Jehovah Lukim Waka wea Iu Duim!

BEZALEL and Oholiab, tufala wakem staka samting. Taem tufala slave long Egypt, tufala wakem staka brik. Bat bihaen tufala lusim Egypt tufala kasem wanfala niu waka. Tufala kasem assignment for wakem olketa barava spesol samting for tabernacle. (Ex. 31:1-11) Bat tu-thri pipol nomoa lukim olketa barava spesol samting wea tufala wakem. Waswe, datwan mekem tufala feel nogud? Waswe, hem important for olketa narawan lukim waka wea tufala duim? Waswe sapos no eniwan lukim waka wea iu duim?

OLKETA NAESFALA SAMTING WEA SAMFALA NOMOA LUKIM

Staka samting wea stap long tabernacle hem barava spesol. Olsem example, antap long ark bilong agreement hem garem tufala gold cherub. Aposol Paul sei tufala cherub hia “shaen braet tumas.” (Heb. 9:5) Masbi tufala gold cherub hia barava luk naes fogud!—Ex. 37:7-9.

Sapos olketa samting wea Bezalel and Oholiab wakem still stap kam kasem distaem, maet bae olketa fit for stap insaed olketa big museum mekem staka pipol savve lukluk long olketa. Bat haomas pipol nao barava lukim olketa naesfala samting hia taem Bezalel and Oholiab wakem? Tufala cherub stap long Barava Holy Rum, so hae priest nomoa savve lukim datwan wantaem evri year long Atonement Day. (Heb. 9:6, 7) Dastawe no staka pipol long bifor lukim tufala cherub hia.

HAPI NOMOA NOMATA NO ENIWAN PRAISEM IU

Sapos iu nao Bezalel or Oholiab wea waka hard for wakem olketa naesfala samting hia, hao nao bae iu feel sapos iu savve tu-thri pipol nomoa lukim olketa samting wea iu wakem? Staka pipol distaem laekem nara pipol for tinghae and praisem olketa for samting olketa duim. Long tingting bilong olketa, praise wea nara pipol talem nao hem showimaot olketa duim gud datfala waka. Bat pipol bilong Jehovah no garem datkaen tingting. Olsem Bezalel and Oholiab, iumi laekem Jehovah for hapi long waka wea iumi duim.

Long taem bilong Jesus, olketa bigman bilong Jew religion savve talem olketa prea for mekem pipol tinghae long olketa. Bat Jesus sei for no duim olsem. Hem sei for iumi prea from heart and no from iumi laekem narawan for tinghae long iumi. Why nao olsem? Jesus sei: “Dadi bilong iu, wea hem nomoa lukim iu, bae blessim iu.” (Matt. 6:5, 6) So iumi no prea for nara pipol tinghae long iumi. Samting wea important nao hem hao Jehovah ting long olketa prea bilong iumi. Iumi laekem Jehovah for hapi long olketa prea bilong iumi. Hem semsem tu long evri samting wea iumi duim long waka bilong Jehovah. Iumi no duim bikos iumi laekem narawan for praisem iumi, bat iumi duim bikos iumi laek mekem Jehovah hapi.

Bihaen olketa wakem tabernacle, wanfala cloud “kavarem datfala tent bilong meeting, and glory bilong Jehovah hem fulimap datfala tabernacle.” (Ex. 40:34) Datwan showimaot Jehovah hem hapi long tabernacle hia! And nomata nem bilong Bezalel and Oholiab no stap long olketa samting wea tufala wakem, masbi tufala hapi bikos Jehovah blessim wanem tufala duim. (Prov. 10:22) Long olketa year bihaen, masbi Bezalel and Oholiab hapi tumas for lukim pipol bilong Jehovah gohed iusim olketa samting wea tufala wakem long tabernacle. Taem Bezalel and Oholiab laef bak insaed niu world, bae tufala hapi for savve olketa Israelite iusim tabernacle long worship bilong Jehovah for klosap 500 year!

Organization bilong Jehovah distaem no talem nem bilong olketa brata and sista wea wakem olketa video, drawim olketa piksa, pleim music, tek foto, raetem olketa article long olketa pablikeson bilong iumi, and transleitim olketa article hia. So no eniwan savve long olketa hia. And tu, iumi no lukim staka waka wea gohed insaed winim 110,000 kongregeson raonem world. Olsem example, iumi no lukim account servant taem hem stretem olketa account bilong kongregeson long end bilong evri month. Iumi no lukim secretary taem hem redyim field service report bilong kongregeson. Staka no lukim taem brata or sista hem duim repair long Kingdom Hall.

Bezalel and Oholiab no kasem eni medal, trophy, or award for olketa spesol samting wea tufala wakem. Bat tufala kasem samting wea important winim datwan. Hem nao wei wea Jehovah hapi long tufala. Iumi savve Jehovah lukim olketa samting wea tufala duim. Iumi laek for followim example bilong tufala, wea hem nao for hambol and willing for duim wanem Jehovah laekem.