“Taem for God Sevem Iufala Hem Klosap”!

1. Wanem nao happen long Jerusalem long 66 C.E.? (Lukim piksa long start bilong study.)

TINGIM sapos iu wanfala Christian wea laef long Jerusalem long 66 C.E. Staka samting nao happen raonem iu. Wanfala bigman long Rome, wea nem bilong Florus, hem stealim 17-fala talent from temple. Olketa Jew kros fogud, and killim dae staka soldia bilong Rome and talemaot olketa no stap anda nao long rul bilong Rome. Bat gavman long Rome kwiktaem duim samting. Insaed thrifala month nomoa, Cestius Gallus wea leadim 30,000 soldia kam and raonem nao Jerusalem. Olketa Jew wea faet go haed long area bilong temple, bat olketa soldia bilong Rome trae for brekem wall bilong temple mekem olketa savve go insaed. Evriwan long Jerusalem wari and fraet fogud. Sapos iu long there, hao nao bae iu feel taem iu lukim evri samting hia wea happen?

2. Wanem nao olketa Christian mas duim taem olketa lukim army bilong Rome raonem Jerusalem, and hao nao olketa fit for ranawe?

² Plande year bifor, Jesus warnim olketa disaepol bilong hem abaotem disfala samting wea happen, and hem sei long olketa: “Taem iufala lukim army hem raonem Jerusalem, iufala savve nao datfala taon hem klosap for finis. Long datfala taem nao, olketa wea stap long Judea mas ranawe go long olketa maunten. Olketa wea stap long Jerusalem mas lusim datfala taon and olketa wea stap aotsaed long hem mas no kam insaed.” (Luke 21:20, 21) Hao nao olketa Christian bae lusim Jerusalem bikos staka soldia raonem finis datfala taon? Wanfala samting wea mekem pipol sapraes hem happen. Army bilong Rome seknomoa lusim Jerusalem! Olsem Jesus talem, God “no letem datfala [attak] gohed for longfala taem.” (Matt. 24:22) Taem army lusim Jerusalem, datwan hem chance nao for olketa faithful Christian obeyim toktok bilong Jesus for ranawe go long olketa maunten.a Bihaen, long 70 C.E., narafala army bilong Rome kam bak long Jerusalem and distroem datfala taon. Bat olketa wea obeyim wanem Jesus talem olketa sev.

3. Klosap nao olketa Christian bae feisim wanem samting, and wanem nao bae iumi storyim long disfala study?

³ Datfala instruction and warning wea Jesus talem long olketa Christian long Jerusalem hem fitim taem bilong iumi tu. Klosap nao iumi tu bae feisim semkaen samting. Jesus storyim olketa samting wea happen long first century for showimaot samting wea bae happen taem datfala “bigfala trabol” hem start. (Matt. 24:3, 21, 29) Long sem wei wea olketa faithful Christian sev taem Jerusalem hem distroe, “wanfala big crowd” tu bae sev taem datfala big trabol kasem full earth. (Readim Revelation 7:9, 13, 14.) Hem barava important for iumi savve long wanem Bible talem abaotem olketa samting hia wea klosap for happen. Why nao olsem? Bikos datwan bae helpem iumi for sev long datfala taem. Distaem bae iumi storyim olketa samting wea klosap for happen and hao olketa samting hia bae affectim iumi wanwan.

