God Hem Savve Sorre​—Hao Nao Iumi Savve Mekem Hem Hapi?

Waswe, enitaem iu krae from iu garekil and body bilong iu soa tumas?—a Maet iumi evriwan kasem diswan. Bat samfala taem iumi krae bikos iumi sorre. Maet samwan talem laea samting abaotem iumi. Datwan savve mekem iumi feel nogud, iaman?— God tu savve feel nogud taem samwan talem laea samting abaotem hem. Bae iumi storyim diswan and lukim wanem iumi savve duim for mekem God hapi.

Bible storyim samfala pipol wea sei olketa lovem God bat olketa mekem “hem sorre” and “barava feel nogud.” Bae iumi storyim why Jehovah hem sorre taem iumi no obeyim wanem hem talem.

Firstfala man and woman wea Jehovah wakem, tufala mekem hem sorre tumas. Jehovah putim tufala long “garden bilong Eden” wea hem wanfala paradaes. Waswe, iu savve long nem bilong tufala?— Ia, God wakem Adam firstaem, then hem wakem Eve. Bae iumi storyim wanem tufala duim wea mekem Jehovah sorre.

Bihaen Jehovah putim tufala insaed datfala garden, hem talem tufala for lukaftarem. Hem talem tufala for garem pikinini and tufala bae stap long datfala garden and no savve dae. Bat wanfala nogud samting hem happen bifor Adam and Eve garem pikinini. Waswe, iu savve wanem hem happen?— Wanfala angel hem mekem Eve and Adam for againstim Jehovah. Bae iumi storyim hao nao diswan happen.

Datfala angel hem iusim wanfala snek for toktok. Eve laekem wanem datfala snek hem talem. Snek hem sei Eve bae kamap “olsem God.” So Eve duim nao wanem datfala snek hem talem. Waswe, iu savve wanem nao hem duim?—

Eve kaikaim frut bilong datfala tree wea Jehovah talem Adam for tufala no kaikaim. Bifor God wakem Eve, hem talem Adam: “Iu savve kaikaim frut bilong evri tree long garden. Bat iu mas no kaikaim frut bilong datfala tree wea piksarem wei for savve long gud and nogud samting, bikos long day wea iu kaikaim datwan bae iu dae.”

Eve savve long datfala law. Bat hem gohed for lukluk long datfala tree and tingse “hem gud for kaikaim, and frut hia hem barava luk naes tumas long hem. So hem tekem datfala frut and kaikaim.” Bihaen hem givim long Adam and hem tu “kaikaim” datfala frut. Waswe, iu savve why nao hem duim datwan?— Bikos Adam lovem Eve winim Jehovah. Hem disaed for mekem Eve hapi winim God. Bat hem important for obeyim Jehovah winim eni narawan!

Waswe, iu tingim datfala snek wea story long Eve? Samwan nao kontrolem datfala snek for toktok. Hu nao kontrolem datfala snek for story long Eve?— Devil and Satan wea hem “datfala snek bilong bifor kam.”

Waswe, iu savve wanem nao bae iu duim for mekem Jehovah hapi?— Iu bae mekem Jehovah hapi sapos iu trae for obeyim hem evritaem. Satan sei hem savve mekem evriwan for duim wanem hem laekem olketa for duim. So Jehovah sei long iumi: “Son [or dota] bilong mi, duim samting wea wise, and mekem heart bilong mi hapi, mekem mi savve givim ansa long datwan wea tok daonem mi.” Satan hem tok spoelem Jehovah. Hem sei hem savve mekem evriwan for no worshipim Jehovah. So iu savve mekem Jehovah hapi taem iu obeyim hem and gohed worshipim hem! Waswe, bae iu traem best bilong iu for duim datwan?—