Wei for Give Savve Mekem Man Barava Hapi

1-2. Wat nao gud samting wea iumi kasem bikos Jehovah creatim iumi for barava hapi taem iumi give?

TAEM Jehovah creatim olketa human being, hem mekem olketa for garem wanfala spesol ability for barava hapi taem olketa givim samting winim taem olketa kasem samting. (Acts 20:35) Hao, datwan minim taem iumi kasem samting iumi no hapi? Nomoa. Taem iumi kasem wanfala present, iumi savve feel hapi. Nomata olsem, hapi wea iumi kasem from wei for give hem winim datwan. From Jehovah creatim iumi for garem datfala ability, iumi savve kasem gud samting. Why nao iumi sei olsem?

² From Jehovah givim iumi datfala ability, iumiseleva garem choice for duim samting for increasim hapi blo iumi. Taem iumi lukaotem chance for givim samting for olketa narawan, datwan savve increasim hapi blo iumi. From Jehovah wakem iumi olsem, datwan hem barava spesol.—Ps. 139:14.

3. Why nao Bible sei Jehovah hem datfala “hapi God”?

³ Bible talem iumi dat wei for give hem mekem man hapi, datwan helpem iumi for understandim why Bible sei Jehovah hem datfala “hapi God.” (1 Tim. 1:11) Hem nao first Person wea givim samting for olketa narawan, and no eniwan savve give winim hem. Aposol Paul sei bikos lo Jehovah “iumi laef and savve wakabaot and duim samting.” (Acts 17:28) Tru nao, “evri gud and perfect present” hem from Jehovah.—Jas. 1:17.

4. Wat nao bae helpem iumi for barava hapi?

⁴ For sure, iumi evriwan laek for kasem datfala spesol hapi wea kam from wei for give. Iumi savve kasem datwan taem iumi followim example blo Jehovah for give. (Eph. 5:1) Lo disfala article, iumi bae discussim datwan and wat iumi savve duim if iumi tingse samwan no appreciatim wat iumi duim. Olketa reminder hia bae helpem iumi for garem wei for givim samting and barava hapi taem iumi gohed duim datwan.

FOLLOWIM EXAMPLE BLO JEHOVAH FOR GIVE

5. Wat nao olketa material tings wea Jehovah givim for iumi?

⁵ Wat nao samfala samting wea showim Jehovah hapi for give? Tingim samfala example hia. Jehovah givim iumi olketa material tings. Hem no evritaem givim iumi olketa expensive tings, bat iumi hapi bikos hem mek sure iumi kasem wat iumi needim. For example, hem evritaem mek sure iumi garem kaikai, kaleko, and ples for stap. (Ps. 4:8; Matt. 6:​31-33; 1 Tim. 6:​6-8) Hao, Jehovah provaedem olketa tings hia just bikos datwan hem responsibility blo hem? Nomoa! Why nao Jehovah duim olketa samting hia for iumi?

6. Wat nao iumi lanem from Matthew 6:​25, 26?

⁶ Jehovah provaedem physical need blo iumi bikos hem lovem iumi. Tingim wat Jesus talem lo Matthew 6:​25, 26. (Readim.) Jesus storyim olketa example from creation. Taem Jesus story abaotem olketa bird, hem sei: “Olketa no wakem garden and harvestim kaikai. Olketa no keepim kaikai long eni foodsafe tu.” Lukim next samting wea hem talem: “Dadi bilong iufala long heven feedim olketa.” Then Jesus sei: “Iufala important winim olketa bird!” So wat nao iumi lanem? Jesus laekem iumi for minim dat Jehovah barava tinghae lo iumi winim olketa animal wea hem creatim. If Jehovah savve provaedem wat olketa animal needim, iumi sure hem bae provaedem wat iumi needim! Olsem wanfala loving dadi, love nao main samting wea muvim Jehovah for provaed for famili blo hem.—Ps. 145:16; Matt. 6:32.

