Barava Tinghae Long Olketa Wei Bilong Jehovah
“From iufala olketa pikinini bilong God wea hem lovem, iufala mas followim wei bilong hem.”—EPH. 5:1.
1. (a) Wanem nao samfala wei bilong Jehovah wea iu savve tingim? (b) Wanem gud samting nao bae iu kasem sapos iu study abaotem olketa wei bilong God?
TAEM iu tingim Jehovah, wanem nao olketa wei bilong hem wea iu tingim? Maet iu tingim love, justice, wisdom, and paoa. Iumi savve Jehovah garem staka nara nambawan wei tu. Olketa pablikeson bilong iumi story abaotem winim 40 difren wei bilong Jehovah. Sapos iu studyim olketa wei hia taem iu duim famili study or study seleva, iu bae lanem staka samting abaotem Jehovah! Bae iu barava tinghae long olketa wei bilong hem. Datwan bae mekem iu laekem tumas for followim example bilong Jehovah and fren gud witim hem.—Josh. 23:8; Ps. 73:28.
2. (a) Wanem nao bae helpem iumi for barava tinghae long olketa wei bilong Jehovah? Storyim example. (b) Wanem nao bae iumi storyim long disfala study and tufala study bihaen?
2 Wanem nao bae helpem iu for barava tinghae long wanfala samting? Tingim sapos iu teistim wanfala kaikai wea iu no kaikaim bifor. Hem smel gud long iu. Then iu teistim datwan, and hem swit long iu. Bihaen, iuseleva laek kukim datfala kaikai. Olsem tu, iumi savve tinghae long wanfala wei bilong Jehovah taem iumi lane abaotem datfala wei, ting raonem hao Jehovah showimaot datwan, and showimaot datfala sem wei long laef bilong iumi. (Eph. 5:1) Disfala study and tufala study bihaen bae storyim samfala wei bilong Jehovah. Taem iumi storyim olketa wei hia, bae iumi storyim hao Jehovah showimaot datwan, and hao iumi savve followim example bilong Jehovah for showimaot datwan.
JEHOVAH HEM GOD WEA ISI FOR IUMI STORY WITIM
3, 4. (a) Wanem kaen man nao hem isi for iumi story witim? (b) Hao nao Jehovah showimaot hem God wea isi for iumi story witim?
3 Firstaem, bae iumi storyim wanem kaen man nao hem isi for iumi story witim. Man olsem hem kaen, and no enitaem hem busy tumas for story witim olketa narawan. Samting wea hem talem, akson bilong hem, and lukluk long feis bilong hem showimaot hem willing for lisin and for help.
4 Hem nao wei bilong Jehovah. Nomata hem garem bigfala paoa winim eniwan long universe, hem laekem iumi for prea long hem. Hem herem olketa prea bilong iumi and hem helpem iumi. (Readim Psalm 145:18; Isaiah 30:18, 19.) Iumi savve prea long God enitaem, nomata wea iumi stap, and iumi savve talem shortfala prea or longfala prea. No enitaem hem kros long iumi from iumi story long hem. (Ps. 65:2; Jas. 1:5) Bible story abaotem Jehovah long wei wea mekem iumi no fraet for story witim hem. Olsem example, David sei: “Jehovah hem lukluk” long iumi and hem sapotim iumi witim “raet hand bilong hem.” (Ps. 34:15; 63:8) Profet Isaiah hem sei Jehovah hem olsem wanfala shepherd. Hem sei: “Hem bae holem kam olketa pikinini sheepsheep and karem olketa klosap long heart bilong hem.” (Isa. 40:11) Tingim datwan! Jehovah laekem iumi for stap klosap long hem olsem wanfala smol sheepsheep wea shepherd karem klosap long heart bilong hem. Taem iumi ting long Dadi bilong iumi long wei olsem, datwan mekem iumi barava lovem hem! Hao nao iumi savve olsem Jehovah?
ELDER MAS MAN WEA ISI FOR STORY WITIM
5. Why nao olketa elder mas man wea isi for narawan story witim olketa?
5 No longtaem go nomoa, olketa askem samfala brata and sista long olketa difren kantri disfala kwestin: “Wanem kaen wei bilong elder nao iu barava tinghae long hem?” Klosap evriwan hia sei olketa laekem elder wea “hem man wea isi for story witim.” Hem tru, iumi evriwan mas garem disfala wei, bat diswan hem barava important for olketa elder. (Isa. 32:1, 2) Why nao olsem? Wanfala sista hem sei sapos elder hem man wea isi for hem story witim, and hem feel free for story witim hem, datwan helpem sista hia for luksavve long olketa nara gudfala wei bilong hem. Datwan hem barava tru. So wanem nao iu savve duim for helpem olketa narawan feel free for story witim iu?
