Olketa Barava Willing for Preach Long Norway
LONG 2009, Roald and Elsebeth, wea klosap 50 year, tufala garem gudfala living. Olketa stap long Bergen, wanfala main taon long Norway. Tufala garem wanfala dota and son, wea nem bilong tufala, Isabel and Fabian. Fofala evriwan faithful for sapotim olketa waka long kongregeson. Roald hem elder and Elsebeth hem pioneer. Isabel and Fabian tufala strong pablisa.
Long September 2009, olketa disaed for go preach long farawe territory for wan week. So Roald and Elsebeth witim Fabian, wea hem 18 year long datfala taem, go long Nordkyn long Finnmark, long Arctic. Olketa preach long Kjøllefjord vilij witim olketa nara brata and sista wea kam tu for preach long there. Roald hem sei: “Long start bilong datfala week, mi hapi tumas from mi changem samfala samting long laef bilong mi mekem mi fit for duim disfala spesol waka for wanfala full week.” Bat long datfala sem week nomoa, wanfala samting hem happen wea affectim tingting bilong hem. Wanem nao happen?
KWESTIN WEA MEKEM MI SEKE
Roald hem sei: “Seknomoa Mario, wea hem pioneer long Finnmark, askem sapos mifala bae willing for muv go long Lakselv, for helpem kongregeson long there wea garem 23 pablisa.” Roald hem seke long datfala kwestin. Hem sei: “Mitufala Elsebeth story finis abaotem wei for muv go long ples wea needim samfala pablisa moa, bat mifala ting for duim datwan bihaen olketa pikinini big finis and no stap moa witim mifala.” Nomata olsem, long first tu-thri day wea Roald hem preach long Arctic, hem luksavve pipol long there willing for lane abaotem Jehovah. Hem luksavve olketa needim help long datfala taem, no long bihaen. Hem sei: “Kwestin bilong Mario hem pokem konsens bilong mi and from mi tingting tumas abaotem datwan, mi no sleep gud for tu-thri naet.” Then Mario draevem Roald and famili bilong hem long Lakselv, wea hem 240 kilometer south long Kjøllefjord. Mario laekem Roald and famili bilong hem for meetim olketa brata and sista long datfala smol kongregeson.
Long Lakselv, Andreas wea hem wanfala elder long there, hem tekem Roald and famili bilong hem for lukluk long datfala ples and showim Kingdom Hall long olketa. Kongregeson barava welkamim olketa and talem Roald and Elsebeth bae olketa hapi tumas sapos famili bilong olketa savve muv go long there for helpem olketa preachim gud nius. Andreas hem smile and sei hem arrangem finis interview for waka for Roald and Fabian. Wanem nao bae famili hia duim?
WANEM NAO BAE OLKETA DUIM?
Fabian sei long firstaem hem les for muv. Hem no laek lusim olketa fren wea hem growap witim long hom kongregeson bilong hem and muv go long wanfala smol taon. And tu, hem no finisim yet training bilong hem for waka olsem electrician. Bat taem olketa askem Isabel (wea 21 year long datfala taem) abaotem tingting bilong hem, hem sei: “Hem nao samting wea mi laekem tumas for duim!” Isabel hem sei: “Bat long bihaen, taem mi tingting raonem datwan, mi no really sure sapos hem gud idea or nomoa. Mi wari nogud mi misstim olketa fren bilong mi. Mi ting maet hem gud for stap nomoa long sem kongregeson wea hem isi and mi getius long hem.” Wanem nao tingting bilong Elsebeth? Hem sei: “Long tingting bilong mi, diswan hem assignment from Jehovah, bat mi tingting tu abaotem haos bilong mifala wea mifala just duim samfala waka long hem, and evri samting long haos wea mifala ownim and peim insaed 25 year wea go pas.”