7. Wat nao wanfala wei wea iumi savve followim example blo Jehovah lo wei for give? (Lukim tu piksa.)

⁷ Olsem Jehovah, love tu muvim iumi for givim wat olketa narawan needim. For example, waswe, iu savve lo eni brata or sista wea needim kaikai or kaleko? Jehovah savve iusim iu for givim wat hem needim. Taem disaster happen, pipol blo Jehovah kwiktaem for helpem olketa narawan. For example, during lo COVID-19 pandemic, olketa brata and sista sharem kaikai, kaleko, and olketa nara samting witim olketa brata wea garem need. Staka givim tu contribution for waka raonem world. Datwan help for sapotim relief waka wea gohed raonem world. Olketa brata and sista followim samting wea Hebrew 13:16 storyim wea sei: “No forget for duim gud samting and for sharem samting wea iu garem witim olketa narawan, bikos God hem hapi long kaen sakrifaes olsem.”

8. Hao nao paoa wea Jehovah givim hem helpem iumi? (Philippi 2:13)

⁸ Jehovah givim paoa. Jehovah garem bigfala paoa and hem hapi for givim lo olketa faithful worshipper blo hem. (Readim Philippi 2:13.) Hao, enitaem iu prea for Jehovah givim iu strong for againstim temptation or givim iu paoa for winim wanfala hard taem? Maet iu prea tu for hem givim iu inaf energy for duim waka wea iu need for duim each day. Taem iu kasem ansa for prea blo iu, bae iu agree witim toktok blo aposol Paul wea sei: “Nomata wanem samting hem kasem mi, paoa wea mi kasem from God nao hem strongim mi for gohed.”—Phil. 4:13.

9. Hao nao iumi savve followim example blo Jehovah lo hao hem willing for givim paoa lo olketa narawan? (Lukim tu piksa.)

⁹ Nomata iumi no perfect, iumi savve followim example blo Jehovah lo hao hem willing for givim paoa lo olketa narawan. Hem tru, iumi hard for givim energy or strong lo narawan. Bat iumi savve iusim strong blo iumi for helpem olketa. For example, iumi savve duim shopping or samfala waka lo haos for helpem wanfala brata or sista wea olo or sik. If hem fitim, iumi savve help for volunteer for klinim or duim maintenance lo Kingdom Hall. Taem iumi iusim strong blo iumi olsem, iumi helpem olketa narawan wea worshipim Jehovah.

10. Hao nao toktok blo iumi savve strongim olketa narawan?

¹⁰ No forgetim tu dat toktok wea iumi talem hem garem paoa. Iu savve lo eniwan wea iu need for sei thankiu lo hem? Hao, iu savve lo eniwan wea needim comfort? If olsem, hao sapos iu duim samting for helpem hem? Iu savve visitim hem, ringim hem, sendem wanfala card, email, or text message. No wari tumas for talem olketa spesol toktok. Simpol toktok wea iu talem from heart, maet hem nao wat brata or sista blo iu need for herem for helpem hem gohed faithful lo datfala day or for helpem hem deal witim situation blo hem.—Prov. 12:25; Eph. 4:29.

11. Wat nao tingting blo Jehovah taem hem givim wisdom?

¹¹ Jehovah givim wisdom. Disaepol James sei: “Sapos eniwan long iufala hem needim wisdom, hem mas gohed askem God and bae hem kasem datwan, bikos God hem kaen tumas for givim samting long evriwan and bae hem no kros long man wea askem hem.” (Jas. 1:5) Toktok hia showim Jehovah no selfish witim wisdom blo hem. Hem willing for sharem witim olketa narawan. Lukim tu hao James sei, taem Jehovah givim wisdom “hem no kros long man wea askem hem.” Datwan showim hem no laekem iumi for hol bak for askem hem for wisdom. Really, hem laekem iumi for lukaotem datwan.—Prov. 2:​1-6.

