Wat Nao Revelation Sei Bae Happen lo Future?

1. Wanem important disison nao evriwan mas mekem?

DISTAEM pipol need for mekem wanfala important disison. Olketa mas disaed sapos olketa bae sapotim Jehovah wea hem nao garem raet for rulim full universe, or sapos olketa bae sapotim Satan, datfala enemy blo God. Olketa mas disaed hu nao for sapotim, and datfala disison bae minim olketa bae kasem laef olowe or nomoa. (Matt. 25:31-33, 46) Lo “datfala big trabol” olketa bae kasem mark for laef or for dae.—Rev. 7:14; 14:9-11; Esikiel 9:4, 6.

2. (a) Wat nao Hebrew 10:35-39 encouragem iumi for duim? (b) Hao nao Bible buk Revelation savve helpem iumi?

² Readim Hebrew 10:35-39. Sapos iumi disaed for sapotim rul blo Jehovah, datwan hem wise disison. And iumi laek for helpem olketa narawan tu for duim sem samting. Iumi savve iusim Bible buk Revelation for helpem olketa. Datfala buk storyim wanem bae happen lo pipol wea againstim Jehovah, and hem storyim tu olketa blessing wea pipol wea faithful for sapotim rul blo Jehovah bae kasem. Hem important for studyim Revelation bikos hem bae strongim iumi for disaed for gohed worshipim Jehovah. And tu, taem iumi duim datwan, iumi savve helpem olketa narawan for mekem gudfala disison and for gohed worshipim Jehovah.

3. Wat nao bae iumi storyim lo disfala article?

³ Disfala article bae storyim olketa kwestin hia: Wat nao bae happen lo olketa wea sapotim rul blo God? Bat wat nao bae happen lo olketa wea sapotim datfala wild animal wea kala blo hem red wea Bible buk Revelation storyim?

WAT NAO BAE HAPPEN LO OLKETA WEA FAITHFUL LO JEHOVAH?

4. Wanem grup nao aposol John lukim witim Jesus lo heven?

⁴ John lukim lo wanfala vision tufala grup wea sapotim rul blo Jehovah, and olketa kasem laef olowe. Firstfala grup, 144,000 nao insaed. (Rev. 7:4) God chusim olketa from earth for rul witim Jesus lo wanfala gavman, or Kingdom lo heven. Olketa bae rul witim Jesus ovarem disfala earth. (Rev. 5:9, 10; 14:3, 4) Lo datfala vision, John lukim olketa standap witim Jesus lo Maunt Zion lo heven.​—Rev. 14:1.

5. Wat nao hem klosap for happen lo smol grup blo 144,000 wea stap yet lo earth?

⁵ Start lo taem blo olketa aposol, God chusim staka thousand pipol for kamap part lo datfala 144,000. (Luke 12:32; Rome 8:17) Wanfala angel talem John hao lo olketa last day wanfala smol grup blo olketa nomoa bae “stap yet” lo earth. Olketa hia bae kasem lastfala “mark” bifor bigfala trabol hem start, wea datwan showimaot Jehovah appruvim olketa. (Rev. 7:2, 3; 12:17) Then lo taem blo bigfala trabol, disfala smol grup bae go ap lo heven for joinim olketa narawan lo datfala 144,000, wea stap finis lo heven. Olketa hia bae rul witim Jesus lo Kingdom blo God.​—Matt. 24:31; Rev. 5:9, 10.

6-7. (a) Wat nao nara grup wea John lukim, and wat nao hem talem abaotem olketa? (b) Why nao datfala “big crowd” and smol grup blo 144,000 wea stap yet lo earth shud interest lo wanem Revelation chapter 7 storyim?

⁶ Bihaen John lukim datfala grup wea bae go lo heven, hem lukim “wanfala big crowd.” Bible no talem hao many pipol nao insaed datfala grup. (Rev. 7:9, 10) Wat nao John talem abaotem olketa hia? John sei: “Hem olketa wea no dae long datfala big trabol. Olketa wasim kaleko bilong olketa long blood bilong datfala Pikinini Sheepsheep and kaleko bilong olketa kamap white.” (Rev. 7:14) Datfala “big crowd” wea no dae lo datfala big trabol, and olketa bae gohed laef lo earth and enjoyim staka nambawan blessing.​—Sams 37:9-11, 27-29; Provebs 2:21, 22; Rev. 7:16, 17.

