Hao for ‘Givim Ansa Long Man’

1, 2. (a) Storyim experience wea showimaot gud samting wea savve kamaot from wei for askem olketa gudfala kwestin. (Lukim piksa long start bilong study.) (b) Why nao iumi shud no fraet for storyim olketa subject wea pipol garem strong tingting abaotem?

WANFALA Christian sista storyim Bible witim hasband bilong hem wea no wanfala Jehovah’s Witness. Hasband bilong hem sei hem biliv long Trinity. Bat sista luksavve maet hasband bilong hem no barava savve wanem church bilong hem teachim abaotem Trinity. So sista ask olsem: “Waswe, iu bilivim God hem God, Jesus hem God, and holy spirit hem God, bat olketa no thrifala God bat wanfala nomoa?” Hasband hia sapraes and sei: “Nomoa, mi no bilivim datwan!” Bihaen datwan, tufala storyim tru samting abaotem God.

² Wanem nao iumi savve lanem from datfala experience? Gudfala samting savve kamaot from wei for askem olketa gudfala kwestin. Iumi lanem tu, iumi no need for fraet for storyim olketa subject wea pipol garem strong tingting abaotem olsem Trinity, hellfire, or sapos God hem stap or nomoa. Sapos iumi depend long Jehovah and followim training wea iumi kasem, iumi savve teach long wei wea bae kasem heart bilong pipol. (Col. 4:6) Long disfala study iumi bae storyim hao for teach gud long ministry long wei for (1) askem olketa kwestin wea helpem man talemaot tingting bilong hem, (2) explainim gud wanem scripture talem, and (3) iusim olketa tokpiksa for strongim point.

ASKEM OLKETA KWESTIN WEA HELPEM MAN TALEMAOT TINGTING BILONG HEM

3, 4. Why nao hem important for iusim olketa kwestin for helpem iumi savve wanem man bilivim? Storyim example.

³ Olketa kwestin wea iumi askem long man, savve helpem iumi for savve long wanem hem bilivim. Why nao datwan hem important? Proverbs 18:13 sei: “Man wea talem eni samting bifor hem herem full story hem krangge, and bae hem kasem shame.” So firstaem hem gud for savve wanem nao man wea iumi story witim hem bilivim. Sapos iumi no duim datwan, maet iumi spendem staka taem for pruvim wanfala teaching hem no stret bat bihaen iumi faendaot datfala man no bilivim nomoa datfala teaching!—1 Cor. 9:26.

⁴ Olsem example, maet iumi story witim samwan abaotem hell. Samfala pipol bilivim hell hem ples wea nogud pipol bone long fire. Olketa narawan bilivim hell hem minim wei for man no fren witim God. So maet iumi savve askem hem olsem: “From pipol no garem sem tingting abaotem hell, mi laek savve wanem nao iu bilivim?” Bihaen iumi herem tingting bilong hem, iumi savve helpem hem for minim wanem Bible talem.

5. Storyim example wea showimaot wei wea olketa kwestin savve helpem iumi for savve why nao man bilivim wanfala samting.

⁵ Olketa gudfala kwestin savve helpem iumi tu for savve why nao man bilivim wanfala samting. Olsem example, tingim sapos iumi story witim wanfala man long ministry wea sei hem no biliv long God. Maet iumi tingse datfala man hem bilivim teaching bilong evolution. (Ps. 10:4) Bat samfala pipol no biliv long God bikos olketa lukim olketa narawan barava safa or olketa seleva safa. Olketa no bilivim wanfala God wea garem love savve letem pipol for safa. So sapos haosholder sei hem no biliv long God, maet iumi askem hem: “Waswe, bifor iu biliv long God?” Sapos hem sei ia, maet iumi savve askem hem: “Wanem nao happen wea mekem iu for no biliv long God distaem?” Wanem hem talem bae helpem iumi for savve hao for helpem hem.—Readim Proverbs 20:5.

6. Wanem nao iumi mas duim bihaen iumi askem wanfala kwestin?

⁶ Bihaen iumi askem kwestin long samwan, iumi mas lisin gud long ansa bilong hem and showimaot iumi respectim tingting bilong hem. Olsem example, maet samwan storyim samfala nogud samting happen long laef bilong hem, and datwan mekem hem no sure sapos wanfala God wea garem love hem stap. First samting, iumi shud letem hem savve hem no rong for ting raonem why nao iumi safa. (Hab. 1:2, 3) Then, iumi savve storyim long hem olketa samting wea pruvim God hem stap. Sapos iumi patient and showimaot love, maet hem laek for savve long samfala samting moa.a

EXPLAINIM GUD WANEM SCRIPTURE TALEM

7. For duim gud ministry bilong iumi, wanem nao iumi mas duim?

⁷ Bible hem main tul wea iumi iusim long ministry. Hem helpem iumi for “barava fit and redi for duim evri gudfala waka.” (2 Tim. 3:16, 17) For duim gud ministry bilong iumi, hem no depend long haomas scripture nao iumi readim. Hem depend long wei wea iumi explainim gud olketa scripture wea iumi readim for helpem man for minim. (Readim Acts 17:2, 3.) Bae iumi storyim thrifala example for showimaot diswan.