6. Wanem nao iu savve duim for mekem olketa narawan feel free for story witim iu?
6 Wanfala wei for duim olsem hem for showimaot iu tingim olketa narawan and iu willing for helpem olketa. Sapos olsem, olketa brata and sista, and olketa young wan tu, bae feel free for story witim iu. (Mark 10:13-16) Carlos, wea hem 12 year, hem sei: “Long Kingdom Hall mi lukim olketa elder smile and kaen long narawan, and mi barava laekem datwan.” So hem no inaf for wanfala elder talem nomoa hem willing for lisin and helpem olketa narawan. Hem mas showimaot datwan. (1 John 3:18) Hao nao hem savve duim olsem?
7. Why nao samfala pipol feel free for story witim iumi taem iumi werem convention badge card, and wanem nao iumi lanem from datwan?
7 Tingim disfala example: No longtaem go nomoa, wanfala brata attendim convention long nara kantri. Taem hem travel go bak long hom bilong hem long aeroplane, hem werem convention badge card wea sei “Kingdom Bilong God Bae Kam!” Taem wanfala man lukim datfala badge card hem sei: “Mi laekem tumas for datfala Kingdom hem kam!” Tufala story gud tugeta, and datfala man tekem samfala magasin bilong iumi. Why nao pipol feel free for story witim iumi taem iumi werem convention badge card? Datfala badge card mekem olketa laek savve wea nao iumi go, and hem showimaot iumi willing for story witim olketa abaotem olketa biliv bilong iumi. Olsem tu, olketa elder mas showimaot olketa evritaem willing for story witim olketa brata and sista. Hao nao olketa elder savve duim datwan?
8. Hao nao olketa elder showimaot olketa barava interest long olketa narawan, and hao nao datwan savve affectim kongregeson?
8 Long staka kantri, iu savve showimaot iu interest long olketa brata and sista taem iu smile long olketa, sekhand, and sei hello. Hu nao olketa main wan wea shud duim diswan? Bible sei taem Jesus hipap witim olketa disaepol bilong hem, hem nao “kam long olketa” and story witim olketa. (Matt. 28:18) Olsem tu, olketa elder nao go long olketa brata and sista and story long olketa. Hao nao datwan savve affectim olketa long kongregeson? Wanfala pioneer sista wea hem 88 year, hem sei: “Taem olketa elder smile and talem toktok for encouragem mi taem mi kam insaed long Kingdom Hall, datwan mekem mi lovem olketa.” Nara sista hem sei: “Taem wanfala elder smile long mi taem mi kam long meeting, mi barava tinghae long datwan.”
WILLING FOR STORY WITIM OLKETA BRATA AND SISTA
9, 10. (a) Hao nao Jehovah showimaot gudfala example for iumi? (b) Hao nao olketa elder savve followim example bilong Jehovah?
9 Hem tru, sapos iumi laekem olketa narawan for feel free for story witim iumi, iumi mas willing for story witim olketa. Jehovah showimaot gudfala example for iumi. Dastawe Bible sei: “Hem no hard nomoa for savve long hem.” (Acts 17:27) Wanfala wei olketa elder savve followim example bilong Jehovah hem for story witim olketa brata and sista wea olo, and olketa young wan tu, bifor and bihaen long olketa meeting. Wanfala brata wea pioneer hem sei: “Taem elder laek for savve hao nao mi and hem lisin taem mi story, mi feel olsem hem tingim mi.” Wanfala sista wea worshipim Jehovah for klosap 50 year hem sei: “Olketa elder wea willing for story witim mi bihaen long meeting mekem mi feel olsem olketa tinghae long mi.”
10 Hem tru, olketa elder garem staka waka for duim. Bat olketa shud mek sure olketa story witim olketa brata and sista long olketa meeting.
JEHOVAH NO FAVORIM ENIWAN
11, 12. (a) Wanem nao hem minim for no favorim eniwan? (b) Hao nao Bible showimaot Jehovah hem no favorim eniwan?
11 Nara nambawan samting abaotem Jehovah hem wei wea hem no favorim eniwan. (Acts 10:34) Man wea no favorim eniwan hem deal witim evriwan long sem wei nomoa. Bat sapos iumi laek for deal witim olketa narawan long wei wea no favorim eniwan, firstaem iumi mas biliv hem stret for no favorim eniwan. Iumi bae no garem wei for kaen long samfala pipol bat no kaen long olketa narawan bikos long kantri wea olketa kam from or haomas selen olketa garem. Iumi deal witim evriwan long sem wei nomoa.
12 Jehovah nao showimaot nambawan example long wei for no favorim eniwan. Bible sei hem “no favorim eniwan.” (Readim Acts 10:34, 35; Deuteronomy 10:17.) Bae iumi storyim wanfala example wea showimaot diswan.
13, 14. (a) Wanem nao problem bilong faevfala dota bilong Zelophehad? (b) Hao nao Jehovah showimaot hem no favorim eniwan?
13 Taem olketa Israelite klosap for go insaed long Promis Land, faevfala dota bilong wanfala man wea nem bilong hem Zelophehad garem problem. Wanem nao datfala problem? Dadi bilong olketa hem dae, and olketa no savve tekem datfala pis land bilong dadi bilong olketa. Why nao olsem? Bikos Law hem sei olketa son nomoa savve tekem land bilong dadi bihaen hem dae. Bat dadi bilong olketa no garem eni son. (Num. 26:33, 52-55) Waswe, olketa nara relative nao bae tekem datfala pis land? Wanem nao olketa dota bilong Zelophehad savve duim?
