No Letem Sik for Spoelem Hapi Bilong Iu

TINGIM sapos iu wekap long morning and iu wish nomoa hem evening semtaem tu. Maet iu sik or wari and iu no laek deal witim datwan. Maet iu feel olsem Job wea sei: “Mi laek dae nomoa winim wei for safa.” (Job 7:15, The New English Bible) Hao sapos iu garem sik wea gohed for staka year finis?

Hem nao samting wea kasem Mephibosheth, son bilong Jonathan wea hem fren bilong King David. Hem “foldaon and kamap kripol” taem hem 5 year. (2 Sam. 4:4) Mephibosheth wari tu bikos pipol tok spoelem hem and sei hem againstim king. Hem lusim tu staka material samting. Olketa samting hia mekem hem for barava feel nogud. Nomata olsem, hem no letem datwan for spoelem hapi bilong hem. Hem showimaot gudfala example for iumi.—2 Sam. 9:6-10; 16:1-4; 19:24-30.

Tingim aposol Paul. Hem storyim hao wanfala samting kasem hem wea “olsem nila wea stap long body” bilong hem. (2 Cor. 12:7) Maet datwan hem wanfala sik wea hem garem for longtaem. Or maet datfala nila hem pipol wea sei hem no fit for kamap aposol. Nomata iumi no savve wanem nao kasem Paul, datfala problem gohed and Paul mas deal witim datwan.—2 Cor. 12:9, 10.

Samfala wea worshipim God distaem tu kasem olketa bigfala sik or barava feel wikdaon. Taem Magdalena hem 18 year, hem kasem systemic lupus erythematosus, wanfala sik wea immune system long body savve spoelem olketa organ. Hem sei: “Mi barava fraet taem mi kasem datfala sik. Gogo mi garem problem long bele, ulcer long mouth, and problem long thyroid and datwan mekem sik bilong mi worse go moa.” Bat tingim Izabela. Hem garem sik wea pipol no savve luksavve long hem. Hem sei: “Start long taem mi smol mi savve feel wikdaon evritaem. Mi savve wari, no brith gud, and bele soa. Plande taem mi feel taed tumas.”

Luksavve Wanem Iu Fit for Duim

Taem man sik datwan savve changem laef bilong hem. Taem samting olsem kasem iu, hem gud for ting raonem wanem iu fit for duim. Maet hem no isi for acceptim wei wea iu no fit for duim samfala samting wea iu duim bifor. Magdalena sei: “Mi garem sik wea gogo hem bae kamap worse. Staka taem mi taed tumas and hem hard for mi getap from bed. Mi no savve planim eni samting bikos samfala taem nomoa mi savve feel gud. Bat samting wea mekem mi feel nogud nao hem wei wea mi no fit for duim staka samting for Jehovah olsem bifor.”

Zbigniew sei: “Mi garem rheumatoid arthritis. Datfala sik mekem mi no strong and hem spoelem olketa join long body bilong mi. Samfala taem olketa join long body bilong mi boela and mi no savve duim olketa samting wea isi for mi duim bifor. Datwan mekem mi barava wikdaon.”

Barbara kasem brain tumor no longtaem go nomoa. Hem sei: “Diswan barava affectim mi. Body bilong mi wik, hed bilong mi savve soa olowe, and mi no savve tingting gud. From mi kasem datfala sik, mi mas tingim wanem mi fit for duim and no fit for duim.”

Evriwan wea iumi storyim olketa worshipim Jehovah. Important samting long laef bilong olketa hem for duim samting wea Jehovah laekem. Olketa trustim God and hem helpem olketa.—Prov. 3:5, 6.

Wanem Jehovah Duim for Helpem Iumi

Iumi shud no tingse God no hapi long iumi dastawe iumi sik. (Lam. 3:33) Tingim olketa samting wea kasem Job nomata hem man wea “no garem blame and garem stretfala wei.” (Job 1:8) God no switim eniwan for duim nogud samting. (Jas. 1:13) Iumi kasem enikaen sik bikos long wanem Adam and Eve duim.—Rom. 5:12.

Bat Jehovah and Jesus bae evritaem helpem olketa wea raeteous. (Ps. 34:15) Taem iumi kasem olketa hard taem, iumi tinghae long wei wea God hem olsem ‘sef ples and savve strongim iumi.’ (Ps. 91:2) So wanem nao savve helpem iumi for gohed hapi nomata iumi kasem sik wea no savve finis?

Prea: Iu savve prea long Jehovah and putim evri hevi bilong iu long hand bilong hem olsem olketa faithful man and woman bifor duim. (Ps. 55:22) Taem iu duim olsem, ‘peace bilong God bae gaedem heart and tingting bilong iu.’ (Phil. 4:6, 7) Magdalena prea long God evritaem and datwan helpem hem for deal witim sik bilong hem. Hem sei: “Taem mi storyim evri samting long heart bilong mi long Jehovah, datwan mekem mi hapi. Mi luksavve wanem hem minim for trustim God evriday.”—2 Cor. 1:3, 4.

Jehovah savve herem prea bilong iu and hem iusim holy spirit, Bible, and olketa Christian brata and sista for strongim iu. Iu shud no tingse God bae duim mirakol for finisim sik bilong iu. Nomata olsem, iu savve askem Jehovah for strongim iu and givim iu wisdom for deal witim datfala sik. (Prov. 2:7) Jehovah bae givim “strong wea winim strong bilong man” for helpem iu.—2 Cor. 4:7.

