“No Lusim Stretfala Tingting” Bilong Iu!
“Olketa brata, . . . iufala mas no lusim stretfala tingting.”—2 THESS. 2:1, 2.
1, 2. Why nao wei for trikim and laea long narawan hem kamap big tumas distaem, and diswan savve kam from olketa wanem samting? (Lukim piksa long start bilong study.)
WEI for trikim and laea long narawan hem kamap big tumas long disfala world. Iumi shud no sapraes long diswan. Bible sei Satan hem savve tumas hao for trikim pipol and hem nao rulim disfala world. (1 Tim. 2:14; 1 John 5:19) Taem world hem gogo for finis, Satan hem kros fogud bikos hem “garem lelebet taem nomoa.” (Rev. 12:12) Dastawe pipol wea stap anda long paoa bilong Devil bae gohed for laea long narawan. Olketa main wan wea olketa bae trae for trikim nao hem pipol bilong Jehovah.
2 Taem olketa niuspepa, TV program, and Internet story abaotem pipol bilong Jehovah and biliv bilong olketa, samfala taem olketa no talem full story and maet olketa laea tu. Samfala pipol kwiktaem for bilivim olketa laea story hia and datwan mekem olketa feel nogud or kros.
3. Wanem nao savve protectim iumi from olketa laea story?
3 Iumi hapi from iumi savve protectim iumiseleva from olketa laea bilong Satan. For helpem iumi duim datwan, iumi garem Bible wea savve “stretem evri samting.” (2 Tim. 3:16) Wanem aposol Paul raetem showimaot samfala Christian long Thessalonica bilivim olketa laea story. Hem sei: “Iufala mas no lusim stretfala tingting.” (2 Thess. 2:1, 2) Wanem nao iumi savve lanem from disfala warning bilong Paul, and hao nao iumi savve followim datwan distaem?
OLKETA WARNING WEA BARAVA FITIM
4. Wanem nao Paul talem for warnim olketa Christian long Thessalonica abaotem “day bilong Jehovah,” and hao nao iumi kasem warning distaem?
4 Long first leta wea Paul raetem for olketa Christian long Thessalonica, hem warnim olketa abaotem “day bilong Jehovah” wea klosap for kam. Hem no laekem olketa Christian brata for konfius or no redi for datfala day. Hem kolem olketa, “olketa son bilong laet,” and then hem sei: “Iumi mas gohed wekap and garem gudfala tingting.” (Readim 1 Thessalonica 5:1-6.) Distaem, iumi weitim taem wea Bigfala Babylon, wea hem nao evri false religion, bae finis. Taem datwan happen, bigfala day bilong Jehovah hem start nao. Iumi hapi from iumi savve wanem Jehovah bae duim for mekem plan bilong hem kamap tru. Long kongregeson, iumi kasem olketa reminder wea savve helpem iumi redi for day bilong Jehovah. Taem iumi herem and traem best for followim olketa warning hia, datwan savve strongim iumi for gohed worshipim God witim “gudfala tingting.”—Rome 12:1.
5, 6. (a) Wanem nao Paul story abaotem long mek-tu leta bilong hem for olketa Christian long Thessalonica? (b) Wanem nao Jesus klosap for duim, and iumi wanwan shud ting raonem olketa wanem kwestin?
5 Paul raetem nara leta for olketa Christian long Thessalonica. Hem story abaotem bigfala trabol wea bae kam taem Jesus judgem “olketa wea no savve long God, and olketa wea no obeyim datfala gud nius.” (2 Thess. 1:6-8) Long chapter 2, Paul sei samfala long datfala kongregeson hapi tumas for savve abaotem day bilong Jehovah, and from datwan olketa bilivim datfala day hem klosap start. (Readim 2 Thessalonica 2:1, 2.) Olketa Christian hia no minim staka samting abaotem plan bilong Jehovah. Bihaen, Paul storyim diswan taem hem sei olsem abaotem olketa profesi: “Iumi no garem evri savve and iumi no savve talem full profesi tu. Bat taem iumi garem evri savve and savve talem full profesi, then datfala wei for no garem evri savve and for no savve talem full profesi bae finis.” (1 Cor. 13:9, 10) Bat olketa savve gohed faithful sapos olketa herem warning wea Jehovah iusim Paul, aposol Peter, and olketa nara anointed Christian brata for talem long datfala taem.
6 For stretem tingting bilong olketa, Paul sei bifor day bilong Jehovah hem kam, bigfala wei for apostate and “datfala nogud man” bae showaot firstaem.a Then bihaen datwan, long taem wea God markem, Jesus bae “finisim” olketa wea followim olketa apostate hia. Paul sei olketa kasem disfala judgment bikos “olketa no acceptim and lovem samting wea tru.” (2 Thess. 2:3, 8-10) Hem gud for iumi wanwan ting raonem olketa kwestin hia: ‘Waswe, mi barava lovem tru samting? Waswe, mi studyim disfala magasin and olketa nara pablikeson wea God provaedem for pipol bilong hem evriwea long world, mekem mi savve long hao iumi minim olketa Bible teaching distaem?’
