‘Jehovah Willing for Forgivim Iufala’

Edward Herbert, wea hem wanfala savveman long England long mek-17 century, hem sei: “Man wea no laek forgivim narawan hem olsem hem brekem bridge wea hemseleva bae akrosim.” Disfala toktok showimaot wanfala reason for iumi mas forgivim narawan. Diswan hem bikos gogo maet iumi tu bae askem narawan for forgivim iumi. (Matthew 7:12) Bat aposol Paul storyim reason wea important winim datwan long Colossae 3:13.—Readim.

From iumi evriwan no perfect, maet samfala taem iumi mekem narawan feel nogud and olketa narawan maet duim sem samting long iumi. (Rome 3:23) Wanem nao iumi savve duim for gohed stap gud witim olketa narawan? God iusim holy spirit for leadim Paul for talem iumi for no gohed kros long narawan bat forgivim narawan. Paul raetem datfala toktok klosap tu thousand year go finis and hem fitim olketa long datfala taem and iumi distaem tu. Bae iumi storyim moa disfala toktok bilong Paul.

“Mas no kros.” Greek toktok wea Paul iusim for “mas no kros” hem savve minim for patient. Wanfala buk hem sei olketa Christian garem disfala wei “taem olketa willing for patient witim olketa wea savve duim olketa samting wea mekem olketa feel nogud.” Taem iumi tingim iumi tu savve mekem olketa narawan feel nogud, iumi bae no letem samting wea olketa narawan duim wea iumiseleva no hapi long hem for spoelem wei wea iumi stap gud witim olketa. Bat waswe sapos olketa narawan sin againstim iumi?

‘Mas evritaem forgivim narawan.’ Wanfala savveman sei, olketa no iusim evritaem disfala Greek toktok wea olketa transleitim “evritaem forgive.” Bat olketa iusim disfala toktok bikos hem garem deep mining wea showimaot man hem barava willing for forgive. Nara savveman hem sei datfala toktok hem savve minim “for duim samting for mekem narawan hapi, kaen long narawan, duim gud samting for narawan.” Iumi showimaot iumi kaen taem iumi willing for forgivim narawan nomata iumi ‘feel nogud long hem.’ Why nao iumi mas duim olsem? Bikos maet gogo iumi tu bae laekem narawan for forgivim iumi long sem wei.

“Iufala mas olsem Jehovah wea hem willing for forgivim iufala.” Main reason for iumi mas evritaem forgivim narawan hem bikos Jehovah God hem willing for forgivim iumi. (Micah 7:18) Tingim wei wea Jehovah hem barava kaen long olketa wea repent. Jehovah hem no garem sin olsem iumi. Nomata olsem, hem willing for barava forgivim man wea repent nomata hem no needim datfala man for duim sem samting long hem. Tru tumas, Jehovah hem nambawan example long wei for willing for forgive!

Wei wea Jehovah showimaot mercy long iumi hem mekem iumi for laek followim example bilong hem. (Ephesus 4:32–5:1) Hem gud for iumiseleva tingim diswan, ‘Jehovah hem barava willing for forgivim mi, so mi tu shud forgivim narawan wea sin againstim mi wea repent.’—Luke 17:3, 4.