“Iufala No Savve Long Datfala Day Or Taem”

1-3. (a) Storyim tufala example wea helpem iumi for minim main point bilong tufala tokpiksa bilong Jesus? (b) Olketa wanem kwestin nao bae iumi ansarem?

TINGIM sapos wanfala bigman long gavman askem iu for draevem hem go long wanfala important meeting. No longtaem bifor iu go for tekem hem iu luksavve car wea iu draevem no garem inaf petrol. So iu kwiktaem go for refillim petrol. Datfala bigman hem kam bat iu no long there. Hem lukaotem iu bat hem no savve faendem iu so hem askem narawan for tekem hem, nogud hem leit. No longtaem bihaen, iu arrive bak bat datfala bigman hem go finis. Hao nao bae iu feel?

² Distaem, tingim sapos iu nao datfala bigman. Iu redi for go long wanfala gogo, and iu chusim thrifala man for duim samfala important waka. Iu explainim wanem iu laekem olketa for duim, and thrifala evriwan sei olketa willing for duim datwan. Bat taem iu kam bak, iu faendaot tufala nomoa duim waka bilong olketa. Mek-thri man no duim wanem iu askem and hem talem enikaen excuse. Nomata for startim datfala waka bat hem no duim tu. Hao nao bae iu feel?

³ Tufala example hia klosap semsem witim tufala tokpiksa bilong Jesus abaotem tenfala gele and tenfala silver selen. Tufala tokpiksa hia showimaot why samfala anointed Christian bae faithful and wise taem world hem gogo for finis, and why samfala bae no faithful.a (Matt. 25:1-30) Jesus talem main point bilong tufala tokpiksa hia taem hem sei: “Dastawe, gohed for lukaot, bikos iufala no savve long datfala day or taem.” Hem talem olketa disaepol bae olketa no savve long barava taem wea hem bae finisim world bilong Satan. (Matt. 25:13) Iumi tu mas “gohed for lukaot.” Why nao hem gud for iumi duim datwan? Hu nao showimaot olketa redi for datfala day? Wanem nao iumi mas duim distaem for showimaot iumi gohed for lukaot?

WHY HEM GUD FOR GOHED LUKAOT

4. Waswe, olketa Christian need for savve long taem wea end bae kam? Minim kam.

⁴ Long samfala waka or samting wea iumi duim, hem important for savve long taem. Olsem example, sapos iu garem waka long wanfala factory, garem appointment for lukim doctor, or iu bae go long wanfala ship, iu mas savve long taem mekem iu no leit. Bat olketa wea garem waka for killim dae fire wea bonem building, or sevem pipol long taem bilong natural disaster, olketa no gohed for chekim taem. Wei for duim olsem savve mekem mind bilong olketa go difren, or maet hem danger tu. Long kaen waka olsem, hem barava important for tingting strong long datfala waka, winim wei for savve long taem. Taem disfala world gogo for finis, waka for helpem pipol savve wanem olketa mas duim for sev, hem barava important. For gohed lukaot and duim wanem Jehovah laekem, iumi no need for savve long barava taem wea end bae kam. Distaem bae iumi storyim faevfala reason why hem gud iumi no savve long barava day and taem wea end bae kam.

5. From iumi no savve taem wea end bae kam, iumi garem chance for showimaot wanem?

⁵ First samting, from iumi no savve wanem taem nao end bae kam, datwan givim iumi chance for showimaot long Jehovah wanem kaen man nao iumi. Iumi savve chus for faithful long hem or nomoa. Wei wea Jehovah letem iumi for chus olsem showimaot hem tinghae long iumi. Iumi worshipim Jehovah bikos iumi lovem hem, no bikos iumi laek kasem laef olowe nomoa. (Readim Psalm 37:4.) Taem iumi duim wanem God laekem iumi hapi, and iumi luksavve hem teachim iumi bikos hem laekem iumi for kasem gud samting. (Isa. 48:17) Iumi no ting hem hard tumas for obeyim olketa law bilong hem.—1 John 5:3.