CHUSIM GUD OLKETA WEA IU ASSOCIATE WITIM
7, 8. (a) Long first century, wanem nao olketa samting wea olketa Christian mas keakea long hem? (b) Wanem nao olketa Christian distaem mas barava keakea long hem?
7 Hem no teaching bilong olketa apostate nomoa wea savve spoelem olketa Christian. Olsem example, Paul talem Timothy “enikaen nogud samting hem kamaot from wei for laekem tumas selen.” Then hem sei: “Samfala wea garem kaen wei olsem lusim nao olketa trufala teaching and mekem olketa seleva for kasem staka problem wea barava spoelem olketa.” (1 Tim. 6:10) Nara samting wea savve spoelem olketa Christian tu, hem “olketa nogud samting wea man laek for duim.”—Gal. 5:19-21.
8 Paul givim strongfala warning long olketa Christian long Thessalonica for keakea long “olketa laea aposol.” Samfala long olketa “talem olketa samting wea no stret for mekem olketa disaepol followim olketa.” (2 Cor. 11:4, 13; Acts 20:30) Jesus praisem kongregeson long Ephesus bikos olketa “no acceptim olketa nogud man.” Olketa “testim” olketa man hia and faendaot olketa laea aposol nomoa and man for laea. (Rev. 2:2) Long mek-tu leta wea Paul raetem for olketa long Thessalonica, hem sei: “Olketa brata, mifala talem iufala long nem bilong Lord Jesus Christ, for stap klia long eni brata wea laef bilong hem olobaot.” Then hem story abaotem samfala Christian wea “no laek waka.” (2 Thess. 3:6, 10) So sapos olketa mas stap klia long eniwan wea lesy and no laek waka, hem barava no fitim for associate witim olketa wea garem apostate tingting. Hem barava danger samting long datfala taem for associate witim olketa apostate, and hem danger samting distaem tu.—Prov. 13:20.
9. Why nao iumi shud keakea long eniwan wea laek talem tingting bilong hemseleva abaotem samting wea Bible no explainim, or wea tok againstim organization?
9 Distaem datfala big trabol hem klosap for start and disfala nogud world hem klosap for finis. Olketa warning wea kam from Jehovah long first century hem barava important winim enitaem bifor. Iumi no laek for “ting nating long why God hem kaen long [iumi].” Sapos iumi garem tingting olsem, bae iumi lusim chance for laef olowe. (2 Cor. 6:1) Iumi shud keakea long eniwan wea attendim olketa meeting wea laekem iumi for talem tingting bilong iumiseleva abaotem olketa samting wea Bible no explainim, or wea hem tok daonem olketa elder and olketa narawan wea worshipim God.—2 Thess. 3:13-15.
“GOHED FOR BILIV STRONG LONG OLKETA SAMTING WEA IUFALA LANEM”
10. Wanem nao olketa samting wea Paul talem olketa Christian long Thessalonica for duim?
10 Paul encouragem olketa brata long Thessalonica for “no givap” and for gohed duim wanem olketa lanem. (Readim 2 Thessalonica 2:15.) Wanem nao “olketa samting” hia wea olketa lanem? Hem olketa samting wea Jesus teachim and olketa toktok wea kam from God wea Paul and olketa narawan raet abaotem. Paul no story abaotem olketa teaching bilong false religion. Hem praisem olketa brata long Corinth taem hem sei: “Iufala evritaem tingim mi and iufala barava followim olketa samting wea mi teachim long iufala.” (1 Cor. 11:2) Olketa teaching hia kam from Jehovah and Son bilong hem and olketa Christian fit for trustim.
11. Wanem nao savve happen sapos man bilivim olketa laea teaching?
11 Taem Paul raet for olketa Hebrew Christian, hem storyim tufala samting wea savve mekem Christian wikdaon and no gohed faithful long Jehovah. (Readim Hebrew 2:1; 3:12.) Hem story abaotem wei for isisi go difren from Jehovah, and wei for lusim Jehovah. Olsem example, hem no isi for luksavve karent hem isisi tekem wanfala kanu, gogo kanu hia hem farawe from shore nao. Bat man seleva tu savve chus for pushim go aot kanu bilong hem from shore. Tufala example hia showimaot wanem savve happen sapos man bilivim olketa laea teaching and letem wei wea hem tinghae long truth for kamap wik.
12. Wanem nao maet spoelem wei wea iumi fren witim Jehovah?
12 Maet datwan nao samting wea happen long samfala Christian long Thessalonica. Waswe, datwan savve happen distaem tu? Staka samting stap wea savve weistim taem bilong iumi. Olsem example, man savve spendem staka hour long social networking, for readim and sendem olketa e-mail and text message, for lukluk long sports long TV, or for story nating nomoa. Olketa samting hia savve mekem Christian no strong for worshipim Jehovah. Maet gogo hem no prea from heart, and no strong for studyim Bible. Maet hem no go long olketa meeting and no go preaching tu. Wanem nao iumi mas duim mekem iumi no lusim stretfala tingting bilong iumi?
SAMTING WEA BAE HELPEM IUMI FOR NO LUSIM STRETFALA TINGTING
13. (a) Bible sei wanem kaen tingting nao bae staka pipol garem? (b) Wanem nao iumi savve duim for protectim faith bilong iumi?
