Olketa Barava Willing for Preach​—Long West Africa

PASCAL growap long ples wea pipol poor long Côte d’Ivoire. Hem laekem tumas for garem gudfala laef. From hem man for boxing, hem ting for muv go long ples wea hem savve kamap wanfala sports star wea rich. Taem hem samting olsem 25 year, hem disaed for go long Europe. Bat from hem no garem pepa, hem mas go haed.

Long 1998, taem Pascal hem 27 year, hem lusim Côte d’Ivoire. Hem go long Ghana, then Togo and Benin, gogo hem kasem Birni Nkonni long Niger. Start long there, gogo bilong hem bae danger nao. For hem kasem Mediterranean Sea, hem mas faendem wanfala transport and akrosim Sahara Desert. Then hem mas go insaed ship for kasem Europe. Bat tufala samting happen long Niger wea mekem hem no followim datfala plan bilong hem.

First samting, selen bilong hem finis. Mek-tu samting, hem meetim Noé, wanfala pioneer brata wea studyim Bible witim hem. Wanem hem lanem barava kasem heart bilong hem and changem tingting bilong hem. Hem changem olketa goal bilong hem and start for worshipim Jehovah. Long December 1999, Pascal hem baptaes. From hem laek thankiu long Jehovah, hem start for pioneer long Niger long 2001, long sem taon wea hem lanem truth. Wanem nao tingting bilong hem abaotem pioneer waka bilong hem? Hem sei: “Mi barava enjoyim laef bilong mi!”

BARAVA HAPI AND SATISFAE LONG AFRICA

Olsem Pascal, plande narawan luksavve man savve hapi and satisfae taem hem garem olketa spiritual goal. For kasem olketa goal hia, samfala lusim Europe and muv go long olketa ples long Africa wea needim samfala pablisa moa. Samting olsem 65 Witness from Europe, wea age bilong olketa midolwan 17 and 70 muv for help long olketa kantri long West Africa olsem Benin, Burkina Faso, Niger, and Togo.a Why nao olketa duim datwan, and waswe, olketa kasem eni gud samting?

Anne-Rakel, wea kam from Denmark hem sei: “Long bifor, dadi and mami bilong mi missionary long Senegal. Tufala evritaem hapi tumas for story abaotem missionary waka, so gogo mi tu laek for duim datwan.” Taem Anne-Rakel hem samting olsem 20 year, hem muv go long Togo and hem joinim wanfala saen-languis kongregeson. Hem stap long there for 15 year finis. Hao nao samting wea hem duim encouragem olketa narawan? Hem sei: “Bihaen, young sista and brata bilong mi tu muv kam long Togo.”

Aurele, wanfala brata from France wea hem 70 year and hem marit, hem sei: “Taem mi 65 year, mi retire and mi mas mekem wanfala disison. Bae mi garem isi laef nomoa long France and weit for Paradaes hem kam, or bae mi duim moa samting long ministry.” Aurele disaed for duim moa samting. Distaem Aurele and waef bilong hem Albert-Fayette, stap long Benin for thrifala year finis. Aurele sei: “For kam long hia hem best samting wea mifala duim.” Hem smile and sei tu: “Long territory bilong mifala, samfala area long saedsea mekem mi tingim Paradaes.”

Clodomir and waef bilong hem, Lysiane, wea kam from France stap long Benin for 16 year finis. Firstaem, tufala barava misstim famili and olketa fren bilong tufala long France, and tufala tingse bae hem hard tumas for getius long niu laef bilong olketa. Bat gogo tufala olraet nomoa. Tufala kasem bigfala hapi. Clodomir sei: “Insaed 16 year wea mifala stap long hia, mifala helpem samting olsem 16-fala pipol for kam insaed long truth.”

Sébastien and Johanna, wanfala hasband and waef wea kam from France, muv go long Benin long 2010. Sébastien sei: “Staka waka hem stap for duim long kongregeson,” and from datwan tufala mas lanem staka samting kwiktaem. Hao nao preaching waka long there? Johanna sei: “Pipol laekem tumas for lanem truth. Nomata taem mifala no duim preaching waka, pipol askem olketa Bible kwestin and ask for olketa buk bilong iumi.” Hao nao wei for muv go long Benin affectim marit bilong tufala? Sébastien sei: “Hem strongim marit bilong mitufala. Mi hapi tumas for spendem staka taem witim waef bilong mi long ministry.”

Eric and waef bilong hem, Katy, tufala pioneer long north part bilong Benin wea no staka pipol stap. Taem tufala stap yet long France, tufala readim olketa article wea story abaotem wei for muv long olketa ples wea needim samfala pablisa moa, and olketa story witim samfala wea duim full-taem service. Datwan mekem tufala laek for muv go long nara ples, and olketa duim datwan long 2005. Olketa lukim staka pipol kam insaed long truth. Eric sei: “Tufala year bifor, grup bilong mifala long Tanguiéta garem 9-fala pablisa. Distaem mifala garem 30 pablisa. Long Sunday, 50 go kasem 80 pipol nao savve attendim meeting. Mifala hapi tumas for lukim staka pipol kam insaed long truth!”

