‘God Sevem Noah and Nara Sevenfala Pipol’

TINGIM, Noah and famili bilong hem sidaon klosap tugeta taem datfala big rain hem foldaon. Hem dark insaed long ark and laet from wanfala smol lamp hem shaen long feis bilong olketa. Rain hem mekem bigfala noise taem hem bangam ruf and saed bilong datfala ark. Maet datwan mekem olketa fraet and wari.

Taem Noah lukim waef bilong hem, thrifala son bilong hem, and waef bilong olketa, Noah mas barava thankiu long God. Pipol aotsaed long ark kasem barava nogud samting, bat Noah hapi bikos olketa wea hem barava lovem stap sef witim hem and no eni samting spoelem olketa. Masbi Noah prea long God for talem thankiu, and hem mas tok big mekem famili bilong hem herem bikos long bigfala noise bilong rain.

Noah garem strongfala faith dastawe Jehovah protectim hem and famili bilong hem. (Hebrew 11:7) Waswe, olketa bae needim faith tu bihaen long Flood? Olketa bae barava needim faith mekem olketa savve deal witim olketa hard samting wea bae kamap bihaen. Iumi tu needim faith mekem iumi savve deal witim olketa hard samting distaem. Bae iumi storyim wanem iumi savve lanem from example bilong Noah.

“FOTI DAY AND FOTI NAET”

Hem gohed for rain “for foti day and foti naet.” (Genesis 7:4, 11, 12) Gogo wata hem fulap long evri ples and hem deep tumas. Datfala Flood mekem Noah luksavve God bilong hem, Jehovah, hem protectim pipol wea raeteous and panisim nogud pipol.

Datfala Flood stopem nogud samting wea samfala angel duim. Satan switim staka angel for “lusim ples wea olketa shud stap” long heven. Olketa kam daon long earth for sleep witim olketa woman and garem olketa pikinini wea olketa kolem Nephilim. (Jude 6; Genesis 6:4) Satan mas barava hapi taem hem lukim wanem olketa angel hia duim for spoelem olketa man wea Jehovah wakem.

Bat long taem bilong Flood olketa nogud angel hia mas lusim body wea olketa garem olsem man and go bak long heven. Bihaen datwan, olketa no savve garem moa body olsem man. Olketa lusim tu waef and pikinini bilong olketa for dae witim nara pipol long Flood.

Start long taem bilong Enoch, samting olsem seven handred year bifor long Flood, Jehovah talem olketa man hem bae finisim nogud pipol. (Genesis 5:24; Jude 14, 15) Nomata olsem, wei bilong pipol kamap worse. Olketa barava raf and spoelem earth, gogo olketa finis long flood. Waswe, Noah and famili bilong hem hapi for lukim evri pipol hia dae?

Nomoa! God tu no hapi long datwan. (Ezekiel 33:11) Jehovah duim staka samting for trae sevem pipol. Hem talem Enoch for warnim pipol and talem Noah for wakem ark. Pipol lukim Noah and famili bilong hem wakem datfala big ark for staka year. Jehovah talem Noah tu for preach long pipol. (2 Peter 2:5) Olsem Enoch, Noah warnim pipol Jehovah bae finisim olketa wea duim nogud samting. Hao nao tingting bilong pipol abaotem datfala warning? Jesus sei olsem abaotem pipol long taem bilong Noah: “Olketa nating tinghae long samting wea Noah talemaot, gogo Flood hem kam nomoa and evriwan draon nao.”—Matthew 24:39.

Tingim wanem Noah and famili bilong hem duim insaed long 40-fala day bihaen Jehovah satem door bilong ark. Taem datfala rain hem gohed, evriday olketa need for duim samting olsem for wakem kaikai, klinim ples wea olketa stap, and feedim and lukaftarem olketa animal. Then gogo, olketa feelim datfala maeti ark hem start for muv! Ark hem start for float antap long wata wea kamap deep tumas. (Genesis 7:17) Datwan showimaot bigfala paoa bilong Olmaeti God, Jehovah!

