“Iu Bae Stap Witim Mi Long Paradaes”

1. Taem Jesus klosap for dae, wat nao hem talem lo wanfala criminal saed lo hem? (Luke 23:39-43)

JESUS and tufala criminal lo saed lo hem, olketa safa and gogo for dae. (Luke 23:32, 33) Tufala criminal hia bin tok spoelem Jesus, so tufala no disaepol blo hem. (Matt. 27:44; Mark 15:32) Bat wanfala criminal changem tingting blo hem abaotem Jesus. Hem sei: “Jesus, plis, iu tingim mi taem iu King.” Jesus sei lo hem: “Mi talem iu tru samting, iu bae stap witim mi long Paradaes.” (Readim Luke 23:39-43.) Luk olsem disfala criminal no acceptim yet message abaotem “Kingdom bilong God,” wea Jesus preach abaotem taem hem duim ministry blo hem. And Jesus no talem datfala man bae hem go insaed lo Kingdom lo heven. (Matt. 4:17) Jesus storyim datfala Paradaes lo earth wea bae kamap lo future. Why nao iumi sei olsem?

2. Wat nao showimaot datfala criminal wea repent hem wanfala Jew?

² Luk olsem datfala criminal wea repent hem wanfala Jew. Hem sei lo nara criminal: “Hao, iu nating fraet long God nomoa?” (Luke 23:40) Olketa Jew worshipim wanfala God nomoa, bat pipol wea no Jew worshipim staka god. (Ex. 20:2, 3; 1 Cor. 8:5, 6) Sapos tufala criminal hia no Jew, maet datfala criminal ask olsem, “Hao, iu nating fraet long olketa god nomoa?” Nara samting tu, God no sendem Jesus lo olketa pipol wea no Jew, bat God sendem hem lo “pipol bilong Israel nomoa, wea olsem olketa sheepsheep wea lus.” (Matt. 15:24) God talem olketa Israelite hao bae hem resurrectim pipol wea dae finis. Masbi datfala criminal wea repent savve abaotem diswan, and wanem hem sei lo Jesus showimaot hem luksavve Jehovah bae resurrectim Jesus for rul lo Kingdom blo hem. Luk olsem hem hope for God resurrectim hem tu.

3. Wat nao maet datfala criminal tingim taem Jesus storyim Paradaes? (Genesis 2:15)

³ From datfala criminal wea repent hem wanfala Jew, bae hem mas savve abaotem Adam and Eve and datfala Paradaes wea Jehovah wakem for tufala. So maet datfala criminal tingim hao Paradaes wea Jesus storyim, bae hem wanfala naes garden hia lo earth.​—Readim Genesis 2:15.

4. Toktok wea Jesus talem lo datfala criminal shud mekem iumi ting abaotem wanem?

⁴ Wanem Jesus talem lo datfala criminal mekem iumi ting abaotem laef lo Paradaes. Iumi savve lane abaotem Paradaes from wanem Bible storyim abaotem laef blo pipol wea stap anda lo rul blo King Solomon. And iumi savve expectim laef blo pipol lo paradaes anda lo rul blo Jesus and 144,000 for winim datwan. (Matt. 12:42) So, iumi “olketa nara sheepsheep” shud interest for savve lo wanem iumi need for duim for kasem laef olowe lo Paradaes.​—John 10:16.

LAEF LO PARADAES BAE HEM HAO?

5. Taem iu ting abaotem laef lo Paradaes, wat nao iu tingim?

⁵ Taem iu ting abaotem laef lo Paradaes, waswe, iu tingim wanfala garden wea barava luk naes, olsem garden blo Eden? (Gen. 2:7-9) Maet iu tingim datfala profesi lo Bible buk Micah wea sei pipol blo God bae “stap gudfala long olketa plantesin blong olketa long grep, an olketa save sidaon andanit long olketa fig tri blong olketa.” (Maeka 4:3, 4) Maet iu tingim tu hao Bible sei lo Paradaes bae iumi garem staka kaikai. (Sams 72:16; Aesaea 65:21, 22, SIPB) So maet datwan mekem iu imaginim iu insaed lo wanfala naes garden and iu savve smelem naes smel blo olketa plant and flaoa. Iu witim famili, olketa fren, and olketa narawan wea laef bak, sidaon raonem wanfala tebol wea fulap witim olketa naes kaikai. Iufala laflaf from iufala hapi for stap tugeta. Datwan hem no wanfala dream nomoa. Iumi savve sure olketa samting hia bae happen lo future. Bat lo Paradaes bae iumi duim samfala waka tu wea bae iumi enjoyim.

