Why Nao Pipol Sei God No Tingim Iumi?

SAMFALA sei God hem lovem iumi. Bat staka pipol distaem no sure sapos datwan hem tru. Why nao olsem?

Samfala wea kasem natural disaster askem olketa kwestin olsem: Why nao God letem olketa samting hia for happen? Waswe, God tingim iumi tu?

Olketa narawan tingse God hem no tingim iumi bikos long samfala story long Bible, olsem story abaotem Flood long taem bilong Noah. Olketa no minim why God wea garem love hem mekem datfala Flood for killim dae pipol long datfala taem.

Waswe, iu minim why God letem olketa nogud samting olsem for happen? Or sapos samwan sei God no tingim iumi, waswe, iu savve sapos datwan hem tru or nomoa? Firstaem, bae hem gud for ting raonem nara kwestin.

WHY NAO IUMI HEITIM BARAVA NOGUD SAMTING WEA HAPPEN?

Iumi heitim nogud samting bikos iumi laekem stret samting. Datwan mekem iumi barava difren from olketa animal. God wakem iumi “for olsem hem.” (Genesis 1:27) Datwan minim iumi savve garem olketa wei bilong hem, olsem wei for laekem stret samting. So sapos iumi heitim nogud samting wea happen, datwan pruvim God hem heitim datwan tu.

Datwan hem tru bikos long Bible, God hem sei: ‘Olketa wei bilong mi and tingting bilong mi hem hae winim olketa wei and tingting bilong iufala.’ (Isaiah 55:9) Sapos iumi sei God nao bihaenem olketa nogud samting wea happen, hem olsem iumi sei wei and tingting bilong iumi hae winim God. So maet hem gud for tingim firstaem, ‘Why nao hem luk olsem God bihaenem olketa nogud samting wea happen?’ For minim diswan bae iumi storyim wei bilong man wea raf and no tingim narawan.

Taem iumi sei man hem raf hem bikos iumi tingse hem duim samting wea no stret. Man wea raf hem hapi for lukim olketa narawan kasem nogud samting and hem no kea taem olketa safa. So, dadi wea laek lukim son bilong hem feel nogud taem hem panisim hem, hem dadi wea raf and no tingim son bilong hem. Bat dadi wea panisim son bilong hem for teachim and protectim hem, hem gudfala dadi. From iumi no evritaem savve long reason why olketa narawan duim samting, hem isi for minim olketa rong.

Tufala reason wea mekem samfala tingse God hem no tingim narawan hem olketa natural disaster wea happen distaem and olketa story long Bible abaotem hao God judgem pipol. Waswe, hem tru God no tingim iumi? Iumi bae storyim tufala samting hia for helpem iumi minim diswan.