Masbi Noah thankiu long Jehovah for sevem hem and famili bilong hem and for wei wea Jehovah showimaot mercy long pipol taem hem iusim olketa for warnim pipol wea dae long Flood. Maet olketa feel olsem olketa hard waka nating long staka year wea olketa preach, bikos pipol nating laek for lisin! Tingim, maet Noah garem olketa brata, sista, nephew, and olketa niece wea laef bifor Flood hem kam. Bat olketa hia nating lisin long hem. Famili bilong hem nomoa lisin long hem. (Genesis 5:30) Taem Noah and famili bilong hem stap sef insaed long ark, masbi olketa satisfae taem olketa ting go bak long wei wea olketa givim chance long pipol hia for sev.

Jehovah hem no change. (Malachi 3:6) Jesus sei taem bilong iumi hem olsem “taem bilong Noah.” (Matthew 24:37) Iumi stap long taem wea staka nogud samting hem happen, and klosap nao God bae finisim disfala nogud world. Distaem pipol bilong God tu talemaot message for warnim pipol. Waswe, bae iu lisin long datfala warning? Sapos iu acceptim finis datfala message, waswe, bae iu tu talemaot datwan long olketa narawan? Noah and famili bilong hem showimaot gudfala example for iumi.

ARK SEVEM OLKETA FROM FLOOD

Taem ark gohed float antap long wata wea raf, olketa wea stap insaed savve herem noise bilong olketa timba bilong ark taem hem muv. Waswe, Noah hem wari nogud olketa wave big tumas or nogud ark hem brek? Nomoa. Noah no olsem samfala man distaem wea daotem sapos datfala ark hem strong. Bible sei: “From Noah garem faith . . . hem wakem wanfala ark.” (Hebrew 11:7) Why nao hem garem faith? Jehovah mekem agreement witim Noah for sevem hem and famili bilong hem long taem bilong Flood. (Genesis 6:18, 19) Jehovah wakem universe, earth, and evri samting wea laef long earth, so hem fit for protectim datfala ark for no brek. Noah trustim Jehovah bae duim wanem hem promisim. And hem nao wanem Jehovah duim. Noah and famili bilong hem sev long datfala ark.—1 Peter 3:20.

Bihaen 40 day and 40 naet rain hem stop. Datwan hem happen long samting olsem December 2370 B.C.E. Bat famili bilong Noah bae stap for longtaem yet insaed long ark. Datfala ark hem gohed float antap long wata wea kavarem full earth, nomata olketa maunten tu. (Genesis 7:19, 20) Tingim, Noah and olketa son bilong hem Shem, Ham, and Japheth mas gohed waka hard for feedim, klinim, and lukaftarem olketa animal. God iusim paoa bilong hem for mekem olketa wild animal for no raf taem olketa go insaed long ark, and luk olsem hem duim sem samting tu for mekem olketa savve gohed stap kwaet olsem for longtaem insaed ark.a

Noah keepim olketa record long olketa samting wea happen. From datwan, iumi savve long taem wea rain hem start and taem wea hem stop. Iumi savve tu wata hem kavarem earth for 150 day. Then wata hem start for gogo daon. Wanday datfala ark hem sidaon long “olketa maunten long Ararat,” wea distaem datfala kantri hem Turkey. Datwan happen long April 2369 B.C.E. Bihaen 73 day, long June, top bilong olketa maunten start for showaot. Thrifala month bihaen, long September, Noah aotem lelebet part long ruf bilong ark. Olketa mas barava hapi for lukim sun and brithim fresh air. Bat bifor Noah duim datwan, hem duim samting for lukim sapos olketa fit for go aotsaed. Noah sendem wanfala raven, and tu-thri taem nao hem go and kam bak. Then hem sendem moa wanfala dove wea gogo hem faendem wanfala ples for stap and hem no kam bak.—Genesis 7:24–8:13.

Olketa spiritual samting nao hem important long Noah winim olketa nara samting. Tingim, evriday hem and famili bilong hem mas hipap tugeta for prea and story abaotem Dadi bilong olketa long heven. Noah evritaem prea long Jehovah for helpem hem disaedem eni important samting. Bihaen olketa stap long ark for winim wanfala year Noah lukim earth “hem drae.” Nomata olsem, hem no openem door bilong ark and leadim famili bilong hem witim olketa animal for go aotsaed. (Genesis 8:14) Hem weitim Jehovah for talem olketa for go aot!

