Duim Gud Waka Bilong Iu for Talemaot Gud Nius

1. Why nao Jehovah hem main wan wea talemaot gud nius?

JEHOVAH GOD nao first wan wea talemaot gud nius and hem tu main wan wea duim datwan. Stretawe bihaen Adam and Eve no obeyim Jehovah, hem talemaot hem bae finisim Satan. (Gen. 3:15) Insaed staka handred year bihaen datwan, Jehovah storyim wanem hem bae duim for kliarem nem bilong hem, for stretem evri nogud samting wea Satan duim, and hao olketa man savve garem chance moa for laef olowe. Evri samting hia hem gud nius wea Bible storyim.

2. (a) Wanem nao wanfala waka wea olketa angel duim? (b) Hao nao Jesus hem gudfala example for olketa wea talemaot gud nius?

² Olketa angel tu talemaot gud nius, and helpem olketa man for talemaot gud nius long earth. (Luke 1:19; 2:10; Acts 8:26, 27, 35; Rev. 14:6) Waswe long datfala chief angel, Michael, wea hem nao Jesus? Hem tu talemaot gud nius. Taem Jesus stap long earth, main important samting long laef bilong hem nao hem for talemaot disfala gud nius. Example bilong hem showimaot preaching waka mas main important samting long laef bilong iumi tu.—Luke 4:16-21.

3. (a) Wanem nao datfala gud nius wea iumi talemaot? (b) Olketa wanem kwestin nao iumi mas ansarem?

³ Jesus talem olketa disaepol bilong hem for talemaot gud nius. (Matt. 28:19, 20; Acts 1:8) Aposol Paul sei long Timothy: “Duim waka for talemaot gud nius, and barava duim gud ministry bilong iu.” (2 Tim. 4:5) Wanem nao datfala gud nius wea iumi talemaot? Iumi talem pipol Dadi bilong iumi long heven, Jehovah, hem lovem iumi olketa man. (John 3:16; 1 Pet. 5:7) Wanfala main samting wea showimaot Jehovah God lovem olketa man nao, hem Kingdom bilong hem. Dastawe iumi talem pipol sapos olketa stap anda long rul bilong Kingdom, obeyim God, and duim samting wea stret, olketa savve fren witim hem. (Ps. 15:1, 2) Jehovah bae finisim wei for safa, and iumi bae no sorre and no tingim moa wei wea iumi safa bifor. Datwan hem barava gudfala nius! (Isa. 65:17) From iumi pipol for talemaot gud nius, iumi mas ansarem tufala important kwestin hia: Why nao pipol mas herem gud nius distaem? And hao nao iumi savve duim gud waka bilong iumi for talemaot gud nius?

WHY NAO PIPOL MAS HEREM GUD NIUS?

4. Wanem nao samfala laea story abaotem God wea pipol herem?

⁴ Tingim sapos samwan hem laea long iu and sei dadi bilong iu lusim iu and famili bilong iu. Hem sei dadi bilong iu no interest long iu, no talem tru samting long iu, and hem no kaen. Then hem sei dadi bilong iu dae finis, so iu no hard waka for faendem hem. Hem nao kaen laea story wea samfala pipol talem abaotem God. Olketa sei hem hard for olketa man savve long God, or olketa sei hem no kaen. Samfala bigman bilong religion sei God bae panisim nogud pipol for olowe long hellfire. Olketa narawan blamem God for wei wea pipol safa from olketa natural disaster. Nomata gud and nogud pipol dae long olketa natural disaster, olketa sei God nao panisim olketa.

5, 6. Hao nao teaching bilong evolution and olketa laea teaching abaotem God affectim pipol?

⁵ Olketa narawan sei God no stap. Staka wea bilivim teaching bilong evolution sei no eni Creator hem stap and laef kamap seleva nomoa. Samfala sei iumi shud no sapraes taem man hem raf or selfish, bikos long tingting bilong olketa, olketa man kam from animal. Olketa sei taem samwan wea strong hem spoelem samwan wea wik, datwan hem normal nomoa and hem bae olsem for olowe. So olketa wea bilivim evolution no garem eni hope for future.

⁶ Wanfala reason why olketa man safa long olketa last day hem teaching bilong evolution and olketa laea teaching abaotem God. (Rome 1:28-31; 2 Tim. 3:1-5) Olketa teaching hia hem no gud nius, bat olsem aposol Paul talem hem mekem pipol “no savve minim samting and olketa farawe from datfala laef wea God promisim.” (Eph. 4:17-19) And tu, teaching bilong evolution and olketa laea teaching stopem pipol for no acceptim datfala gud nius wea kam from God.—Readim Ephesus 2:11-13.

7, 8. Wanem nao pipol mas duim for lanem gud nius?

