“Lukim Olketa Piksa!”

Waswe, enitaem iu talem datfala toktok taem iu lukluk long wanfala niu Wastaoa? Olketa brata waka hard for chusim olketa naesfala piksa for teachim iumi. Olketa savve kasem heart bilong iumi and mekem iumi tingting. Iumi kasem olketa gud samting from olketa piksa taem iumi preparem Wastaoa bilong iumi and taem iumi tekpart long Wastaoa Study.

Olsem example, ting raonem why nao piksa long first page bilong each study hem fitim datfala study. Wanem nao iu lukim long disfala piksa? Hao nao hem join witim title and theme scripture? Taem iu lukluk long olketa nara piksa long datfala study, ting raonem hao hem join witim datfala subject and hao hem savve helpem iu.

Hem bae gud for Wastaoa Study conductor givim chance long kongregeson for storyim olketa piksa. Olketa savve storyim hao wanfala piksa join witim subject bilong study or hao datfala piksa helpem olketa. Samfala taem, raeting wea stap witim piksa bae talem paragraf namba wea join witim datwan. Sapos nomoa, study conductor savve disaed wanem paragraf nao hem gud for storyim piksa. Datwan bae helpem iumi evriwan for piksarem long mind bilong iumi wanem iumi savve lanem from Bible.

Wanfala brata hem sei: “Taem mi readim naesfala article, olketa piksa helpem mi for kasem gud samting from datfala article.”