14 Olketa go long Moses and sei: “Why nao nem bilong dadi bilong mifala mas finis from tribe bilong hem from hem no garem eni son?” Waswe, Moses hem sei: ‘Hem law nao ia, and mi no savve duim eni samting for helpem iufala’? Nomoa, Moses hem askem Jehovah abaotem diswan. (Num. 27:2-5) Wanem nao Jehovah talem? Hem sei long Moses: “Samting wea olketa dota bilong Zelophehad talem, hem stret. Taem iu givim land long olketa brata bilong dadi bilong olketa, iu mas givim pis land long olketa tu, and long wei olsem olketa mas kasem samting from dadi bilong olketa.” And Jehovah duim nara samting tu. Hem talem Moses for putim disfala toktok insaed long Law, taem hem sei: “Sapos man hem dae and hem no garem eni son, iufala mas givim evri samting bilong dadi long dota bilong hem.” (Num. 27:6-8; Josh. 17:1-6) Start long datfala taem, evri Israelite woman wea olsem olketa dota bilong Zelophehad, bae kasem samting taem dadi bilong olketa dae.
15. (a) Hao nao Jehovah deal witim pipol bilong hem, especially olketa wea no garem eniwan for helpem olketa? (b) Wanem nao olketa nara story long Bible wea showimaot Jehovah hem no favorim eniwan?
15 Datfala disison hem no favorim eniwan! Faevfala sista hia no garem eniwan wea savve helpem olketa. Jehovah hem deal witim olketa long stretfala wei and respectim olketa, olsem hao hem deal witim evri nara Israelite tu. (Ps. 68:5) Diswan hem wanfala nomoa long plande story long Bible wea showimaot Jehovah deal witim pipol bilong hem long stretfala wei and hem no favorim eniwan.—1 Sam. 16:1-13; Acts 10:30-35, 44-48.
IUMI SAVVE FOLLOWIM EXAMPLE BILONG JEHOVAH
16. Hao nao iumi savve followim example bilong Jehovah for no favorim eniwan?
16 Hao nao iumi savve followim example bilong Jehovah for no favorim eniwan? No forget, for iumi deal witim olketa narawan long wei wea no favorim eniwan, firstaem iumi mas biliv hem stret for no favorim eniwan. Maet iu tingse iu no favorim eniwan. Bat samfala taem, hem no isi for iumi savve hao nao iumi ting long olketa narawan. So wanem nao iu savve duim for luksavve sapos iu no favorim eniwan? Jesus hem gudfala example for iumi followim. Taem hem laek savve hao pipol ting long hem, hem askem olketa fren bilong hem disfala kwestin: “Long tingting bilong pipol, hu nao Son bilong man?” (Matt. 16:13, 14) Maet iu savve chusim wanfala fren bilong iu wea iu savve hem bae tok stret long iu, and askem hem: ‘Long tingting bilong iu, waswe, mi deal witim evriwan long sem wei nomoa? Waswe, olketa narawan tingse mi man wea no favorim eniwan?’ Maet hem sei samfala taem iu favorim pipol from wanfala kantri or iu kaen long pipol wea skul gud or wea garem staka selen. Sapos hem sei olsem, wanem nao iu shud duim? Prea long Jehovah and askem hem for helpem iu change, mekem iu savve followim example bilong hem and no favorim eniwan.—Matt. 7:7; Col. 3:10, 11.
17. Wanem nao iumi savve duim wea showimaot iumi no favorim eniwan?
17 Iumi savve followim example bilong Jehovah taem iumi kaen and showimaot respect long evriwan long kongregeson. Olsem example, taem iu invaetem olketa brata and sista for kam long haos bilong iu, iu savve invaetem olketa wea garem difren culture. Or maet iu savve invaetem olketa wea no garem staka samting, olketa widow man or woman, or olketa young wan wea no eniwan long famili bilong olketa hem insaed long truth. (Readim Galatia 2:10; James 1:27.) Taem iumi duim preaching waka, iumi story witim olketa difren kaen pipol, and pipol from olketa nara kantri tu. Organization bilong Jehovah transleitim olketa Bible pablikeson long samting olsem 600 languis. So iumi garem nambawan chance for showimaot iumi no favorim eniwan!
18. Taem iu ting raonem hao Jehovah hem God wea isi for story witim and hem no favorim eniwan, datwan shud mekem iu laek for duim wanem samting?
18 Taem iumi ting raonem hao Jehovah hem God wea isi for story witim and hem no favorim eniwan, datwan bae helpem iumi for tinghae long olketa wei hia. Iumi bae laek for followim example bilong Jehovah long wei wea iumi deal witim olketa brata and sista bilong iumi, and pipol wea iumi meetim long preaching waka.