6. Wat nao bae iumi duim lo Paradaes? (Lukim piksa.)

⁶ Jehovah creatim iumi for enjoyim waka. (Eklesiastes 2:24, SIPB) Lo Wan Thousand Year Rul blo Christ iumi bae busy tumas, bikos pipol wea no dae lo big trabol and staka million pipol wea laef bak bae needim kaleko, kaikai, and ples for stap. So iumi bae need for duim staka waka, bat bae iumi enjoyim datfala waka. God laekem Adam and Eve for mekem earth kamap paradaes, bat iumi nao bae garem datfala privilege. Tingim tu, iumi bae teachim staka million pipol wea laef bak wea no savve abaotem Jehovah and plan blo hem. And tu, bae iumi helpem olketa faithful man and woman wea laef bifor Jesus kam lo earth for lanem moa samting abaotem Jehovah.

7. Wat nao iumi savve sure lo hem, and why nao olsem?

⁷ Why nao iumi sure lo Paradaes iumi bae stap lo peace, garem evri samting iumi needim, and bae evri samting organize? Bikos Jehovah iusim Bible for storyim laef blo pipol wea stap anda lo rul blo King Solomon, for helpem iumi for minim laef wea iumi bae kasem anda lo rul Son blo hem.

LAEF LO PARADAES BAE OLSEM LAEF ANDA RUL BLO KING SOLOMON

8. Hao nao toktok blo King David lo Sams 37:10, 11, 29 (SIPB) kamap tru lo taem blo Solomon? (Lukim “Kwestin From Reader” lo disfala magasin.)

⁸ King David raet abaotem laef blo pipol wea bae stap anda lo rul blo wanfala king wea wise and faithful. (Readim Sams 37:10, 11, 29, SIPB.) Taem iumi storyim Paradaes lo pipol, staka taem iumi readim Sams 37:11 (SIPB). Datwan hem fitim bikos Jesus quotem datfala scripture lo Sermon lo Maunten for showimaot datfala scripture bae kamap tru lo future. (Matt. 5:5) Bat toktok blo David showimaot tu hao laef blo pipol lo taem blo King Solomon bae hem gud tumas. Taem Solomon rulim Israel, pipol blo God stap lo peace and garem evri samting olketa needim from land blo olketa “garem staka milk and honey.” God hem sei lo olketa: “Sapos iufala gohed wakabaot followim law . . . , mi bae mekem iufala garem peace lo datfala land, and iufala bae leidaon and no eniwan bae mekem iufala fraet.” (Lev. 20:24; 26:3, 6) And datwan kamap tru lo taem Solomon hem rul. (1 Chron. 22:9; 29:26-28) Nara samting, David sei lo datfala taem olketa nogud pipol bae “lus.” (Sams 37:10, SIPB) So iumi lukim hao toktok lo Sams 37:10, 11, 29 (SIPB) hem kamap tru lo bifor, and bae hem kamap tru lo future tu.

9. Wat nao queen blo Sheba sei abaotem rul blo King Solomon?

⁹ Queen blo Sheba herem hao anda lo rul blo Solomon olketa Israelite stap lo peace and garem staka samting. Datfala queen kam lo Jerusalem from farawe ples for lukim seleva situation lo there. (1 Ki. 10:1) Bihaen hem lukluk lo evri samting lo kingdom blo Solomon, hem sei: “Wanem mi herem hem no full story. . . . Olketa man blo iu and olketa servant blo iu wea evritaem stap witim iu, and herem olketa wise toktok blo iu olketa hapi.” (1 Ki. 10:6-8) Datfala queen lukim hao laef anda lo rul blo Solomon hem gud tumas. Bat datwan hem example nomoa lo wanem Jehovah bae duim for pipol wea bae stap anda lo rul blo Son blo Hem, Jesus.