Olketa famili hed distaem savve lanem staka samting from example bilong Noah. Hem organize gud, waka hard, patient, and lukaftarem gud famili bilong hem. And main important samting long Noah, hem for duim wanem Jehovah God laekem. Sapos iumi followim example bilong Noah, iumi bae helpem olketa wea iumi lovem for kasem gud samting.

“GO AOT FROM ARK”

Gogo Jehovah sei long Noah: “Distaem, iu and waef bilong iu, and thrifala son bilong iu and waef bilong olketa savve go aot from ark.” Olketa obeyim Jehovah and go aot from ark and olketa animal tu go aot. Waswe, olketa animal no followim order taem olketa go aot? Nomoa! Bible sei olketa go aot from ark followim order. (Genesis 8:15-19) Taem Noah and famili bilong hem aotsaed, olketa brithim fresh air and luk go aot long olketa nara ples. Olketa lukim klin earth wea nogud pipol no stap. Olketa Nephilim, raf pipol, olketa bighed angel, and evri nogud pipol nomoa nao!b Long datfala taem, olketa man garem chance for trae duim moa wanem Jehovah laekem.

Firstfala samting wea Noah duim hem samting wea join witim worship. Hem wakem wanfala altar and iusim samfala animal wea Jehovah sei hem klin for sakrifaesim long God. (Genesis 7:2; 8:20) Waswe, Jehovah hapi long wanem Noah duim?

Bible sei: “Jehovah smelem samting wea smel naes.” Bifor long flood God barava sorre bikos hem lukim staka pipol long world raf. Bat taem hem lukim Noah and famili bilong hem barava laek for duim wanem hem laekem, datwan mekem God hapi tumas. Jehovah luksavve from olketa no perfect olketa no savve duim stret samting evritaem. Hem sei: “Heart bilong man laekem tumas for duim nogud samting start kam from taem hem young yet.” (Genesis 8:21) Datwan showimaot Jehovah hem kaen tumas. Jehovah duim nara samting tu wea showimaot hem kaen long olketa man.

God hem aotem curse wea hem putim long graon. Bihaen Adam and Eve sin, God cursim graon and datwan mekem kaikai wea man plantim for no grow gud. Lamech wea hem dadi bilong Noah sei Noah bae helpem olketa man for kamap free from datfala curse. Noah mas hapi tumas taem hem luksavve God hem aotem datfala curse and kaikai wea olketa plantim bae grow gud. So iumi no sapraes Noah kamap wanfala farmer!—Genesis 3:17, 18; 5:28, 29; 9:20.

Long datfala taem tu Jehovah givim samfala law long olketa man. Olsem example, hem sei man mas no killim dae narawan and no iusim blood long rong wei. God hem promisim olketa man bae hem no enitaem iusim flood moa for distroem evri samting wea laef long earth. Jehovah mekem rainbow olsem wanfala saen for showimaot long olketa man hem bae keepim datfala promis. Taem iumi lukim wanfala rainbow datwan mekem iumi tingim datfala promis bilong Jehovah.—Genesis 9:1-17.

Story long Bible abaotem Noah hem wanfala tru story. Noah hem man wea laef bifor. Long datfala taem pipol savve laef for longfala taem. Bihaen long flood Noah laef for nara 350 year, and long olketa year hia hem kasem staka hard taem. Noah mekem bigfala mistek taem hem drunk wanfala taem, and then nara nogud samting moa hem happen taem granson bilong hem Canaan duim bigfala sin. From Canaan duim olsem, olketa wea kam from laen bilong hem kasem nogud samting. Noah lukim tu samfala wea kam from laen bilong hem duim olketa bigfala sin olsem wei for worshipim idol and for raf long taem bilong Nimrod. Noah lukim samfala gud samting tu. Son bilong hem Shem faithful and showimaot gudfala example for famili bilong hem.—Genesis 9:21-28; 10:8-11; 11:1-11.

Iumi mas gohed faithful olsem Noah. Iumi mas gohed faithful nomata olketa narawan no laek worshipim God, or samfala stop for worshipim hem. Jehovah barava tinghae long olketa wea gohed faithful long hem. Jesus Christ sei: “Man wea bae sev nao hem man wea no givap go kasem taem world hem finis.”—Matthew 24:13.