Pioneer Waka Strongim Wei Wea Iumi Fren Witim God

1, 2. (a) Taem iumi tingim and story abaotem samwan wea iumi lovem, wanem nao savve kamaot from datwan? (Lukim piksa long start bilong study.) (b) Olketa wanem kwestin nao bae iumi story abaotem?

TAEM iumi tingim and story abaotem samwan wea iumi lovem, datwan savve strongim wei wea iumi fren witim hem. Wei wea iumi fren witim Jehovah God hem olsem tu. Taem David lukaftarem olketa sheepsheep, staka naet hem savve lukluk long olketa star and ting raonem olketa nambawan wei bilong God. Hem sei: “Taem mi luk go ap long skae and lukim moon and olketa star wea iu wakem, mi ting olsem: Why nao iu tingim olketa man nating, and why nao iu lukaftarem olketa man long earth?” (Ps. 8:3, 4) And taem aposol Paul storyim nambawan samting wea Jehovah duim for mekem plan bilong Hem for olketa anointed Christian kamap tru, hem sei: “Olketa blessing, wisdom, and savve bilong God barava big tumas!”—Rome 11:17-26, 33.

² Iumi tingim and story abaotem Jehovah taem iumi duim ministry. Diswan strongim wei wea iumi fren witim hem. Staka pioneer sei wei for spendem moa taem long ministry strongim love wea olketa garem for God. Sapos iu pioneer distaem or iu laek for kamap pioneer, tingim olketa kwestin hia: Hao nao pioneer waka savve strongim wei wea iu fren witim Jehovah? Sapos iu wanfala pioneer, wanem nao bae helpem iu for gohed duim disfala spesol waka? Sapos iu no pioneer yet, wanem nao iu savve duim for helpem iu kasem datfala goal? Firstaem, bae iumi storyim hao pioneer waka savve helpem iumi for fren gud witim God.

PIONEER WAKA STRONGIM WEI WEA IUMI FREN WITIM GOD

3. Taem iumi storyim olketa gudfala samting wea Kingdom bae duim, hao nao datwan helpem iumi?

³ Taem iumi storyim olketa gudfala samting wea Kingdom bae duim, datwan strongim wei wea iumi fren gud witim Jehovah. Wanem scripture nao iu savve laek for readim taem iu duim preaching waka? Waswe, hem Psalm 37:10, 11, Daniel 2:44, John 5:28, 29, or Revelation 21:3, 4? Evritaem iumi storyim olketa promis wea stap insaed olketa scripture hia, datwan mekem iumiseleva tu for tingim God bilong iumi Jehovah hem kaen tumas and hem givim “evri gud and perfect present.” Diswan savve mekem iumi fren gud witim hem.—Jas. 1:17.

4. Taem iumi preach long nara pipol, hao nao datwan mekem iumi barava tinghae long kaenfala wei bilong God?

⁴ Taem iumi lukim staka pipol no hapi and no garem hope, iumi barava tinghae long truth. Pipol long world no kasem help wea olketa needim for garem gudfala laef and hapi. Plande wari abaotem future and no garem hope. Olketa laek for savve why nao iumi laef. Staka pipol wea biliv long God no savve gud long Bible tu. Olketa olsem pipol wea stap long Nineveh bifor. (Readim Jonah 4:11.) Taem iumi spendem moa taem for story witim pipol long ministry, datwan helpem iumi for luksavve Jehovah barava lukaftarem iumi. (Isa. 65:13) Iumi luksavve tu Jehovah no just lukaftarem pipol bilong hem nomoa, bat hem laekem evriwan nao for garem chance for kasem comfort and garem strongfala hope. Diswan mekem iumi tingim Jehovah hem barava kaen tumas.—Rev. 22:17.

