Meeting Abaotem Samfala Plan, and wea Mekhae Long Wan Mind

EVRI year olketa brata and sista savve interest tumas long annual meeting bilong Watch Tower Bible and Tract Society of Pennsylvania. Hem olsem tu for olketa wea hipap for datfala mek-127 annual meeting long Saturday, October 1, 2011! Olketa from staka kantri wea kasem invitation hipap long Assembly Hall bilong Olketa Jehovah’s Witnesses long Jersey City, New Jersey, America.

Gerrit Lösch, wanfala member bilong Governing Body, hem welkamim olketa wea hipap wea kam from samting olsem 85 difren kantri. Hem storyim hao olketa garem spesol wei for wan mind wea pipol long world no garem, and datwan givim gudfala witness long pipol and givim glory long Jehovah. Staka taem long disfala meeting olketa mekhae long wei for wan mind.

GUDFALA REPORT FROM MEXICO

Firstfala tok long program mekhae long wei wea pipol bilong Jehovah wan mind. Baltasar Perla interviewim thrifala nara member bilong Mexico Bethel famili abaotem wei wea Governing Body satem sixfala branch office long Central America, and distaem Mexico branch lukaftarem waka long olketa kantri hia. From datwan, staka brata and sista from olketa difren kantri and culture waka tugeta long Mexico Bethel, and evriwan kasem encouragement from datwan. Hem olsem God mekem olketa for kamap wanfala nation nomoa.

Governing Body laek helpem olketa pablisa long olketa kantri hia for luksavve organization bilong Jehovah barava tingim olketa, nomata branch office no stap long kantri bilong olketa. Dastawe evri kongregeson long olketa kantri hia, nomata olketa wea stap farawe tu, savve sendem e-mail stret go long branch office long Mexico.

REPORT FROM JAPAN

James Linton from Japan branch story abaotem datfala earthquake and olketa tsunami wea kasem Japan long March 2011, and hao datwan affectim olketa brata and sista. Staka brata and sista lusim evri samting, and samfala famili member bilong olketa dae tu. Olketa brata and sista from olketa nara ples long Japan willing for letem olketa iusim winim 3,100 haos and plande handred trak. Winim 1,700 volunteer nao waka hard witim Olketa Regional Building Komiti for fixim haos bilong olketa brata and sista. Samfala volunteer kam from America for fixim olketa Kingdom Hall, and 575 volunteer waka tugeta witim olketa long disfala project.

Organization bilong Jehovah duim staka samting for helpem olketa saed long feeling and for strongim olketa long spiritual wei. Winim 400 elder go for comfortim olketa brata and sista. Tufala zone overseer from world headquarter go long Japan for givim encouragement long olketa brata and sista, and datwan showimaot Governing Body tu tingim olketa. Olketa brata and sista long Japan barava kasem comfort tu from olketa message bilong olketa brata and sista evriwea long world.

WIN LONG KOT

Olketa long audience lisin gud taem Stephen Hardy from Britain branch story abaotem samfala kot case wea iumi winim. Olsem example, gavman bilong France sei organization bilong iumi long France mas peim $82 million (U.S.) long tax. Iumi winim datfala case taem European Court of Human Rights (ECHR) sei iumi no need for peim datwan. Datfala kot sei samting wea gavman bilong France duim hem againstim Article 9 bilong European Convention, wea protectim raet bilong man for followim religion wea hem chusim. Disison bilong datfala kot showimaot main goal bilong gavman bilong France hem no for kasem datfala selen. Hem sei gavman bilong France againstim Olketa Jehovah’s Witness, tok spoelem olketa, and trae for finisim olketa tu.

Iumi winim nara case tu long datfala kot, wea affectim raet bilong iumi long Armenia. Start kam long 1965, ECHR sei datfala European Convention no savve stopem olketa gavman for forcem olketa citizen for joinim army. Bat long case bilong iumi, The Grand Chamber bilong ECHR, hem sei European Convention shud protectim raet bilong man for no join insaed long army sapos datwan barava againstim biliv bilong hem. Diswan minim Armenia and olketa nara kantri olsem Azerbaijan and Turkey mas followim datfala disison.

