Jehovah Directim Waka for Teachim Pipol Evriwea Long World

1. Wanem nao samfala samting wea mekem hem no isi for preachim gud nius?

WINIM 130 year go finis, taem olketa Bible Studenta start for preachim gud nius, olketa feisim staka hard samting. Olsem olketa Christian long first century, olketa Bible Student nating staka nomoa, and pipol no laekem message wea olketa preachim. Long tingting bilong samfala pipol, olketa Christian hia no skul gud. Taem Jesus torowem Satan kam daon long earth, olketa Christian kasem hard taem bikos Satan “kros fogud.” (Rev. 12:12) And start kam long datfala taem olketa duim preaching waka long “olketa last day” wea “evri samting hem hard tumas.”—2 Tim. 3:1.

2. Wanem nao olketa samting wea Jehovah duim distaem wea helpem iumi for duim preaching waka?

² Nomata olsem, Jehovah gohed for helpem pipol bilong hem. Hem laekem olketa for preachim datfala gud nius evriwea long earth, and hem bae no letem eni samting for stopem datfala waka. Hem helpem pipol bilong hem for kamap free from Bigfala Babylon, wea hem nao evri false religion. Jehovah duim sem samting bifor taem hem mekem olketa Israelite kamap free from Babylon. (Rev. 18:1-4) Hem teachim iumi mekem iumi kasem gudfala samting. Hem helpem iumi for stap gud witim narawan and trainim iumi for teachim nara pipol abaotem hem. (Readim Isaiah 48:16-18.) Nomata samfala samting wea gohed long world hem mekem hem isi for iumi duim preaching waka, diswan no minim Jehovah kontrolem evri samting wea happen long world. Preaching waka hem gohed bikos Jehovah nao helpem iumi nomata pipol spoelem iumi, and iumi feisim olketa nara hard samting wea kam from world bilong Satan.—Isa. 41:13; 1 John 5:19

3. Wanem nao showimaot profesi bilong Daniel kamap tru?

³ Profet Daniel sei long taem bilong end staka pipol bae minim olketa tru teaching insaed Bible. (Readim Daniel 12:4.) Bifor “taem bilong end” hem start, Jehovah helpem pipol bilong hem for minim olketa important teaching insaed long Bible and for rejectim olketa laea teaching. Distaem pipol bilong hem teachim truth wea kam from Bible long pipol evriwea long world. Datfala profesi long Daniel hem kamap tru. Klosap eit million pipol lanem finis truth wea stap long Bible and gohed for teachim long nara pipol. So wanem nao samfala samting wea helpem pipol bilong Jehovah for preach evriwea long world?

BIBLE TRANSLEISON

4. Long mek-19 century, olketa transleitim Bible long haomas languis?

⁴ Distaem staka pipol garem Bible, and datwan mekem hem isi for iumi talemaot gud nius long olketa. Bat staka handred year bifor, olketa bigman bilong religion no laekem pipol for readim Bible. Olketa againstim eniwan wea readim Bible and killim dae tu samfala wea transleitim Bible. Bat long mek-19 century, olketa Bible society transleitim and printim full Bible or samfala part bilong hem long samting olsem 400 languis. Kasem end bilong mek-19 century, staka pipol garem Bible bat olketa no savve long olketa teaching wea stap insaed long hem.

5. Wanem nao Olketa Jehovah’s Witness duim for teachim truth long pipol?

⁵ Olketa Bible Student savve olketa mas teachim truth insaed Bible long nara pipol, and hem nao wanem olketa duim. Long firstaem olketa iusim olketa difren Bible transleison wea stap long datfala taem, and tu, olketa givimaot olketa transleison hia long pipol. Start long 1950, olketa pablisim full New World Translation of the Holy Scriptures or samfala part bilong hem long winim 120 languis. Long 2013, olketa pablisim revised English New World Translation Bible wea hem isi for minim and for transleitim tu. Taem iumi iusim Bible wea isi for pipol minim, datwan mekem hem isi for teachim truth long olketa.

WANFALA TAEM BILONG PEACE

6, 7. (a) Insaed long 100 year wea go pas, olketa wanem war nao kamap? (b) Taem olketa kantri garem peace, wanem nao pipol bilong Jehovah duim and wanem nao kamaot from datwan?