Long end bilong datfala week, Roald and famili bilong hem go bak long Bergen, bat olketa gohed tingim olketa Christian brata and sista long Lakselv, wea stap 2,100 kilometer from Bergen. Elsebeth hem sei: “Mi gohed prea strong long Jehovah, and mi gohed story witim olketa brata and sista long there and mifala sendem olketa piksa and experience long each other.” Roald hem sei: “Mi needim lelebet taem for ting raonem diswan. And tu, mi mas ting raonem hao mifala bae kasem need long there. Mi prea long Jehovah staka taem abaotem diswan and story raonem witim famili and olketa mature brata.” Fabian hem sei: “Taem mi tingting raonem gud, mi luksavve mi no garem eni gudfala reason for no go. Staka taem mi prea long Jehovah abaotem diswan, and gogo mi barava laek for muv nao.” Waswe long Isabel? Hem start for pioneer long homtaon bilong hem, mekem hem savve redi sapos olketa muv. Bihaen hem pioneer for sixfala month and spendem staka taem for studyim Bible, hem feel olsem hem redi for muv.
SAMTING OLKETA DUIM FOR KASEM DATFALA GOAL
Taem Roald and famili bilong hem disaed for muv go long datfala ples wea needim samfala pablisa moa, olketa duim samfala samting for kasem datfala goal. Nomata Roald garem gudfala waka wea hem enjoyim, hem askem boss sapos hem savve off for wanfala year. Bat boss laekem hem for duim part-taem waka. Hem sei for Roald waka for tufala week, then hem savve off for sixfala week. Roald hem sei: “Pei bilong mi barava kat daon, bat mifala kasem wanem mifala needim.”
Elsebeth sei: “Hasband bilong mi askem mi for trae faendem wanfala haos long Lakselv, and for faendem eniwan for rentim haos bilong mifala long Bergen. Hem no isi, bat gogo mifala duim datwan.” Hem sei moa: “Bihaen lelebet taem, olketa pikinini faendem part-taem waka and tufala helpem mifala for peim kaikai and petrol.”
Isabel sei: “From datfala taon hem smol, hem no isi for mi faendem part-taem waka for sapotim pioneer waka bilong mi. Samfala taem, hem luk olsem hem hard tumas nao.” Nomata olsem, from Isabel willing for duim eni part-taem waka wea hem savve faendem, hem fit for kasem need bilong hem. Insaed firstfala year, hem faendem naenfala part-taem waka. Waswe long Fabian? Hem sei: “For kasem pepa for duim waka olsem electrician, mi mas gohed kasem training. Mi duim datwan long Lakselv. Gogo, mi kasem pepa bilong mi and mi faendem part-taem waka olsem electrician.”
WANEM OLKETA NARAWAN DUIM
Marelius and waef bilong hem Kesia tu laek for go long ples wea needim samfala pablisa moa. Marelius, wea hem 29 year distaem, hem sei: “Olketa convention tok and interview abaotem pioneer waka mekem mi tingting for duim moa samting long ministry.” Bat Kesia, wea hem 26 year distaem, hem no laek muv farawe from famili bilong hem. Hem sei: “Mi les for stap farawe from olketa wea mi lovem.” Nara samting tu, Marelius hem waka full-taem for peim loan long haos bilong tufala. Hem sei: “Jehovah helpem mifala and mifala prea long hem staka taem for helpem mifala mekem samfala change. Gogo mifala fit for muv.” First samting tufala duim hem for spendem moa taem for studyim Bible. Then tufala salem haos, resign from waka, and long August 2011 tufala muv go long Alta, long north part bilong Norway. For sapotim pioneer waka bilong tufala, Marelius hem waka olsem accountant and Kesia hem waka long wanfala stoa.
Knut and Lisbeth, wanfala hasband and waef wea winim 30 year, kasem encouragement from olketa story insaed Yearbook abaotem olketa wea muv go long ples wea needim samfala pablisa moa. Lisbeth sei: “Olketa experience hia nao mekem mifala ting for muv go long nara kantri, bat mi hol bak bikos mi no tingse mi savve duim kaen samting olsem.” Nomata olsem, tufala duim samfala samting for kasem goal bilong tufala. Knut sei: “Mitufala salem haos bilong mifala, and go stap witim mami bilong mi mekem mifala no need for peim rent. Bihaen, for helpem mitufala savve hao nao bae ministry long nara kantri, mifala muv go long wanfala English-languis kongregeson long Bergen for wanfala year. Long there, mifala stap witim mami bilong Lisbeth.” No longtaem bihaen, Knut and Lisbeth disaed tufala redi for go long nara kantri, so tufala muv go long Uganda. Tufala month evri year, tufala kam bak long Norway for waka for selen. Selen wea tufala kasem mekem tufala fit for stap long Uganda and preach full taem for olketa nara month long year.