SAMFALA CONSTRUCTION PROJECT

Next brata wea givim tok hem Guy Pierce, wea hem member bilong Governing Body. Hem sei Governing Body luksavve evriwan interest for herem nius abaotem samfala construction project bilong iumi long New York State. Hem showim video abaotem samfala waka long Wallkill, and Patterson, and samfala property wea olketa peim long Warwick and Tuxedo, New York. Long Wallkill, olketa gohed wakem niu accommodation building wea garem winim 300 rum for olketa Bethelite, and olketa plan for finisim datwan long 2014.

Olketa garem plan for duim construction long wanfala pis land long Warwick wea size bilong hem 100 hectare. Brata Pierce hem sei: “Nomata mifala no sure yet long will bilong Jehovah abaotem disfala pis land long Warwick, mifala gohed duim samfala waka long there distaem witim goal for muvim world headquarter bilong Olketa Jehovah’s Witness long there.” Olketa plan for iusim wanfala pis land wea 20 hectare and wea stap 10 kilometer north long Warwick for redyim olketa machine and building material for datfala construction waka. Brata Pierce sei: “Taem mifala kasem permit for startim datfala construction, mifala plan for finisim insaed fofala year. Then mifala bae salem olketa property long Brooklyn.”

Waswe, Governing Body tingse datfala big trabol hem farawe yet? Brata Pierce hem sei: “Nomoa. Sapos datfala big trabol kam bifor mifala finisim evri waka hia, datwan bae barava gud tumas!”

KEAKEA LONG LION WEA SINGAOT BIG

Stephen Lett wea hem nara member bilong Governing Body givim next tok. Hem storyim 1 Peter 5:8 wea sei: “Iufala mas gohed for garem gudfala tingting and gohed for lukaot. Devil, wea hem enemy bilong iufala, hem raraon olsem wanfala lion wea singaot big and hem laekem tumas for kaikaim eniwan.” Brata Lett hem sei samfala wei bilong olketa lion mekem datfala tokpiksa bilong Peter abaotem Devil, hem barava fitim.

Olketa lion strong and savve ran fast winim olketa man, so iumi mas no depend long strong bilong iumiseleva for winim Satan. Iumi needim Jehovah for helpem iumi. (Isa. 40:31) Hem wei bilong lion for attak haed, so iumi mas stap klia long spiritual darkness wea Satan iusim for kasholem pipol. Olsem lion wea killim dae wanfala deer or baby zebra wea sleep, Satan hem nating sorre sapos hem killim iumi dae long spiritual wei. Bihaen lion hem kaikaim wanfala animal, hard for iu luksavve wanem kaen animal nao datwan. Long sem wei, sapos Satan spoelem samwan “bae hem worse winim taem hem no savve long olketa tru teaching.” (2 Pet. 2:20) So iumi mas againstim Satan and gohed followim olketa Bible principle wea iumi lanem finis.—1 Pet. 5:9.

TINGHAE LONG PRIVILEGE FOR WORSHIPIM JEHOVAH

Next tok hem bilong Samuel Herd, wea hem member bilong Governing Body. Hem sei: “Iumi evriwan garem ples insaed haos bilong Jehovah.” Datfala “haos” hem spiritual temple, wea hem nao arrangement bilong Jehovah for iumi savve worshipim hem sapos iumi showimaot faith long ransom sakrifaes bilong Jesus. Iumi mas tinghae long privilege for worshipim Jehovah. Olsem David, iumi laek for stap “long haos bilong Jehovah long full laef bilong [iumi].”—Ps. 27:4.

Brata Herd hem storyim Psalm 92:12-14 and hem askem disfala kwestin: “Wanem nao Jehovah duim for helpem iumi gohed strong?” Hem sei: “Long spiritual paradaes God hem lukaftarem iumi, protectim iumi, and givim iumi olketa tru teaching wea olsem wata. Iumi mas thankiu long Jehovah for datwan.” Brata Herd hem encouragem audience for “gohed stap long haos bilong Jehovah, no for lelebet taem nomoa, bat for olowe.”

