Tinghae Long Wei Bilong Jehovah for Kaen and for No Ova Tumas

1, 2. Iumi bae garem chance for duim wanem samting?

MONIKA, wanfala sista wea marit for klosap 35 year, hem sei: “Mi and hasband bilong mi savve gud long each other. Nomata olsem, mitufala gohed faendemaot staka samting abaotem mitufala wea mitufala no savve bifor!” Plande long iumi savve talem sem samting abaotem hasband or waef, or olketa fren bilong iumi.

² Iumi hapi for savve gud moa long olketa wea iumi lovem. Bat iumi barava hapi for lane abaotem Jehovah, wea hem nao best fren wea iumi savve garem. Hem hard for iumi lanem evri samting abaotem hem. (Rome 11:33) Nomata olsem, bae iumi garem chance for gohed lane and tinghae long olketa wei bilong Jehovah for olowe.—Eccl. 3:11.

3. Wanem nao bae iumi lanem long disfala study?

³ Study bifor diswan helpem iumi for tinghae long wei wea Jehovah hem God wea isi for iumi story witim, and hem no favorim eniwan. Long disfala study, bae iumi lanem hao Jehovah hem kaen and no ova tumas. Diswan bae helpem iumi for minim gud hao “Jehovah hem duim gudfala samting long evriwan, and hem savve sorre long iumi and evri samting wea hem wakem.”—Ps. 145:9.

JEHOVAH HEM KAEN

4. Wanem nao hem minim for kaen?

⁴ Wanem nao hem minim for kaen? Toktok bilong Jesus long Acts 20:35 helpem iumi for savve long ansa. Hem sei: “Man wea givim samting hem barava hapi winim man wea kasem samting.” So man wea kaen hem hapi for iusim taem, strong, and olketa samting wea hem garem for helpem olketa narawan. Nomata man givim olketa present wea big and expensive, datwan no minim hem kaen, bat man wea kaen hem givim samting from heart bilong hem and hem hapi for givim datwan. (Readim 2 Corinth 9:7.) No eniwan hem kaen winim “hapi God” bilong iumi, Jehovah.—1 Tim. 1:11.

5. Wanem nao Jehovah duim wea showimaot hem kaen?

⁵ Wanem nao Jehovah duim wea showimaot hem kaen? Bible sei: “Jehovah hem duim gudfala samting long evriwan.” Hem givim long evri man wanem olketa needim, nomata sapos olketa no worshipim hem yet. Hem “mekem sun hem shaen long pipol wea gud and pipol wea nogud and hem mekem hem rain long pipol wea raeteous and pipol wea no raeteous.” (Matt. 5:45) Dastawe Paul savve sei long samfala wea no Christian: “[Jehovah] duim olketa gud samting . . . Hem givim rain for iufala and mekem garden bilong iufala barava grow gud. Hem givim staka kaikai and mekem iufala hapi.” (Acts 14:17) Tru tumas, Jehovah hem kaen long evriwan.—Luke 6:35.

6, 7. (a) Hu nao Jehovah hem barava hapi for helpem? (b) Wanem example nao showimaot God hem provaedem wanem pipol bilong hem needim?

⁶ Olketa wea Jehovah barava hapi for provaedem wanem olketa needim nao hem pipol bilong hem. King David sei: “Distaem mi olo nao, bat no enitaem mi lukim God hem lusim eni man wea raeteous or olketa pikinini bilong hem lukaotem kaikai.” (Ps. 37:25) Staka faithful Christian lukim hao Jehovah givim samting wea olketa needim.

⁷ Olsem example, samfala year bifor, wanfala pioneer wea nem bilong hem Nancy hem kasem hard taem. Hem needim $66 mekem hem garem inaf selen for peim rent long next day. Bat hem no garem datfala selen. Hem sei: “Mi prea abaotem datwan, and then mi go duim waka bilong mi long ples for kaikai.” Pei bilong Nancy hem depend long haomas kastoma kam for kaikai long there. Nancy hem sei: “Datwan hem naet long week wea mifala no savve garem staka kastoma, so mi tingse mi bae kasem smol selen nomoa. Bat mi barava sapraes taem staka kastoma kam long datfala naet. Taem mi finis waka and kaontem selen wea mi kasem, hem kasem barava $66 nao.” Nancy savve Jehovah nao helpem hem for kasem barava samting wea hem needim.—Matt. 6:33.

8. Wanem nao datfala present wea Jehovah givim wea spesol winim eni nara samting?

⁸ From Jehovah hem kaen, hem givim wanfala present for evri man wea spesol winim eni nara samting wea hem givim. Wanem nao datwan? Hem givim Son bilong hem for dae for iumi. Jesus sei: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.” (John 3:16) So Jehovah givim datfala present wea hem spesol winim eni nara samting long evriwan wea laekem datwan. Eniwan wea showimaot faith long Jesus bae kasem laef olowe! (John 10:10) No eni nara samting showimaot Jehovah hem kaen winim datwan.