⁷ For pipol fren witim God, firstaem olketa mas faendaot wanem nao really samting wea Bible teachim. Iumi savve helpem olketa for kasem ansa long olketa kwestin wea olketa garem abaotem God. Iumi savve iusim brochure, Gud Nius From God! Olsem example, iumi savve showim samfala kwestin insaed long datfala brochure, olsem Wanem Nao Hope for Man wea Dae Finis? and Why Nao God Letem Olketa Nogud Samting and Wei for Safa Gohed?

⁸ For lanem datfala gud nius abaotem God and plan bilong hem, man mas studyim Bible. Iumi garem nambawan privilege for helpem pipol lanem datfala gud nius! Bat for helpem samwan biliv long God and fren witim hem, iumi no talem hem nomoa wanem nao tru, bat iumi mas helpem hem for bilivim datwan. (2 Tim. 3:14) So iumi mas lane hao for helpem pipol for biliv, olsem Jesus hem duim. Wanem nao mekem Jesus win for duim datwan? Wanfala reason hem bikos Jesus iusim olketa kwestin long gudfala wei. Hao nao iumi savve followim example bilong hem?

IUSIM OLKETA KWESTIN LONG GUDFALA WEI

9. Wanem nao iumi mas duim sapos iumi laek for helpem pipol bilivim gud nius?

⁹ Why nao iumi mas iusim olketa kwestin long ministry, olsem Jesus duim? Tingim sapos doctor sei iu needim bigfala operation. Maet iu bilivim hem. Bat waswe sapos hem talem datwan nomata hem no askem iu eni kwestin abaotem sik bilong iu? Sapos olsem, maet iu no bilivim hem nao. Nomata sapos datfala doctor hem savve tumas, hem mas askem olketa kwestin and herem ansa bilong iu bifor hem savve helpem iu. So for helpem pipol bilivim gud nius abaotem Kingdom, iumi mas lane for askem olketa gudfala kwestin mekem iumi savve hao for helpem olketa.

10, 11. Sapos iumi iusim gud olketa kwestin for teachim pipol olsem Jesus hem duim, hao nao datwan savve helpem iumi long ministry?

¹⁰ Jesus savve olketa gudfala kwestin bae helpem teacher for savve long tingting bilong student, and helpem student hia for talemaot tingting bilong hem. Olsem example, taem Jesus laek for teachim olketa disaepol bilong hem hao hem important for hambol, firstaem hem askem wanfala kwestin wea bae mekem olketa tingting. (Mark 9:33) Wantaem Jesus askem Peter wanfala kwestin, talem hem tufala ansa, and then askem hem for chusim which wan nao stret. Diswan helpem Peter for lanem wanfala important samting. (Matt. 17:24-26) Narataem, Jesus askem olketa disaepol samfala kwestin for savve long tingting bilong olketa. (Readim Matthew 16:13-17.) Jesus no talem pipol nomoa wanem olketa mas duim, bat taem hem iusim olketa kwestin, hem kasem heart bilong olketa and datwan mekem olketa laek for duim samting wea olketa herem.

¹¹ Taem iumi iusim gud olketa kwestin olsem Jesus duim, iumi luksavve wanem nao best wei for helpem pipol wea iumi meetim long ministry. Datwan teachim iumi tu hao for story witim pipol wea no agree witim iumi. Iumi teachim pipol wanem olketa mas duim mekem olketa kasem gud samting. Bae iumi storyim thrifala example wea showimaot hao iumi savve iusim gud olketa kwestin.

12-14. Wanem nao iu savve duim for helpem pikinini bilong iu for no fraet for talemaot gud nius? Storyim example.

¹² Example 1: Wanem nao bae iu duim sapos teenage pikinini bilong iu hem fraet for story abaotem biliv bilong hem long olketa skulfren bilong hem? Hao nao bae iu helpem hem for no fraet for story long olketa? Winim wei for tok daonem hem or talem hem wanem for talem, hem gud for iu askem samfala kwestin for savve long tingting bilong hem, olsem Jesus duim. Hao nao iu savve duim diswan?

¹³ Hem gud for readim datfala brochure Gud Nius From God! witim pikinini bilong iu. Lukluk long olketa subject long last page bilong datfala brochure, then askem hem wanem subject nao hem interest long hem. Encouragem hem for ting raonem olketa nara reason why hem interest long datfala subject and hao hem savve explainim datwan long narawan.—Rome 12:2.

