ANSA FOR OLKETA BIBLE KWESTIN

Why nao Bible sei Jesus hem Son bilong God?

God no need for garem waef for bornem olketa pikinini for hem bikos hem nao wakem evri samting wea laef. God wakem olketa man for savve followim olketa wei bilong hem. Dastawe Bible kolem Adam, firstfala man wea God wakem, “son bilong God.” Jesus tu Bible kolem hem “son bilong God” bikos God wakem Jesus for garem olketa wei bilong hem.—Readim Luke 3:38; John 1:14, 49.

Wanem taem nao God wakem Jesus?

God wakem Jesus firstaem bifor hem wakem Adam. Hem iusim Jesus for wakem olketa angel and evri nara samting. Dastawe Bible sei Jesus hem “firstborn long evri samting wea God wakem.”—Readim Colossae 1:15, 16.

Jesus hem wanfala angel long heven firstaem bifor hem born olsem wanfala man long Bethlehem. For Jesus hem born olsem wanfala man long earth, God hem iusim holy spirit for putim laef bilong hem insaed long bele bilong Mary.—Readim Luke 1:30-32; John 6:38; 8:23.

Why nao God mas sendem kam Jesus for born olsem wanfala man long earth? Wanem important samting nao Jesus kam for duim long earth? Iu savve faendem ansa for olketa kwestin hia long Bible and olketa ansa hia bae barava helpem iu for savve and tinghae long wanem God and Jesus duim for iu.