6. Sapos iumi worshipim God bikos iumi lovem hem, hem feel hao, and why nao olsem?

⁶ Mek-tu samting, from iumi no savve long datfala day or taem, datwan givim chance long iumi for mekem heart bilong Jehovah hapi. Sapos iumi worshipim Jehovah bikos iumi lovem hem, and no bikos end hem klosap or iumi laek kasem reward nomoa, iumi helpem Jehovah for pruvim Satan hem laea. (Job 2:4, 5; readim Proverbs 27:11.) Iumi savve samting wea Satan duim mekem staka pipol safa, so iumi hapi for sapotim rul bilong Jehovah, and againstim rul bilong Satan.

7. Why nao iu laek iusim laef bilong iu for duim wanem God laekem and for helpem narawan?

⁷ Mek-thri samting, from iumi no savve long barava taem wea end bae kam, datwan helpem iumi for showimaot iumi no tingim iumiseleva bat iumi laek for duim wanem God laekem, and for helpem olketa narawan. Samfala pipol distaem wea no savve long God olketa tu bilivim world bae finis. Olketa fraet and tingse klosap nao bae wanfala natural disaster finisim earth, so olketa garem disfala tingting: “Iumi kaikai and drink nomoa bikos tumoro bae iumi dae.” (1 Cor. 15:32) Bat iumi no fraet. And iumi no tingim iumiseleva nomoa. (Prov. 18:1) First samting long laef bilong iumi hem for duim wanem Jehovah laekem. Iumi willing for iusim taem, strong, and olketa samting wea iumi garem for preachim gud nius abaotem Kingdom bilong God. (Readim Matthew 16:24.) Iumi hapi for worshipim God, and especially for helpem olketa narawan savve long hem.

8. Wanem example long Bible nao showimaot iumi mas barava depend long Jehovah and long samting wea Bible talem?

⁸ Mek-foa samting, from iumi no savve long datfala day and taem, datwan helpem iumi for barava depend long Jehovah and traem best for obeyim samting wea Bible talem. From iumi no perfect, hem wei bilong iumi for depend long seleva. Paul talem disfala warning long evri Christian: “Man wea tingse hem standap strong mas keakea nogud hem foldaon.” Hem story abaotem 23,000 Israelite wea no obeyim Jehovah and dae taem datfala nation redi for go insaed long Promis Land. Paul sei olketa samting hia “stap long olketa Holy Raeting for warnim iumi wea stap long disfala taem wea world hem klosap for finis.”—1 Cor. 10:8, 11, 12.

9. Hao nao olketa hard samting savve strongim faith bilong iumi and helpem iumi fren gud witim Jehovah?

⁹ Mek-faev samting, wei wea iumi no savve long taem wea end bae kam hem helpem iumi for lane from olketa hard samting wea kasem iumi, and datwan strongim faith bilong iumi. (Readim Psalm 119:71.) Olketa last day distaem “barava difren and . . . evri samting hem hard tumas.” (2 Tim. 3:1-5) Staka pipol long disfala world bilong Satan heitim iumi, so maet iumi kasem persecution bikos long faith bilong iumi. (John 15:19; 16:2) Bat olketa hard samting wea kasem iumi savve strongim faith bilong iumi. Sapos iumi hambol and followim wanem God talem, olketa hard taem bae no mekem iumi stop for worshipim Jehovah, bat olketa bae helpem iumi for barava fren gud witim hem.—Jas. 1:2-4; 4:8.

10. Wanem nao savve mekem taem go pas kwiktaem?

¹⁰ Taem savve go pas kwiktaem or savve slow tumas. Sapos iumi busy and no evritaem chekim taem, taem savve go pas kwiktaem. Olsem tu, sapos iumi busy long waka wea Jehovah givim iumi, bae end hem kam kwiktaem. Staka long olketa anointed Christian showimaot gudfala example for iumi long wei for busy long waka bilong God. Distaem bae iumi storyim samting wea happen bihaen Jesus kamap King long 1914, and wei wea samfala anointed Christian showimaot olketa redi bat olketa narawan no redi.

