Mekhae Long Nambawan Nem Bilong Jehovah

1, 2. Hao nao tingting bilong Olketa Jehovah’s Witness abaotem nem bilong God hem barava difren from olketa nara religion?

KLOSAP evri religion nating iusim nem bilong God. Olsem example, Revised Standard Version Bible sei hem “barava no fitim” for church iusim eni nem for God.

² Bat Olketa Jehovah’s Witness barava hapi for garem nem bilong God and for mekhae long datfala nem. (Readim Psalm 86:12; Isaiah 43:10.) And tu, iumi tinghae long privilege for savve long mining bilong nem bilong God, and for savve hem important for nem bilong God mas holy. (Matt. 6:9) For helpem iumi no forget hem bigfala privilege for savve long Jehovah, bae iumi storyim thrifala important kwestin hia: Wanem nao hem minim for savve long nem bilong God? Hao nao Jehovah showimaot hem fit for garem datfala nambawan nem? Wanem nao iumi savve duim wea showimaot iumi garem nem bilong Jehovah?

WANEM HEM MINIM FOR SAVVE LONG NEM BILONG GOD

3. Wanem nao hem minim for savve long nem bilong God?

³ For savve long nem bilong God, hem no minim iumi savve nomoa long datfala word “Jehovah.” Iumi mas savve wanem kaen God nao Jehovah. Iumi mas savve tu long wei bilong hem, plan bilong hem, samting wea hem duim, and hao hem deal witim pipol bilong hem. Taem Jehovah gohed mekem plan bilong hem kamap tru, hem isisi showimaot wanem kaen God nao hem. (Prov. 4:18) Iumi savve God talem nem bilong hem long Adam and Eve, bikos Eve iusim datfala nem bihaen hem bornem Cain. (Gen. 4:1) Olketa faithful wakaman bilong God olsem Noah, Abraham, Isaac, and Jacob, savve tu long nem bilong God. Olketa lanem moa samting abaotem wanem kaen God nao hem taem hem blessim and lukaftarem olketa, and taem hem talem plan bilong hem long olketa. Gogo, God talem Moses spesol samting abaotem mining bilong nem bilong hem.

4. Why nao Moses askem God abaotem nem bilong hem, and why nao hem laek for strongim long olketa Israelite God bae sevem olketa?

⁴ Readim Exodus 3:10-15. Taem Moses hem 80 year, God sei long hem: “Tekem pipol bilong mi, olketa son bilong Israel, go aot from Egypt.” Then Moses askem Jehovah, ‘Waswe sapos olketa Israelite askem mi hu nao nem bilong iu? Hao nao bae mi ansarem olketa?’ For longfala taem finis, pipol bilong God savve long nem bilong God, so why nao Moses askem datfala kwestin? Hem laek for savve long moa samting abaotem wanem kaen God nao Jehovah. Moses laek for strongim long olketa Israelite God nao bae sevem olketa. Hem fitim for Moses duim olsem bikos olketa Israelite slave for longtaem finis and maet olketa daotem sapos Jehovah savve sevem olketa. Samfala Israelite worshipim olketa god bilong Egypt tu!—Ezek. 20:7, 8.

5. Wanem nao Jehovah showimaot long Moses abaotem nem bilong hem?

⁵ Hao nao Jehovah ansarem Moses? Hem talem Moses for sei olsem long olketa Israelite: “Jehovah, God bilong olketa grani bilong iufala . . . hem sendem mi kam long iufala.” Hem talem Moses for sei tu: “MI BAE KAMAP nao hem sendem mi kam long iufala.”a Taem God talem datwan, hem showimaot important samting abaotem hemseleva. Hem bae kamap man for faet, or man for sevem pipol, or eni nara samting olsem mekem hem evritaem duim wanem hem promisim. Dastawe Jehovah hem sei: “Diswan nao hem nem bilong mi for olowe, and diswan nao mekem evri genereson rememberim mi.” Masbi Moses barava tinghae long toktok hia and datwan strongim faith bilong hem!

