Meeting wea Olketa Bae Nating Forgetim

“TAEM disfala meeting finis, iu bae sei, ‘Mi bae nating forgetim disfala annual meeting!’” Hem nao samting wea Stephen Lett, wea hem member bilong Governing Body bilong Olketa Jehovah’s Witness, talem long olketa brata and sista wea hipap for mek-126 annual meeting bilong Watch Tower Bible and Tract Society of Pennsylvania. Disfala meeting kamap long October 2, 2010 long Assembly Hall bilong Olketa Jehovah’s Witness long Jersey City, New Jersey, America. Wanem nao samfala main samting wea olketa storyim?

Brata Lett nao givim first tok. Hem story abaotem chariot bilong Jehovah long heven wea buk bilong Ezekiel storyim. Nambawan chariot hia piksarem organization bilong Jehovah wea hem kontrolem. Brata Lett sei organization bilong God long heven, wea olketa angel nao insaed long diswan, hem muv kwiktaem tumas olsem laetning. Semtaem Jehovah tingim samting, organization hem muv. Organization bilong Jehovah long earth tu muv kwiktaem. Brata Lett storyim staka nambawan change wea kamap long organization long earth long tu-thri year wea go pas.

Olsem example, Governing Body disaed for klosim samfala branch office and olketa nara branch nao lukaftarem waka wea gohed long olketa kantri hia. Diswan givim chance long staka wea waka long Bethel bifor for busy long preaching waka. Brata Lett encouragem olketa brata and sista for gohed prea for Governing Body wea stand for wakaman wea faithful and wise.​—Matt. 24:45-47.

Olketa Naesfala Report and Interview

Tab Honsberger wea member bilong Branch Komiti long Haiti givim naesfala report abaotem wanem hem happen bihaen earthquake kasem Haiti long January 12, 2010. Samting olsem 300,000 pipol nao dae. Hem sei olketa bigman bilong religion talem pipol God protectim olketa wea duim gud samting bat hem killim dae olketa wea no garem faith. Bat staka thousand criminal wea stap long prison ranawe taem earthquake mekem prison foldaon. Nomata olsem, staka pipol long Haiti wea laek for savve abaotem truth kasem comfort taem olketa lanem why staka nogud samting happen distaem. Brata Honsberger storyim samting wea wanfala faithful brata long Haiti talem taem waef bilong hem dae long earthquake. Brata hia sei: “Kam kasem distaem, mi savve krae from samting wea happen. Mi no savve wanem taem nao bae mi finis for sorre, bat mi hapi from olketa long organization bilong Jehovah lovem mi. Mi garem hope and mi laek helpem nara pipol for garem datfala hope tu.”

Mark Sanderson wea stap long Brooklyn Bethel distaem givim report abaotem wanem hem happen long Philippines. Bifor hem member bilong Branch Komiti long there. Hem storyim hao long Philippines, namba bilong olketa pablisa hem go ap evri month for samting olsem 3-fala year. Hem sei namba bilong olketa Bible study hem winim namba bilong olketa pablisa. Hem story abaotem wanfala brata wea nem bilong hem Miguel and hao samwan killim dae pikinini bilong son bilong hem. Miguel duim staka samting for mek sure datfala man go long prison. Gogo, taem Miguel preach long prison, hem meetim man wea killim dae grani bilong hem. Nomata Miguel fraet, hem tok kaen long datfala man. Gogo Miguel study witim hem, and datfala man changem wei bilong hem and lovem Jehovah. Distaem hem baptaes. Miguel fren gud witim hem and helpem hem for aot kwiktaem from prison.a

Next samting long program hem olketa interview. Mark Noumair wea hem wanfala teacher long Theocratic Schools Department hem interviewim thrifala hasband and waef. Hem interviewim Alex and Sarah Reinmueller, David and Krista Schafer, and Robert and Ketra Ciranko. Alex Reinmueller wea hem wanfala helper long Publishing Komiti, storyim hao hem disaed strong for worshipim Jehovah taem hem pioneer long Canada taem hem 15 year. Plande taem hem preach seleva nomoa. Brata Reinmueller sei thrifala faithful brata long Bethel barava helpem hem for kamap strongfala Christian. Waef bilong hem Sarah story abaotem wei wea hem fren witim wanfala sista wea stap long prison long China for staka year bikos long faith bilong hem. Sarah sei samting wea hem lanem from datfala sista hem for gohed prea long Jehovah and trustim hem.