OLKETA ANOINTED CHRISTIAN WEA SHOWIMAOT OLKETA REDI

11. Bihaen 1914, why nao samfala anointed Christian tingse Jesus hem leit?

¹¹ Tingim moa tufala tokpiksa bilong Jesus abaotem tenfala gele and tenfala silver selen. Sapos tenfala gele savve long taem wea man wea bae marit bae kam, or tenfala wakaman savve long taem wea datfala boss bae kam, bae olketa no need for gohed lukaot. Bat olketa no savve, so olketa mas gohed for lukaot. Staka year bifor 1914, olketa anointed Christian savve datwan bae hem barava spesol year, bat olketa no really sure wanem nao bae happen long datfala taem. Taem wanem olketa laekem for happen hem no happen, samfala long olketa tingse Jesus hem leit. Wanfala brata sei olsem abaotem samting wea happen long October 1914: “Samfala long mifala barava sure bae mifala go long heven long firstfala week bilong October.”

12. Hao nao staka anointed Christian showimaot olketa faithful and wise?

¹² Masbi olketa feel nogud taem olketa tingse end bae kam bat hem no kam! Nara samting tu, olketa brata hia kasem persecution long taem bilong World War I. Preaching waka hem klosap stop. Hem olsem olketa anointed Christian sleep long datfala taem. Bat long 1919, wanfala samting nao mekem olketa wekap! Jesus kam for lukluk gud long olketa wea sei olketa Christian. Samfala long olketa anointed Christian no redi taem Jesus kam, so olketa lusim privilege for duim waka bilong Jesus. (Matt. 25:16) From olketa no gohed for lukaot, olketa olsem faevfala gele wea no garem gudfala tingting wea no refillim oil for laet bilong olketa. And olsem datfala lesy wakaman wea no duim wanem boss askem, olketa hia no willing for mekem sakrifaes for saed bilong Kingdom. Bat staka anointed Christian long datfala taem olketa faithful and showimaot olketa barava laek duim wanem Jesus askem, nomata datwan hem no isi long olketa year wea war hem gohed.

13. Wanem nao tingting bilong olketa anointed Christian bihaen 1914, and long distaem?

¹³ Bihaen 1914, wanfala article insaed The Watchtower sei: “Olketa brata, iumi wea garem stretfala tingting no feel nogud long eni arrangement bilong God. Iumi no laekem samting for happen followim tingting bilong iumiseleva. So taem wanem iumi laekem for happen hem no happen long October, 1914, iumi hapi Lord no changem Plan bilong Hem for fitim tingting bilong iumi. Iumi no expectim Hem for duim olsem. Main samting iumi laekem nao hem for minim gud olketa plan bilong Hem.” Olketa anointed Christian distaem garem semkaen hambol tingting and laekem tu for duim wanem God laekem. Olketa no sei samting wea olketa talem and duim hem stret evritaem. Bat olketa traem best for duim waka wea Jesus talem olketa for duim long earth. And distaem staka Christian wea garem hope for laef olowe long earth, wea hem nao “olketa nara sheepsheep,” olketa followim example bilong olketa anointed Christian hia.—Rev. 7:9; John 10:16.

OLKETA NARA SHEEPSHEEP SHOWIMAOT OLKETA REDI

14. Why nao hem gud for iumi obeyim wanem datfala wakaman wea faithful and wise hem teachim?

¹⁴ God markem datfala wakaman wea faithful and wise for provaedem spiritual kaikai for teachim pipol bilong hem for kasem gud samting from Bible and holy spirit. Olsem olketa anointed Christian duim, olketa long datfala big crowd wea gohed lukaot obeyim wanem datfala wakaman teachim. Taem olketa duim olsem, hem olsem olketa gohed fulimap laet bilong olketa witim oil. (Readim Psalm 119:130; John 16:13.) So datwan helpem olketa long datfala big crowd tu for gohed redi for end, taem Christ kam bak, and hem strongim olketa for gohed faithful nomata olketa kasem barava hard taem. Olsem example, long wanfala prison camp bilong olketa Nazi, olketa brata wea stap long there garem wanfala Bible nomoa. So olketa prea for kasem samfala moa spiritual kaikai. No longtaem bihaen datwan, olketa herem wanfala brata hem arrive long datfala prison camp. Hem garem wanfala wooden leg, and hem haedem samfala copy bilong wanfala niu Wastaoa magasin insaed datwan and tekem kam insaed prison. Brata Ernst Wauer, wanfala anointed Christian wea stap long datfala prison long semtaem tu, hem sei olsem: “Jehovah barava helpem mifala for rememberim olketa point insaed olketa article hia wea barava encouragem mifala.” Hem sei tu: “Distaem, iumi garem staka spiritual kaikai bat waswe, iumi tinghae long evri spiritual kaikai hia? Mi barava sure Jehovah bae givim staka blessing long olketa wea trustim hem, gohed faithful, and kaikai long spiritual tebol bilong hem.”

