Holy Spirit Leadim Olketa wea Faithful Bifor
“Jehovah, Lord bilong evri samting sendem mi, and hem sendem tu spirit bilong hem.”—ISA. 48:16.
1, 2. (a) Wanem nao mekem man for garem faith? (b) Wanem nao iumi lanem from example bilong olketa wea faithful bifor?
START long taem bilong Abel, staka nao showimaot faith. Nomata olsem, Bible sei: “No evriwan hem garem faith.” (2 Thess. 3:2) Wanem nao mekem man for garem faith, and wanem nao savve helpem hem gohed faithful? For garem faith man mas savve long Bible bikos Bible sei: “Bihaen man herem message nao hem savve garem faith.” (Rom. 10:17) Holy spirit nao mekem man for garem faith. (Gal. 5:22, 23) So iumi needim holy spirit for helpem iumi garem strongfala faith.
2 Faith hem samting wea iumi no born witim. Bible storyim olketa faithful man and woman bifor tu olketa “olsem iumi nomoa.” (Jas. 5:17) Olketa garem wik point and daotem samfala samting. Olketa feel olsem olketa no fit for duim samfala samting tu. Bat God givim holy spirit for strongim olketa taem olketa kasem hard taem. (Heb. 11:34) Bae iumi lane abaotem wei wea holy spirit helpem olketa bifor. Datwan bae strongim iumi for gohed faithful nomata iumi kasem hard taem.
Holy Spirit Strongim Moses
3-5. (a) Why nao iumi savve holy spirit helpem Moses? (b) Wanem nao iumi lanem from wei wea Jehovah givim holy spirit long Moses?
3 Moses “hem hambol winim evri nara man” wea stap long 1513 B.C.E. (Num. 12:3) Jehovah givim Moses bigfala waka for leadim olketa Israelite. Holy spirit helpem Moses for talem profesi, judge, raetem samfala Bible buk, leadim olketa Israelite and for duim olketa mirakol. (Readim Isaiah 63:11-14.) Bat wanfala taem Moses komplen and sei hem hard nao for leadim olketa Israelite. (Num. 11:14, 15) So Jehovah tekem “samfala paoa bilong holy spirit” from Moses, and hem givim long nara 70-fala man for helpem Moses. (Num. 11:16, 17) Nomata Moses tingse hem hard for duim datfala waka seleva, hem no luksavve Jehovah nao helpem hem. And Jehovah helpem 70-fala man hia tu.
4 Firstaem, Jehovah givim inaf holy spirit for helpem Moses duim datfala waka. Nomata Jehovah tekem samfala paoa bilong holy spirit from Moses and givim long 70-fala man hia, holy spirit gohed for helpem Moses duim waka bilong hem. So Moses and 70-fala man hia kasem holy spirit fitim waka wea each wan duim. Jehovah duim sem samting for iumi distaem tu. Hem givim staka blessing bikos hem “kaen tumas” and “no savve hol bak taem hem givim holy spirit.”—John 1:16; 3:34.
5 Waswe, iu kasem hard taem? Waswe, iu tingse iu garem staka waka tumas for duim? Waswe, iu mas waka hard bikos evri samting hem expensive and iu garem health problem, bat long semtaem iu traem best for provaedem need bilong famili and helpem olketa fren gud witim Jehovah? Waswe, iu garem bigfala waka long kongregeson? Nomata wanem samting nao kasem iu, Jehovah savve givim holy spirit for strongim iu.—Rom. 15:13.
Holy Spirit Helpem Bezalel
6-8. (a) Holy spirit helpem Bezalel and Oholiab for duim wanem? (b) Wanem nao showimaot holy spirit leadim Bezalel and Oholiab? (c) Long wanem wei nao example bilong Bezalel strongim iumi?