10. Hao nao Jesus hem winim Solomon?

¹⁰ Jesus hem winim Solomon lo staka difren wei. Solomon no perfect and hem duim olketa nogud samting wea mekem pipol blo God safa. Bat Jesus hem no duim eni sin and hem wanfala perfect Ruler. (Luke 1:32; Heb. 4:14, 15) Jesus gohed faithful lo God nomata hem kasem olketa barava hard test from Satan. Christ pruvim hao hem bae no sin or duim eni samting wea bae mekem olketa wea stap anda lo rul blo hem for safa. Jesus hem nambawan King blo iumi.

11. Hu nao bae rul witim Jesus?

¹¹ Olketa wea bae rul witim Jesus for lukaftarem iumi and mekem plan blo Jehovah for earth for kamap tru, hem datfala 144,000. (Rev. 14:1-3) Taem olketa man and woman hia stap lo earth, olketa feisim staka hard taem, so datwan bae mekem olketa for barava minim iumi taem olketa rulim iumi. Wat nao samfala samting wea 144,000 hia bae duim?

WAT NAO BAE OLKETA ANOINTED WAN DUIM?

12. Wanem waka nao Jehovah givim lo datfala 144,000?

¹² Waka wea Jehovah givim lo Jesus and datfala 144,000 hem winim waka wea Solomon duim. Solomon lukaftarem staka million pipol lo wanfala kantri. Bat olketa wea bae rul lo Kingdom blo God bae lukaftarem staka billion pipol wea stap evriwea lo earth. Datwan hem nambawan privilege wea Jehovah givim lo datfala 144,000!

13. Wanem spesol waka nao olketa wea rul witim Jesus bae duim?

¹³ Olsem Jesus, datfala 144,000 bae duim waka blo king and priest. (Rev. 5:10) Anda lo Law blo Moses, olketa priest nao main wan for duim waka for lukaftarem health blo pipol, and tu, for mek sure olketa gohed gud lo spiritual wei. Datfala Law hem “shadow nomoa bilong olketa gudfala samting” wea bae kamap lo future. So luk olsem olketa wea rul witim Jesus bae lukaftarem tu physical and spiritual saed blo pipol blo God. (Heb. 10:1) Iumi no savve yet hao nao olketa king and priest hia bae story witim pipol lo earth wea olketa rul ovarem. Bat nomata wanem Jehovah arrangem, iumi savve sure lo Paradaes wea bae kam, evriwan lo earth bae kasem direction wea olketa needim.​—Rev. 21:3, 4.

WAT NAO “OLKETA NARA SHEEPSHEEP” MAS DUIM FOR QUALIFY FOR STAP LO PARADAES?

14. Wat nao Bible sei abaotem “olketa nara sheepsheep” and olketa wea bae rul witim Jesus?

¹⁴ Jesus kolem olketa wea bae rul witim hem “smol sekson bilong olketa sheepsheep.” (Luke 12:32) Hem storyim nara grup tu wea hem kolem “olketa nara sheepsheep.” Tufala grup hia kamap wanfala sekson nomoa. (John 10:16) Tufala grup hia waka tugeta distaem, and bae olketa gohed waka tugeta go kasem taem full earth kamap paradaes. Lo datfala taem, datfala “smol sekson” bae stap lo heven and “olketa nara sheepsheep” bae garem hope for stap lo earth for olowe. Bat “olketa nara sheepsheep” need for duim samfala samting distaem for qualify for stap lo Paradaes.

15. (a) Wanem nao “olketa nara sheepsheep” duim for helpem olketa anointed wan? (b) Hao nao iumi savve followim example blo brata wea insaed lo datfala pharmacy? (Lukim piksa.)

