Waswe, Iu Tingim Yet?
Waswe, iu lanem gud samting from Wastaoa magasin wea iu readim no longtaem go nomoa? Waswe, iu tingim yet ansa bilong olketa kwestin hia:
• Hu nao shud teachim olketa pikinini abaotem God?
Dadi and mami shud waka tugeta for teachim pikinini followim wanem Bible talem. (Prov 1:8; Eph 6:4) Olketa savveman faendemaot taem dadi and mami duim datwan, pikinini savve kasem gud samting.—8/1, page 6-7.
• Wanem nao Jehovah minim taem hem sei hem bae lukaftarem olketa Levite?
Jehovah givim pis land long olketa nara tribe bilong Israel bat Jehovah talem olketa Levite hem nao bae “lukaftarem” olketa. (Num. 18:20) Hem no givim pis land long olketa bat hem givim important waka for olketa duim. Nomata olsem, Jehovah provaedem material samting wea olketa Levite needim. Distaem tu, Jehovah bae lukaftarem olketa wea mekem Kingdom first samting long laef bilong olketa.—9/15, page 7-8, 13.
• Hao nao bae iumi luksavve sapos hapitaem wea iumi duim hem mekem Jehovah hapi?
For helpem iu disaedem hapitaem wea fitim, tingim thrifala kwestin hia: Wanem kaen hapitaem nao mi chusim? Haomas taem nao mi iusim long hapitaem? Hu nao mi laek duim hapitaem witim?—10/15, page 9-12.
• Long wanem wei nao Proverbs 7:6-23 helpem iumi for no lukluk long olketa rabis piksa?
Datfala scripture storyim wanfala young man wea followim road wea klosap long haos bilong wanfala olobaot woman. Woman hia switim hem for duim nogud samting. Iumi mas no lukluk long olketa Web site long Internet wea garem olketa rabis piksa. Iumi need for prea long Jehovah for helpem iumi for no lukluk long olketa rabis piksa.—11/15, page 9-10.
• Wanem nao hasband and waef savve duim mekem tufala gohed respectim each other?
Hasband and waef mas “willing for lisin, no kwiktaem for toktok, and no kwiktaem for kros.” Bifor tufala story, tufala shud tingting gud firstaem abaotem wanem for talem. Sapos marit partner garem difren tingting abaotem samting, no tingim nomoa wanem iuseleva laekem. Tingim feeling bilong hem tu. (Jas. 1:19; Col. 4:6; Phil. 2:4)—10/1, page 11-12.