Famili: Taem evriwan long famili kaen and lovem iu, datwan savve helpem iu for deal witim datfala sik. Bat hem gud for tingim hao olketa long famili tu sorre bikos maet olketa no fit for finisim sik wea iu kasem. Nomata olsem, olketa redi for helpem iu. Wei for prea tugeta bae helpem iu for garem peace long mind.—Prov. 14:30.

Barbara storyim wanem gele bilong hem and olketa nara sista long kongregeson duim. Hem sei: “Olketa sapotim mi long ministry. Wei wea olketa gohed strong for duim ministry encouragem mi.” Zbigniew tinghae long wanem waef bilong hem duim. Hem sei: “Waef bilong mi duim staka waka long haos. Hem helpem mi for werem kaleko and plande taem hem karem basket bilong mi taem mifala go meeting and preaching.”

Olketa brata and sista: Taem iumi stap witim olketa brata and sista, olketa savve encouragem and comfortim iumi. Bat waswe sapos iu sik tumas and iu no savve go long olketa meeting? Magdalena sei: “Olketa brata long kongregeson recordim olketa tok long meeting bikos olketa laekem mi for no missim eni samting. Olketa brata and sista savve ringim mi and askem mi sapos mi needim help. Olketa raetem olketa leta tu for encouragem mi. Samting wea olketa duim mekem mi luksavve olketa tingim mi and datwan helpem mi for no givap.”

Izabela wea feel wikdaon evritaem sei: “Staka brata and sista long kongregeson nao olsem dadi and mami bilong mi. Olketa lisin long mi and trae for minim samting wea kasem mi. Evriwan long kongregeson nao olsem famili bilong mi and datwan mekem mi hapi and garem peace.”

Olketa wea sik shud no garem tingting for laek “stap seleva.” Bat hem gud for olketa kaban witim olketa brata and sista. (Prov. 18:1) Sapos olsem, example bilong olketa bae encouragem narawan. Maet firstaem iu fraet for talem olketa brata and sista wanem iu needim. Bat sapos iu storyim wanem iu needim, olketa bae tinghae long datwan. Hem bae givim chance long olketa for showimaot ‘love wea hem tru wan.’ (1 Pet. 1:22) Iu savve askem olketa brata and sista for tekem iu long meeting, waka witim iu long preaching, or for story witim iu. Bat hem gud for iu tinghae long wanem olketa duim for iu and no expectim olketa for duim staka samting.

Garem gudfala tingting: Nomata iu sik, wei for hapi hem depend long hao iu ting long samting wea kasem iu. Sapos man luk sorre and feel nogud olowe, datwan savve mekem hem for no tingting stret. Bible sei: “Man wea garem gudfala tingting bae no givap nomata hem sik. Bat man wea sorre bae no kasem gud samting.”—Prov. 18:14.

Magdalena sei: “Mi traem best for no tingim problem bilong mi. Taem mi feel gud, mi duim samting wea mekem mi hapi. Taem mi readim laef story bilong olketa brata and sista wea faithful nomata olketa sik, datwan encouragem mi.” Izabela luksavve Jehovah lovem and tinghae long hem and datwan strongim hem. Hem sei: “Mi luksavve samwan lovem mi and datwan mekem mi no givap. Mi garem nambawan hope long future tu.”

Zbigniew sei: “From mi sik, mi lane for hambol, obey, luksavve long samting, garem gudfala tingting, and forgivim narawan. Mi lane for no sorre tumas long wanem hem kasem mi and hapi for worshipim Jehovah. Nomata mi sik, mi laek gohed worshipim Jehovah and kamap strongfala Christian.”

Tingim tu, Jehovah lukim wei wea iu faithful. Hem luksavve long wei wea iu safa and hem tingim iu. Hem bae no ‘forgetim waka wea iu duim and love wea iu showimaot for nem bilong hem.’ (Heb. 6:10) Jehovah promis hem bae “nating lusim iu.”—Heb. 13:5.

Sapos iu feel wikdaon, tingim nambawan hope for laef olowe long niu world. Klosap nao bae iumi kasem olketa nambawan samting taem Kingdom bilong God rulim earth!

[Box/Piksa long page 28]

Olketa Gohed Preach Nomata Olketa Sik

Jerzy wea no savve lukluk gud sei: “Mi no savve wakabaot seleva, so waef bilong mi or samfala brata and sista go witim mi long preaching waka. Mi baeheartim olketa story and scripture.”

Magdalena wea garem sik systemic lupus erythematosus sei: “Mi savve duim telephone witnessing and raetem olketa leta. Samfala wea interest savve raet kam bak. Taem mi admit long hospital, evritaem mi putim Bible and olketa buk bilong iumi klosap long bed. Datwan mekem staka for laek story witim mi.”

Izabela wea feel wikdaon evritaem sei: “Mi laek preach long haos tu haos bat taem mi no feel gud, mi duim telephone witnessing.”

Barbara wea garem brain tumor sei: “Mi laek for duim olketa return visit and go witim narawan long Bible study. Long day wea mi feel gud, mi preach long haos tu haos.”

Zbigniew wea garem rheumatoid arthritis sei: “Taem mi go preaching, mi tekem smol basket nomoa. And sapos olketa join long body bilong mi soa tumas mi go bak nao.”

[Piksa long page 30]

Olketa wea young and olo savve encouragem narawan