5. Taem iumi teachim truth long narawan, datwan mekem iumi ting hao long olketa problem bilong iumi?

⁵ Taem iumi teachim truth long narawan, datwan helpem iumi for no tingim tumas olketa problem bilong iumiseleva. Wanfala regular pioneer wea nem bilong hem Trisha, sei hem feel nogud tumas taem dadi and mami bilong hem divorce. Wantaem, from hem sorre tumas hem no mas laek for go preaching. Nomata olsem hem go duim wanfala Bible study. Hem study witim thrifala pikinini long wanfala famili wea garem staka problem. Dadi hem lusim olketa, and big brata hem raf long olketa. Trisha sei: “Taem mi comparem samting wea kasem mi and samting wea kasem olketa, mi luksavve problem bilong mi hem smol nomoa. Taem mifala study, eye bilong thrifala hem shaen and olketa laflaf and hapi. Long datfala day, olketa pikinini hia olsem present wea Jehovah givim long mi.”

6, 7. (a) Taem iumi studyim Bible witim narawan, hao nao datwan strongim faith bilong iumi? (b) Iumi feel hao taem iumi lukim olketa Bible principle helpem Bible study bilong iumi?

⁶ Taem iumi teachim tru samting from Bible long narawan, datwan strongim faith bilong iumi long olketa teaching hia. Aposol Paul story abaotem samfala Jew long taem bilong hem wea no duim wanem olketa talem narawan for duim. Hem sei long olketa: “Nogud iu teachim nara pipol, batawea, iu no teachim iuseleva.” (Rome 2:21) Olketa pioneer garem plande chance for teachim truth long olketa narawan and duim olketa Bible study. For teachim narawan long gudfala wei, olketa mas teachim olketa seleva firstaem. Olketa mas prepare for evri study and maet olketa mas duim research tu for ansarem olketa kwestin. Wanfala pioneer wea nem bilong hem Janeen, sei evritaem wea hem teachim truth long narawan, datwan strongim faith bilong hemseleva long olketa teaching hia.

⁷ Taem iumi lukim olketa Bible principle helpem olketa study bilong iumi, iumi barava tinghae long wisdom bilong God. (Isa. 48:17, 18) Diswan mekem iumi tu laek for gohed followim olketa principle hia. Wanfala pioneer wea nem bilong hem Adrianna, hem sei: “Pipol savve garem staka problem sapos olketa depend long savve bilong olketa seleva. Bat taem olketa start for followim wisdom bilong Jehovah, olketa stretawe kasem gud samting.” Phil, wea hem pioneer tu, sei hem barava sapraes taem hem lukim bigfala change long laef bilong pipol taem Jehovah helpem olketa.

8. Taem iumi waka witim olketa brata and sista long ministry, hao nao datwan helpem iumi?

⁸ Taem iumi waka witim olketa brata and sista long ministry, datwan encouragem iumi. (Prov. 13:20) Olketa pioneer savve spendem staka taem witim olketa brata and sista long ministry. Diswan givim olketa staka chance moa for “strongim narawan.” (Rome 1:12; readim Proverbs 27:17.) Lisa, wanfala pioneer sei long ples wea hem waka, pipol savve jealous and laek for winim narawan. Evriday olketa gossip and tok swear. Hem sei: “Samfala taem olketa mekfani and tok spoelem mi bikos long gudfala wei bilong mi. Bat taem mi waka witim olketa brata and sista long ministry, datwan barava encouragem mi. Taem mi go bak long haos, mi feel strong nomata mi taed.”

9. Taem hasband and waef pioneer tugeta, hao nao datwan helpem marit bilong tufala?

⁹ Taem hasband and waef pioneer tugeta, datwan savve strongim marit bilong tufala. (Eccl. 4:12) Madeline, wea pioneer witim hasband bilong hem sei: “Mi and hasband bilong mi garem taem for story abaotem day bilong mifala long ministry, or samting wea mifala readim long Bible reading wea mifala savve followim long ministry. Wei for pioneer tugeta hem gohed for strongim marit bilong mitufala.” Trisha wea hem and hasband bilong hem pioneer tugeta sei tufala agree for no garem eni kaon. So datwan mekem tufala for no raoa abaotem selen. Tufala savve go tugeta long olketa return visit and Bible study bilong tufala. Diswan barava strongim marit bilong tufala.