KAEN OLSEM JEHOVAH

9. Hao nao iumi savve kaen olsem Jehovah?

⁹ Hao nao iumi savve kaen olsem Jehovah? Jehovah givim iumi plande samting for mekem iumi hapi, so iumi tu shud laek for givim samting long olketa narawan for mekem olketa hapi. (1 Tim. 6:17-19) Iumi hapi for givim olketa present long olketa fren and famili bilong iumi, and for helpem olketa wea needim samting. (Readim Deuteronomy 15:7.) Wanem nao savve helpem iumi for no forget for givim samting long narawan? Samfala disaed taem olketa kasem samting from samwan, olketa tu mas lukaotem chance for givim samting long narawan. Staka pipol bilong Jehovah distaem showimaot gudfala example long wei for kaen.

10. Wanem nao wanfala best wei for iumi kaen long narawan?

¹⁰ Wanfala best wei for iumi kaen long olketa narawan hem for iusim taem and strong bilong iumi for helpem and encouragem olketa. (Gal. 6:10) Waswe, iu kaen olsem? Hem gud for man wanwan for ting raonem olketa kwestin hia: ‘Waswe, mi showimaot mi willing for lisin taem narawan laek story? Sapos samwan askem mi for helpem hem, or for go duim samting for hem, waswe, mi willing for duim datwan? Wanem taem nao mi praisem samwan long famili or long kongregeson?’ Sapos hem wei bilong iumi for “givim samting long nara pipol,” bae iumi fren gud witim Jehovah and olketa fren bilong iumi tu.—Luke 6:38; Prov. 19:17.

11. Wanem nao samfala wei wea iumi savve kaen long Jehovah?

¹¹ Iumi savve kaen long Jehovah tu long wei for givim samting long hem. Bible encouragem iumi for iusim “olketa gudfala samting” wea iumi garem for mekhae long Jehovah. (Prov. 3:9) “Olketa gudfala samting” hia hem taem, strong, and selen wea iumi savve iusim for duim waka bilong Jehovah. Olketa smol pikinini tu savve lane for givim samting long Jehovah. Jason, wanfala dadi, hem sei: “Taem famili bilong mifala disaed for givim contribution long Kingdom Hall, mifala letem olketa pikinini nao for putim datwan insaed contribution box. Olketa pikinini hapi for duim datwan and sei olketa ‘givim samting long Jehovah.’” Sapos olketa smol pikinini luksavve wei for givim samting long Jehovah mekem olketa hapi, bae olketa gohed duim olsem taem olketa big.—Prov. 22:6.

JEHOVAH HEM NO OVA TUMAS

12. Wanem nao hem minim for no ova tumas?

¹² Nara nambawan wei bilong Jehovah hem wei wea hem no ova tumas. Wanem nao hem minim for no ova tumas? Man wea no ova tumas no forcem tingting bilong hem long narawan. (Titus 3:1, 2) Hem no strong for sei man mas evritaem followim wanfala rul. Hem no strict or raf. Hem kaen long pipol and hem traem best for minim samting wea kasem olketa. Hem willing for herem tingting bilong narawan, and sapos hem fitim, for letem narawan kasem wanem hem laekem, or duim wanem hem laekem.

13, 14. (a) Wanem nao Jehovah duim wea showimaot hem no ova tumas? (b) Taem iu tingim samting wea Jehovah letem Lot for duim, wanem nao iu lanem from datwan?

¹³ Wanem nao Jehovah duim wea showimaot hem no ova tumas? Hem tingim feeling bilong olketa wea worshipim hem, and plande taem hem letem olketa duim samting followim wanem olketa laekem. Olsem example, tingim hao Jehovah hem deal witim datfala raeteous man Lot. Taem Jehovah disaed for finisim Sodom and Gomorrah, hem talem klia for Lot mas ranawe go long olketa maunten. Bat Lot askem Jehovah for letem hem go long difren ples. Tingim datwan! Lot askem Jehovah for letem hem duim difren samting from wanem Jehovah talem!—Readim Genesis 19:17-20.

¹⁴ Taem iu readim datfala story, maet iu tingse Lot no garem strongfala faith, or hem no laek obeyim Jehovah. Jehovah savve protectim Lot nomata wea hem stap. So Lot shud no fraet nomoa. Nomata olsem, Lot hem fraet. Jehovah tingim feeling bilong Lot and letem hem for ranawe go long nara taon, nomata Jehovah laek finisim datfala taon tu. (Readim Genesis 19:21, 22.) Diswan showimaot Jehovah no strict or raf. No enitaem hem ova tumas.

15, 16. Hao nao Law bilong Moses showimaot Jehovah no ova tumas? (Lukim piksa long start bilong disfala study.)