‘TRUSTIM JEHOVAH AND BAE IU LUKSAVVE HEM GUD’
Wanem nao happen long evriwan hia wea willing for muv long ples wea needim samfala pablisa moa? Roald sei: “Taem mifala muv long disfala ples famili bilong mifala garem taem for duim moa samting tugeta winim taem mifala stap long Bergen. Famili bilong mifala fren gud tugeta, and hem blessing for lukim tufala pikinini bilong mifala gohed fren gud witim Jehovah.” Hem sei moa: “And tu, mifala no tingim tumas olketa material samting. Distaem mifala luksavve olketa samting hia no important.”
Elsebeth luksavve bae hem gud sapos hem lanem nara languis. Why nao olsem? Karasjok vilij wea hem hom bilong Sami pipol hem insaed territory bilong Lakselv kongregeson. Sami pipol hem olketa native pipol long north part bilong Norway, Sweden, Finland, and Russia. From Elsebeth laek for preach long olketa pipol hia, hem tekem wanfala course for lanem Sami languis. Distaem hem savve story lelebet long datfala languis. Waswe, hem enjoyim niu territory bilong hem? Hem smile big and sei: “Mi garem sixfala Bible study. Mi hapi tumas for pioneer long hia!”
Fabian, wea distaem hem pioneer and ministerial servant, storyim hao hem and Isabel helpem thrifala teenager long niu kongregeson bilong olketa wea needim encouragement for duim moa samting long kongregeson. Distaem thrifala evriwan strong for duim preaching waka. Tufala baptaes finis and duim auxiliary pioneer long March 2012. Wanfala teenager hia wea hem wik long bifor, hem sei thankiu long Fabian and Isabel for helpem hem for “strong bak moa.” Fabian sei: “Mi tinghae long wanem hem talem. Mi barava hapi for savve mi helpem narawan!” Isabel sei: “Disfala assignment mekem mi luksavve ‘Jehovah hem gud tumas.’” (Ps. 34:8) Hem sei tu: “Mi barava enjoyim disfala assignment!”
Nomata laef bilong Marelius and Kesia distaem hem simpol, tufala barava hapi. Kongregeson bilong tufala long Alta hem garem 41 pablisa distaem. Marelius sei: “Laef bilong mitufala hem barava difren, bat datwan hem gud tumas. Mifala thankiu long Jehovah mifala savve pioneer long hia. Diswan mekem mifala hapi tumas.” Kesia sei: “Mi lane for barava trustim Jehovah, and hem lukaftarem gud mitufala. Mi luksavve taem mi stap farawe from famili bilong mi datwan mekem mi tinghae long taem wea mifala savve spendem tugeta. Mi nating sorre from mitufala disaed for muv kam long hia.”
Waswe, Knut and Lisbeth gohed gud long Uganda? Knut sei: “Hem tek taem for mitufala getius long niu ples and culture. Samfala taem mifala garem problem saed long wata, paoa, and sik. Nomata olsem, staka pipol laek for studyim Bible!” Lisbeth sei: “Samfala territory klosap long ples wea mifala stap no eniwan preach long there bifor. Bat taem mifala kasem olketa ples hia, mifala lukim pipol gohed readim Bible and olketa askem mifala for teachim olketa. Mifala hapi tumas mifala savve teachim Bible long hambol pipol olsem!”
Masbi Leader bilong iumi Jesus Christ hem hapi tumas for lukim preaching waka wea hem startim long earth hem kasem staka ples distaem! Pipol bilong God evriwea long earth barava willing and hapi tumas for obeyim komand bilong Jesus for “teachim pipol long evri kantri for kamap disaepol.”—Matt. 28:19, 20.