ANSA FOR OLKETA BIBLE KWESTIN

Why nao iumi shud prea?

Jehovah God barava laekem iumi for storyim long hem olketa samting wea iumi wari abaotem. (Luke 18:1-7) Hem herem prea bilong iumi bikos hem interest long iumi. From Dadi bilong iumi long heven hem talem iumi for prea long hem, iumi shud duim datwan!—Readim Philippi 4:6.

Iumi no prea long God bikos iumi laekem hem for helpem iumi nomoa. Bat prea savve helpem iumi for fren witim God tu. (Psalm 8:3, 4) Taem iumi evritaem talem tingting and feeling bilong iumi long God, datwan helpem iumi for fren gud witim hem.—Readim James 4:8.

Wanem nao iumi shud duim taem iumi prea?

Taem iumi prea, God no laekem iumi for talem sem samting evritaem or for talem spesol toktok. And Bible no talem eni spesol wei for iumi standap or sidaon taem iumi prea. Jehovah laekem iumi for prea from heart bilong iumi. (Matthew 6:7) Olsem example, long Israel bifor, Hannah prea long God abaotem hard taem wea hem kasem insaed famili bilong hem. Bihaen, taem datfala problem hem finis, hem barava hapi and hem talem wanfala prea long God for sei thankiu long hem.—Readim 1 Samuel 1:10, 12, 13, 26, 27; 2:1.

Iumi garem nambawan privilege for prea long God! Iumi savve storyim long God olketa wari and hevi wea iumi kasem. And tu, iumi savve praisem God and talem thankiu long hem for evri samting wea hem duim. Iumi shud barava tinghae long disfala privilege for prea.—Readim Psalm 145:14-16.