12. Wat nao olketa chance for sharem wisdom wea iumi garem?

¹² Waswe lo iumi? Hao, iumi savve followim example blo Jehovah for sharem wisdom wea iumi garem? (Ps. 32:8) Pipol blo Jehovah garem staka chance for sharem wat olketa lanem. For example, staka taem iumi trainim olketa niu wan lo hao for duim ministry. Olketa elder savve patient for helpem olketa ministerial servant and olketa brata wea baptaes, for duim olketa assignment lo kongregeson. And olketa wea garem experience lo construction and maintenance savve help for trainim olketa narawan for duim waka lo olketa building wea iumi iusim for waka blo Jehovah.

13. Taem iumi trainim olketa narawan, hao nao iumi savve followim example blo Jehovah for sharem wisdom?

¹³ Olketa wea provaedem training savve lane from example blo Jehovah lo hao hem sharem wisdom blo hem. Tingim hao Jehovah willing tumas for givim wisdom. Lo sem wei tu, iumi feel free for sharem knowledge and experience wea iumi garem witim olketa narawan wea gohed for lane. Iumi shud no wari and tingse sapos iumi trainim narawan lo evri knowledge blo iumi bae hem tekova lo waka blo iumi. And tu, iumi no laek for ting olsem: ‘Mi nating kasem eni training nomoa! Letem hem lane seleva.’ Pipol blo Jehovah shud no garem kaen attitude olsem. Bat, iumi hapi for sharem knowledge and even willing for givim taem and strong blo iumi for trainim olketa narawan. (1 Thess. 2:8) Iumi hope tu dat olketa bae “fit for teachim datwan long narawan.” (2 Tim. 2:​1, 2) Taem iumi willing for give, hem olsem iumi part lo wanfala cycle wea result blo hem iumi evriwan bae hapi.

TAEM SAMWAN LUK OLSEM HEM NO APPRECIATIM WAT IUMI GIVIM

14. Taem iumi willing for give, wat nao staka savve duim?

¹⁴ Taem iumi givim or duim samting for narawan, especially for olketa brata and sista, staka taem olketa savve sei thankiu. Maet olketa raetem thankiu note or duim samting wea showimaot olketa tinghae lo wat iu duim for olketa. (Col. 3:15) Taem samwan duim datwan, hem mekem iumi feel hapi go moa dat iumi duim samting for helpem olketa.

15. Wat nao iumi shud rememberim taem samwan no sei thankiu for wat iumi duim?

¹⁵ Bat samfala taem, maet pipol no sei thankiu for wat iumi duim. Maet iumi iusim taem, strong, or material samting for helpem narawan bat then iumi wonder if datfala person hem hapi witim wat iumi duim. If olsem, wat nao savve helpem iumi for no feel nogud or lusim hapi blo iumi? Rememberim toktok lo Acts 20:35 wea hem theme scripture blo disfala study. Hapi wea man kasem from wei for give, hem no depend lo response blo datfala person. Iumi savve chus for gohed hapi for give even if narawan no appreciatim wat iumi duim. Hao nao iumi savve duim datwan? Tingim samfala samting wea savve helpem iumi.

16. Wat nao iumi shud focus lo hem taem iumi give?

¹⁶ Focus for followim example blo Jehovah. Hem givim staka gud tings lo pipol, nomata olketa appreciatim or nomoa. (Matt. 5:​43-48) Jehovah promis if iumi give and “no ting for kasem bak” eniting, bae hem “barava blessim” iumi. (Luke 6:35) Datfala principle fitim tu wei for sei thankiu. Nomata eniwan sei thankiu lo iumi or nomoa, Jehovah bae evritaem rewardim iumi for gud samting wea iumi duim for helpem olketa narawan bikos iumi hapi for give.—Prov. 19:17; 2 Cor. 9:7.

17. Hao nao iumi savve gohed for followim example blo Jehovah? (Luke 14:​12-14)

¹⁷ Wanfala important principle wea savve helpem iumi for followim example blo Jehovah taem iumi give, hem stap lo Luke 14:​12-14. (Readim.) Hem no rong for iumi duim gud samting or invaetem olketa wea bae duim sem samting for iumi lo future. Bat hao if iumi luksavve dat staka taem wea iumi givim samting lo narawan, iumi hope dat olketa tu bae duim gud samting for iumi? Hem gud for iumi followim wat Jesus talem. Iumi savve invaetem olketa wea iumi luksavve living blo olketa hem mekem hem hard for olketa givim bak eni samting for iumi. Taem iumi duim datwan, bae iumi hapi bikos iumi followim example blo Jehovah. Datkaen mind set bae helpem iumi tu for gohed hapi nomata no eniwan sei thankiu lo iumi.

