ANSA FOR OLKETA BIBLE KWESTIN
Waswe, olketa wea dae finis savve laef bak?
Iumi sure God fit for mekem olketa wea dae finis for laef bak
Jehovah nao givim laef long evri samting. (Psalm 36:9) So hem barava fitim for God mekem olketa wea dae finis for laef bak! Iumi sure hem bae duim diswan long future bikos Bible nao hem storyim datwan. (Readim Acts 24:15) Bat why nao God laek for duim olsem?
Plan bilong God firstaem hem for olketa man laef olowe long earth. (Genesis 1:31; 2:15-17) God no changem datfala plan. Hem sorre tumas taem hem lukim iumi kasem staka hard taem and laef bilong iumi hem short tumas.—Readim Job 14:1, 14, 15.
Olketa wea laef bak bae stap long wea?
Waswe, God wakem olketa man for stap long heven? Nomoa. Olketa angel nao God wakem olketa for stap long heven, bat hem wakem olketa man for stap long earth. (Genesis 1:28; Job 38:4, 7) Tingim olketa wea Jesus mekem olketa for laef bak long bifor. Olketa laef bak and stap long earth. So staka long olketa wea bae laef bak long future bae stap long earth.—Readim John 5:28, 29; 11:44.
Bat God chusim wanfala smol sekson wea bae laef bak and go long heven. Olketa bae garem spirit body. (Luke 12:32; 1 Corinth 15:49, 50) Olketa wea go long heven bae rul witim Christ ovarem disfala earth.—Readim Revelation 5:9, 10.