START BILONG DATFALA BIG TRABOL

4. Wanem nao bae happen wea showimaot datfala big trabol hem start?

⁴ Wanem nao bae happen wea showimaot datfala big trabol hem start? Evri false religion long world bae distroe. Bible kolem evri false religion “Bigfala Babylon,” wea hem “mami bilong olketa jury woman.” (Rev. 17:5-7) Why nao Bible sei false religion hem olsem wanfala jury woman? Bikos olketa bigman long false religion olketa no faithful long God. Olketa no sapotim Jesus and Kingdom bilong hem, bat olketa sapotim olketa gavman bilong man. And tu, olketa no followim wanem Bible talem mekem olketa savve garem moa paoa ovarem olketa gavman hia. Worship bilong olketa hem no klin, wea barava difren from klinfala worship bilong olketa anointed Christian. (2 Cor. 11:2; Jas. 1:27; Rev. 14:4) Bat hu nao bae distroem Bigfala Babylon? Jehovah bae mekem “tenfala horn” bilong datfala “wild animal wea kala bilong hem red” for “garem tingting for duim samting wea hem laekem.” Datfala “wild animal wea kala bilong hem red” hem piksarem United Nations, and “tenfala horn” bilong hem piksarem evri gavman long world wea sapotim United Nations.—Readim Revelation 17:3, 16-18.

5, 6. Hao nao iumi savve no evri member bilong olketa false religion bae dae taem Bigfala Babylon hem distroe?

⁵ Waswe, evri member bilong olketa false religion nao bae dae taem Bigfala Babylon hem distroe? Nomoa. Jehovah iusim profet Zechariah for raet abaotem samting wea bae happen. Long datfala taem, samfala wea insaed false religion bifor bae sei: “‘Mi no wanfala profet. Mi wanfala farmer, bikos wanfala man nao baem mi taem mi smol.’ And sapos eniwan askem hem, ‘Hao nao iu garem olketa garekil hia long body bilong iu?’ hem bae sei, ‘Olketa garekil hia mi kasem long haos bilong olketa fren bilong mi.’” (Zech. 13:4-6) So samfala bigman bilong religion tu bae sei olketa no insaed long olketa religion hia, and olketa bae act olsem olketa no interest long religion.

⁶ Wanem nao bae happen long pipol bilong God long datfala taem? Jesus sei: “God bae no letem datfala trabol gohed for longfala taem, bikos sapos olsem, no eniwan bae sev. Bat from hem tingim olketa wea hem chusim, hem bae no letem datwan for gohed.” (Matt. 24:22) Olsem iumi storyim finis, long 66 C.E. God no letem datfala trabol wea kasem Jerusalem gohed for longfala taem. Diswan givim chance long “olketa wea hem chusim,” wea hem nao olketa anointed Christian, for ranawe. Long sem wei tu, God bae no letem first part bilong datfala big trabol gohed for longfala taem from hem tingim “olketa wea hem chusim.” God bae no letem “tenfala horn,” wea piksarem olketa gavman, for finisim pipol bilong hem. Bihaen Bigfala Babylon hem distroe, olketa samting bae kwaet for lelebet taem.

TAEM BILONG TEST, AND TAEM BILONG JUDGMENT

7, 8. Bihaen olketa false religion finis, bae iumi garem chance for duim wanem samting, and long wanem wei nao pipol bilong God bae difren long datfala taem?

⁷ Wanem nao bae happen bihaen olketa false religion distroe? Iumi bae garem chance for showimaot iumi barava trustim Jehovah. Long datfala taem, staka pipol bae trae for kasem protection and help from olketa organization bilong olketa man, wea olsem “olketa bigfala ston long olketa maunten.” (Rev. 6:15-17) Bat pipol bilong Jehovah bae trustim hem for protectim olketa. Long 66 C.E., taem olketa soldia bilong Rome lusim Jerusalem, hem no chance for olketa long Jew religion for change and kamap Christian. Bat hem taem for olketa wea Christian finis for ranawe from Jerusalem, olsem Jesus talem olketa for duim. Olsem tu, bihaen Bigfala Babylon hem finis, iumi shud no tingse eniwan bae change for kamap tru Christian. Bat hem chance for evri tru Christian showimaot olketa lovem Jehovah and for sapotim olketa anointed Christian.—Matt. 25:34-40.