15, 16. (a) Wanem blessing nao wanfala hasband and waef kasem from hard waka wea tufala duim long ministry? (b) Hao nao olketa experience olsem savve helpem iu?

¹⁵ Olketa nara sheepsheep tu busy for duim preaching waka, wea diswan helpem olketa brata bilong Christ. (Matt. 25:40) Olketa no olsem datfala nogud slave long tokpiksa bilong Jesus wea hem lesy. Olketa willing for waka hard and mekem olketa sakrifaes for saed bilong Kingdom. Olsem example, Jon and Masako kasem invitation for go long Kenya for help long Chinese territory. Firstaem tufala hol bak lelebet, bat bihaen tufala prea abaotem and ting raonem evri samting, tufala disaed for go long there.

¹⁶ Jehovah barava blessim hard waka bilong tufala. Olketa sei: “Mitufala barava enjoyim ministry long hia.” Tufala startim sevenfala Bible study, and kasem staka nara naes experience tu. Olketa sei moa: “Evriday mitufala sei thankiu long Jehovah for letem mifala kam long hia.” Samting wea staka nara brata and sista duim distaem tu showimaot olketa laek gohed busy long waka bilong God go kasem taem end hem kam. Staka thousand brata and sista attendim finis Gilead Skul and duim missionary waka. Iu savve readim moa samting abaotem waka bilong olketa missionary long article “Mifala Duim Best Bilong Mifala!” long Wastaoa, October 15, 2001. Taem iu readim datfala interesting article abaotem laef bilong olketa missionary, tingim samfala wei wea iu savve duim moa samting long waka bilong God. Datwan bae mekem Jehovah kasem praise and bae mekem iu moa hapi.

IU TU MAS GOHED FOR LUKAOT

17. Olketa wanem gud samting nao iumi kasem from iumi no savve long day and taem wea end bae kam?

¹⁷ Nomata iumi no savve long barava day or taem wea end bae kam, datwan no mekem iumi feel nogud. Iumi kasem gud samting from iumi no savve long datwan. Diswan helpem iumi for gohed busy for duim wanem God laekem, and for barava fren gud witim Dadi bilong iumi, Jehovah. From iumi gohed busy long waka wea Jesus givim long iumi and no busy long olketa nara samting, iumi savve barava hapi taem iumi worshipim Jehovah.—Luke 9:62.

18. Why nao iumi laek for gohed faithful long waka bilong God?

¹⁸ Disfala world hem barava klosap for finis, so iumi laek gohed faithful long waka bilong God. Iumi no laek mekem Jehovah and Jesus feel sorre. Tufala givim iumi nambawan waka for duim long olketa last day distaem. Iumi barava tinghae long wei wea tufala trustim iumi for duim datfala waka!—Readim 1 Timothy 1:12.

19. Wanem nao iumi mas gohed duim mekem iumi redi taem end hem kam?

¹⁹ Nomata hope bilong iumi hem for go long heven or for stap insaed Paradaes long earth, iumi mas gohed faithful for obeyim komand bilong God for preach and teachim pipol for kamap disaepol. Iumi no need for savve long barava day and taem wea end bae kam. Bae iumi redi for datfala taem! (Matt. 24:36, 44) Iumi barava sure sapos iumi trustim Jehovah, and Kingdom bilong hem nao first samting long laef bilong iumi, bae iumi nating sorre.—Rom. 10:11.