David Schafer wea hem wanfala helper long Teaching Komiti sei strongfala faith bilong mami barava helpem hem. Hem sei tu olketa brata wea waka for katem olketa tree helpem hem for auxiliary pioneer taem hem teenager. Waef bilong hem Krista sei gudfala example bilong olketa olo brata and sista long Bethel barava helpem hem. Olketa “faithful long olketa smol samting” olsem Jesus talem.​—Luke 16:10.

Robert Ciranko wea hem wanfala helper long Writing Komiti storyim gudfala example wea fofala grani bilong hem wea anointed Christian and wea kam from Hungary showimaot. Taem hem young, hem go long olketa big convention long olketa year bihaen 1950 and datwan helpem hem for luksavve organization bilong Jehovah hem big winim kongregeson bilong hem. Waef bilong hem Ketra sei taem hem pioneer, hem lane for gohed faithful nomata kongregeson kasem olketa problem and samfala kamap apostate. Hem no givap and gogo hem kasem assignment for spesol pioneer long kongregeson wea evriwan wan mind.

Manfred Tonak givim report abaotem wanem hem happen long Ethiopia, wanfala kantri wea Bible tu storyim. Distaem winim 9,000 pablisa nao long there. Staka long olketa pablisa hia long kapitol taon, Addis Ababa or klosap long there. Diswan minim olketa needim staka pablisa moa for preach long olketa farawe ples long Ethiopia. So olketa Witness from Ethiopia wea stap long nara kantri kasem invitation for preach long samfala farawe ples long Ethiopia. Staka kam and diswan encouragem olketa Witness long Ethiopia. Olketa meetim plande pipol wea interest long truth.

Wanfala interesting samting wea kamap long program hem olketa tok abaotem Olketa Jehovah’s Witness long Russia and hard taem wea olketa kasem long kot. Aulis Bergdahl wea hem member bilong Branch Komiti long Russia storyim wei wea pipol persecutim olketa Witness long Russia, wea main ples hem long Moscow. Philip Brumley wea waka long Legal Department long United States branch storyim olketa gud samting wea kamap taem European Court of Human Rights herem naenfala case wea pipol accusim olketa Witness long hem. Hem sei Kot luksavve naenfala case hia wea pipol accusim olketa Witness long hem, hem no tru. Staka long olketa case hia Kot explainim why samting wea pipol talem hem no tru. Iumi no savve yet sapos gavman long Russia bae followim wanem Kot talem, bat Brata Brumley sei wanem Kot disaedem maet helpem tu olketa brata and sista long nara kantri.

Brata Lett talem hao European Court of Human Rights agree for herem case abaotem tax wea gavman long France mekem againstim Olketa Jehovah’s Witness. Hem big samting for Kot agree for herem case bilong iumi bikos hem samting wea datfala Kot no savve duim plande taem. Kam kasem distaem European Court of Human Rights herem 39 case bilong Olketa Jehovah’s Witness and iumi winim 37 long olketa case hia. Brata Lett encouragem evriwan for gohed prea long Jehovah abaotem datwan.

Lastfala report hem from Richard Morlan wea hem wanfala teacher long Skul for Olketa Elder. Hem storyim olketa gud samting abaotem datfala skul and wei wea olketa elder tinghae long datwan.

