“Iu Savve Kamap Wanfala Gud Pioneer!”
1. Wanem nao tingting bilong wanfala sista abaotem pioneer waka bilong hem?
1 Kathe Palm wea duim pioneer waka for staka year long Chile, South America, hem sei olsem: “No eni waka moa wea mi savve, hem olsem disfala waka wea mekem mi hapi and satisfae long spiritual wei.” Hem pioneer from wan saed long Chile go kasem nara saed. Samwan wea savve abaotem gudfala laef wea olketa pioneer garem, maet talem iu: “Iu savve kamap wanfala gud pioneer!”
2. Storyim why man savve barava hapi taem hem duim olketa spiritual samting.
2 Laef wea Savve Mekem Man Hapi: Jesus, wea showimaot example for iumi, barava hapi for duim wanem Dadi bilong hem laekem. (John 4:34) Dastawe, Jesus tok tru taem hem talem olketa disaepol bilong hem, man savve barava hapi taem hem duim olketa samting wea join witim wei for worshipim Jehovah. Iumi satisfae taem iumi busy for duim olketa samting wea Jehovah hapi long hem. And tu, taem iumi iusim moa taem, strong, and olketa samting wea iumi garem for helpem olketa narawan, bae iumi hapi go moa.—Acts 20:31, 35.
3. Wanem hapi nao iumi maet kasem taem iumi iusim moa taem long ministry?
3 Taem iumi iusim moa taem long ministry, iumi bae garem staka chance for kasem hapi wea savve kamaot from wei for startim and duim olketa Bible study. Nomata luk olsem staka haosholder long territory bilong iumi no interest, taem iumi savve gud long hao for preach, maet iumi savve helpem staka pipol moa. Taem olketa pioneer attendim Pioneer Service Skul bihaen olketa pioneer for wanfala year, olketa savve iusim wanem olketa lanem for helpem olketa narawan. (2 Tim. 2:15) Taem iumi no givap, maet iumi plantim olketa seed bilong truth wea savve garem frut long olketa taem wea bae kam.—Eccl. 11:6.
4. Wanem nao olketa young pipol wea klosap for graduate shud ting raonem?
4 Young Pipol: Taem iu long skul yet, waswe, iu ting raonem gud wanem bae iu duim long future? Kam kasem distaem, iu iusim staka taem for duim olketa skul waka bilong iu. Bihaen iu graduate and iu finis skul nao, wanem nao bae iu duim witim olketa taem bilong iu? Winim wei for waka for selen, hao sapos iu ting raonem and prea abaotem regular pioneer waka? Olketa teknik wea iu bae lanem, olsem for preach long difren kaen pipol, winim hard samting wea kasem iu, waka hard for bossim seleva, and kamap gud long wei for teach, bae helpem iu long laef bilong iu.
5. Wanem nao mami and dadi and olketa long kongregeson savve duim for mekhae long pioneer waka?
5 Dadi and mami, waswe, iufala helpem pikinini bilong iufala for markem goal for duim full taem service? Toktok and gudfala wei bilong iufala savve barava helpem pikinini for putim Kingdom firstaem. (Matt. 6:33) Ray, wea start for duim pioneer waka bihaen hem finis from skul sei olsem: “Mami bilong mi evritaem talem, wei for pioneer savve mekem man barava hapi.” Evriwan long kongregeson savve mekhae long wei for pioneer long toktok and wanem olketa duim. Jose, wea kam from Spain sei olsem: “Long kongregeson bilong mi, olketa ting long pioneer waka hem nambawan waka wea olketa young wan savve duim. Toktok and wei wea olketa tinghae long pioneer waka and help wea olketa givim, helpem mi for start pioneer.”
6. Wanem nao maet iumi savve duim sapos distaem iumi no tingting for pioneer?
6 Winim Olketa Samting wea Stopem Iu: Bat waswe sapos iu sei, ‘Mi no tingting for pioneer.’ Sapos hem nao wanem iu tingim firstaem, prea long Jehovah abaotem datwan and talem hem, ‘Mi no savve sapos mi laek for pioneer bat mi laek for duim wanem bae mekem iu hapi.’ (Ps. 62:8; Prov. 23:26) Then followim wanem Bible and organization bilong hem talem. Staka regular pioneer ‘traem’ auxiliary pioneer firstaem, and hapi wea olketa kasem mekem olketa laek for duim regular pioneer waka.—Ps. 34:8.
7. Hao nao iumi savve winim tingting for sei iumi no savve kasem 70 hour long wanfala month?
7 Waswe sapos iu tingse iu no savve kasem 70 hour for wanfala month? Hem bae gud sapos iu story witim olketa pioneer wea garem sem living olsem iu! (Prov. 15:22) Then wakem samfala schedule for iu traem. Maet iu lukim hao wei for duim moa long ministry and no duim olketa nara samting hem no hard tumas olsem hao iu tingim firstaem.—Eph. 5:15, 16.
8. Why nao hem gud samfala taem for iumi lukluk gud moa long living bilong iumi?
8 Lukluk Gud Moa Long Living Bilong Iu: Living bilong iu savve change. Samfala taem hem gud for iu lukluk gud moa long living bilong iu. Tingim, waswe, iu klosap for retire from waka bilong iu? Randy, wea retire taem hem no olo yet sei: “Samting wea mi disaedem mekem mi fit for start duim regular pioneer witim waef bilong mi, diswan helpem mitufala for garem chance for muv for duim preaching waka long ples wea needim samfala pablisa moa. Mi kasem staka blessing from wanem mi disaedem, bat bigfala blessing wea mi kasem nao hem gudfala conscience.”
9. Wanem nao olketa hasband and waef shud ting raonem?
9 Taem samfala hasband and waef lukluk gud long living bilong olketa, olketa luksavve tufala evriwan no need for waka full taem. Tru tumas, diswan maet mekem famili for garem laef wea simpol, bat hem barava gud samting for duim. John sei olsem abaotem waef bilong hem wea just finis from full taem waka for duim moa long ministry, “Mi barava hapi taem mi savve waef bilong mi duim olketa spiritual samting evritaem.”
10. Wanem nao bae strongim olketa Christian for ting raonem wei for pioneer?
10 Wanfala Wei for Showimaot Love and Faith: Preaching waka nao hem important waka wea Jehovah givim long eniwan long iumi for duim. Disfala world klosap nao bae hem finis, and olketa wea prea long Jehovah for helpem olketa bae sev. (Rom. 10:13) From iumi barava lovem and tinghae long wanem hem duim for iumi, datwan strongim iumi for obeyim wanem Son bilong hem talem for gohed faithful for preach. (Matt. 28:19, 20; 1 John 5:3) Nara samting tu, taem iumi biliv hao iumi stap long olketa last day, datwan bae mekem iumi for duim wanem iumi fit for duim long ministry long taem wea stap yet, and no mekius long world.—1 Cor. 7:29-31.
11. Hao nao iumi shud ting sapos samwan sei, iumi savve kamap wanfala gud pioneer?
11 Iumi duim regular pioneer waka no for kasem hour wea organization markem nomoa, bat iumi laek showimaot iumi lovem God. So sapos samwan talem iu, iu savve kamap wanfala gud pioneer, tinghae long datfala toktok. Ting raonem and prea abaotem, mekem iu savve joinim olketa wea hapi for duim disfala waka.
[Piksa long page 4]
Dadi and mami, waswe, iufala helpem pikinini bilong iufala for markem goal for duim full-taem service?
[Piksa long page 5]
Preaching waka nao hem important waka wea Jehovah givim long eniwan long iumi for duim.