Waswe, Bae Iu Sakrifaesim Samting For Sapotim Kingdom?

1. Wanem nao plande pipol willing for sakrifaesim, and why nao olsem?

PIPOL savve willing for sakrifaesim samfala samting for duim or kasem samting wea important long olketa. Olsem example, dadi and mami savve sakrifaesim taem, selen, and strong for helpem pikinini bilong olketa. Young pipol wea laek for tekpart long Olympic Games spendem staka hour evriday for duim training nomata olketa fren bilong olketa relax and enjoyim hapitaem. Jesus tu sakrifaesim samfala samting mekem hem duim olketa important samting. Hem no goal bilong Jesus for garem richfala living or for garem pikinini. Hem laek for iusim full strong bilong hem for sapotim Kingdom bilong God. (Matt. 4:17; Luke 9:58) Olketa disaepol bilong Jesus tu sakrifaesim samfala samting for Kingdom bilong God bikos datwan nao important long laef bilong olketa. (Matt. 4:18-22; 19:27) So iumi wanwan shud tingim diswan: ‘Wanem nao important long laef bilong mi?’

2. (a) Wanem nao samfala samting wea evri tru Christian mas sakrifaesim? (b) Wanem nao samfala samting moa wea plande brata and sista duim?

² Evri Christian mas sakrifaesim samfala samting for gohed fren gud witim God. Samfala samting wea iumi mas sakrifaesim nao hem taem and strong wea iumi iusim for prea, readim Bible, duim famili worship, attendim olketa meeting, and duim preaching waka.a (Josh. 1:8; Matt. 28:19, 20; Heb. 10:24, 25) From iumi waka hard and Jehovah blessim iumi, staka pipol moa start for kam long “maunten bilong haos bilong Jehovah” for worshipim Hem. (Isa. 2:2) For sapotim Kingdom, plande brata and sista sakrifaesim samfala samting for waka long Bethel, help for buildim olketa Kingdom Hall and Assembly Hall, organizem olketa convention, or helpem olketa wea kasem natural disaster. Nomata waka hia bae no mekem iumi kasem laef olowe, hem olketa important waka wea sapotim Kingdom.

3. (a) Wanem gudfala samting nao iumi kasem taem iumi sakrifaesim samfala samting for sapotim Kingdom? (b) Olketa wanem kwestin nao iumi shud ting raonem?

³ Winim eni narataem, distaem nao hem important for iumi duim moa samting for sapotim Kingdom. Iumi hapi for lukim staka brata and sista wea willing for sakrifaesim samfala samting for Jehovah! (Readim Psalm 54:6.) Sapos iumi tu duim datwan, iumi bae hapi taem iumi weitim Kingdom bilong God for kam. (Deut. 16:15; Acts 20:35) Hem barava important for iumi lukluk gud long iumiseleva and ting raonem olketa kwestin hia: ‘Waswe, mi savve duim moa samting for sapotim Kingdom? Hao nao mi iusim savve, taem, selen, and strong bilong mi? Wanem nao mi mas careful long hem?’ Bae iumi storyim olketa sakrifaes wea olketa Israelite chus for givim, and wanem iumi savve lanem from datwan. Wei for followim example bilong olketa bae mekem iumi hapi.

OLKETA SAKRIFAES WEA OLKETA ISRAELITE GIVIM

4. Wanem gud samting nao olketa Israelite kasem from olketa givim sakrifaes?

⁴ For God forgivim sin bilong olketa Israelite, and for hem hapi long olketa, olketa mas givim olketa sakrifaes. Samfala sakrifaes hia Law sei olketa mas givim, bat samfala sakrifaes olketa savve chus for givim. (Lev. 23:37, 38) Nomata olketa mas givim samfala sakrifaes wea olketa bonem, olketa savve chus tu for givim kaen sakrifaes hia olsem present long Jehovah. Wanfala taem wea olketa givim staka sakrifaes long Jehovah hem taem olketa dedicatem temple bilong Solomon.—2 Chron. 7:4-6.

5. Wanem nao Jehovah talem mekem man wea poor tu savve givim sakrifaes?

⁵ Jehovah tingim olketa Israelite and luksavve no evriwan fit for givim sem samting. Hem askem olketa for givim nomoa wanem olketa savve givim. Law bilong Jehovah sei olketa mas givim animal sakrifaes and kapsaetem blood bilong olketa. Olketa sakrifaes hia “hem shadow nomoa bilong olketa gudfala samting” wea bae kam bikos long sakrifaes bilong Jesus. (Heb. 10:1-4) Bat Jehovah no ova tumas long wanem hem askem. Olsem example, sapos man no savve givim wanfala man sheepsheep or goat, hem savve givim samfala kurukuru. So man wea poor tu savve givim sakrifaes long Jehovah and hapi long datwan. (Lev. 1:3, 10, 14; 5:7) Nomata Jehovah hapi long olketa difren animal wea olketa givim olsem sakrifaes, eniwan wea givim sakrifaes wea olketa chus for givim mas duim tufala samting.