⁸ Iumi no savve evri samting wea bae happen long datfala taem bilong test. Bat iumi savve, laef bae no isi long datfala taem and bae iumi mas mekem samfala sakrifaes. Long first century, olketa Christian wea sev mas lusim haos bilong olketa and mas deal witim olketa hard samting. (Mark 13:15-18) Iumi shud ting raonem tufala kwestin hia: ‘Waswe, mi willing for lusim olketa material samting? Waswe, mi willing for duim eni samting wea mi mas duim for gohed faithful long Jehovah?’ Tingim diswan: Long datfala taem, iumi nomoa bae followim example bilong profet Daniel taem iumi gohed worshipim God bilong iumi nomata wanem nao happen!—Dan. 6:10, 11.

9, 10. (a) Wanem message nao bae pipol bilong God talemaot long taem bilong bigfala trabol? (b) Wanem nao olketa enemy bilong God bae duim taem olketa herem datfala message?

⁹ Long taem bilong bigfala trabol, iumi bae no preachim “gud nius abaotem Kingdom.” Taem for preachim datfala message hem finis nao. Datfala taem wea “world bae finis” hem klosap nao! (Matt. 24:14) Pipol bilong God bae talemaot wanfala strong message abaotem judgment wea bae kam. Maet iumi bae talemaot hao world bilong Satan hem redi for finis evribit. Bible sei datfala message bae olsem olketa hail ston. Hem sei: “Olketa bigfala hail ston foldaon from skae antap long olketa man. Hevi bilong wanfala hail ston hia hem samting olsem twenti kilo. Olketa man tok spoelem God bikos datfala hail hem nogud tumas and hem spoelem staka samting.”—Rev. 16:21.

¹⁰ Wanem nao olketa enemy bilong iumi bae duim taem olketa herem datfala strong message? Jehovah iusim profet Ezekiel for storyim samting wea Gog from Magog, wea hem nao olketa kantri wea join tugeta, bae duim taem olketa herem datfala message. Jehovah sei olsem long Gog: “Long datfala day bae iu tingim wanfala nogud plan insaed long heart bilong iu. Iu bae sei: ‘Mi bae attakim olketa ples wea olketa taon no garem eni samting for protectim olketa. Mi bae againstim olketa wea stap sef, wea stap long olketa vilij wea no garem ston wall raonem, olketa bar, or olketa gate for protectim olketa.’ Goal bilong iu hem for tekem staka samting, and for attakim olketa ples wea distroe wea pipol stap long hem distaem and for attakim pipol from evri difren kantri wea hipap tugeta, wea hipimap olketa riches and property, and wea stap long midol bilong earth.” (Ezek. 38:10-12) Bae pipol bilong God barava difren from nara pipol, wea datwan hem olsem olketa “stap long midol bilong earth.” Olketa kantri wea join tugeta bae no hol bak nao for attakim olketa anointed Christian and olketa wea sapotim olketa.

11. (a) Wanem nao iumi shud luksavve long hem abaotem olketa samting wea bae happen long taem bilong bigfala trabol? (b) Wanem nao bae pipol duim taem olketa lukim olketa saen long skae?

¹¹ Distaem bae iumi storyim olketa next samting wea bae happen. Bat iumi shud luksavve Bible no talem wanem nao bae happen firstaem and wanem nao bae happen bihaen. Maet samfala samting hia hem happen long semtaem. Long profesi bilong Jesus abaotem taem wea world hem gogo for finis, hem sei: “Olketa saen bae showaot tu long sun, moon, and olketa star. Olketa kantri long earth bae kasem barava hard taem and no savve wanem for duim bikos sea hem mekem bigfala noise and hem raf tumas. Olketa man bae fraet fogud and wari long olketa samting wea bae happen long earth, bikos olketa samting long skae wea strong tumas bae seksek. Then olketa bae lukim Son bilong man hem kam long olketa cloud long skae witim bigfala paoa and glory.” (Luke 21:25-27; readim Mark 13:24-26.) Waswe, taem disfala profesi kam tru bae olketa saen wea mekem man fraet showaot long skae? Bae iumi mas weit and lukluk. Bat iumi savve, taem olketa enemy bilong God lukim olketa saen hia, bae olketa fraet fogud.

