Wanem Nao Iumi Savve Lanem From Wanfala Criminal?

Criminal wea bae iumi storyim, hem nao man wea Jesus story long hem long piksa. Datfala criminal hem barava sorre for olketa samting wea hem duim wea no stret. Hem sei long Jesus: “Plis, iu tingim mi taem iu King.” Iu lukim long piksa, Jesus story witim hem. Waswe, iu savve wanem nao Jesus talem hem?—a Jesus hem sei : “Mi talem iu tru samting, iu bae stap witim mi long Paradaes.”

Iu tingse datfala Paradaes bae luk hao?— For iumi savve, iumi bae storyim datfala Paradaes wea God wakem for Adam and Eve. Wea nao God wakem datfala Paradaes? Waswe, hem long heven, or hem long earth?—

Sapos iu sei hem long earth, datwan hem stret. So tingim, taem Jesus sei datfala criminal bae stap “long Paradaes,” hem minim criminal hia bae stap long paradaes long disfala earth. Datfala paradaes bae luk hao?— Bae iumi storyim datwan.

Bihaen Jehovah God wakem Adam and Eve, Bible sei hem putim tufala long wanfala paradaes long earth. Bible kolem datfala Paradaes “garden long Eden.” Waswe iu tingse datfala “garden long Eden” mas barava luk naes?— Hem mas barava luk naes winim eni ples wea iumi savve lukim distaem!

Hao nao tingting bilong iu? Waswe, bae Jesus stap witim datfala criminal long earth?— Nomoa, Jesus bae King long heven and bae hem rul ovarem Paradaes long earth. So Jesus bae stap witim datfala criminal long wei wea hem bae mekem hem laef bak long Paradaes long earth and hem mek sure hem kasem wanem hem needim. Bat why nao Jesus letem criminal man for stap long paradaes?— Bae iumi storyim datwan.

Hem tru, disfala criminal hem duim olketa barava rabis samting. Bat staka nara billion pipol tu duim olketa samting wea no stret. Staka long olketa duim olketa nogud samting bikos olketa no savve long Jehovah and olketa samting wea hem laekem olketa for duim.

So olketa pipol hia and datfala criminal wea Jesus story long hem, bae laef bak and stap long Paradaes long disfala earth. Olketa bae lanem wanem God laekem. Then olketa savve showimaot olketa lovem Jehovah.

Hao nao olketa savve showimaot olketa lovem Jehovah?— Olketa mas duim wanem God laekem. Hem bae naes tumas for stap long Paradaes and for stap witim pipol wea lovem Jehovah and lovem olketa narawan!