6. (a) Wanem nao tufala samting wea eniwan wea givim sakrifaes mas duim? (b) Why nao hem important for duim tufala samting hia?

⁶ First samting, sakrifaes wea man givim mas best wan wea hem garem. Sapos wanfala animal hem sik or garem eni samting rong long body bilong hem, Jehovah bae no hapi long datfala sakrifaes. (Lev. 22:18-20) Mek-tu samting, man wea givim datfala sakrifaes mas klin fitim wanem Law hem talem. Sapos hem no klin, firstaem hem mas givim wanfala sin offering or guilt offering mekem Jehovah hapi moa long hem. Bihaen hem duim datwan nomoa bae Jehovah acceptim sakrifaes bilong hem. (Lev. 5:5, 6, 15) Diswan hem barava important samting. Jehovah sei sapos eniwan kaikaim sakrifaes taem hem no klin, olketa mas killim hem dae. (Lev. 7:20, 21) Bat sapos datfala man hem klin and hem givim best samting, hem bae garem gudfala konsens and bae hem barava hapi.—Readim 1 Chronicles 29:9.

OLKETA SAKRIFAES WEA IUMI GIVIM DISTAEM

7, 8. (a) Wanem nao olketa wea sakrifaesim samting for Kingdom olketa kasem? (b) Wanem nao iumi garem wea iumi savve givim olsem sakrifaes long Jehovah?

⁷ Distaem, staka brata and sista bilong iumi willing for duim moa samting long waka bilong Jehovah. Jehovah hem hapi long diswan. Taem iumi waka hard for helpem olketa brata, iumi tu hapi. Wanfala brata wea help for buildim olketa Kingdom Hall and wea helpem olketa wea kasem natural disaster hem barava hapi taem hem helpem olketa brata. Hem sei: “Taem mi lukim olketa brata and sista hapi and tinghae taem olketa insaed niu Kingdom Hall bilong olketa, or taem olketa kasem help bihaen natural disaster, mi luksavve hard waka bilong mi hem barava helpem olketa.”

⁸ Organization bilong Jehovah evritaem lukaotem chance for duim samting for sapotim Kingdom. Long 1904, Brata Charles Russell sei iumi evriwan shud traem best bilong iumi for iusim taem, paoa, selen, and olketa nara samting wea iumi garem for mekhae long Jehovah. Nomata iumi mas lusim samfala samting wea iumi garem for givim sakrifaes long Jehovah, iumi kasem staka blessing. (2 Sam. 24:21-24) Waswe, samfala wei moa stap wea iumi savve iusim wanem iumi garem for givim sakrifaes long Jehovah?

9. Wanem nao iumi savve lanem from Luke 10:2-4 abaotem wei wea iumi shud iusim taem?

⁹ Taem bilong iumi. Olketa brata and sista spendem staka taem and duim bigfala waka for transleitim and printim literature bilong iumi, buildim olketa Kingdom Hall and Assembly Hall, organizem olketa convention, help long relief waka, and duim olketa nara important waka. Iumi garem 24 hour nomoa evriday. Nomata olsem, Jesus storyim wanfala principle wea savve helpem iumi for iusim gud taem bilong iumi. Taem Jesus sendem olketa disaepol bilong hem for preach hem talem olketa for “no stop tu for story witim eniwan wea [olketa] meetim long road.” (Luke 10:2-4) Why nao Jesus talem datwan? Long taem bilong Jesus, taem man stop for sei hello, olketa no just sekhand nomoa. Olketa bae gohed hagem each other and baodaon long graon tu. Hem tek taem for duim evri samting hia. Jesus no sei olketa disaepol bilong hem mas no kaen long narawan, bat hem helpem olketa for luksavve olketa no garem staka taem, so olketa mas iusim gud taem bilong olketa for duim olketa samting wea moa important. (Eph. 5:16) Waswe, iumi savve followim disfala principle mekem iumi garem moa taem for sapotim Kingdom waka?

10, 11. (a) Organization bilong Jehovah iusim olketa donation for duim olketa wanem samting? (b) Principle long 1 Corinth 16:1, 2 savve helpem iumi long wanem wei?

¹⁰ Selen bilong iumi. Organization bilong Jehovah iusim staka selen for sapotim Kingdom waka evriwea long world. Evri year olketa spendem plande million dollar for sapotim waka bilong olketa traveling overseer, spesol pioneer, and missionary. Start long 1999, olketa wakem winim 24,500 Kingdom Hall long olketa poor kantri. Nomata olsem, iumi needim yet 6,400 Kingdom Hall. Evri month, olketa printim 100 million Wastaoa and Awake! magasin. Olketa donation wea iu givim hem sapotim evri waka hia.

¹¹ Aposol Paul storyim wanfala principle abaotem wei for givim donation wea iumi savve followim. (Readim 1 Corinth 16:1, 2.) Hem encouragem olketa brata long Corinth for disaed long start bilong week haomas selen olketa bae givim olsem donation, and no weitim end long week for givim eni selen wea stap yet. Olsem long first century, olketa brata and sista distaem tu planim firstaem haomas selen nao olketa bae givim. (Luke 21:1-4; Acts 4:32-35) Jehovah barava tinghae long pipol bilong hem wea give long wei olsem.

