Kwestin From Reader

Waswe, wanfala Christian wea gohed for lukluk long olketa rabis piksa savve disfellowship from kongregeson?

▪ Ia, hem savve disfellowship. Dastawe iumi mas no lukluk long olketa rabis piksa long olketa magasin, movie, Internet, and no readim tu story wea mekhae long wei for durong.

Pipol savve lukim rabis piksa and readim olketa buk wea mekhae long wei for durong long eni ples long world. Hem isi tumas for staka pipol lukim olketa rabis piksa distaem bikos hem kamap long Internet. Samfala pipol lukim olketa rabis piksa long Web site nomata olketa no min for lukluk long datwan. Bat samfala pipol min for lukluk long Web site wea garem rabis piksa and for readim story wea mekhae long wei for durong bikos olketa tingse no eniwan bae lukim olketa. Why nao hem important for olketa Christian mas keakea long datwan?

Jesus talem disfala warning: “Eniwan wea gohed for lukluk long wanfala woman and laek for durong witim hem, hem duim adultery finis witim hem long heart bilong hem.” (Matt. 5:28) Hem tru, hem stret for olketa wea marit duim sex and hem samting wea mekem hasband and waef hapi. (Prov. 5:15-19; 1 Cor. 7:2-5) Bat olketa rabis piksa and buk wea storyim wei for durong no mekhae long datwan. Olketa rabis samting hia mekhae long wei for durong and hem mekem man for garem rabis tingting wea Jesus warnim iumi abaotem. So wei for lukluk long olketa rabis piksa or for readim story wea mekhae long wei for durong hem againstim wanem Bible talem, wea sei: “Killim dae feeling bilong iufala for laek durong, for duim samting wea no klin, for ova tumas for laekem sex, for laekem tumas for duim nogud samting, and for greedy, wea datwan hem wei for worshipim idol.”—Col. 3:5.

Bat waswe sapos wanfala Christian lukluk long olketa rabis piksa wan or tufala taem nomoa? Samting wea hem duim bae mekem hem stap long danger. Wantaem Asaph stap long danger. Hem sei: “Bat klosap nomoa leg bilong mi tan go difren, klosap nomoa mi step rong and foldaon.” Wei for lukluk long piksa bilong olketa naked woman or man, or man and woman wea durong, bae mekem datfala Christian no garem klinfala konsens and no fren gud witim God. Maet hem olsem Asaph wea sei: “Mi safa long full day, and evri morning God hem stretem mi.”—Ps. 73:2, 14.

Eni Christian wea lukluk long olketa rabis piksa wan or tufala taem nomoa shud luksavve diswan spoelem wei wea hem fren witim Jehovah and hem needim help. Hem savve kasem help from olketa elder. Bible sei: “Maet wanfala man start for go rong bat hem no luksavve long datwan. Sapos olsem, iufala wea mature mas trae for stretem hem. Taem iufala duim datwan iufala mas kaen long hem. Bat lukluk gud long iuseleva.” (Gal. 6:1) Wan or tufala elder savve helpem hem. Prea wea olketa talem savve mekem datfala man wea sik for gud bak, and God savve forgivim eni sin wea hem duim. (Jas. 5:13-15) Olketa wea kasem help and wea stop for lukluk long rabis piksa, garem sem tingting olsem Asaph wea sei: “Hem gud tumas for mi fren gud witim God”.—Ps. 73:28.

Bat aposol Paul sei samfala duim sin and no repent “from wei wea olketa no klin, olketa durong, and nating shame for duim rong samting.”a (2 Cor. 12:21) Marvin Vincent wea hem wanfala savveman explainim hao datfala Greek word wea iumi transleitim “no klin” savve minim samting wea barava dirty. Samfala rabis piksa showim olketa man and woman wea duim sex and olketa wea naked. Bat samfala nara piksa showim olketa samting wea barava nogud winim datwan. Samfala piksa showim barava dirty samting, olsem man durong witim man, woman durong witim woman, staka pipol wea duim sex tugeta, pipol duim sex witim animal, rabis piksa abaotem pikinini, gang rape, killim nogud olketa woman, wei for taengem narawan and duim sex witim hem, wei for duim sex wea mekem narawan safa. Long taem bilong Paul, samfala pipol wea “no savve minim samting . . . olketa no savve long wanem hem stret and wanem hem no stret. Olketa no hol bak for duim rong samting and nating shame for duim rong samting. Olketa gohed for duim evri difren kaen samting wea no klin and olketa greedy witim tu.”—Eph. 4:18, 19.

Long Galatians 5:19, Paul storyim moa “wei for no klin.” Wanfala savveman from Britain sei datfala toktok “wei for no klin” long “hia maet minim wei for ova tumas for laek duim sex and for duim barava dirty samting wea tambu.” Wanem tufala savveman hia talem hem barava fitim olketa rabis piksa wea showim olketa barava dirty samting wea iumi storyim finis. Long Galatians 5:19-21, Paul sei “pipol wea duim olketa samting” wea no klin “bae no kasem Kingdom bilong God.” So sapos samwan gohed for lukluk long olketa rabis piksa wea showim olketa barava dirty samting olsem, and maet hem duim datwan for lelebet longtaem, bat hem no repent and stop for duim datwan, olketa elder mas aotem hem from kongregeson. Olketa mas disfellowshipim hem mekem hem no spoelem olketa brata and sista and for keepim kongregeson klin.—1 Cor. 5:5, 11.

Iumi hapi bikos samfala wea lukluk long olketa rabis piksa bifor go long olketa elder and kasem help for no duim datwan moa. Jesus sei olsem long samfala long Sardis: “Strongim olketa samting wea stap yet wea klosap for dae, . . . gohed for tingim olketa samting wea iufala kasem and herem, and gohed for hol strong long datwan, and repent. Sapos iu no wekap, . . . bae iu barava no savve long wanem taem nao bae mi kam long iu.” (Rev. 3:2, 3) Man wea lukluk long rabis piksa savve repent and kasem help.—Jude 22, 23.

Hem tru, iumi savve kasem help from olketa elder and repent. Nomata olsem, iumi no laek for duim eni samting wea savve spoelem wei wea iumi fren witim God. Iumi each wan shud disaed strong for no lukluk long eni rabis piksa.

[Footnote]

[Blurb long page 30]

Eni Christian wea lukluk long olketa rabis piksa shud luksavve hem needim help from olketa elder