Hao for Garem Peace Nomata lo Taem blo War and Violent Conflict
Gary wea joinim military bifor sei: “Taem mi no studyim Bible yet, mi no idea lo why nao pipol raf tumas, injustice, and trabol gohed lo world. Bat distaem mi garem peace lo mind. Mi savve Jehovah God bae mekem disfala world for kamap sef ples.”
Ino Gary nomoa feel olsem. Lukim hao Bible helpem olketa narawan.
BIBLE SEI: “Iu O Jehovah, iu gud tumas and redi for forgive.”—Psalm 86:5.
HAO DISWAN HELP: “Disfala verse assurem mi dat Jehovah hem garem mercy. Mi savve hem willing for forgivim mi for evriting wea mi duim bifor taem mi joinim war.”—Wilmar, Colombia.
BIBLE SEI: “Mi wakem nao niu skae and wanfala niu earth. And olketa samting wea happen bifor bae no kamap moa lo mind blo pipol, and bae olketa no kamap tu lo heart.”—Isaiah 65:17.
HAO DISWAN HELP: “Mi safa from stress and depression bikos lo wat mi experiencem lo military. Bat disfala scripture remindim mi dat klosap nao Jehovah bae mekem mind blo mi for kwaet and for forgetim nao evri nogud memory wea mi garem. Hem bae no stap moa insaed mind or heart blo mi. Diswan hem best present!”—Zafirah, United States.
BIBLE SEI: “Lo taem wea hem rul, olketa raeteous wan bae olsem olketa grass wea grow gud, and peace bae stap evriwea go kasem taem moon no stap moa.”—Psalm 72:7.
HAO DISWAN HELP: “Staka taem mi tingting abaotem olketa toktok hia. Klosap nao war and evriting wea war kosim bae finis, and iumi bae no wari moa abaotem safety blo olketa loved wan blo iumi.”—Oleksandra, Ukraine.
BIBLE SEI: “Olketa blo iu wea dae bae laef. . . . Wekap and singaot from iufala hapi, iufala pipol wea stap lo dust!”—Isaiah 26:19.
HAO DISWAN HELP: “Klosap evriwan lo famili blo mi nao olketa killim dae during datfala genocide againstim olketa Tutsi. Bat disfala verse assurem mi dat bae mi lukim olketa moa. Mi luk forward for herem voice blo olketa from olketa hapi taem olketa resurrect!”—Marie, Rwanda.
BIBLE SEI: “Lelebet taem nomoa stap, and wicked pipol bae nomoa nao. . . . Bat pipol wea hambol bae stap lo earth, and olketa bae hapi tumas bikos olketa bae barava stap lo peace.”—Psalm 37:10, 11.
HAO DISWAN HELP: “Nomata war hem finis, injustice and nogud pipol still stap. Olketa verse hia barava strongim mi. Jehovah lukim evriting and understandim situation blo mi. Hem promis dat klosap nao safaring bae finis and mi bae no tingim moa.”—Daler, Tajikistan.
Olketa hia wea disfala magasin storyim hem samfala nomoa lo staka million Jehovah’s Witness wea Bible helpem olketa for garem peace. Olketa lanem hao for deal witim wei for heit bikos lo race, kantri, tribe and for heitim narawan. (Ephesians 4:31, 32) Olketa Jehovah’s Witness neutral lo politik and no laek join insaed violence.—John 18:36.
And tu, Olketa Jehovah’s Witness sapotim each other olsem famili. (John 13:35) For example, Oleksandra, wea iumi storyim finis, hem and sista blo hem mas ranawe go lo nara kantri bikos lo war. Hem sei: “Taem mifala krosim border, stretawe mifala lukim olketa nara Witness lo there for welkamim mifala. Sapot blo olketa helpem mifala for adjust fitim laef lo niu kantri olsem refugee.”
Mifala invaetem iu for joinim mifala lo olketa meeting blo mifala for lanem message lo Bible wea givim peace and hao for applyim. Go lo jw.org for faendem location klosap lo iu or requestim wanfala free Bible study course witim wanfala lo Olketa Jehovah’s Witness, and iusim pablikeson Enjoyim Laef for Olowe!