‘Distaem Iufala Pipol Bilong God Nao’

1, 2. Wanem important samting nao happen long Pentecost 33 C.E., and hu nao kamap member bilong datfala niu nation bilong Jehovah? (Lukim piksa long start bilong study.)

LONG Pentecost 33 C.E., wanfala barava important samting hem happen. Jehovah startim wanfala niu nation, spiritual Israel, wea hem nao datfala “Israel bilong God.” (Gal. 6:16) Jehovah iusim holy spirit bilong hem for chusim olketa wea insaed long disfala nation. Paul sei, olketa wea insaed disfala niu nation no need for circumcise, wea hem nao samting wea olketa long laen bilong Abraham mas duim. Bat holy spirit nao mekem olketa “circumcise long heart.”—Rome 2:29.

² Olketa first wan wea insaed disfala niu nation hem olketa aposol and winim wan handred disaepol bilong Christ wea hipap long wanfala rum long Jerusalem long Pentecost 33 C.E. (Acts 1:12-15) God givim holy spirit long olketa, and olketa kamap olketa son bilong God. (Rome 8:15, 16; 2 Cor. 1:21) Diswan showimaot Jehovah acceptim sakrifaes bilong Christ and startim niu agreement for changem datfala Law agreement. (Luke 22:20; readim Hebrew 9:15.) Olketa anointed Christian hia kamap member bilong datfala niu nation, wea olketa nao pipol bilong Jehovah. Holy spirit helpem olketa for minim and story long staka languis, and for teachim pipol “olketa nambawan samting wea God duim.”—Acts 2:1-11.

NIUFALA NATION BILONG GOD

3-5. (a) Wanem nao Peter talem long olketa Jew long Pentecost 33 C.E.? (b) Long firstaem, hao nao datfala niu nation hem start for grow?

³ Jehovah iusim aposol Peter for invaetem olketa Jew and olketa wea followim religion bilong olketa Jew for kamap member bilong niu nation bilong Hem, wea hem nao Christian kongregeson. Long Pentecost 33 C.E., Peter talem olketa Jew olketa mas showimaot faith long Jesus, man wea olketa killim dae, bikos God mekem hem kamap “Lord and Christ.” Taem olketa askem Peter wanem nao olketa shud duim, hem sei olsem long olketa: “Iufala mas repent and baptaes long nem bilong Jesus Christ mekem iufala kasem forgiveness for sin bilong iufala. Then iufala bae kasem datfala holy spirit.” (Acts 2:22, 23, 36-38) Long datfala day, samting olsem 3,000 pipol nao kam insaed datfala niu nation, wea hem spiritual Israel. (Acts 2:41) Then bihaen, olketa aposol gohed for preach, and staka pipol moa kamap disaepol. (Acts 6:7) Datfala niu nation hem gohed for grow.

⁴ Bihaen datwan, olketa disaepol bilong Jesus start for preach long pipol long Samaria. Staka long olketa acceptim wanem olketa herem and olketa baptaes, bat olketa no kasem holy spirit yet. Governing body long Jerusalem sendem Peter and John for go lukim olketa brata and sista hia long Samaria. Peter and John “putim hand bilong tufala long olketa pipol hia, and God givim holy spirit long olketa.” (Acts 8:5, 6, 14-17) Diswan mekem olketa kamap anointed Christian, and member bilong spiritual Israel.

⁵ Long 36 C.E., God iusim Peter for invaetem narafala grup for kam insaed datfala niu nation. Diswan hem happen taem Peter preach long Cornelius, bigman bilong army long Rome, witim olketa relative and fren bilong hem. (Acts 10:22, 24, 34, 35) Bible sei taem Peter hem gohed for story, “holy spirit kam long evriwan [wea no Jew] wea herem message bilong God. Olketa brata wea circumcise wea kam witim Peter, olketa sapraes fogud bikos God givim holy spirit tu long olketa wea no Jew.” (Acts 10:44, 45) Start long datfala taem eniwan wea no Jew and wea no circumcise savve kam insaed datfala niu nation.

PIPOL WEA “GAREM NEM BILONG HEM”

6, 7. Wanem nao olketa wea insaed datfala niu nation duim for showimaot olketa pipol wea garem nem bilong God?

⁶ Long wanfala meeting wea governing body garem long 49 C.E., disaepol James sei: “Olsem Symeon [Peter] hem storyim gud long iumi finis, distaem God hem acceptim pipol wea no Jew mekem hem savve chusim samfala wea no Jew tu for garem nem bilong hem.” (Acts 15:14) Pipol hia wea “garem nem bilong [God]” hem olketa Christian wea Jew and olketa wea no Jew. (Rome 11:25, 26a) Long narataem bihaen, Peter sei: “Long bifor, iufala no pipol bilong God, bat distaem iufala pipol bilong hem nao.” Peter storyim why God startim disfala niu nation taem hem sei: “Iufala ‘pipol wea God chusim and olketa priest wea rul olsem king. Iufala wanfala holy nation and spesol pipol bilong God. Hem chusim iufala for talemaot long evri ples olketa nambawan wei’ bilong hem. Hem nao kolem iufala kamaot from darkness and tekem iufala go insaed long nambawan laet bilong hem.” (1 Pet. 2:9, 10) Olketa mas no fraet for witness abaotem Jehovah and talemaot long pipol Jehovah hem ruler bilong evri samting.