⁶ Maet long tingting bilong iu, world hem nating garem peace enitaem. Olsem example, long mek-20 century, staka million pipol nao dae long olketa faet wea gohed, especially long World War I and World War II. Taem World War II hem gohed, Nathan Knorr nao leadim waka long organization. Hem givim tok long wanfala convention wea garem title “Peace—Can It Last?” Long datfala tok hem explainim profesi long Revelation chapter 17. Hem sei datfala profesi showimaot war hia bae no lead go long Armageddon, bat bae hem finis and wanfala taem bilong peace bae kamap.—Rev. 17:3, 11.

⁷ Bat datwan no minim bihaen long World War II, peace hem kamap long evri ples. Kam kasem distaem, staka million pipol dae long olketa narafala war tu. Nomata olsem, long staka kantri wea peace hem stap, pipol bilong Jehovah gohed for preachim gud nius. Wanem nao kamaot from datwan? Taem World War II gohed, namba bilong Olketa Jehovah’s Witness raonem world hem no kasem 110,000 pablisa. Bat distaem, klosap eit million Witness nao stap evriwea long world! (Readim Isaiah 60:22.) So long taem bilong peace, iumi savve preachim gud nius long staka pipol moa.

HEM ISI FOR TRAVEL

8, 9. Wanem nao mekem hem isi for travel distaem, and hao nao diswan helpem iumi long waka bilong iumi?

⁸ Taem pipol bilong Jehovah start for preach long United States, hem no isi for olketa travel. Long year 1900, wea hem samting olsem 21 year bihaen olketa start for printim Wastaoa magasin, United States garem 8,000 trak nomoa and no garem staka gudfala road. Bat distaem, winim wan and haf billion trak stap evriwea long world and staka ples garem olketa gudfala road. So iumi savve iusim olketa trak and go long olketa road for kasem olketa farawe ples for preach long pipol. Nomata iumi stap long ples wea hem no isi for travel, and iumi mas wakabaot farawe, iumi traem best for preach long eni ples wea pipol stap.—Matt. 28:19, 20.

⁹ Iumi iusim olketa difren kaen transport tu for duim waka bilong iumi. Iumi iusim olketa trak, ship, and train for transportim olketa Bible and olketa buk bilong iumi. So olketa brata and sista bilong iumi wea stap long olketa farawe ples savve kasem literature bilong olketa kwiktaem. Olketa circuit overseer, Branch Komiti member, missionary, and olketa narawan savve travel long aeroplane for go givim tok long olketa convention and for helpem olketa kongregeson. Olketa member bilong Governing Body and olketa nara brata from hedquarter tu savve travel long aeroplane for go long nara kantri for encouragem and trainim olketa brata and sista. Wei wea hem isi for travel hem helpem pipol bilong Jehovah for garem wan mind.—Ps. 133:1-3.

LANGUIS AND TRANSLEISON

10. Wanem nao showimaot English hem languis wea staka pipol raonem world iusim?

¹⁰ Long first century, staka pipol wea stap long olketa kantri wea Rome rulim savve story long Greek languis. Distaem staka pipol raonem world savve story long English. Datfala buk English as a Global Language hem sei: “Long evri fofala man long earth, wanfala hem savve minim or story long English.” Plande pipol lanem English bikos hem nao languis wea pipol raonem world iusim long bisnis, gavman, science, and technology.

11. Hao nao English helpem iumi long waka bilong iumi?

¹¹ Wei wea staka savve long English hem helpem iumi long waka bilong iumi. For staka year, firstaem olketa pablikeson bilong iumi stap long English, and bihaen olketa transleitim long olketa nara languis. Staka pipol savve readim olketa pablikeson bilong iumi bikos olketa savve minim English. English hem languis wea olketa iusim long hedquarter bilong iumi. Olketa brata and sista from nara kantri wea savve gud long English savve kasem training long olketa skul bilong iumi long Patterson, long New York.

12. Iumi transleitim olketa pablikeson bilong iumi long haomas languis, and wanem nao helpem iumi for duim datwan?

¹² From iumi garem responsibility for preach long pipol evriwea long world, iumi transleitim olketa pablikeson bilong iumi long winim 700 languis. Wanem nao helpem iumi for duim datwan? Iumi iusim olketa computer and olketa computer program, wea wanfala nao hem MEPS, for duim transleison waka. Samting wea kamaot from diswan, Olketa Jehovah’s Witness evriwea long world garem wan mind bikos olketa savve long datfala “klin languis” wea hem nao olketa tru teaching insaed Bible.—Readim Zephaniah 3:9.