13 Iumi mas no forget world bilong Satan hem klosap for finis and hem danger for iumi associate witim pipol wea tingse iumi no stap long “olketa last day.” Aposol Peter sei olsem abaotem taem bilong iumi: “Pipol bae mekfani long olketa gudfala samting and olketa bae duim olketa nogud samting wea olketa seleva laekem. Olketa bae sei: ‘Hem promis for kam, bat wea nao hem? Start kam long taem wea olketa grani bilong iumi dae no eni samting hem change. Evri samting gohed semsem nomoa start kam long taem wea God wakem olketa man.’” (2 Pet. 3:3, 4) Wei for readim Bible evriday and studyim evritaem bae helpem iumi for no forget iumi stap long “olketa last day.” Wei for apostate wea Bible story abaotem hem start longfala taem bifor, and hem gohed kam kasem distaem. “Datfala nogud man” hem stap yet and hem againstim olketa wea worshipim God. Dastawe iumi mas no forget day bilong Jehovah hem barava klosap.—Zeph. 1:7.
14. Hao nao wei for busy long waka bilong God protectim iumi?
14 Narafala samting wea iumi savve duim mekem iumi no lusim stretfala tingting hem for busy for preachim gud nius. Christ Jesus komandim olketa disaepol bilong hem for teachim pipol long evri kantri for kamap disaepol, and for teachim olketa for obeyim evri samting wea hem laekem olketa for duim. Sapos olketa disaepol bilong hem obeyim datfala komand, bae datwan protectim olketa. (Matt. 28:19, 20) For iumi obeyim datfala komand, iumi mas strong for preachim gud nius. Paul raet go for olketa long Thessalonica and hem sei: “No blokem waka bilong holy spirit insaed long iufala. No ting daonem olketa profesi.” (1 Thess. 5:19, 20) Bihaen olketa readim datwan, masbi olketa barava tinghae long waka for preach and teach. Hard for olketa ting smol long datfala waka or hafhaf for duim datwan. Olketa profesi wea iumi study abaotem and storyim long olketa narawan olketa barava nambawan!
15. Wanem nao iumi savve duim long famili worship?
15 Iumi laek helpem famili bilong iumi kamap gud long wei for preachim gud nius. Staka brata and sista iusim lelebet taem long famili worship for practicem wei for duim ministry. Maet iu savve practicem hao for duim olketa return visit. Ting raonem wanem nao bae iu story abaotem, wanem iu savve talem for mekem haosholder gohed interest, and wanem nao best taem for go bak. Staka famili iusim lelebet taem long famili worship for prepare for olketa meeting tu. Waswe, famili bilong iu savve duim diswan? Wei for tekpart long olketa meeting bae strongim faith bilong iu and helpem iu for gohed garem stretfala tingting. (Ps. 35:18) Famili worship bae protectim iumi from wei for garem daot or for laek talem tingting bilong iumiseleva abaotem olketa samting wea Bible no explainim.
16. Wanem nao strongim olketa anointed Christian for no lusim stretfala tingting bilong olketa?
16 For plande year finis Jehovah helpem pipol bilong hem for minim olketa Bible profesi long wei wea moa klia. Datwan hem bigfala blessing! Diswan mekem iumi sure bae iumi kasem nambawan reward long future. Olketa anointed Christian luk forward for rul witim Christ long heven. Hope bilong olketa strongim olketa for no lusim stretfala tingting bilong olketa! Samting wea Paul raetem for kongregeson long Thessalonica hem fitim olketa anointed Christian distaem. Hem sei: “Mifala mas evritaem talem thankiu long God for iufala olketa brata wea Jehovah lovem, bikos hem chusim iufala . . . taem hem givim spirit long iufala for mekem iufala holy, and bikos iufala bilivim samting wea tru.”—2 Thess. 2:13.
17. Wanem encouragement nao iu kasem from 2 Thessalonica 3:1-5?
17 Iumi wea luk forward for laef olowe long earth shud traem best for no letem eni samting spoelem stretfala tingting bilong iumi, olsem olketa anointed Christian duim. Sapos hope bilong iu hem for laef olowe long earth, gohed obeyim toktok bilong Paul for olketa anointed Christian long Thessalonica. (Readim 2 Thessalonica 3:1-5.) Iumi shud tinghae long toktok bilong Paul. Olketa leta wea hem raetem for olketa long Thessalonica warnim iumi for no talem tingting bilong iumiseleva abaotem olketa samting wea Bible no explainim, or for bilivim olketa samting wea narawan talem wea maet hem no tru. From iumi stap long taem wea end hem klosap tumas, iumi barava tinghae long olketa warning hia.
a Long Acts 20:29, 30, Paul sei samfala insaed long olketa kongregeson, “bae talem olketa samting wea no stret for mekem olketa disaepol followim olketa.” Gogo olketa kongregeson garem olketa bigman. Kasem mek-thri century C.E., hem klia olketa bigman bilong religion wea sei olketa Christian nao “datfala nogud man.”—Lukim The Watchtower, February 1, 1990, page 10-14.