6 Tingim Bezalel. Hem tu stap laef long taem bilong Moses and God givim holy spirit for helpem hem. Example bilong hem bae helpem iumi for luksavve wei wea holy spirit savve leadim iumi. (Readim Exodus 35:30-35.) Jehovah chusim Bezalel for wakem olketa samting for tabernacle. Waswe, Bezalel savve hao for wakem olketa samting hia? Maet hem savve wakem samfala samting. Bat waka wea hem duim bifor hem for wakem olketa brik for olketa long Egypt. (Ex. 1:13, 14) So wanem nao bae helpem Bezalel for duim datfala waka nomata hem no isi? Jehovah “givim Bezalel spirit bilong Hem and wisdom, wei for minim samting, wei for savve hao for duim waka and for mekem olketa gudfala plan for wakem samting . . . and hem savve hao for duim plande narafala waka.” Jehovah givim holy spirit long Bezalel and Oholiab for helpem tufala savve hao for duim gud datfala waka. Luk olsem tufala lanem gud waka hia dastawe tufala fit for teachim narawan.
7 Holy spirit helpem Bezalel and Oholiab for duim gud datfala waka. Olketa samting wea tufala wakem stap longtaem, dastawe nomata 500 year bihaen pipol gohed for iusim yet. (2 Chron. 1:2-6) Staka pipol distaem wea savve hao for wakem samting laekem pipol for praisem olketa. Bat Bezalel and Oholiab no olsem. Tufala laekem pipol for praisem Jehovah.—Ex. 36:1, 2.
8 Maet iumi tu need for garem big savve for duim samfala waka. Maet iu duim building project, printing, organizem olketa convention, helpem olketa brata and sista taem disaster kasem olketa, or explainim wanem Bible talem abaotem blood long olketa doctor and olketa wea waka long hospital. Samfala taem, olketa wea skulim olketa waka hia nao savve duim olketa waka olsem. Bat staka taem, olketa wea no garem bigfala savve nao volunteer for duim olketa waka hia. Holy spirit nao helpem olketa for duim gud waka bilong olketa. Taem iu kasem eni assignment long organization bilong Jehovah, waswe, iu fraet for acceptim bikos iu tingse narawan nao fit for duim? Hem gud for tingim holy spirit bae helpem iu for duim datfala waka nomata iu garem lelebet savve nomoa.
Holy Spirit Helpem Joshua
9. (a) Wanem nao olketa Israelite mas duim bihaen olketa lusim Egypt? (b) Datwan mekem olketa Israelite for tingim wanem?
9 Holy spirit helpem nara faithful man wea stap laef long taem bilong Moses and Bezalel. No longtaem bihaen olketa Israelite lusim Egypt, olketa Amalekite attakim olketa. Datwan nao hem firstaem for olketa Israelite faet long war. (Ex. 13:17; 17:8) So olketa needim samwan for leadim olketa. Hu nao bae duim datwan?
10. Why nao Joshua and olketa Israelite winim datfala faet?
10 Jehovah chusim Joshua nomata hem no savve hao for faet and no enitaem hem leadim army. Bifor, hem wanfala slave wea wakem brik nomoa. Taem Joshua stap long wilderness, hem kolektem manna evriday. Grani bilong Joshua, Elishama, hem leader long tribe bilong Ephraim and hem leadim army wea garem 108,100 man. (Num. 2:18, 24; 1 Chron. 7:26, 27) Nomata olsem, Jehovah no talem Moses for chusim Elishama or son bilong hem Nun. Jehovah sei Joshua nao shud leadim army bilong Israel for winim enemy. Olketa Israelite faet for klosap full day. From Joshua obeyim God and hem letem holy spirit for leadim hem, datwan mekem olketa Israelite for winim faet.—Ex. 17:9-13.
11. Wanem nao iumi lanem from example bilong Joshua?
11 Bihaen Moses dae, Joshua nao leadim olketa Israelite. Jehovah “givim hem paoa wea mekem hem wise.” (Deut. 34:9) Nomata Joshua kasem holy spirit, datwan no mekem hem for talem profesi or duim olketa mirakol olsem Moses. Bat holy spirit helpem Joshua for leadim olketa Israelite for winim olketa long Canaan. Maet iumi feel olsem iumi no fit for duim samfala assignment long organization bilong Jehovah. Bat Jehovah bae helpem iumi olsem hem helpem Joshua, sapos iumi obey and letem holy spirit leadim iumi.—Josh. 1:7-9.