8, 9. (a) Wanem nao wanfala wei for story witim samwan wea bilivim Jesus hem semsem witim God? (b) Wanem nao iu duim for story witim pipol wea biliv olsem?

⁸ Example 1: Long ministry, iumi story witim samwan wea bilivim Jesus hem semsem witim God. Olketa wanem scripture nao bae iumi storyim witim datfala haosholder? Maet iumi askem hem for readim toktok bilong Jesus long John 6:38, wea sei: “Mi kam daon from heven, no for duim samting wea miseleva laekem bat for duim samting wea Dadi, wea hem sendem mi kam, laekem mi for duim.” Bihaen iumi readim datfala scripture, iumi savve askem hem: “Sapos Jesus hem God, hu nao sendem hem kam daon from heven? Man wea sendem kam Jesus hem mas hae winim Jesus. Bikos, man wea sendem narawan hem mas hae winim man wea hem sendem.”

⁹ Maet iumi savve readim tu Philippi 2:9 wea aposol Paul storyim wanem God duim bihaen Jesus hem dae and laef bak. Datfala scripture sei: “God givim hem [Jesus] position wea hae winim position bilong hem bifor. From God hem kaen tumas, hem givim hem nem wea winim evri nara nem.” For helpem datfala man minim datfala scripture maet iumi ask olsem: “Sapos Jesus hem semsem witim God bifor hem dae, and then God givim Jesus position wea hae winim position bilong hem bifor, then Jesus bae hae winim God nao, iaman? Bat, hard for eniwan hem hae winim God, iaman?” Taem iumi story olsem, maet datwan helpem pipol wea respectim Bible for laek savve moa.—Acts 17:11.

10. (a) Hao nao bae iumi story witim man wea biliv long teaching abaotem hellfire? (b) Wanem nao iu duim for story witim pipol wea biliv olsem?

¹⁰ Example 2: Wanfala haosholder barava biliv strong olketa nogud pipol bae bone long hellfire. Maet hem biliv long hellfire bikos hem laekem nogud pipol for kasem panis for nogud samting wea olketa duim. Hao nao bae iumi story witim man wea garem tingting olsem? First samting, iumi savve talem hem God bae panisim olketa nogud pipol. (2 Thess. 1:9) Then, iumi savve talem hem for readim Genesis 2:16, 17, wea sei panis bilong man wea duim sin hem dae. Maet iumi explainim long hem, from Adam hem sin, iumi evriwan born sin. (Rome 5:12) Iumi savve talem hem God no storyim eni samting long Adam abaotem wei for panis long hellfire. Then iumi savve readim Genesis 3:19. Long datfala scripture God talem Adam panis wea hem kasem from hem sin hem nao for hem go bak long graon. Maet iumi ask olsem: “Sapos Adam bae go long hellfire, waswe, hem stret for God sei hem bae go bak long graon?” Wei for iusim kaen kwestin olsem savve helpem man wea hambol for ting raonem sapos samting hem bilivim hem tru or nomoa.

11. (a) Wanem nao wanfala wei for story witim samwan wea bilivim evri gud pipol bae go long heven? (b) Wanem nao iu duim for story witim pipol wea biliv olsem?

¹¹ Example 3: Long ministry, iumi story witim samwan wea bilivim evri gud pipol bae go long heven. Maet datfala biliv bae affectim wei wea hem minim Bible. Olsem example, sapos iumi readim Revelation 21:4, maet datfala man tingse datfala scripture story abaotem laef long heven. (Readim.) Hao nao bae iumi story witim man wea garem tingting olsem? Winim wei for readim samfala scripture moa, maet iumi story raonem datfala toktok long Revelation 21:4 wea sei “no eniwan bae dae.” Iumi savve sei long hem: “Datfala toktok ‘no eniwan bae dae,’ hem showimaot masbi pipol dae bifor, iaman?” Maet hem ansa and sei ia. Then iumi savve talem hem, long heven no eniwan dae, long earth nomoa pipol savve dae. So masbi Revelation 21:4 hem storyim olketa blessing wea bae kamap long earth.—Ps. 37:29.

