Wat Nao Iu Savve Duim for God Lisin lo Prea blo Iu?
Jehovah God ‘oltaem ansarem prea blo iumi.’ (Sams 65:2) Iumi savve prea enitaem and lo eni ples, and iumi savve prea big or smol. Jehovah laekem iumi for kolem hem “Dadi,” and hem nao best Dadi. (Matthew 6:9) Jehovah teachim iumi hao for prea and wat for duim for hem lisin lo prea blo iumi bikos hem lovem iumi.
PREA LO JEHOVAH GOD LO NEM BLO JESUS
“Sapos iufala askem Dadi for eni samting long nem bilong mi, bae hem givim long iufala.”—John 16:23.
Scripture hia showim Jehovah no laekem iumi for iusim idol, or nem blo eni angel, saint, or man wea dae finis, taem iumi prea lo hem, bat for iusim nem blo Jesus Christ. Taem iumi duim olsem, datwan showim iumi tinghae lo wat hem duim for iumi. Jesus sei: “Mi nomoa road for man go long Dadi long heven.”—John 14:6.
STORYIM TINGTING AND FEELING BLO IU
“Talemaot olketa trabol blong yufala long hem.”—Sams 62:8.
Taem iumi prea lo Jehovah, iumi shud story lo hem olsem dadi wea lovem iumi. Iumi shud no read from buk or repeatim samting iumi memorizim, bat iumi shud story witim respect and from heart.
PREA FOLLOWIM WILL BLO GOD
“Eni samting wea iumi askem wea followim tingting bilong God, God hem herem iumi.”—1 John 5:14.
Iumi readim lo Bible, wat Jehovah God bae duim for iumi and wat hem laekem iumi for duim. For hem lisin lo prea blo iumi, iumi mas prea ‘followim tingting blo hem.’ For duim olsem, iumi need for studyim Bible mekem iumi savve gud lo hem. Datwan bae mekem God lisin lo prea blo iumi.
WAT NAO IUMI SAVVE PREA FOR HEM?
Prea for Olketa Samting Iumi Needim. Iumi savve prea lo God for kaikai, kaleko, ples for stap, wisdom for helpem iumi mekem gud disison, and for hem strongim iumi for no givap lo olketa hard taem. Iumi savve prea tu for hem forgivim iumi, givim iumi faith, and for helpem iumi.—Luke 11:3, 4, 13; James 1:5, 17.
Prea for Olketa Narawan. Parents hapi taem olketa lukim olketa pikinini lovem each other. Jehovah tu laekem olketa pikinini blo hem lo earth for lovem each other. Hem gud for prea for famili, pikinini, olketa fren, and for hasband and waef prea for each other. Disaepol James sei: “Prea for olketa narawan.”—James 5:16.
Talem Thankiu. Bible storyim Creator taem hem sei: “Hem duim olketa gud samting for . . . iufala. Hem givim rain for iufala and mekem garden bilong iufala barava grow gud. Hem givim staka kaikai and mekem iufala hapi.” (Acts 14:17) Taem iumi tingim evri samting wea God duim for iumi, bae iumi laek for prea lo hem for talem thankiu. Iumi showim iumi thankiu lo God tu taem iumi obeyim hem.—Colossae 3:15.
MAS PATIENT AND GOHED PREA
Samfala taem iumi laek givap bikos iumi no stretawe kasem ansa for olketa prea blo iumi. Hao datwan showim God no lovem iumi? Nomoa! Bae iumi storyim samfala experience wea showim iumi mas gohed for prea.
Steve wea iumi storyim lo first article hem sei: “Sapos mi no gohed prea, bae mi no garem hope and no hapi moa.” Wat nao mekem hem change? Hem studyim Bible and lanem, hem mas gohed for prea. Steve sei: “Mi prea lo God and talem thankiu lo hem for sapot wea mi kasem from olketa gud fren blo mi. Distaem mi barava hapi.”
Jenny wea iumi storyim finis wea tingse hard for God herem prea blo hem sei: “Lo taem wea mi barava feel iusles, mi begim God for helpem mi minim why mi feel olsem.” Hao nao prea helpem hem? Hem sei: “Mi prea lo God and hem helpem mi for luksavve nomata heart blo mi mekem mi feel guilty God savve gud lo mi winim miseleva. Prea helpem mi tu for no givap.” Eni gud samting hem kasem? Hem sei: “Prea helpem mi for tingim Jehovah hem stap, hem lovem mi, kea for mi, hem Dadi and Fren, wea evritaem stanbae for helpem mi taem mi traem best for mekem hem hapi.”
Taem Isabel lukim Gerard gohed hapi nomata hem disable, hem sei: “Mi luksavve hem best ansa for olketa prea blo mi”
Tingim tu wat kasem Isabel. Taem hem babule, doctor talem bae baby blo hem disable taem hem born. Hem sorre tumas. Samfala sei for hem spoelem datfala baby. Hem sei: “From mi sorre tumas mi tingse bae mi dae nao.” Wat nao hem duim? Hem sei: “Mi gohed prea lo God for helpem mi.” Gogo, hem bornem Gerard, baby boy wea disable. Lo tingting blo Isabel, God ansarem olketa prea blo hem? Ia. Hao nao God ansarem hem? Isabel sei: “Taem mi lukim son blo mi wea 14 years old distaem hem gohed hapi nomata hem disable, mi luksavve hem best ansa for olketa prea blo mi and hem nambawan blessing wea Jehovah God givim lo mi.”
Wat evriwan talem mekem iumi tingim toktok blo man wea raetem psalms: “[Jehovah] . . . bae yu herem olketa pipol blong yu . . . , an bae yu mekem tingting blong olketa fo kamap strong.” (Sams 10:17) Iumi garem olketa gudfala reason for gohed prea and no givap!
Bible garem staka prea blo Jesus. Wanfala prea wea staka pipol savve, hem prea wea hem teachim lo olketa disaepol. Wat nao iumi savve lanem from datfala prea?