Niu Member Bilong Governing Body

Long Wednesday morning, September 5, 2012, olketa mekem announcement long Bethel famili long America and Canada. Olketa sei wanfala brata hem kamap niu member bilong Governing Body bilong Olketa Jehovah’s Witness. Brata Mark Sanderson kamap member bilong Governing Body start long September 1, 2012.

Brata Sanderson growap long San Diego, California, long America. Dadi and mami bilong hem insaed long truth, and hem baptaes long February 9, 1975. Long September 1, 1983, hem start for pioneer long Saskatchewan, long Canada. Long December 1990, hem graduate from mek-seven class bilong Ministerial Training Skul long America (wea distaem olketa kolem Bible Skul for Olketa Singol Brata). Long April 1991, Brata Sanderson kamap spesol pioneer long Newfoundland, wanfala island long Canada. Bihaen hem duim waka olsem substitute circuit overseer, olketa askem hem for waka long Canada Bethel long February 1997. Long November 2000, hem muv go United States branch and hem waka long Hospital Information Services and bihaen datwan hem waka long Service Department.

Long September 2008, Brata Sanderson attendim Skul for Olketa Branch Komiti Member. Then bihaen hem kamap member bilong Branch Komiti long Philippines. Long September 2010, olketa askem hem for go bak long United States branch and duim waka for helpem Service Komiti bilong Governing Body.