⁷ Jehovah iusim datfala niu nation and hem sei olketa nao “pipol wea mi chusim for talemaot olketa samting wea mi duim mekem mi kasem praise.” (Isa. 43:21) Olketa no fraet for talem pipol Jehovah nao hem trufala God, and evri nara god olketa false. (1 Thess. 1:9) Olketa witness abaotem Jehovah and Jesus “long Jerusalem, long evri ples long Judea and long Samaria, and long evri farawe ples long earth.”—Acts 1:8; Col. 1:23.

8. Long first century, wanem warning nao aposol Paul talem long pipol bilong God?

⁸ Paul hem no fraet for witness abaotem Jehovah and talem pipol Jehovah nao hem trufala God. Taem Paul story long samfala savveman hem sei Jehovah nao “wakem world and evri samting insaed,” and hem “Lord bilong heven and earth.” (Acts 17:18, 23-25) Paul talem tu disfala warning long pipol bilong God: “Bihaen mi lusim iufala, mi savve samfala man wea olsem olketa wild dog bae kam and joinim iufala and olketa bae no kaen long olketa sheepsheep. Samfala long iufala tu bae talem olketa samting wea no stret for mekem olketa disaepol followim olketa.” (Acts 20:29, 30) Datfala warning hem abaotem wei wea olketa apostate bae kam insaed kongregeson. Kasem end bilong first century, staka apostate stap nao.—1 John 2:18, 19.

9. Wanem nao happen bihaen olketa aposol dae?

⁹ Bihaen olketa aposol dae, staka apostate kam insaed long olketa kongregeson. Olketa apostate hia nao startim olketa church wea sei olketa Christian. Olketa false Christian hia no pipol wea garem nem bilong God, bat olketa aotem nem bilong God from staka Bible transleison bilong olketa. Olketa spoelem nem bilong God tu long olketa narafala wei. Olketa followim olketa kastom bilong pipol wea worshipim olketa false god, and teachim pipol olketa samting wea no kam from Bible. Olketa join insaed olketa war and sei olketa faet for God, and olketa raverave and durong. For staka handred year bihaen olketa apostate kam insaed long kongregeson, tu-thri long earth nomoa faithful for worshipim Jehovah, bat olketa hia no organize yet olsem wanfala grup wea “garem nem bilong [God].”

DATFALA NATION HEM KAMAP MOA

10, 11. (a) Wanem nao Jesus talem long tokpiksa bilong hem abaotem olketa “wheat” and “rabis grass”? (b) Long wanem wei nao datfala profesi kamap tru bihaen 1914?

¹⁰ Tokpiksa bilong Jesus abaotem olketa wheat and rabis grass showimaot disfala wei for apostate bae mekem hem hard for pipol luksavve long tru religion. Hem sei “taem evriwan sleep,” Devil bae plantim rabis grass long planteison wea Son bilong man hem plantim wheat. Hem sei datfala wheat and rabis grass bae grow tugeta go kasem “taem wea world hem gogo for finis.” Hem sei tu, “gudfala seed” hem piksarem “olketa son bilong Kingdom” and “olketa rabis grass” hem piksarem “olketa son bilong Devil.” Long taem wea world hem gogo for finis, Son bilong man bae sendem olketa angel for separatem olketa rabis grass from olketa wheat. Then olketa angel bae hipimap olketa son bilong Kingdom. (Matt. 13:24-30, 36-43) Long wanem wei nao disfala profesi hem kamap tru? Hao nao diswan mekem wei for wanfala grup kamap wea organize for worshipim God?

¹¹ Datfala “taem wea world hem gogo for finis” hem start long 1914, and datwan tu hem year wea World War I hem start. Long datfala taem tu-thri thousand anointed Christian nomoa stap long earth. Taem datfala war gohed olketa anointed “son bilong Kingdom” hia still followim samfala teaching bilong Bigfala Babylon. Bat long 1919, Jehovah mekem olketa kamap free from Bigfala Babylon, and hem isi for luksavve wei wea olketa tru Christian difren from olketa false Christian. Jehovah hipimap “olketa son bilong Kingdom” and organizem olketa for kamap pipol wea garem nem bilong hem, and datwan mekem wanfala profesi bilong Isaiah kamap tru. Isaiah sei: “Waswe, wanfala kantri savve kamap long wanfala day nomoa? Or waswe, wanfala nation savve seknomoa kamap? Nomata olsem, long semtaem wea datfala woman Zion hem feelim pain, hem bornem olketa son bilong hem nao.” (Isa. 66:8) Zion, wea piksarem organization bilong Jehovah long heven wea olketa angel insaed, hem bornem olketa son bilong hem taem olketa anointed Christian kamap wanfala nation.

