ANSA FOR OLKETA BIBLE KWESTIN
Waswe, eni hope stap for olketa wea dae finis?
Man wea dae finis hem olsem hem sleep nomoa bikos hem no savve long eni samting and no savve duim eni samting. Bat God wea wakem iumi savve mekem olketa wea dae finis for laef bak. God showimaot hem savve duim datwan, taem hem givim paoa long Jesus for mekem samfala pipol wea dae finis long bifor for laef bak.—Readim Ecclesiastes 9:5; John 11:11, 43, 44.
Why nao man wea dae finis hem olsem hem sleep nomoa?
God promisim bae hem mekem olketa wea dae finis wea hem no forgetim olketa for laef bak insaed wanfala niu world wea evri samting bae raeteous. Olketa hia mas weit long grev go kasem taem God bae mekem olketa for laef bak. Olmaeti God barava laek for iusim paoa bilong hem for mekem olketa wea dae finis for laef bak.—Readim Job 14:14, 15.
Olketa wea laef bak bae hao?
Taem God mekem pipol for laef bak, olketa bae luksavve long olketa fren and famili member, and lukluk bilong olketa bae no barava change. Nomata body bilong man wea dae hem rotten finis, God savve mekem hem laef bak witim wanfala niu body.—Readim 1 Corinth 15:35, 38.
Samfala nomoa bae laef bak for go long heven. (Revelation 20:6) Staka wea laef bak bae stap long paradaes long earth. Olketa hia bae startim niu laef bilong olketa and garem hope for laef olowe.—Readim Psalm 37:29; Acts 24:15.