OLKETA LAW AND KOT CASE

13, 14. Wanem gud samting nao iumi kasem from olketa law and olketa kot case?

¹³ Olketa Christian long first century kasem gud samting from law bilong Rome. Distaem tu olketa law bilong staka kantri helpem iumi long preaching waka. Olsem example, olketa law long United States sei pipol garem raet for chusim religion bilong olketa, storyim biliv bilong olketa, and for hipap tugeta for worship. So olketa Witness long datfala kantri free for hipap tugeta for worship and for duim preaching waka. Iumi free tu for organizem preaching waka wea gohed long full world long hedquarter bilong iumi long United States. Nomata olsem, samfala taem iumi mas go long kot and iusim law for defendim raet bilong iumi for preach. (Phil. 1:7) And taem olketa kot stopem pipol bilong Jehovah long United States for no preach, iumi appeal long hae kot or supreme kot for defendim raet bilong iumi for preach. Taem olketa duim olsem, staka taem iumi winim olketa kot case hia.

¹⁴ Long olketa nara kantri tu iumi go long kot for defendim raet bilong iumi for hipap tugeta and for duim preaching waka. Long samfala kantri, taem iumi lus long samfala kot case hia, iumi go long olketa international kot. Olsem example, staka taem iumi go long European Court of Human Rights. Kam kasem June 2014, iumi winim finis 57 kot case long datfala Kot. And staka kantri long Europe mas stap anda long olketa disison bilong datfala European Court of Human Rights. Nomata staka pipol “heitim” iumi, olketa law bilong staka kantri helpem iumi for free for worshipim Jehovah.—Matt. 24:9.

OLKETA NARA SAMTING WEA HELPEM IUMI

15. Hao nao olketa niufala wei for duim printing helpem iumi?

¹⁵ Olketa niufala wei for duim printing helpem iumi for preachim gud nius long staka pipol. Long year 1450, Johannes Gutenberg wakem first printing machine, and for staka handred year pipol iusim datwan. Bat insaed 200 year wea go finis, olketa designim olketa niu printing machine. Olsem example, offset printing machine hem savve print fast and olketa buk wea hem printim hem barava gud. And tu, hem no expensive tumas for baem pepa and for wakem olketa buk. Hao nao diswan helpem waka bilong iumi? Long 1879, olketa printim firstfala Wastaoa magasin long English nomoa. Hem no garem eni piksa insaed, and olketa printim 6,000 copy bilong datfala magasin. Distaem, olketa printim Wastaoa magasin long winim 200 languis. Hem garem olketa naesfala kala piksa, and olketa printim winim 50,000,000 copy bilong each magasin.

16. Wanem nao olketa samting wea pipol wakem wea helpem iumi for preach evriwea long world? (Lukim piksa long start bilong study.)

¹⁶ Staka nara samting wea pipol wakem insaed 200 year wea go pas, hem helpem pipol bilong Jehovah for preachim gud nius. Iumi story finis abaotem olketa train, trak, and aeroplane. Bat olketa nara samting wea iumi iusim tu hem baesikol, typewriter, machine for printim buk for blind pipol, telegraph, telephone, camera, audio recorder, video recorder, radio, television, movie, computer, and Internet. Nomata pipol bilong Jehovah no wakem olketa samting hia, bat olketa iusim for preach evriwea long world and for wakem olketa Bible and Bible literature long staka languis. Taem olketa duim olsem, olketa “drinkim milk bilong olketa nation” wea hem nao wanem profet Isaiah profesi abaotem.—Readim Isaiah 60:16.

17. (a) Preaching waka hem pruvim wanem samting? (b) Why nao Jehovah laekem iumi for waka witim hem?

¹⁷ Jehovah nao directim preaching waka bilong iumi. Jehovah no depend long iumi for duim disfala waka. Bat hem askem iumi for duim disfala waka bikos hem lovem iumi and hem laekem iumi for waka witim hem. Taem iumi duim datfala waka, datwan showimaot iumi lovem hem and iumi lovem nara pipol tu. (1 Cor. 3:9; Mark 12:28-31) Iumi barava tinghae long wei wea Jehovah helpem iumi for preach evriwea long earth. So iumi laek for iusim evri chance wea iumi garem for preach abaotem Jehovah and Kingdom bilong hem!