¹⁴ Then talem pikinini bilong iu hem savve story witim skulfren bilong hem long sem wei wea iutufala just story. Hem savve askem skulfren for talem tingting bilong hem abaotem datfala subject. Olsem example, hem savve askem skulfren bilong hem for readim paragraf andanit long mek-tu kwestin, long leson 6 wea sei, Man wea dae finis hem hao? Then pikinini bilong iu savve askem hem: “Waswe, bihaen Lazarus hem laef bak hem storyim eni samting abaotem taem hem dae?” Bae hem sei, nomoa. Then pikinini bilong iu savve sei, “So waswe, iu lukim story abaotem Lazarus hem sapotim teaching long Bible wea sei man wea dae no savve long eni samting?” For helpem pikinini bilong iu for no fraet for storyim biliv bilong hem long narawan, iu savve practice witim hem. Sapos iu trainim hem for iusim gud olketa kwestin, iu bae helpem hem for duim gud waka bilong hem for talemaot gud nius.

15. Hao nao iumi savve iusim olketa kwestin for helpem man wea bilivim God letem pipol for safa for panisim olketa?

¹⁵ Example 2: Taem iumi duim preaching waka, maet iumi meetim samwan wea sei God letem pipol for safa for panisim olketa. Iumi savve askem hem why nao hem bilivim datwan. Bihaen iumi herem ansa bilong hem, iumi savve thankiu long hem from hem talemaot tingting bilong hem. Then iumi savve askem hem sapos hem bae willing for readim wanfala brochure wea storyim why God letem olketa nogud samting and wei for safa gohed. Sapos hem willing, iumi savve givim hem datfala brochure Gud Nius From God! Taem iumi kaen and askem olketa gudfala kwestin wea no mekem pipol feel nogud, maet olketa willing for herem gud nius.

16. Why nao iumi shud no hapi nomoa for Bible study readim kam ansa from buk?

¹⁶ Example 3: Taem iumi duim Bible study, wanem nao maet happen sapos iumi hapi nomoa for student readim kam ansa from buk? Maet hem no gohed gud long truth. Why nao olsem? Bikos student wea readim olketa ansa nomoa and no ting raonem savve olsem wanfala plant wea rut bilong hem no strong. Bae hem no isi for student olsem for gohed strong long truth taem pipol againstim hem. (Matt. 13:20, 21) For helpem Bible study bilong iumi, iumi mas askem tingting bilong hem abaotem wanem hem lanem. Trae for faendaot sapos hem bilivim wanem hem lanem and why nao olsem. Then helpem hem for ting raonem olketa Scripture mekem gogo hemseleva bae fit for luksavve long wanem hem stret and wanem hem no stret. (Heb. 5:14) Sapos iumi iusim gud olketa kwestin, olketa wea iumi study witim bae strong long truth and gohed faithful taem eniwan againstim olketa or laek leadim olketa go rong. (Col. 2:6-8) Wanem moa bae helpem iumi for duim gud waka bilong iumi for talemaot gud nius?

WAKA TUGETA FOR TALEMAOT GUD NIUS

17, 18. Taem partner bilong iu hem story, hao nao iu savve helpem hem?

¹⁷ Jesus markem tufala disaepol for waka tugeta taem olketa duim preaching waka. (Mark 6:7; Luke 10:1) Bihaen, aposol Paul story abaotem “olketa narawan wea waka hard witim [hem] for talemaot datfala gud nius.” (Phil. 4:3) Long 1953, organization bilong Jehovah startim wanfala program wea olketa pablisa trainim olketa nara pablisa long ministry.

¹⁸ Taem iu waka witim narawan long ministry, hao nao iu savve helpem hem? (Readim 1 Corinth 3:6-9.) Taem partner bilong iu readim eni scripture, lukluk followim long Bible bilong iu tu. Lisin gud taem partner bilong iu story, mekem iu redi sapos hem needim help. (Eccl. 4:12) Bat no katem story bilong hem or bilong haosholder. Sapos iu duim olsem, maet datwan mekem partner bilong iu wikdaon or mekem haosholder konfius. Hem no rong for iu join insaed long story, bat sapos iu laek for talem samting, talem short koment nomoa, then letem partner bilong iu gohed long story.

19. Wanem nao iumi mas no forgetim, and why nao olsem?

¹⁹ Hao nao iu and partner bilong iu savve helpem each other taem iutufala wakabaot from haos tu haos? Hem gud for iutufala story tugeta abaotem hao for story gud witim haosholder. Careful for no talem toktok abaotem pipol long territory wea bae no encouragem partner bilong iu. And tu, no komplen abaotem olketa nara brata and sista. (Prov. 18:24) Hem gud for iumi remember iumi evriwan no perfect. Jehovah hem kaen tumas for givim long iumi disfala spesol waka for talemaot gud nius. (Readim 2 Corinth 4:1, 7.) So iumi evriwan laek for showimaot iumi tinghae long disfala gud nius taem iumi duim gud waka bilong iumi for talemaot datwan.