12, 13. Why nao samfala hol bak for iusim strong and savve bilong olketa, bat hao nao Jehovah bae helpem olketa?

¹² Strong and savve bilong iumi. Jehovah sapotim iumi taem iumi iusim strong and savve bilong iumi for Kingdom. Hem promis for helpem iumi taem iumi feel olsem iumi no strong nao. (Isa. 40:29-31) Maet iumi tingse iumi no garem savve for help long disfala waka, or maet narawan nao barava fit. No forget, Jehovah savve mekem iumi fit, olsem hem duim long Bezalel and Oholiab.—Ex. 31:1-6; lukim piksa long start bilong study.

¹³ Jehovah laekem iumi for traem best bilong iumi. (Prov. 3:27) Taem olketa Jew buildim bak temple long Jerusalem, Jehovah talem olketa for ting raonem sapos olketa barava sapotim datfala waka. (Hag. 1:2-5) Olketa busy tumas long olketa nara samting, and olketa no strong for duim waka bilong Jehovah. Iumi wanwan shud ting raonem olketa kwestin hia: ‘Waswe, waka bilong Jehovah hem first samting long laef bilong mi? Waswe, mi ting raonem wanem mi duim long laef bilong mi and lukaotem eni wei wea mi savve duim moa samting for sapotim Kingdom bilong God long olketa last day hia?’

SAKRIFAES WEA FITIM WANEM IUMI GAREM

14, 15. (a) Hao nao example bilong olketa brata and sista wea no garem staka samting encouragem iu? (b) Wanem nao iumi laek for duim?

¹⁴ Long samfala kantri, staka pipol poor or laef bilong olketa hard tumas. Organization bilong iumi helpem olketa brata long olketa kantri hia. (2 Cor. 8:14) Nomata olsem, olketa brata bilong iumi wea no garem staka samting tinghae long wei for givim samting. Jehovah hem hapi taem olketa hapi for givim wanem olketa fit for givim.—2 Cor. 9:7.

¹⁵ Long wanfala barava poor kantri long Africa, samfala brata markem wanfala area long garden bilong olketa for sapotim Kingdom waka. Olketa salem kaikai wea olketa harvestim from datfala area and givim selen hia for donation. Long datfala sem kantri, olketa brata and sista laek for help long waka for buildim wanfala Kingdom Hall, bat hem taem bilong olketa for plantim garden. From olketa laekem tumas for help, olketa waka long Kingdom Hall long daytaem, and long evening nao olketa plantim garden bilong olketa. Barava bigfala sakrifaes nao olketa duim! Datwan mekem iumi tingim olketa brata long Macedonia bifor. Nomata olketa “poor tumas,” olketa gohed askem Paul for letem olketa givim selen for helpem olketa brata. (2 Cor. 8:1-4) Iumi tu laek for givim samting wea iumi fit for givim for showimaot iumi thankiu long Jehovah for olketa blessing wea iumi kasem.—Readim Deuteronomy 16:17.

16. Wanem nao iumi savve duim mekem Jehovah hapi long olketa sakrifaes bilong iumi?

¹⁶ Taem iumi sakrifaesim samfala samting, iumi mas careful olsem olketa Israelite for mek sure God bae hapi long olketa sakrifaes bilong iumi. Iumi mas no forgetim main responsibility bilong iumi hem for worshipim Jehovah and lukaftarem famili bilong iumi. Taem iumi iusim taem, strong, and olketa nara samting for helpem narawan, iumi mas mek sure iumi lukaftarem famili bilong iumi long spiritual and long physical wei. (Readim 2 Corinth 8:12.) Iumi mas gohed tu for strongim wei wea iumiseleva fren witim Jehovah. (1 Cor. 9:26, 27) Iumi savve sapos iumi followim olketa standard long Bible, iumi bae hapi long olketa sakrifaes wea iumi givim, and Jehovah tu bae hapi long datwan.

OLKETA SAKRIFAES BILONG IUMI BARAVA IMPORTANT

17, 18. Hao nao iumi ting long olketa wea sakrifaesim samting for Kingdom, and wanem nao iumi evriwan shud ting raonem?

¹⁷ Staka brata and sista bilong iumi willing for givim taem, strong, and selen for sapotim Kingdom waka. (Phil. 2:17) Iumi barava tinghae long olketa wea duim olsem. Iumi tinghae tu long olketa sakrifaes bilong waef and olketa pikinini bilong olketa brata wea lead long Kingdom waka.

¹⁸ Iumi mas waka hard for sapotim Kingdom. Iumi laek for ting raonem and prea abaotem wanem iumi savve duim for givim moa samting long Jehovah. Sapos iumi duim datwan, iumi bae kasem staka blessing distaem and plande blessing tu “long world wea bae kam.”—Mark 10:28-30.