OLKETA CHRISTIAN TINGHAE LONG WORD BILONG GOD

David Splane, wea hem tu member bilong Governing Body, hem tekem next tok. Hem storyim hao olketa tru Christian evritaem tinghae long Word bilong God. Long first century olketa iusim Word bilong God for ansarem kwestin wea kamap abaotem wei for circumcise. (Acts 15:16, 17) Bat long mek-tu century, samfala wea sei olketa Christian and wea skulim olketa idea bilong Greece, tinghae long datfala savve and datwan mekem olketa no tinghae long Word bilong God. Bihaen, samfala moa changem olketa teaching from Bible witim teaching bilong olketa Church Father and olketa king long Rome, and staka laea teaching kamaot from datwan.

Brata Splane storyim wanfala tokpiksa bilong Jesus wea showimaot samfala anointed Christian bae stap long earth for defendim truth long olketa century bihaen olketa aposol dae. (Matt. 13:24-30) Iumi no barava sure hu nao olketa anointed Christian hia. Bat start kam long first century, plande difren pipol tok againstim olketa laea teaching and kastom wea no kam from Bible. Samfala long olketa hia nao hem Archbishop Agobard bilong Lyons long mek-9 century, Peter bilong Bruys, Henry bilong Lausanne, and Valdès (or, Waldo) long mek-12 century, John Wycliffe long mek-14 century, William Tyndale long mek-16 century, and Henry Grew and George Storrs long mek-19 century. Distaem tu Olketa Jehovah’s Witness gohed for duim wanem Bible talem and evri samting wea olketa bilivim hem kam from Bible. Dastawe Governing Body chusim toktok from John 17:17 for yeartext long 2012. Hem sei: ‘Toktok bilong iu hem tru.’

SAMFALA NIU ARRANGEMENT SAED LONG TRAINING AND OLKETA ASSIGNMENT

Anthony Morris wea hem member bilong Governing Body, hem storyim samfala change wea bae affectim olketa missionary and spesol pioneer. Start long September 2012, datfala Bible Skul for Olketa Hasband and Waef bae kamap long samfala kantri. Change kamap long Gilead Skul tu. Start long October 2011, evriwan wea kasem training long Gilead mas insaed spesol full-taem service finis. Diswan minim olketa missionary wea no go long Gilead yet, and olketa spesol pioneer, traveling overseer, and Bethelite. Governing Body bae iusim olketa wea graduate for strongim pipol bilong God long wei for duim traveling waka, waka long olketa branch office, or for sapotim olketa kongregeson long preaching waka long olketa big taon wea staka pipol stap.

Samfala spesol pioneer bae preach long olketa niu territory wea farawe. Start long January 1, 2012, samfala wea graduate from datfala Bible Skul for Olketa Singol Brata and Bible Skul for Olketa Hasband and Waef, bae kasem assignment olsem temporary spesol pioneer for preach and startim olketa kongregeson long olketa farawe ples. Branch bae reviewim waka bilong olketa evri year for thrifala year. Bihaen datwan, sapos olketa duim gud assignment bilong olketa, maet olketa kasem permanent assignment.

Datfala annual meeting long 2011 hem gud tumas. Iumi trustim Jehovah for blessim olketa niu arrangement for duim moa samting long preaching waka and strongim wan mind wea iumi garem. Datwan bae givim glory and praise long Jehovah.

[Box/Olketa Piksa long page 18, 19]

INTERVIEW WITIM SAMFALA SISTA

Naenfala sista stap wea hasband bilong olketa long Governing Body bifor, bat distaem olketa dae finis. Long disfala program olketa interviewim faevfala long olketa sista hia. Sista Marina Sydlik, Edith Suiter, Melita Jaracz, Melba Barry, and Sydney Barber story abaotem hao olketa lanem truth and start for duim full-taem service. Each wan long olketa sista hia storyim spesol samting wea hem no savve forgetim, tingting abaotem hasband bilong hem, and olketa blessing wea tufala kasem. Bihaen olketa interview, audience singim song namba 86, “Faithful Women, Christian Sisters.”

[Olketa Piksa]

(Antap) Daniel and Marina Sydlik; Grant and Edith Suiter; Theodore and Melita Jaracz

(Long daon) Lloyd and Melba Barry; Carey and Sydney Barber

[Map long page 16]

(For formatted text, lukim pablikeson)

Governing Body satem sixfala branch and distaem Mexico branch lukaftarem waka long olketa kantri hia

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Piksa long page 17]

Piksa bilong world headquarter bilong Olketa Jehovah’s Witness wea Governing Body plan for buildim long Warwick, New York