Samting wea Mekem Laef Bilong Mifala Hapi

TAEM son bilong mi Gary hem born long 1958, mi luksavve samting hem no stret. Bat Gary hem klosap wan year bifor olketa doctor luksavve wanem sik nao hem garem, and hem klosap six year bifor olketa big doctor long London sei wanem olketa nara doctor talem hem stret. Mi sorre tumas taem dota bilong mi Louise, wea born naenfala year bihaen Gary, hem garem sem sik, and olketa problem bilong hem worse winim brata bilong hem.

Olketa doctor sei: “Tufala pikinini bilong iu garem sik LMBB syndrome,a and no eni treatment stap for disfala sik.” Long datfala taem, olketa doctor no savve long staka samting abaotem datfala sik wea man born witim and wea no staka pipol garem. Man wea garem disfala sik maet garem eye problem wea savve mekem hem blind, maet hem fat tumas, garem extra finger or toe, slow for grow, stragol for duim olketa simpol samting, garem sik diabetes, osteoarthritis, or kidney problem. So bae hem no isi for mi lukaftarem tufala pikinini bilong mi. Wanfala research sei samting olsem 1-fala long evri 125,000 pipol long Britain garem disfala sik, bat maet staka narawan garem disfala sik bat hem no serious tumas.

JEHOVAH KAMAP “SEF PLES” BILONG MIFALA

No longtaem bihaen mi marit, mi story witim wanfala Jehovah’s Witness and mi luksavve olketa teachim tru samting abaotem Bible. Bat hasband bilong mi nating interest. Mifala muv long olketa difren ples evritaem bikos long waka bilong hem, so mi no savve go long olketa meeting. Nomata olsem, mi gohed for readim Bible and prea long Jehovah. Mi kasem comfort taem mi readim scripture wea sei: “Jehovah bae kamap wanfala hae sef ples for eniwan wea kasem hevi, wanfala hae sef ples long taem bilong trabol” and hem “bae nating lusim olketa wea lukaotem [hem]”!—Ps. 9:9, 10.

Gary no savve lukluk gud so taem hem six year, hem go long wanfala boarding skul wea teachim olketa pikinini wea blind, long south coast bilong England. Staka taem hem savve ringim mi taem hem garem problem, and mi savve helpem hem for minim olketa main teaching long Bible. Tu-thri year bihaen Louise hem born, mi tu kasem sik multiple sclerosis and fibromyalgia. Gary finis from boarding skul taem hem 16 year. From eye bilong hem kamap worse, long 1975 gavman putim nem bilong hem long list bilong pipol wea blind. Long 1977, hasband bilong mi hem lusim mifala.

No longtaem bihaen Gary kam bak, mifala start for go long olketa meeting, and mi baptaes long 1974. Mi tinghae long wanfala elder wea helpem Gary for deal witim olketa change long body taem hem kamap teenager. Olketa nara Witness helpem mi for duim olketa waka long haos, and gogo, gavman peim faevfala long olketa for lukaftarem mifala. Diswan hem nambawan blessing!

Gary gohed gud long truth and hem baptaes long 1982. Hem barava laek for auxiliary pioneer. So mi duim datwan witim hem for samfala year. Son bilong mi hapi tumas taem gogo circuit overseer bilong mifala sei long hem: “Gary, hem bae gud sapos iu regular pioneer!” Datwan barava encouragem Gary, and hem start for regular pioneer long 1990.

Gary kasem operation long hips bilong hem long 1999 and long 2008, bat olketa health problem bilong Louise hem worse winim Gary. Louise blind taem hem born, and taem mi lukim extra toe long leg bilong hem, mi luksavve hem tu garem LMBB syndrome. No longtaem bihaen, olketa doctor luksavve hem garem staka nara problem tu. Hem kasem samfala big operation, and faevfala taem olketa operate long kidney bilong hem. Hem tu garem diabetes olsem Gary.

From Louise savve long olketa problem wea savve kamap long taem bilong operation, hem story firstaem long olketa doctor and evriwan wea bae lukaftarem hem long hospital, mekem olketa savve why hem no acceptim blood transfusion. From hem duim datwan, evriwan wea lukaftarem hem respectim hem.

LAEF BILONG MIFALA HAPI

Mifala savve duim staka samting long haos wea join witim wei for worshipim Jehovah. Long bifor, mi savve spendem staka hour for read long Gary and Louise. Distaem olketa CD, DVD, and olketa recording from www.jw.org, mekem hem isi for mifala studyim Bible seleva long olketa difren taem long week. And tu, mifala savve givim koment long olketa meeting.

Samfala taem Gary savve baeheartim olketa koment bilong hem, and sapos hem garem tok long Theocratic Ministry Skul, hem story long toktok bilong hemseleva. Hem kamap ministerial servant long 1995 and hem evritaem busy long Kingdom Hall for welkamim olketa brata and sista, and for help witim saond.

Plande taem, olketa brata wea go witim Gary long ministry pushim wheelchair bilong hem wea hem iusim from hem garem sik arthritis. Wanfala brata helpem hem for studyim Bible witim wanfala man wea interest. Gary encouragem tu wanfala sista wea inactive for 25 year. Distaem datfala Bible study and datfala sista attendim olketa meeting.

Taem Louise hem naen year, grani bilong hem teachim hem for iusim wool for wakem kaleko, and mi witim wanfala sista wea lukaftarem hem teachim hem for sewing. From hem laekem tumas for sewing, hem wakem olketa kalakala blanket for olketa baby and olketa olo long kongregeson. Hem savve wakem tu olketa card wea garem piksa. Olketa wea kasem card from Louise barava tinghae long datwan. Taem Louise teenager, hem lane for iusim typewriter. Distaem hem iusim wanfala spesol computer for emailim olketa fren bilong hem. Louise hem baptaes taem hem 17 year. Long olketa spesol campaign for preach, mifala savve auxiliary pioneer tugeta. Olsem Gary, Louise baeheartim olketa scripture mekem hem storyim olketa promis bilong God abaotem wanfala niu world wea “eye bilong olketa wea blind bae open” and “no eniwan bae sei: ‘Mi sik.’”—Isa. 33:24; 35:5.

Mifala tinghae tumas long olketa nambawan truth from Jehovah wea stap insaed Bible! Mifala thankiu tumas long olketa brata and sista long kongregeson wea lovem and sapotim mifala, and from diswan mifala fit for duim staka samting. And from help bilong Jehovah, laef bilong mifala hem hapi.