Why Nao God Letem Man wea Strong Spoelem Man wea Wik?

Bible storyim samfala example abaotem olketa wea wik wea kasem hard taem from olketa wea strong. Story bilong Naboth hem wanfala example long diswan.a Ahab hem king bilong Israel long mek-ten century B.C.E. Hem letem waef bilong hem Jezebel for arrangem samfala man for killim dae Naboth and olketa son bilong hem, mekem king savve tekem grape planteison bilong Naboth. (1 Kings 21:1-16; 2 Kings 9:26) Why nao God no stopem diskaen wei for man spoelem narawan?

Wanfala important reason hem bikos God no savve laea. (Titus 1:2) Hao nao datfala reason join witim wei wea man savve spoelem narawan? Hem bikos bihaen God wakem Adam and Eve, hem warnim tufala sapos tufala no obeyim hem, tufala bae dae. Olsem God talem, bihaen tufala bighed againstim God, tufala dae, and start kam long datfala taem iumi evri man savve dae. Tingim, taem Cain killim dae brata bilong hem Abel, datwan hem firstfala taem for man wea strong spoelem man wea wik.—Genesis 2:16, 17; 4:8.

Bible sei olsem abaotem olketa man: “Taem man rulim narawan hem spoelem hem nomoa.” (Ecclesiastes 8:9) Waswe, samting wea datfala scripture talem hem tru? Ia. Jehovah warnim pipol bilong hem long Israel, olketa king bae spoelem olketa and olketa bae komplen long hem abaotem datwan. (1 Samuel 8:11-18) Nomata King Solomon tu hem talem pipol for peim tax wea hae tumas. (1 Kings 11:43; 12:3, 4) Olketa nara nogud king olsem Ahab barava spoelem pipol. Tingim, sapos God stopem olketa hia for spoelem pipol datwan minim samting wea hem warnim olketa abaotem bae no happen and God hem laea nao.

Tingim tu, Satan sei pipol worshipim God bikos God lukaftarem olketa. (Job 1:9, 10; 2:4) Sapos God protectim pipol bilong hem taem samwan spoelem olketa, bae hem olsem toktok bilong Satan hem tru. Sapos God stopem evri pipol for no spoelem narawan, maet pipol tingse olketa savve hao for rulim olketa seleva and olketa no needim God, bat datwan hem no tru. Bible sei man no fit for rulim hemseleva. (Jeremiah 10:23) Iumi needim Kingdom bilong God for kam bikos datwan nomoa bae finisim olketa samting wea no stret.

Waswe, datwan hem minim God hem lukluk nomoa and no duim eni samting abaotem wei wea man spoelem narawan? Nomoa. Tingim tufala samting wea God duim. First samting, hem storyim staka samting long Bible abaotem disfala nogud wei for spoelem narawan. Olsem example, Bible storyim evri samting wea Jezebel duim for spoelem Naboth. Bible showimaot tu Satan hem bihaenem olketa samting olsem and hem no laekem pipol for savve long hu nao hem. (John 14:30; 2 Corinth 11:14) God laekem iumi for luksavve Satan nao bihaenem wei for spoelem pipol and olketa nara nogud samting, mekem iumi no duim kaen samting olsem. From datwan, God bae hapi long iumi and iumi bae fit for kasem laef long future.

Mek-tu samting, God promisim hem bae finisim wei for man spoelem narawan. Iumi savve trustim diswan bikos staka taem Bible storyim kaen samting olsem and showimaot Jehovah no laekem diswan, and hem judgem and panisim pipol wea duim datwan, olsem hem duim long Ahab and Jezebel. (Psalm 52:1-5) God promisim tu klosap nao hem bae finisim evri nogud samting.b So long future, Naboth and olketa son bilong hem bae stap long paradaes wea no eniwan bae spoelem narawan.—Psalm 37:34.