 helpem iumi for luksavve long wanem?
19 Jehovah bae blessim olketa elder wea waka hard for trainim narawan. Hem bae blessim olketa brata tu wea laek for duim waka long kongregeson. Bible sei Jehovah bae “markem sevenfala man for lukaftarem sheepsheep, and eitfala leader.” Diswan showimaot Jehovah bae mek sure iumi garem olketa brata for lukaftarem olketa kongregeson. (Mic. 5:5) Iumi hapi tumas for lukim staka brata kasem training and hambol for duim waka for helpem narawan long kongregeson. Diswan hem praisem Jehovah and mekem iumi kasem staka gud samting!
Wanem Nao Ansa Bilong Iu?
• Wanem nao samfala samting wea Jesus duim for trainim olketa disaepol?
• Hao nao olketa elder savve followim example bilong Jesus for helpem olketa brata duim waka long kongregeson?
• Wanem nao famili bilong wanfala brata savve duim for helpem hem duim waka long kongregeson?
• Wanem nao brata savve duim for showimaot hem laek for duim waka long kongregeson?
[Olketa Piksa long page 31]
Wanem nao iu savve duim for trainim Bible study bilong iu?
[Piksa long page 32]
Wanem nao brata savve duim for showimaot hem laek for duim waka long kongregeson?