‘Bihaen Iu Gud Bak, Strongim Olketa Brata Bilong Iu’

BIBLE sei Peter krae fogud bihaen hem sei hem no savve long Jesus. Bihaen diswan, Peter mas waka hard for kamap strong moa long spiritual wei. Nomata olsem, Jesus laek for iusim hem for helpem olketa narawan. Dastawe Jesus sei long hem: “Bihaen iu repent and gud bak, strongim olketa brata bilong iu.” (Luke 22:32, 54-62) Gogo, Peter hem kamap wanfala long olketa wea olsem ‘strongfala post’ insaed long kongregeson long first century. (Gal. 2:9) Long sem wei tu, wanfala brata wea bifor hem wanfala elder maet savve duim moa datfala waka and hem savve hapi for strongim olketa brata and sista long spiritual wei.

Samfala wea elder bifor lusim datfala privilege, and datwan maet mekem olketa feel olsem olketa iusles nao. Julio,a wea hem elder long South America for winim 20 year sei: “Taem mi elder mi barava busy for redyim olketa tok, visitim olketa brata and sista long kongregeson, and duim olketa shepherding kol. Seknomoa, hem olsem mi no garem eniting for duim nao! Taem diswan happen hem barava affectim mi.” Distaem, Julio hem kamap wanfala elder moa.

“IUFALA MAS HAPI NOMOA”

Disaepol James sei: “Olketa brata bilong mi, taem iufala kasem enikaen hard taem, iufala mas hapi nomoa.” (Jas. 1:2) Long hia James story abaotem persecution wea iumi kasem, and olketa hard taem wea iumi kasem bikos iumi no perfect. From datwan, iumi savve tingim iumiseleva, favorim samfala, and duim olketa kaen samting olsem. (Jas. 1:14; 2:1; 4:1, 2, 11) Taem Jehovah stretem iumi, datwan savve mekem iumi feel nogud. (Heb. 12:11) Bat iumi shud no letem datwan spoelem hapi bilong iumi.

Nomata sapos iumi lusim privilege for elder long kongregeson, iumi still savve lukluk gud long hao strong nao faith bilong iumi, and showimaot iumi lovem Jehovah. Iumi savve ting raonem tu why nao iumi duim datfala waka. Waswe, iumi laek for kasem gud samting for iumiseleva, or bikos iumi lovem God and barava sure kongregeson hem bilong Jehovah and hem laekem iumi for lukaftarem gud? (Acts 20:28-30) Olketa wea lusim privilege for elder bat gohed for worshipim God, showimaot long evriwan and long Satan tu, hao love bilong olketa for Jehovah hem tru wan.

Taem Jehovah disciplinem King David wea duim bigfala sin, David acceptim datwan and God forgivim hem. David sei: “Olketa wea God forgivim sin bilong olketa and samting wea olketa duim wea hem no stret, olketa bae hapi. Olketa wea Jehovah no tingim moa sin bilong olketa, and wea no garem nogud tingting, olketa bae hapi.” (Ps. 32:1, 2) Discipline wea David kasem strongim hem and helpem hem for kamap gudfala shepherd for pipol bilong God.

Staka taem olketa brata wea lusim privilege and kamap elder moa savve kamap gudfala shepherd winim bifor. Wanfala elder olsem hem sei: “Distaem nao mi just savve hao for helpem olketa wea duim mistek.” Nara elder sei: “Distaem mi barava tinghae go moa long privilege wea mi garem for helpem olketa brata and sista.”

WASWE, IU SAVVE DUIM MOA WAKA HIA?

Man wea raetem psalm sei: “[Jehovah] bae no tingim olowe olketa mistek bilong iumi.” (Ps. 103:9) So iumi shud no tingse God bae no trustim moa man wea duim bigfala mistek bifor. Ricardo, wea elder for staka year bat lusim datfala privilege sei: “Mi feel nogud tumas long wanem mi duim. For longtaem bihaen datwan mi feel olsem mi no fit, so datwan mekem mi hol bak for duim moa waka bilong elder. Mi no sure sapos olketa narawan bae trustim mi moa. Bat from mi laekem tumas for helpem olketa narawan, mi garem olketa Bible study, mi encouragem olketa brata and sista long Kingdom Hall, and waka witim olketa long ministry. Datwan mekem mi feel olsem mi fit for duim moa datfala waka, and distaem mi wanfala elder moa.”

Wei for keepim kros savve stopem wanfala brata for duim moa datfala waka for elder. David showimaot gudfala example taem hem ranawe from King Saul wea jealous long hem! David no pei bak long Saul nomata hem garem olketa chance for duim datwan. (1 Sam. 24:4-7; 26:8-12) Taem Saul dae long faet, David sorre tumas and hem sei Saul and son bilong hem Jonathan, “tufala man wea pipol lovem and tinghae long tufala.” (2 Sam. 1:21-23) Datwan showimaot David no keepim kros.

Sapos iu tingse olketa narawan no minim iu or olketa duim samting long iu wea hem no stret, no letem wei for kros hem kontrolem iu. Olsem example, William, from Britain hem wanfala elder for samting olsem 30 year. Bihaen hem lusim privilege bilong hem, hem no hapi long samfala elder. Wanem nao helpem William for garem stretfala tingting moa? Hem sei: “Taem mi readim Bible buk Job, datwan barava encouragem mi. Sapos Jehovah helpem Job for mek peace witim thrifala fren bilong hem, Hem bae helpem mi tu for mek peace witim olketa elder!”—Job 42:7-9.

GOD BLESSIM OLKETA WEA DUIM MOA WAKA BILONG ELDER

Sapos iuseleva nao disaed for finis from waka bilong iu for elder, hem gud for iu ting raonem why nao iu duim datwan. Waswe, hem bikos long samfala big problem wea kasem iu? Waswe, hem bikos olketa nara samting nao kamap important long laef bilong iu? Waswe, iu feel nogud long olketa wik point bilong olketa narawan long kongregeson? Nomata wanem nao reason, no forget taem iu elder bifor iu helpem olketa narawan long staka difren wei. Olketa tok wea iu givim strongim olketa, example bilong iu encouragem olketa, and wei wea iu duim shepherding kol hem helpem olketa for no givap taem olketa kasem test. Wei wea iu faithful for duim waka bilong elder hem mekem heart bilong Jehovah hapi and iu tu hapi.—Prov. 27:11.

Jehovah helpem finis samfala brata wea elder bifor for laek kamap elder moa. Sapos iuseleva nao disaed for finis, or iu lusim privilege bilong iu, iu savve duim samting for kamap elder moa. (1 Tim. 3:1) Tingim wei wea Paul no givap for “prea long God” for olketa Christian long Colossae for kasem stretfala savve abaotem wanem God laekem ‘mekem God hapi taem olketa duim evri gudfala waka.’ (Col. 1:9, 10) Hem gud for iu tu gohed prea and gohed kasem stretfala savve abaotem wanem God laekem. Sapos iu kasem privilege for elder moa, depend long Jehovah for strongim iu, for mekem iu patient, and for iu hapi. Long olketa last day distaem, pipol bilong God needim sapot long spiritual wei from olketa elder. Waswe, iu willing and fit for strongim olketa brata and sista bilong iu?