LUKSAVVE LONG OLKETA HARD SAMTING AND WINIM

Wanem hard samting nao olketa wea muv long ples wea needim samfala pablisa moa olketa feisim? Benjamin, wea hem 33 year, hem brata bilong Anne-Rakel. Long Denmark, long year 2000, hem meetim wanfala missionary from Togo. Benjamin hem sei: “Taem mi talem datfala missionary mi laek pioneer, hem sei; ‘Iu savve pioneer long Togo.’” Benjamin ting raonem datwan. Hem sei: “Long datfala taem, mi no 20 year yet, bat tufala sista bilong mi stap finis long Togo. So hem isi nomoa for mi muv go long there.” Then Benjamin go long Togo nao. Nomata olsem, hem kasem wanfala hard samting. Benjamin sei: “Mi nating savve long French languis. Firstfala six month hem no isi bikos mi no savve story witim pipol.” Gogo hem start for savve long French languis. Distaem Benjamin waka long Bethel long Benin. Hem tekem go literature for olketa kongregeson and hem help long computer department.

Bifor Eric and Katy muv go long Benin, tufala preach long pipol wea story long difren languis long France. Hao nao West Africa hem difren from France? Katy sei: “Hem no isi for faendem gudfala ples for stap. For staka month, mifala stap long haos wea no garem electric paoa or wata supply.” Eric sei: “Olketa neiba pleim laod music gogo kasem midolnaet. Iu mas lane for patient and traem best for getius long kaen samting olsem.” Tufala evriwan sei: “Hapi wea iu kasem for preach long ples wea staka pipol no herem gud nius bifor hem mekem iu no tingim olketa hard samting.”

Michel and Marie-Agnès, wanfala hasband and waef from France wea klosap kasem 60 year, stap long Benin for samting olsem faev year finis. Tufala wari lelebet taem tufala muv long there. Nomata olsem, from olketa muv long there for duim waka bilong Jehovah, hem barava sapotim tufala.

WANEM FOR DUIM FOR REDYIM IUSELEVA

Olketa wea muv finis long ples wea needim samfala pablisa moa sei hem barava important for duim olketa samting hia for redyim iuseleva firstaem: Mekem wanfala plan. Willing for change. Wakem budget and followim datwan. Depend long Jehovah.—Luke 14:28-30.

Sébastien sei: “Bifor mitufala Johanna muv, mifala sevem selen for tufala year long wei for no spendem tumas selen long hapitaem and no peim samting wea mifala no needim.” Evri year tufala go bak long Europe and waka for tu-thri month mekem olketa garem selen for pioneer long Benin long olketa nara month long year.

Marie-Thérèse hem wanfala long 20-fala singol sista from olketa nara kantri wea pioneer long West Africa. Long France, hem wanfala bas draeva. Then long 2006, hem rest from waka for wanfala year mekem hem savve pioneer long Niger. Kwiktaem nomoa, hem luksavve diswan nao samting wea hem laek for duim long laef bilong hem. Marie-Thérèse sei: “Taem mi go bak long France, mi talem boss mi laek changem schedule bilong mi long waka, and hem agree long datwan. Distaem, from May go kasem August, mi draevem bas long France, and from September go kasem April, mi pioneer long Niger.”

Olketa wea ‘Kingdom hem first samting long laef bilong olketa’ barava sure Jehovah bae givim olketa, ‘samting wea olketa needim.’ (Matt. 6:33) Tingim disfala example. Saphira, hem wanfala singol sista from France wea klosap 30 year, wea pioneer long Benin. Long 2011, hem go bak long France for waka for selen mekem hem savve stap for nara year moa long Africa. Datwan bae hem mek-six year wea hem stap long there. Saphira sei: “Friday hem last day bilong mi for duim wanfala waka, bat for kasem inaf selen for stap long Africa for nara year moa, mi need for waka for nara tenfala day. Bae mi stap long France for nara tufala week nomoa. Mi prea long Jehovah and storyim diswan long hem. No longtaem bihaen, samwan long gavman department wea savve helpem pipol for kasem waka ringim mi and askem mi for changem nara wakaman for tufala week.” Long Monday, Saphira go for kasem training from woman wea bae hem changem. Hem sei: “Mi sapraes for faendaot hem wanfala sista wea needim taem off for attendim Pioneer Service Skul for tenfala day! Boss bae no letem hem for off sapos hem no faendem eniwan for changem hem. Olsem mi duim, hem tu barava askem Jehovah for helpem hem.”

SAMTING WEA MEKEM MAN BARAVA SATISFAE

Samfala brata and sista help long West Africa for staka year and hem kamap olsem hom bilong olketa. Olketa narawan stap for tu-thri year and then go bak long kantri bilong olketa. Nomata olsem, olketa hia gohed kasem gud samting from wei wea olketa help long ples wea needim samfala pablisa moa. Olketa luksavve samting wea mekem man barava satisfae hem nao for worshipim Jehovah.