12, 13. (a) Wanem nao bae happen taem Jesus kam “witim bigfala paoa and glory”? (b) Wanem nao pipol bilong God bae duim long datfala taem?

¹² Wanem nao bae happen taem Jesus kam “witim bigfala paoa and glory”? Hem bae givim reward long olketa wea faithful, and hem bae panisim olketa wea no faithful. (Matt. 24:46, 47, 50, 51; 25:19, 28-30) Jesus iusim wanfala tokpiksa for storyim diswan. Hem sei: “Taem Son bilong man hem kam witim olketa angel, hem bae garem bigfala paoa and hem bae sidaon long nambawan throne bilong hem. Bae hem kam and evriwan long full world bae stap front long hem. Then bae hem separatem olketa long tufala difren sekson, olsem man wea lukaftarem olketa sheepsheep hem separatem olketa sheepsheep from olketa goat. Bae hem putim olketa sheepsheep long raet saed bilong hem, and olketa goat long left saed bilong hem.” (Matt. 25:31-33) Wanem nao bae happen long olketa sheepsheep and long olketa goat? Jesus bae judgem olketa. Olketa goat, wea minim pipol wea no faithful, “bae dae and no laef moa.” Bat olketa sheepsheep, wea minim pipol wea faithful, “bae kasem laef olowe.”—Matt. 25:46.

¹³ Wanem nao bae olketa goat duim taem olketa luksavve bae olketa dae? Olketa “bae hitim chest bilong olketa seleva from olketa sorre tumas.” (Matt. 24:30) Bat wanem nao olketa anointed Christian and olketa wea sapotim olketa bae duim? Olketa bae duim disfala samting wea Jesus talem: “Taem olketa samting hia start for happen, standap stret and apim hed bilong iufala, bikos taem for God sevem iufala hem klosap.”—Luke 21:28.

SHAEN BRAET TUMAS INSAED KINGDOM

14, 15. Wanem nao bae happen bihaen Gog from Magog start for attakim pipol bilong God, and hao nao diswan bae happen?

¹⁴ Wanem nao bae happen bihaen Gog from Magog start for attakim pipol bilong God? Bible sei Son bilong man “bae sendem go olketa angel and bae hipimap olketa wea hem chusim from skae and earth.” (Mark 13:27; Matt. 24:31) Disfala waka for hipimap olketa anointed Christian hem difren from taem wea God chusim olketa anointed Christian start kam long 33 C.E. And hem difren tu from taem wea olketa anointed Christian long earth kasem lastfala mark. (Matt. 13:37, 38) Datwan hem happen bifor datfala big trabol hem start. (Rev. 7:1-4) So disfala taem wea Jesus sei olketa angel bae hipimap olketa anointed Christian, hem story abaotem wanem samting? Hem story abaotem taem wea olketa anointed Christian wea stap yet long earth bae kasem reward bilong olketa for go ap long heven. (1 Thess. 4:15-17; Rev. 14:1) Datwan bae happen bihaen Gog from Magog start for attakim pipol bilong God. (Ezek. 38:11) Then, disfala toktok bilong Jesus bae kamap tru, wea sei: “Olketa wea raeteous bae shaen braet tumas olsem sun insaed Kingdom bilong Dadi bilong olketa.”—Matt. 13:43.b