“Holy Spirit Helpem Gideon”
12-14. (a) Wanem nao iumi lanem from wei wea Gideon and 300 soldia winim big army bilong Midian? (b) Wanem nao Jehovah duim for strongim Gideon? (c) Hao nao Jehovah savve helpem iumi distaem?
12 Bihaen Joshua dae, Jehovah gohed for iusim holy spirit for strongim olketa wea faithful. Bible buk bilong Judges storyim staka pipol wea faithful “nomata olketa wik, olketa kamap strong.” (Heb. 11:34) God iusim holy spirit for helpem Gideon for faet for olketa Israelite. (Judg. 6:34) Army bilong Midian garem 135,000 soldia bat army bilong Gideon garem 32,000 soldia. Nomata olsem, Jehovah tingse namba bilong olketa soldia bilong Israel hem staka yet, so hem talem Gideon tufala taem for sendem samfala soldia go bak. Gogo army bilong Israel hem garem 300 soldia nomoa. (Judg. 7:2-8; 8:10) Jehovah hapi hao 300 soldia nomoa go faet. Sapos olketa Israelite win bae olketa luksavve Jehovah nao helpem olketa.
13 Gideon and army bilong hem redi for go faet nao. Tingim diswan. Sapos iu joinim army bilong Gideon, waswe, bae iu warim wanem nao bae happen? Or waswe, bae iu feel sef bikos olketa soldia wea fraet and wea no lukaot gud go bak? Iumi savve Gideon trustim Jehovah, bikos hem duim wanem Jehovah laekem! (Readim Judges 7:9-14.) Jehovah no kros taem Gideon ask for wanfala saen for showimaot hem bae helpem Gideon. (Judg. 6:36-40) Bat Jehovah strongim faith bilong Gideon.
14 Jehovah savve sevem pipol bilong hem from eni hard samting. Hem savve iusim tu olketa wea wik or wea tingse olketa no fit for duim datwan. Samfala taem, maet iumi feel olsem pipol againstim iumi or iumi no wei nao. Iumi no expectim God for givim iumi saen olsem hem duim for Gideon. Bat Jehovah iusim Bible for leadim and helpem iumi. Taem iumi go long olketa kongregeson meeting, datwan savve strongim iumi tu. (Rom. 8:31, 32) Olketa promis bilong Jehovah strongim faith bilong iumi and iumi trustim hem for helpem iumi.
“Spirit Bilong Jehovah Kam Long Jephthah”
15, 16. (a) Why nao dota bilong Jephthah willing for go waka long tabernacle? (b) Wanem nao olketa dadi and mami savve lanem from diswan?
15 Tingim narawan wea Jehovah iusim holy spirit for leadim hem. Taem olketa Israelite faet againstim olketa long Ammon, spirit bilong Jehovah “kam long Jephthah.” Jephthah laek for winim datfala faet mekem pipol praisem Jehovah, so hem mekem wanfala promis. Jephthah mas duim wanfala hard samting for keepim datfala promis. Hem promis hao sapos Jehovah helpem hem for winim olketa long Ammon, taem hem go bak long haos hem bae givim long Jehovah first man wea kamaot for meetim hem. Bihaen Jephthah winim faet, dota bilong hem nao first wan for kam meetim hem. (Judg. 11:29-31, 34) Waswe, Jephthah sapraes long datwan? Maet nomoa. Hem garem wanfala pikinini nomoa. Jephthah keepim datfala promis and givim dota bilong hem for waka long tabernacle bilong Jehovah long Shiloh. From dota bilong Jephthah faithful for worshipim Jehovah, hem willing for duim samting wea dadi bilong hem promisim. (Readim Judges 11:36.) Holy spirit nao strongim Jephthah and dota bilong hem.