IUSIM OLKETA TOKPIKSA FOR STRONGIM POINT

12. Why nao Jesus iusim olketa tokpiksa?

¹² Jesus iusim olketa tokpiksa taem hem preach. (Readim Matthew 13:34, 35.) Olketa tokpiksa wea Jesus iusim showimaot sapos olketa wea lisin long hem barava laek for worshipim God. (Matt. 13:10-15) Jesus iusim olketa tokpiksa tu for helpem pipol rememberim wanem hem teachim and mekem olketa laek for lisin long hem. Taem iumi teachim narawan, hao nao iumi savve iusim olketa tokpiksa?

13. Wanem tokpiksa nao iu savve iusim for teachim samwan hao God hem hae winim Jesus?

¹³ Hem gud for iusim olketa tokpiksa wea isi for man minim. Olsem example, sapos iumi laek for teachim samwan God hem hae winim Jesus, iumi savve traem diswan. Iumi savve sei God and Jesus iusim tokpiksa abaotem famili taem tufala story abaotem tufala. God hem sei Jesus hem Son bilong hem, and Jesus hem sei God hem Dadi bilong hem. (Luke 3:21, 22; John 14:28) Then iumi savve askem hem: “Sapos iu laek pruvim tufala man tufala semsem, wanem kaen tokpiksa abaotem famili nao bae iu iusim?” Maet hem sei ‘tufala brata or tufala twin nao semsem insaed long famili.’ Then iumi savve sei: “Datwan hem gudfala tokpiksa. Sapos hem isi for iumi tufala tingim disfala tokpiksa, why nao Jesus, wea hem Nambawan Teacher, no iusim sem kaen tokpiksa for story abaotem hem and God? Bat hem sei God hem Dadi bilong hem. From Jesus talem datwan, hem helpem iumi for luksavve God hem hae and hem laef longtaem winim Jesus.”

14. Wanem tokpiksa nao showimaot hem no mek sense for sei God iusim Satan for panisim pipol long hellfire?

¹⁴ Tingim nara example. Samfala biliv God markem Satan for kontrolem hellfire. Hao nao iumi savve helpem wanfala dadi or mami for luksavve hem no mek sense for God iusim Satan for panisim pipol long hellfire? Maet iumi askem hem: “Wanem nao bae iu duim sapos pikinini bilong iu start for bighed and duim staka nogud samting?” Datfala dadi or mami maet sei hem bae stretem datfala pikinini. And maet hem bae trae for helpem datfala pikinini staka taem for no duim nogud samting. (Prov. 22:15) Then iumi savve askem hem: “Wanem nao bae iu duim sapos pikinini bilong iu no laek for change?” Maet staka dadi or mami sei gogo bae olketa mas panisim datfala pikinini. Then iumi savve askem hem: “Wanem nao bae iu duim sapos iu faendaot wanfala rabis man nao mekem pikinini bilong iu for duim olketa nogud samting hia?” Staka dadi and mami bae kros long datfala man. Then for strongim point, maet iu askem hem: “From iu savve wanfala rabis man nao spoelem pikinini bilong iu, waswe, bae iu askem datfala man for panisim pikinini bilong iu?” No eni dadi or mami bae duim datwan. Satan nao mekem pipol for duim olketa nogud samting. So hem no mek sense for sei God iusim Satan for panisim pipol long hellfire.

GAREM BALANCE TINGTING

15, 16. (a) Why nao iumi shud no tingse evriwan shud acceptim wanem iumi teachim abaotem Kingdom? (b) Waswe, for teachim gud narawan, iu mas garem bigfala savve? Minim kam. (Lukim tu box “Tul wea Helpem Iumi for Givim Ansa.”)

¹⁵ Nomata sapos iumi askem olketa barava gud kwestin, iumi barava explainim gud olketa scripture, and iusim olketa gud tokpiksa, no evriwan bae acceptim wanem iumi teachim abaotem Kingdom. (Matt. 10:11-14) Samfala pipol nomoa acceptim wanem Jesus teachim, nomata Jesus hem nambawan Teacher wea winim eni narawan long earth!—John 6:66; 7:45-48.

¹⁶ Nomata sapos iumi tingse iumi no savve teach gud, iumi savve duim gud ministry bilong iumi. (Readim Acts 4:13.) Bible helpem iumi for luksavve “evriwan wea showimaot olketa laekem laef olowe” bae acceptim gud nius. (Acts 13:48) So iumi mas garem balance tingting. Iumi shud trae for kamap gud long wei wea iumi teachim narawan, bat no feel nogud taem olketa wea iumi story long olketa no acceptim gud nius. Sapos iumi depend long Jehovah and followim training wea iumi kasem, iumi bae kamap gud long wei wea iumi teachim narawan, and datwan bae mekem iumi and olketa wea lisin long iumi kasem gud samting. (1 Tim. 4:16) Jehovah savve helpem iumi for “givim ansa long evri man.” Long next study bae iumi lanem hao for duim gud ministry bilong iumi taem iumi followim datfala toktok wea staka pipol kolem Golden Rul.