JEHOVAH SHOWIMAOT HEM FIT FOR GAREM DATFALA NEM

6, 7. Hao nao Jehovah duim wanem hem promisim?

⁶ No longtaem bihaen Jehovah story long Moses, Jehovah duim wanem hem promisim and hem mekem olketa Israelite kamap free. Hem iusim tenfala trabol for panisim pipol bilong Egypt and showimaot Pharaoh and olketa god bilong Egypt olketa no garem eni paoa. (Ex. 12:12) Then Jehovah openem Red Sea, leadim olketa Israelite go long narasaed, and draonem Pharaoh and army bilong hem. (Ps. 136:13-15) Long wilderness, Jehovah givim kaikai and wata long staka million Israelite hia. Nomata kaleko and sandol bilong olketa tu hem no brek or kamap nogud. (Deut. 1:19; 29:5) Diswan pruvim no eni samting savve stopem Jehovah for duim wanem hem promisim. Bihaen, hem sei long Isaiah: “Mi nao Jehovah, and mi nomoa savve sevem iufala.”—Isa. 43:11.

⁷ Joshua, wea changem Moses for leadim olketa Israelite, lukim tu olketa nambawan samting wea Jehovah duim long Egypt and long wilderness. Dastawe, taem Joshua klosap for dae, hem savve sei long olketa Israelite: “Iufala barava savve evri samting wea God bilong iufala Jehovah promisim hem kamap tru. No eni samting wea hem promisim hem no kamap tru.” (Josh. 23:14) Jehovah duim nao wanem hem promis for duim.

8. Hao nao Jehovah duim samting wea hem promis for duim distaem?

⁸ Distaem tu, Jehovah duim wanem hem promis for duim. Hem iusim Son bilong hem for sei long olketa last day, olketa disaepol bilong Jesus bae talemaot gud nius abaotem Kingdom “long evri ples long world.” (Matt. 24:14) Jehovah nomoa savve talem kaen profesi olsem, and hem nomoa garem paoa for mek sure datwan hem kamap tru. And hem iusim olketa man nating for duim datfala waka! (Acts 4:13) So taem iumi preachim gud nius, iumi help for mekem datfala Bible profesi kamap tru. Iumi mekhae long Dadi bilong iumi and showimaot iumi barava laekem samting wea iumi prea for hem taem iumi sei: “Mifala laekem nem bilong iu for holy. Mifala laekem Kingdom bilong iu for kam. Duim samting wea iu laek for duim long earth, olsem iu duim long heven.”—Matt. 6:9, 10.

NEM BILONG HEM NAMBAWAN

9, 10. Wanem moa iumi savve lanem abaotem Jehovah from wei wea hem deal witim olketa Israelite?

⁹ No longtaem bihaen olketa Israelite lusim Egypt, Jehovah showimaot samfala samting moa abaotem hemseleva long olketa. Jehovah givim Law long olketa and hem promis for lukaftarem olketa olsem hasband lukaftarem waef bilong hem. (Jer. 3:14) So olketa Israelite kamap olsem tokpiksa waef bilong Jehovah wea garem nem bilong hem. (Isa. 54:5, 6) Sapos olketa obeyim olketa komandment bilong hem, bae hem blessim and protectim olketa, and givim peace long olketa. (Num. 6:22-27) Pipol long evri kantri bae savve no eni nara God hem olsem Jehovah. (Readim Deuteronomy 4:5-8; Psalm 86:7-10.) Nomata olketa Israelite nao pipol bilong God, staka man and woman from olketa nara kantri disaed for worshipim Jehovah tu. Olketa olsem Ruth, datfala woman bilong Moab, wea sei long Naomi: “Pipol bilong iu bae pipol bilong mi, and God bilong iu bae God bilong mi tu.”—Ruth 1:16.

