Waswe, Iu Savve Trustim God?

TINGIM sapos iu garem wanfala fren wea iu barava tinghae long hem, bat then hem duim samfala samting wea iu no minim why nao hem duim datwan. Olketa narawan tok againstim hem and sei hem duim datwan bikos hem no tingim narawan. Waswe, bae iu kwiktaem for agree witim olketa, or bae iu go long fren bilong iu and herem story bilong hem firstaem? Sapos iu no herem story bilong hem yet, waswe, bae iu trustim hem and patient for herem story bilong hem?

Bifor iu disaed, hem gud for tingim, ‘Waswe, mi savve evri samting abaotem fren bilong mi, and wanem nao mekem mi tinghae long hem?’ Hem gud for iumi tingim olketa samting hia tu bifor iumi sei God no tingim iumi.

Maet hem hard for iu minim why nao God duim samfala samting, or why hem letem samfala samting for happen. Maet samfala pipol talem iu God no tingim iumi and olketa bae laekem iu for agree witim olketa. Waswe, bae iu trustim God and trae for savve long samfala samting moa abaotem hem bifor iu disaed? And hem gud for iu tingim wanem nao mekem iu tinghae long God.

Sapos iu kasem hard taem, maet bae iu tingse God nating tingim iu nomoa. Bat waswe, God nao bihaenem olketa nogud samting wea kasem iumi, or hem givim olketa gud samting long iumi? Iumi storyim finis Satan hem “rulim disfala world,” no Jehovah. (John 12:31) Satan nao bihaenem olketa nogud samting long world. And tu, iumi savve kasem hard taem bikos iumi no perfect and from seknomoa samting hem happen.

Tingim samfala samting wea God duim for iumi. Bible sei God “wakem skae and earth,” hem ‘wakem iumi long nambawan wei,’ and tu ‘laef bilong iumi stap long hand bilong hem.’ (Psalm 124:8; 139:14; Daniel 5:23) Hao nao olketa samting hia helpem iumi for trustim God?

Iumi luksavve God nao mekem iumi laef. (Acts 17:28) Iumi hapi iumi laef bikos iumi savve enjoyim olketa naes samting wea God wakem long world. Iumi lovem olketa famili member and iumi fren gud witim narawan. Wei for hagem olketa wea iumi lovem, enjoyim naes kaikai, lisin long olketa naes music, and smelem olketa naes flaoa hem mekem iumi hapi. Iumi luksavve evri gud samting God nao givim long iumi. (James 1:17) Evri samting hia mekem iumi tinghae long hem and iumi luksavve God hem fren wea iumi savve trustim.

Maet hem hard for iu trustim God bikos iu no savve gud long hem yet. Olketa article hia hem no storyim evri reason wea pipol garem for sei God hem no tingim iumi. Bat bae hem gud sapos iu traem best for savve long God.a Sapos iu duim olsem, bae iu savve long tru samting abaotem God. Bae iu savve God hem tingim iumi from “God hem love.”—1 John 4:8.