16 Why nao dota bilong Jephthah willing for go waka long tabernacle nomata hem no isi? Hem garem strongfala faith bikos dadi bilong hem strong for worshipim Jehovah. Pikinini lukluk long example bilong iufala olketa dadi and mami tu. Samting wea iu disaedem showimaot iu bilivim wanem iu talem. Pikinini tu herem prea bilong iu, lisin taem iu teachim olketa, and lukim wei wea iu traem best for worshipim Jehovah witim full heart. Gudfala example wea iufala showimaot bae helpem pikinini for laek worshipim Jehovah. Datwan bae mekem iufala hapi tumas.
“Spirit Bilong Jehovah Helpem” Samson
17. Holy spirit helpem Samson for duim wanem?
17 Holy spirit helpem Samson tu. Bible sei “spirit bilong Jehovah strongim” Samson mekem hem sevem olketa Israelite from olketa Philistine. (Judg. 13:24, 25) Jehovah mekem Samson for strong winim eni narawan. Taem olketa Philistine mekem samfala Israelite for kasholem Samson, Bible sei: “Spirit bilong Jehovah stap long hem, and olketa rope wea olketa taemapem long hand bilong hem kamap olsem cotton wea fire bonem, and olketa foldaon from hand bilong hem.” (Judg. 15:14) Gogo, Samson lusim strong wea hem garem bikos hem no disaedem stretfala samting. Bat Jehovah strongim Samson moa bikos hem “garem faith.” (Heb. 11:32-34; Judg. 16:18-21, 28-30) Long datfala taem, holy spirit strongim Samson long mirakol wei. Jehovah bae no mekem iumi for garem sem strong olsem Samson, nomata olsem example bilong Samson savve encouragem iumi. Long wanem wei?
18, 19. (a) Wanem nao iumi lanem from example bilong Samson? (b) Long wanem wei nao example bilong olketa wea faithful bifor strongim iumi?
18 Iumi trustim Jehovah bae givim sem holy spirit wea helpem Samson for helpem iumi tu. Holy spirit bae helpem iumi tu for duim waka wea Jesus talem iumi for duim, wea hem for “preach long pipol.” (Acts 10:42) From hem no isi for duim preaching waka, iumi hapi Jehovah givim holy spirit for helpem iumi duim wanem hem laekem! Iumi savve talem sem toktok wea Isaiah talem. Hem sei: “Jehovah, Lord bilong evri samting sendem mi, and hem sendem tu spirit bilong hem.” (Isa. 48:16) Jehovah bae gohed for helpem iumi duim gud wanem hem laekem olsem hem helpem Moses, Bezalel, and Joshua. Iumi iusim “sword bilong spirit, wea hem nao toktok bilong God” and trustim hao Jehovah bae strongim iumi olsem hem strongim Gideon, Jephthah, and Samson. (Eph. 6:17, 18) Sapos iumi trustim Jehovah, hem bae strongim iumi for duim waka bilong hem olsem hem strongim tu Samson.
19 Tru tumas, Jehovah blessim olketa wea gohed strong for worshipim hem. Sapos iumi letem holy spirit for leadim iumi, datwan bae strongim faith bilong iumi. Long Christian Greek Scripture, hem storyim tu samfala wea holy spirit leadim olketa. Long next study, bae iumi lanem hao holy spirit helpem olketa wea faithful long first century, wea stap laef bifor and bihaen Pentecost 33 C.E.
Wanem nao iu lanem from wei wea holy spirit helpem
• Moses?
• Bezalel?
• Joshua?
• Gideon?
• Jephthah?
• Samson?
[Blurb long page 22]
Holy spirit savve strongim iumi for duim waka bilong Jehovah olsem hem strongim Samson
[Piksa long page 21]
Pikinini savve lane from gudfala example bilong dadi and mami