¹⁰ For samting olsem 1,500 year, wei wea Jehovah deal witim olketa Israelite showimaot plande moa samting abaotem wanem kaen God nao hem. Nomata staka taem nao olketa no obeyim hem, hem showimaot bigfala mercy and hem barava patient witim olketa. (Ex. 34:5-7) Bat Jehovah bae no gohed patient witim olketa for olowe. Taem nation bilong Israel nating bilivim Jesus hem Messiah and killim hem dae, olketa no fit nao for garem nem bilong God. (Matt. 23:37, 38) Long tingting bilong Jehovah, olketa olsem wanfala tree wea dae finis. (Luke 23:31) Gogo, hao nao olketa Israelite ting long nem bilong God?

11. Why nao olketa Israelite stop for iusim nem bilong God?

¹¹ Gogo, olketa Israelite start for no garem stretfala tingting abaotem nem bilong God. Olketa tingse nem bilong God hem holy tumas and hem no fitim for eniwan iusim. (Ex. 20:7) From olketa garem datkaen tingting, gogo, olketa stop for iusim datfala nem Jehovah. Masbi Jehovah feel nogud taem olketa nating showimaot respect for nem bilong hem. (Ps. 78:40, 41) Nem bilong Jehovah hem barava important long hem. Bible sei Jehovah hem barava tinghae long nem bilong hem. Olketa Israelite showimaot olketa no respectim nem bilong Jehovah, so olketa no fit nao for garem datfala nem. (Ex. 34:14) From diswan iumi lanem hem important tumas for iumi showimaot bigfala respect for nem bilong Creator bilong iumi.

NIU SEKSON WEA GAREM NEM BILONG GOD

12. Hu nao kamap olketa wea garem nem bilong God?

¹² Jeremiah storyim promis bilong Jehovah for mekem “wanfala niu agreement” witim wanfala niu nation. Evriwan long datfala nation “nomata olketa man nating or olketa bigman,” bae “savve long Jehovah.” (Jer. 31:31, 33, 34) Wanem taem nao God mekem datfala niu agreement? Hem long Pentecost 33 C.E. Hu nao Jehovah mekem datfala niu agreement witim? Bible kolem olketa “Israel bilong God,” wea olketa hia pipol from evri nation. Jehovah sei olketa hia “garem nem bilong hem.”—Gal. 6:16; readim Acts 15:14-17; Matt. 21:43.

13. (a) Waswe, olketa firstfala Christian iusim nem bilong God, and hao nao iumi savve long datwan? (b) Hao nao tingting bilong iu abaotem wei for iusim nem bilong God long preaching waka?

¹³ Olketa firstfala Christian wea insaed disfala niu nation iusim nem bilong God. Olsem example, olketa iusim nem bilong God taem olketa talem toktok from olketa Hebrew Scripture.b Taem aposol Peter story witim staka Israelite and olketa wea followim religion bilong olketa Jew long Pentecost 33 C.E., hem iusim nem bilong God fofala taem. (Acts 2:14, 20, 21, 25, 34) Olketa firstfala Christian mekhae long Jehovah, so hem blessim preaching waka bilong olketa. Taem iumi storyim nem bilong God long pipol and showim long Bible bilong olketa seleva, Jehovah blessim waka bilong iumi tu. Hem privilege for iumi helpem pipol for savve long Jehovah long wei olsem. And sapos olketa gohed lane abaotem Jehovah, datwan bae helpem olketa for fren gud witim hem for olowe.

14, 15. Hao nao iumi savve Jehovah protectim nem bilong hem?