¹⁵ Datfala criminal wea repent hem no garem chance for pruvim hem tinghae lo wanem Christ duim for hem. Bat iumi “olketa nara sheepsheep” garem staka chance for showimaot iumi tinghae lo Jesus. For example, iumi showimaot iumi lovem hem lo wanem iumi duim for helpem olketa anointed brata blo hem. Jesus sei bae hem judgem olketa nara sheepsheep lo hao olketa treatim olketa anointed wan. (Matt. 25:31-40) Iumi savve helpem olketa brata blo Christ taem iumi busy for duim preaching and teaching waka. (Matt. 28:18-20) So iumi laek for iusim gud olketa Bible study buk wea organization blo Jehovah givim iumi, olsem datfala Enjoyim Laef for Olowe! buk. Sapos iumi no garem Bible study distaem, maet hem gud for garem goal for askem staka pipol sapos olketa laek studyim Bible.

16. Wat nao iumi savve duim distaem for redi for stap lo Paradaes?

¹⁶ Bifor iumi go insaed Paradaes, iumi laek for garem olketa gudfala wei wea Jehovah laekem. So hem gud for waka lo datwan distaem, olsem for traem best for honest lo toktok blo iumi and wanem iumi duim, and no ova tumas lo olketa samting. And iumi shud faithful lo Jehovah and marit partner blo iumi, and loyal lo olketa brata and sista. Sapos iumi waka hard distaem for followim olketa standard blo God nomata iumi stap lo disfala nogud world, hem bae isi for duim datwan lo Paradaes. Iumi savve duim olketa nara samting tu for showimaot iumi redi for stap lo Paradaes. Lukim article “Waswe, Iumi Redi for Taem wea ‘God Bae Givim Earth lo Iumi’?” lo disfala magasin.

17. Waswe, iumi shud gohed feel guilty bikos lo sin wea iumi duim bifor? Explainim.

¹⁷ Sapos iumi duim wanfala big sin and iumi stretem finis, iumi no laek for gohed feel guilty. Nomata olsem, iumi no laek for ting nating lo ransom sakrifaes blo Jesus and “gohed for duim sin.” (Heb. 10:26-31) Sapos iumi repent, askem Jehovah and olketa elder for helpem iumi and stop for duim datfala sin, iumi sure Jehovah hem forgivim iumi. (Isa. 55:7; Acts 3:19) Tingim wanem Jesus talem lo olketa Pharisee: “Mi no kam for talem gudfala pipol for repent, bat for talem pipol wea sin nao for repent.” (Matt. 9:13) Ransom sakrifaes blo Jesus hem fit for kavarem evri sin blo iumi.

IUMI SAVVE LAEF OLOWE LO PARADAES

18. Wat nao iu laek askem lo datfala criminal wea dae saed lo Jesus?

¹⁸ Taem iu insaed Paradaes, tingim sapos iu story witim datfala criminal wea story witim Jesus. Maet iutufala evriwan storyim hao iutufala tinghae lo sakrifaes blo Jesus. Maet bae iu askem hem for storyim samfala samting moa wea happen just bifor Jesus dae, and hao nao feeling blo hem taem Jesus sei bae hem stap witim Jesus lo Paradaes. Maet hem bae askem iu tu abaotem laef lo olketa last day lo disfala world blo Satan. Bae hem bigfala privilege for studyim Bible witim olketa pipol olsem!—Eph. 4:22-24.

19. Why nao laef lo Paradaes bae no savve boring? (Lukim piksa lo front page.)

¹⁹ Laef lo Paradaes bae no savve boring. Iumi bae meetim staka interesting pipol and bae iumi garem gudfala waka for duim. And best samting, evriday bae iumi lanem moa samting abaotem Jehovah and enjoyim olketa samting wea hem provaedem. Bae iumi gohed for lane abaotem hem for olowe, and bae iumi lanem staka samting abaotem creation tu. From iumi bae laef olowe, iumi bae barava lovem and fren gud witim God. Iumi thankiu lo Jehovah and Jesus for givim iumi datfala hope for laef olowe lo Paradaes!