Jesus Hem Hapi and Satisfae

WASWE, Jesus hem hapi and satisfae? Mami and dadi bilong hem no garem staka material samting, and Jesus tu no garem staka samting. Bible sei Jesus “no garem eni ples bilong hemseleva wea hem savve sleep long hem.” (Luke 9:57, 58) And tu, pipol heitim hem, laea for spoelem hem and gogo olketa killim hem dae.

Maet iu sei, ‘Kaen laef olsem no savve mekem man hapi and satisfae!’ Bat iumi bae storyim olketa nara samting wea Jesus duim wea mekem hem hapi and satisfae. Bae iumi storyim fofala samting.

1. JESUS KAM FOR DUIM WANEM JEHOVAH LAEKEM.

“Kaikai bilong mi hem for duim waka wea man wea sendem mi kam hem laekem mi for duim.”—John 4:34.

Wanem Jesus duim and talem showimaot hem laek for duim wanem Dadi bilong hem Jehovah laekem.a Taem Jesus duim wanem God laekem datwan mekem hem hapi. Olsem John 4:34 talem, Jesus markem wanem God laekem witim kaikai. Tingim samting wea happen long Jesus taem hem talem datwan.

Jesus wakabaot for full morning long olketa hill long Samaria. Taem hem talem datfala toktok hem samting olsem 12 klok, so masbi hem barava hangre. (John 4:6) Olketa disaepol bilong hem sei: “Teacher, iu kaikai nao.” (John 4:31) Ansa wea Jesus talem showimaot wei for duim wanem God laekem hem olsem kaikai wea strongim hem. So Jesus hem hapi and satisfae taem hem duim wanem God laekem.

2. JESUS LOVEM TUMAS DADI BILONG HEM.

“Mi lovem Dadi.”—John 14:31.

Jesus barava fren gud witim Dadi bilong hem long heven. From Jesus barava lovem Dadi bilong hem, hem laek for story long pipol abaotem nem bilong God, plan bilong Hem and olketa wei bilong Hem. Olketa toktok bilong Jesus, samting wea hem duim, and olketa wei bilong hem barava olsem Dadi bilong hem. Dastawe taem Philip askem Jesus: ‘Showim Dadi long mifala,’ Jesus sei: “Man wea lukim mi hem lukim Dadi tu.”—John 14:8, 9.

Jesus barava lovem Dadi bilong hem dastawe hem willing for obeyim Hem nomata hem mas dae. (Philippi 2:7, 8; 1 John 5:3) From Jesus lovem God tumas datwan mekem hem hapi and satisfae.

3. JESUS LOVEM PIPOL.

“Man wea barava showimaot bigfala love nao hem man wea willing for dae for olketa fren bilong hem.”—John 15:13.

Luk olsem iumi olketa man no garem eni hope nao from iumi sin. Bible hem sei: “Sin hem kasem evriwan long world bikos long wanfala man [Adam] nomoa. From olketa sin, olketa dae, dastawe evriwan dae bikos evriwan sin.” (Rome 5:12) From iumi sin iumi dae, so iumi needim samwan for sevem iumi from dae.—Rome 6:23.

Iumi hapi tumas bikos Jehovah provaedem samwan for sevem iumi. Jesus wea hem perfect Son bilong God nao Jehovah sendem kam long earth. Hem safa and dae for sevem iumi olketa man from sin and dae. From Jesus barava lovem Dadi bilong hem and iumi olketa man, hem willing for givim perfect laef bilong hem for sevem iumi. (Rome 5:6-8) Jesus hapi and satisfae from hem lovem pipol.b

4. JESUS SAVVE DADI BILONG HEM LOVEM HEM AND HAPI LONG HEM.

“Diswan nao Son bilong mi wea mi lovem and wea mi hapi long hem.”—Matthew 3:17.

Jehovah talem datfala toktok taem Jesus hem baptaes. Datwan showimaot hem lovem and hapi long Son bilong hem, Jesus. Dastawe Jesus sei: “Dadi long heven lovem mi”! (John 10:17) From Jesus savve Jehovah lovem and hapi long hem datwan helpem hem for no fraet nomata pipol againstim and spoelem hem. Datwan tu helpem hem for deal witim olketa samting wea happen long hem taem hem redi for dae. (John 10:18) Jesus hapi and satisfae from hem savve Dadi bilong hem lovem and hapi long hem.

Tru tumas, Jesus hem hapi and satisfae. So iumi tu savve hapi and satisfae sapos iumi followim example bilong hem. Next article bae storyim samfala advaes wea Jesus givim long olketa aposol bilong hem long hao for hapi and satisfae.