Olketa Nara Tok wea Olketa Long Governing Body Givim

Guy Pierce wea hem member bilong Governing Body givim tok wea mekhae long yeartext for 2011 wea sei: “Trustim nem bilong Jehovah olsem sef ples for haed.” (Zeph. 3:12) Hem storyim hao nomata distaem hem taem for pipol bilong Jehovah hapi, hem wanfala important taem tu. Bigfala day bilong Jehovah hem klosap. Nomata olsem, pipol trustim false religion, olketa gavman, material samting, or nara samting for helpem olketa. Bat for savve long stretfala ples for haed, iumi need for prea long Jehovah. Datwan minim iumi mas savve long Jehovah, respectim, and trustim hem. Iumi mas showimaot iumi lovem hem.

David Splane wea hem member bilong Governing Body storyim tok wea garem theme “Waswe, Iu Rest Long Day Bilong God for Rest?” Hem storyim hao day bilong God for rest no minim God no duim eni waka. Jehovah and Son bilong hem “gohed for waka” long datfala tokpiksa day mekem plan bilong God for earth and olketa samting wea hem wakem kamap tru. (John 5:17) So hao nao iumi savve rest long day bilong God for rest? Iumi mas no gohed for duim sin and no duim samting wea iumiseleva tingse hem stret. Iumi mas garem faith and tingim evritaem plan bilong God and sapotim datwan. Maet samfala taem hem no isi for duim datwan bat iumi need for acceptim kaonsel and followim wanem organization bilong Jehovah talem. Brata Splane encouragem olketa wea attend for traem best bilong olketa for rest long day bilong God for rest.

Anthony Morris wea hem member bilong Governing Body givim lastfala tok wea garem theme “Olketa Wanem Samting Nao Iumi Weitim?” Brata Morris story abaotem olketa profesi wea iumi weitim wea bae kamap tru long future. Samfala profesi nao hem abaotem taem wea pipol bae sei “Iumi garem peace and stap gud nao!” and taem wea false religion bae finis. (1 Thess. 5:2, 3; Rev. 17:15-17) Brata Morris sei taem iumi lukim enikaen samting happen, iumi mas no kwiktaem sei “Ating Armageddon nao ia.” Hem storyim Micah 7:7 and hao iumi tu shud gohed hapi, patient, and weitim taem wea God bae duim samting. Hem strongim evriwan for followim wanem Governing Body talem and waka tugeta olsem olketa soldia wea faet long bigfala faet. Hem sei: “Mekem heart bilong iufala strong, iufala evriwan wea weit long Jehovah.”​—Ps. 31:24.

Long end bilong meeting, olketa talem samfala important announcement. Geoffrey Jackson wea hem member bilong Governing Body announcem wei wea olketa plan for garem simpol English Wastaoa for helpem olketa wea no savve gud long English. Then Stephen Lett announcem hao Governing Body bae mekem arrangement for duim shepherding kol long olketa distrik overseer and waef bilong olketa long America. Hem sei Governing Body disaed for changem nem bilong Ministerial Training Skul for kamap Bible Skul for Olketa Singol Brata. Then hem announcem wanfala niu skul bae kamap wea garem nem, Bible Skul for Olketa Hasband and Waef. Datfala skul hem for helpem olketa hasband and waef for duim moa samting long organization bilong Jehovah. Brata Lett announcem tu Skul for Olketa Traveling Overseer and Waef and Skul for Olketa Branch Komiti Member and Waef bae kamap tufala taem evri year long Patterson Bethel long America. Olketa wea attendim datfala skul bifor bae garem chance for skul moa.

Brata John Barr wea 97 year and wea member bilong Governing Body talem naesfala prea for finisim program.b Long end bilong meeting, evriwan wea attend sei olketa bae nating forgetim datfala meeting.

[Olketa Footnote]

[Blurb long page 19]

Evriwan barava enjoyim olketa interview

[Blurb long page 20]

Jehovah blessim preaching waka wea gohed long Ethiopia