10. Taem Kingdom hem first samting long laef bilong iumi and iumi lukim Jehovah sapotim iumi, hao nao datwan helpem iumi?

¹⁰ Samting wea helpem iumi for barava trustim Jehovah nao hem taem Kingdom hem first samting long laef bilong iumi, and taem iumi luksavve Jehovah sapotim iumi and ansarem prea bilong iumi. Hem tru, evri Christian wea faithful trustim Jehovah. Bat olketa pioneer luksavve wei for trustim Jehovah savve helpem olketa for gohed pioneer. (Readim Matthew 6:30-34.) Curt and waef bilong hem tufala pioneer, and Curt savve duim substitute circuit overseer waka tu. Wantaem, tufala mas draev for tu and haf hour for visitim wanfala kongregeson. Tufala garem inaf petrol nomoa for draev go kasem datfala kongregeson, bat no inaf petrol for kam bak. And tu, Curt mas weit nara week moa bifor hem kasem pei bilong hem. Hem sei tufala no sure sapos tufala shud go. Bat tufala prea abaotem datwan and disaed for go. Tufala sure God bae givim wanem tufala needim. Taem tufala redi for go, wanfala sista ringim tufala and sei hem garem present for tufala. Datfala present hem selen wea tufala needim for peim petrol for kam bak. Curt sei olketa samting olsem happen staka taem, and datwan mekem tufala luksavve Jehovah nao givim wanem iumi needim.

11. Wanem nao samfala blessing wea olketa pioneer kasem?

¹¹ Staka taem olketa pioneer sei taem olketa barava fren gud witim God and duim moa samting long ministry, olketa savve kasem staka blessing. (Deut. 28:2) Nomata olsem, samfala taem pioneer waka hem no isi. Iumi evriwan safa bikos iumi no perfect and iumi stap long disfala nogud world. Samfala taem olketa pioneer kasem samfala hevi so olketa stop for pioneer. Bat staka taem wei hem stap for olketa savve gohed pioneer nomoa. Wanem nao savve helpem olketa pioneer for gohed long disfala spesol waka?

HAO FOR GOHED LONG PIONEER WAKA

12, 13. (a) Sapos pioneer no savve kasem hour bilong hem, wanem nao hem shud duim? (b) Why nao hem barava important for pioneer markem taem for readim Bible evriday, duim study seleva, and ting raonem wanem hem lanem?

¹² Olketa pioneer savve barava busy. So hem important for olketa mas organize gud. (1 Cor. 14:33, 40) Sapos pioneer no savve kasem hour bilong hem, hem shud lukluk gud long hao hem iusim taem bilong hem. (Eph. 5:15, 16) Hem savve tingim olketa kwestin hia: ‘Waswe, mi iusim staka taem tumas long hapitaem? Waswe, mi savve ting raonem haomas day or hour nao mi iusim for kasem need bilong mi and maet changem datwan lelebet? Waswe, mi iusim staka taem tumas for duim samting wea no important?’ Olketa pioneer mas tingim olketa kwestin hia evritaem and sapos olketa luksavve olketa mas changem samfala samting, hem gud for duim datwan.

¹³ Pioneer mas markem taem for readim Bible evriday, duim study seleva, and ting raonem wanem hem lanem. Hem mas mek sure hem no iusim taem wea hem markem for duim olketa important samting for duim olketa samting wea no important. (Phil. 1:10) Olsem example, wanfala pioneer kam bak long haos bihaen long staka hour wea hem duim preaching waka. Hem plan for prepare for olketa meeting taem hem daylaet yet. Bat taem hem arrive, hem sidaon firstaem for story witim olketa narawan long vilij gogo hem seke bat hem naet nao, and hem no duim nao wanem hem plan for duim. Why nao diswan hem nogud? Tingim diswan. Sapos wanfala sportsman laek for gohed duim datfala sports, hem mas evritaem kaikaim healthy kaikai. Olsem tu, pioneer wea laek for gohed long pioneer waka mas evritaem duim study seleva.—1 Tim. 4:16.