¹⁴ Gogo samfala tekem kam olketa false teaching insaed long Christian kongregeson, and hem just worse moa bihaen olketa aposol dae. (2 Thess. 2:3-7) Olketa hia followim tu kastom bilong olketa Jew for no iusim nem bilong God. Waswe, Jehovah no protectim nem bilong hem, gogo no eniwan savve long nem bilong God nao? Nomoa! Hao nao iumi savve? Nomata maet iumi no savve long hao pipol bifor talem datfala nem, pipol savve long datfala nem kam kasem distaem. For plande handred year, staka Bible transleison garem nem bilong God and hem stap tu insaed raeting bilong olketa Bible savveman. Olsem example, long 1757, Charles Peters talem hao mining bilong nem bilong God hem helpem iumi for savve wanem kaen God nao Jehovah winim eni title bilong hem. Long 1797, long wanfala buk abaotem wei for worshipim God, Hopton Haynes hem sei Jehovah nao nem wea olketa Jew iusim for God. Hem sei: “[Jehovah] nomoa God wea olketa worshipim, olsem Christ and olketa Aposol tu.” Henry Grew (1781-1862) iusim nem bilong God, and tu, hem luksavve pipol no respectim nem bilong God and datfala nem mas holy. George Storrs (1796-1879), and Charles T. Russell wea waka tugeta, tufala tu iusim nem bilong God.

¹⁵ Datfala year 1931 hem barava important year for pipol bilong God. Kam kasem datfala taem, nem bilong olketa hem International Bible Students. Bat long datfala year, olketa tekem datfala nem Olketa Jehovah’s Witness. (Isa. 43:10-12) Olketa laekem pipol for savve olketa hapi tumas for ‘garem nem bilong God’ and for praisem datfala nem. (Acts 15:14) Taem iumi tingim hao Jehovah protectim nem bilong hem, datwan mekem iumi tingim toktok bilong hem long Malachi 1:11, wea sei: “From ples wea sun kamap, go kasem ples wea sun go daon, pipol long evri kantri bae mekhae long nambawan nem bilong mi.”

DUIM SAMTING WEA SHOWIMAOT IU GAREM NEM BILONG JEHOVAH

16. Why nao hem privilege for iumi garem nem Olketa Jehovah’s Witness?

¹⁶ Profet Micah hem sei: “Evri nara pipol bae duim samting wea showimaot olketa garem nem bilong god bilong olketa, bat iumi bae duim samting wea showimaot iumi garem nem bilong God bilong iumi Jehovah for olowe.” (Mic. 4:5) For Olketa Bible Student tekem nem bilong God long datfala taem, hem bigfala privilege, and tu, hem showimaot God hem hapi long olketa. (Readim Malachi 3:16-18.) Waswe, iu ting olsem tu? Waswe, iu traem best for duim samting wea showimaot iu “garem nem bilong God bilong iumi Jehovah”?

17. Hao nao iumi savve showimaot “iumi garem nem bilong God bilong iumi Jehovah”?

¹⁷ For showimaot iumi “garem nem bilong God bilong iumi Jehovah,” iumi mas duim thrifala samting. First samting, iumi mas talem nara pipol abaotem nem bilong God bikos man wea “prea long nem bilong Jehovah” nomoa bae sev. (Rome 10:13 ftn.) Mek-tu samting, iumi mas garem olketa wei olsem Jehovah, wea main wan nao love. Mek-thri samting, iumi mas willing for obeyim olketa law bilong God, and taem iumi duim olsem, iumi mekhae long nem bilong Dadi bilong iumi. (1 John 4:8; 5:3) Waswe, bae iu gohed for duim samting wea showimaot iu “garem nem bilong God bilong iumi Jehovah” for olowe?

18. Why nao evriwan wea mekhae long nem bilong Jehovah luk forward long future?

¹⁸ Klosap nao evriwan wea nating tingim Jehovah or wea againstim hem mas luksavve long hem. (Ezek. 38:23) Olketa olsem Pharaoh wea sei: “Jehovah hem hu ia, for mi mas obeyim toktok bilong hem?” Pharaoh mas luksavve Jehovah nao hem wanfala nambawan God. (Ex. 5:1, 2; 9:16; 12:29) Bat iumi willing for savve long Jehovah and fren witim hem. Long tingting bilong iumi, hem bigfala privilege for garem nem bilong hem and for obeyim hem. Iumi luk forward long future and trustim datfala promis long Psalm 9:10, wea sei: “Jehovah, pipol wea savve long nem bilong iu bae trustim iu, bikos iu bae nating lusim olketa wea lukaotem iu.”