¹⁵ Law bilong Moses tu showimaot Jehovah no ova tumas. Olsem example, sapos wanfala Israelite hem poor and hem no savve sakrifaesim wanfala pikinini sheepsheep or goat, hem savve sakrifaesim tufala big kurukuru or tufala young wan. Bat waswe sapos hem poor fogud, and nomata tufala young kurukuru bat hem no savve peim tu? Sapos olsem, Jehovah sei hem savve givim lelebet flour. Bat Law sei hem mas givim “gudfala flour” wea olketa Israelite savve kukim for olketa important guest bilong olketa. (Gen. 18:6) Wanem nao diswan showimaot abaotem Jehovah?—Readim Leviticus 5:7, 11.

¹⁶ Tingim sapos iu wanfala Israelite and iu poor fogud. Taem iu tekem kam flour bilong iu long tabernacle, iu lukim olketa nara Israelite wea garem selen olketa tekem kam olketa animal. Maet iu feel shame long smol sakrifaes bilong iu. Bat then iu tingim hao Jehovah barava tinghae long sakrifaes bilong iu. Wanem nao mekem hem tinghae long datwan? Law bilong Jehovah sei iu mas tekem kam “gudfala flour.” Hem olsem Jehovah sei long iu: ‘Mi luksavve iu no savve givim bigfala sakrifaes olsem olketa narawan, bat mi savve iu givim best samting wea iu garem.’ Disfala example showimaot Jehovah no ova tumas. Hem askem nomoa samting wea olketa wea worshipim hem fit for givim.—Ps. 103:14.

17. Wanem kaen worship nao Jehovah acceptim?

¹⁷ Taem iumi savve Jehovah no ova tumas and hem acceptim worship bilong iumi sapos iumi traem best, datwan barava encouragem iumi. (Col. 3:23) Constance, wanfala olo sista from Italy, hem sei: “Mi laekem tumas for story witim olketa narawan abaotem Creator bilong mi. Dastawe mi gohed for preach and studyim Bible witim pipol. Samfala taem mi sorre from health bilong mi mekem mi no fit for duim moa samting. Bat mi luksavve Jehovah hem savve long wanem mi fit for duim and hem lovem mi and tinghae long samting wea mi savve duim.”

FOLLOWIM WEI BILONG JEHOVAH FOR NO OVA TUMAS

18. Wanem nao wanfala wei wea parents savve followim example bilong Jehovah?

¹⁸ Hao nao iumi savve followim wei bilong Jehovah for no ova tumas? Tingim moa hao Jehovah deal witim Lot. Jehovah garem raet for talem Lot ples wea hem mas go long hem. Bat Jehovah hem kaen. Hem lisin taem Lot storyim feeling bilong hem, and hem letem Lot for go long ples wea hem chusim. Sapos iu garem olketa pikinini, waswe, iu savve followim example bilong Jehovah? Hem gud for lisin taem olketa pikinini talem iu wanem olketa laekem, and sapos hem fitim, iu savve changem tingting bilong iu. Hao nao iu savve duim diswan? Wastaoa bilong September 1, 2007, hem sei taem samfala parents mekem olketa rul for famili, olketa herem firstaem tingting bilong olketa pikinini. Olsem example, maet parents laek for markem taem wea pikinini mas kam bak long haos long evening. Parents garem raet for duim diswan, bat maet olketa story firstaem witim olketa pikinini bifor olketa disaed wanem taem nao hem fitim. Maet samfala taem parents disaed for changem taem wea pikinini mas kam bak long haos sapos hem fitim. Taem parents story witim olketa pikinini firstaem bifor olketa mekem eni rul, bae olketa pikinini minim gud and willing for obey.

19. Hao nao olketa elder savve trae for followim example bilong Jehovah?

¹⁹ Olketa elder long kongregeson mas traem best for followim example bilong Jehovah for no ova tumas. Olketa savve duim diswan long wei for no expectim olketa brata and sista for duim samting wea olketa no fit for duim. No forget, Jehovah tinghae long sakrifaes bilong olketa Israelite wea poor tu. Samfala brata and sista savve spendem lelebet taem nomoa long ministry bikos olketa garem problem saed long health or from olketa olo. Waswe sapos olketa feel wikdaon bikos olketa no savve duim moa samting? Olketa elder savve helpem olketa for luksavve Jehovah lovem olketa from olketa traem best bilong olketa.—Mark 12:41-44.

20. Wanem nao hem minim for garem balance tingting taem iumi duim waka bilong God?

²⁰ Nomata olsem, iumi mas no tingse hem olraet for iumi isisi nomoa long waka bilong iumi for God. (Matt. 16:22) Iumi no laek for duim smol samting nomoa sapos iumi fit for duim moa samting. Iumi evriwan mas no forgetim disfala toktok bilong Jesus wea sei: “Iufala mas barava trae hard.” (Luke 13:24) So iumi mas garem balance tingting. Iumi duim best bilong iumi long waka bilong God, and long semtaem iumi mas tingim Jehovah no askem iumi for duim samting wea iumi no fit for duim. Sapos iumi duim olsem, Jehovah bae hapi long iumi. Hem nambawan privilege for worshipim kaen God olsem! Long next study, bae iumi storyim nara tufala nambawan wei bilong Jehovah.—Ps. 73:28.