18. Wat nao iumi shud mek sure for no duim, and why nao olsem?

¹⁸ No kwiktaem for ting negative lo olketa narawan. (1 Cor. 13:7) If olketa narawan no sei thankiu lo iumi, tingim diswan: ‘Hao, olketa no really tinghae lo wat iumi duim, or olketa just forget nomoa?’ Maet olketa nara reason stap tu why olketa no respond olsem hao iumi expectim. Samfala maet barava appreciatim wat iumi duim, bat hem no isi for olketa talem datwan. Olketa narawan maet feel shame lelebet for acceptim help, especially if bifor olketa nao main wan wea savve givim help. Nomata wat nao reason why samfala no sei thankiu, Christian love wea iumi garem for olketa brata and sista bae mekem iumi for no ting negative and gohed hapi taem iumi givim samting.—Eph. 4:2.

19-20. Why nao wei for patient savve helpem iumi taem iumi give for olketa narawan? (Lukim tu piksa.)

¹⁹ Mas patient. Wise King Solomon raet olsem abaotem wei for give: “Torowem bred blo iu lo olketa wata, bikos bihaen staka day bae iu faendem datwan moa.” (Eccl. 11:1) Olsem disfala toktok “bihaen staka day” hem showimaot, maet hem tek longtaem bifor samfala talemaot thankiu. Tingim disfala experience wea showim datwan.

²⁰ Staka year bifor, waef blo wanfala circuit overseer sendem wanfala encouraging leta for wanfala sista wea just baptaes and encouragem hem for gohed faithful. Samting olsem eit years bihaen, datfala sista just replyim datfala leta and sei: “Mi just laek for raet kam and talem hao iu barava helpem mi for staka year nomata iu no savve dat iu duim datwan.” Hem sei tu: “[Leta blo iu] hem barava encouragem mi, bat samting wea kasem heart blo mi hem datfala scripture and mi no savve forgetim.”a Bihaen hem storyim olketa challenge wea hem feisim, datfala sista sei: “Samfala taem mi laek for go aot, lusim truth, lusim olketa responsibility and just go. Bat scripture wea iu raetem for mi hem stap olowe lo heart blo mi, and taem olsem . . . mi no givap.” Hem sei tu: “Insaed eitfala year wea go pas, datfala leta nomoa hem barava helpem mi.” Imaginim hapi blo datfala waef blo circuit overseer taem hem kasem datfala leta bihaen longfala taem or olsem scripture hem sei, “bihaen staka day.” Maet iumi tu experiencem hao samwan hem sei thankiu lo iumi bihaen longfala taem for samting wea iumi duim for olketa.

21. Why nao iu disaed strong for gohed for followim example blo Jehovah for give?

²¹ Olsem iumi discussim lo disfala study, Jehovah creatim iumi witim disfala spesol ability. Nomata iumi hapi for kasem samting, hapi wea iumi kasem from wei for give hem winim datwan. Taem iumi helpem olketa brata and sista, datwan mekem iumi feel gud. And taem olketa appreciatim wat iumi duim, iumi hapi. Bat even if samwan wea iumi helpem hem sei thankiu lo iumi or nomoa, iumi hapi nomoa bikos iumi savve iumi duim stret samting. No forgetim nomata wat nao iu givim, “Jehovah garem wei for givim staka samting moa lo iu winim datwan.” (2 Chron. 25:9) No eni samting wea iumi givim hem winim wat Jehovah givim! No eni hapi hem winim hapi wea iumi kasem taem Jehovah rewardim iumi. So iumi mas disaed strong for followim example blo Dadi blo iumi lo heven, wea willing tumas for givim samting.