12. Wanem nao olketa anointed Christian duim wea showimaot olketa pipol bilong Jehovah?

¹² Olketa anointed Christian distaem witness abaotem Jehovah, olsem olketa Christian long first century tu olketa duim. (Readim Isaiah 43:1, 10, 11.) Hem isi for luksavve olketa difren bikos olketa garem gudfala wei, and olketa talemaot gud nius abaotem Kingdom “long evri ples long world mekem pipol long evri kantri mas herem.” (Matt. 24:14; Phil. 2:15) Datwan helpem staka million pipol for savve long Jehovah and fren gud witim hem.—Readim Daniel 12:3.

“MIFALA LAEK GO WITIM IUFALA”

13, 14. (a) Wanem nao olketa wea no part long spiritual Israel mas duim for Jehovah acceptim worship bilong olketa? (b) Wanem tufala profesi long Bible nao story abaotem diswan?

¹³ Olsem iumi lanem long study bifor diswan, Jehovah acceptim worship bilong olketa wea no Israelite sapos olketa worship witim pipol bilong hem. (1 Ki. 8:41-43) Long distaem, sapos eniwan wea no part long spiritual Israel hem laek for worshipim Jehovah, hem mas worship witim olketa anointed Christian.

¹⁴ Tufala profet bilong Jehovah storyim wei wea staka pipol bae kam worshipim Jehovah witim pipol bilong hem long taem bilong end. Profet Isaiah sei: “Staka pipol bae kam and sei: ‘Kam, iumi go ap long maunten bilong Jehovah, long haos bilong God bilong Jacob. Hem bae teachim iumi long olketa wei bilong hem and iumi bae wakabaot long stretfala road bilong hem.’ Law bae go aot from Zion, and toktok bilong Jehovah bae go aot from Jerusalem.” (Isa. 2:2, 3) Zechariah sei: “Staka pipol and olketa strongfala nation bae kam long Jerusalem for worshipim Jehovah, wea hem komanda bilong olketa angel long heven, and for askem Jehovah for blessim olketa.” Olketa hia bae kam from “evri languis bilong olketa nation.” Olketa bae worshipim God witim spiritual Israel and olketa bae sei olsem: “Mifala laek go witim iufala, from mifala herem finis God hem stap witim iufala.”—Zech. 8:20-23.

15. Wanem nao hem minim taem Bible sei “olketa nara sheepsheep” “go witim” spiritual Israel?

¹⁵ “Olketa nara sheepsheep” “go witim” spiritual Israel taem olketa sapotim olketa for preachim gud nius abaotem Kingdom. (Mark 13:10) Olketa tu kamap pipol bilong God. “Olketa nara sheepsheep” witim olketa anointed Christian olketa “wanfala sekson nomoa” and Jesus Christ nao lukaftarem olketa.—Readim John 10:14-16.

STAP SEF WITIM PIPOL BILONG JEHOVAH

16. Wanem nao Jehovah bae duim wea bae lead go long Armageddon?

¹⁶ Bihaen Bigfala Babylon hem finis, olketa enemy bilong Jehovah bae attakim pipol bilong hem. Iumi bae barava needim Jehovah for protectim iumi long datfala taem. From datfala attak bae startim Armageddon, wea hem lastfala part bilong datfala “bigfala trabol,” Jehovah nao bae kontrolem evri samting wea bae lead go for datwan hem happen. (Matt. 24:21; Ezek. 38:2-4) Long datfala taem Gog nao bae attakim pipol bilong Jehovah. (Ezek. 38:10-12) Taem datwan happen Jehovah bae stretawe duim samting for sevem pipol bilong hem and faetem Gog and olketa army bilong hem. Jehovah bae mekhae long nem bilong hem and raet bilong hem for rul. Hem sei: “Mi bae . . . mekem plande nation savve long mi, and olketa mas savve mi nao Jehovah.”—Ezek. 38:18-23.

17, 18. (a) Wanem instruction nao Jehovah bae givim long pipol bilong hem taem Gog attakim olketa? (b) Sapos iumi laekem Jehovah for protectim iumi, wanem nao iumi mas duim?

¹⁷ Taem Gog start for attakim pipol bilong God, Jehovah bae sei long olketa: “Pipol bilong mi, go insaed long olketa rum bilong iufala wea iufala bae stap sef, and satem door. Haed for lelebet taem nomoa go kasem taem kros bilong God hem finis.” (Isa. 26:20) Long datfala taem Jehovah bae givim instruction abaotem wanem iumi need for duim for stap sef. Maet datfala toktok “olketa rum bilong iufala” hem minim olketa kongregeson bilong iumi.

¹⁸ Sapos iumi laekem Jehovah for protectim iumi long taem bilong datfala big trabol, iumi mas luksavve God hem garem pipol long earth and hem organizem olketa long olketa kongregeson. Iumi mas gohed worshipim Jehovah witim pipol bilong hem, and no lusim kongregeson. Olsem man wea raetem psalm talem, iumi tu laek for sei: “Jehovah nomoa savve sevem man. Blessing bilong iu hem stap long pipol bilong iu.”—Ps. 3:8.