14, 15. (a) Why nao olketa pioneer shud garem simpol laef? (b) Sapos pioneer kasem olketa hard samting, wanem nao hem shud duim?

¹⁴ Olketa wea gohed strong long pioneer waka traem best for garem simpol laef. Hem nao samting wea Jesus encouragem olketa disaepol bilong hem for duim. (Matt. 6:22) Jesus garem simpol laef mekem hem savve duim gud ministry bilong hem. Wantaem Jesus sei: “Olketa fox garem hol for stap insaed and olketa bird garem nest tu, bat Son bilong man no garem eni ples bilong hemseleva wea hem savve sleep long hem.” (Matt. 8:20) Olketa pioneer wea followim example bilong Jesus luksavve sapos olketa garem staka samting, bae olketa mas spendem taem and selen for keepim gud olketa samting hia.

¹⁵ Olketa pioneer luksavve olketa duim spesol waka, bat olketa no tingse olketa gud winim olketa narawan. Olketa savve pioneer waka hem wanfala present from Jehovah. So for gohed long disfala waka, evri pioneer mas trustim Jehovah. (Phil. 4:13) Bae olketa kasem olketa hard samting. (Ps. 34:19) Long taem olsem, olketa pioneer mas no kwiktaem for givap long pioneer waka bat askem Jehovah for leadim olketa and letem Jehovah helpem olketa. (Readim Psalm 37:5.) Taem olketa luksavve Jehovah hem lukaftarem olketa gud, datwan mekem olketa barava fren gud witim hem.—Isa. 41:10.

WASWE, IU SAVVE PIONEER?

16. Wanem nao iu shud duim sapos iu laek for pioneer?

¹⁶ Sapos iu laek for pioneer and kasem olketa blessing wea olketa pioneer kasem, prea long Jehovah abaotem datwan. (1 John 5:14, 15) Story witim olketa wea pioneer. Markem olketa goal wea bae helpem iu for kamap wanfala pioneer. Datwan nao samting wea Keith and Erika duim. Long firstaem, tufala duim sem samting olsem olketa nara hasband and waef wea olketa sem age. Tufala evriwan waka and no longtaem bihaen tufala marit, tufala baem haos and niu trak. Tufala sei: “Mitufala tingse olketa samting hia bae mifala hapi. Bat olketa samting hia no mekem mifala hapi.” Bihaen olketa finisim Keith long waka bilong hem, hem start auxiliary pioneer. Hem sei: “Taem mi pioneer, datwan mekem mi tingim moa bigfala hapi wea man savve kasem taem hem duim ministry.” Tufala fren gud witim wanfala hasband and waef wea pioneer and tufala hia helpem Keith and Erika for luksavve wei for pioneer and for garem simpol laef savve mekem man barava hapi. Wanem nao Keith and Erika duim? Tufala raetem wanfala list long olketa goal bilong tufala, and tickim each goal long datfala list taem tufala kasem. Gogo tufala fit for pioneer nao.

17. Why nao hem gud for ting raonem sapos iu fit for pioneer?

¹⁷ Waswe, iu savve pioneer? Sapos iu tingse iu no fit for pioneer distaem, waka hard for fren gud witim Jehovah long wei for duim gud ministry bilong iu. Sapos iu prea long Jehovah and ting raonem gud living bilong iu, maet iu luksavve iu savve changem samfala samting mekem iu fit for pioneer. Taem iu start for pioneer, hapi wea iu kasem bae winim eni sakrifaes wea iu duim. Iu bae hapi bikos Kingdom bilong God hem first samting long laef bilong iu and bikos iu duim moa samting for helpem nara pipol. (Matt. 6:33) Iu bae garem staka chance for tingim and story abaotem Jehovah, and diswan bae strongim love bilong iu for hem and hem bae hapi long iu.