¹⁵ Waswe, diswan minim olketa anointed Christian bae go ap long wanfala “rapture”? Staka pipol long religion sei datfala rapture hem minim olketa Christian bae go ap long heven witim physical body bilong olketa. And tu, olketa sei bae olketa lukim Jesus taem hem kam bak for rulim earth. Bat Bible sei: “Saen bilong Son bilong man bae showaot long skae” and Jesus bae kam “long olketa cloud long skae.” (Matt. 24:30) So scripture hia showimaot no eniwan lukim Jesus taem hem kam bak. Bible sei tu: “Body bilong man no savve kasem Kingdom bilong God.” So olketa anointed Christian wea bae go ap long heven mas change firstaem, and disfala change bae happen “kwiktaem nomoa, olsem taem eye hem sat and open moa. Diswan bae happen long taem wea datfala last trumpet hem krae.”c (Readim 1 Corinth 15:50-53.) So iumi no sei samting hia wea bae happen long olketa anointed Christian hem wanfala “rapture” bikos word hia hem join witim olketa laea teaching. Nomata olsem, taem olketa angel hipimap olketa anointed Christian wea stap yet long earth for go ap long heven, datwan bae happen kwiktaem nomoa.

16, 17. Wanem nao mas happen bifor marit bilong datfala Pikinini Sheepsheep hem kamap?

¹⁶ Taem evriwan long olketa 144,000 stap long heven, hem taem nao for redyim olketa lastfala samting for marit bilong datfala Pikinini Sheepsheep. (Rev. 19:9) Bat wanfala samting mas happen bifor marit hia kamap. Olsem iumi storyim finis, Gog bae attakim pipol bilong God taem samfala anointed Christian stap yet long earth. (Ezek. 38:16) Wanem nao pipol bilong God bae duim long datfala taem? Olketa bae followim disfala toktok: “Iufala bae no need for faet. Standap redi, standap kwaet, and lukim wei wea Jehovah bae sevem iufala. . . . Iufala mas no fraet or seksek.” (2 Chron. 20:17) Bihaen Gog start for attakim pipol bilong God, evri anointed Christian wea stap yet long earth bae go ap long heven. Revelation 17:14 storyim samting wea olketa long heven bae duim taem Gog start for attakim pipol bilong God. Olketa enemy bilong pipol bilong God “bae faetem datfala Pikinini Sheepsheep bat from hem nao Lord bilong olketa lord and King bilong olketa king, datfala Pikinini Sheepsheep bae winim olketa. Olketa wea God chusim and wea faithful long God, olketa tu bae winim olketa.” So Jesus, witim 144,000 king wea bae rul witim hem long heven, bae olketa kam for sevem pipol bilong God long earth.

¹⁷ Taem olketa duim datwan, Armageddon hem start nao, wea bae mekhae long holy nem bilong Jehovah. (Rev. 16:16) Evriwan wea Jesus sei olketa goat, wea minim olketa no faithful, bae olketa dae. No eni wicked pipol bae stap long earth, and datfala “big crowd” bae sev long Armageddon. Then, lastfala samting wea buk bilong Revelation storyim bae happen, wea hem nao marit bilong datfala Pikinini Sheepsheep! (Rev. 21:1-4)d Evriwan wea laef long earth bae kasem staka blessing from God. Datfala marit feast bae hem barava nambawan! Iumi barava luk forward long datfala taem.—Readim 2 Peter 3:13.

18. From olketa nambawan samting wea Bible storyim hem klosap for happen, wanem nao iumi mas duim?

¹⁸ From olketa nambawan samting hia klosap for happen, wanem nao iumi shud duim distaem? Jehovah iusim aposol Peter for raet olsem: “From evri samting hia bae melt olsem, iufala mas tingting gud abaotem wei bilong iufala and samting wea iufala mas duim. Iufala mas holy and duim samting wea showimaot iufala faithful long God taem iufala weitim and tingim evritaem datfala day bilong Jehovah. . . . So olketa brata wea mi lovem, from iufala weitim olketa samting hia, traem best bilong iufala for mekem God hem lukim iufala stap klin, no garem eni rabis wei, and iufala fren gud witim hem.” (2 Pet. 3:11, 12, 14) So iumi mas gohed klin long spiritual wei, and sapotim King bilong Peace, Jesus Christ.