⁷ Nomata iumi garem hope for go lo heven or iumi bae gohed stap lo earth, iumi shud tingim hao olketa samting wea Revelation chapter 7 storyim hem affectim iumi. Datwan bae hem wanfala barava spesol taem for tufala grup hia. And iumi bae hapi from iumi disaed for sapotim rul blo Jehovah. Wanem moa Bible buk Revelation storyim abaotem datfala big trabol?​—Matt. 24:21.

WAT NAO BAE HAPPEN LO OLKETA WEA AGAINSTIM GOD?

8. Hao nao bigfala trabol bae start, and wat nao staka pipol bae duim?

⁸ Olsem iumi storyim lo last article, iumi lanem hao klosap nao olketa gavman bae attakim Bigfala Babylon, wea hem nao evri false religion. (Rev. 17:16, 17) Diswan nao hem start lo bigfala trabol. Waswe, datfala big trabol bae mekem staka pipol for disaed for worshipim Jehovah? Nomoa. Revelation chapter 6 sei olketa gavman and olketa bisnisman olketa olsem olketa maunten, and lo datfala taem pipol wea no worshipim Jehovah bae laekem olketa hia for protectim olketa. From olketa hia no sapotim Kingdom blo God, datwan showimaot olketa againstim Jehovah.​—Luke 11:23; Rev. 6:15-17.

9. Wat nao bae mekem pipol blo Jehovah difren from olketa narawan lo taem blo bigfala trabol, and wat nao bae happen lo olketa?

⁹ Lo datfala big trabol, olketa wea faithful lo Jehovah bae barava difren from olketa narawan. Lo datfala barava hard taem, olketa nomoa only pipol lo earth wea worshipim Jehovah God and no sapotim “datfala wild animal.” (Rev. 13:14-17) From datwan, olketa wea againstim Jehovah bae barava kros and olketa kantri bae join tugeta for attakim pipol blo God evriwea lo earth. Wanfala profesi lo Bible sei diswan nao hem attak blo Gog blo Magog.​—Esikiel 38:14-16.

10. Olsem Revelation 19:19-21 storyim, wat nao Jehovah bae duim taem olketa kantri attakim pipol blo hem?

¹⁰ Hao nao bae Jehovah feel taem olketa kantri attakim pipol blo hem? Hem sei: “Bae mi barava kros fogud.” (Esikiel 38:18, 21-23) Revelation chapter 19 storyim next samting wea bae happen. Jehovah sendem kam Son blo hem for protectim pipol blo hem and faetem olketa enemy. “Olketa army long heven,” wea hem nao olketa angel and datfala 144,000, bae joinim Jesus lo datfala faet. (Rev. 17:14; 19:11-15) Olketa hia bae finisim evri organization and pipol wea againstim Jehovah!​—Readim Revelation 19:19-21.

BIHAEN WAR WANFALA MARIT HEM KAMAP

11. Wanem spesol samting nao Revelation sei bae happen?

¹¹ Tingim hao olketa lo earth wea faithful bae hapi tumas bihaen God finisim olketa enemy blo hem! And tu, Bible sei olketa lo heven bae barava hapi taem Bigfala Babylon hem distroe. Bat nara samting tu bae mekem iumi evriwan hapi tumas. (Rev. 19:1-3) Revelation storyim hao wanfala spesol samting bae happen, wea hem nao “marit bilong datfala Pikinini Sheepsheep.”​—Rev. 19:6-9.

12. Olsem Revelation 21:1, 2 storyim, wat taem nao marit blo datfala Pikinini Sheepsheep bae kamap?

¹² Wat taem nao datfala marit bae kamap? Bifor datfala war blo Armageddon hem start, evriwan blo datfala 144,000 bae stap lo heven. Bat marit bae no gohed lo datfala taem. (Readim Revelation 21:1, 2.) Datfala marit bae happen bihaen God finisim olketa enemy blo hem lo Armageddon.​—Sams 45:3, 4, 13-17.

13. Wat nao datfala tokpiksa marit blo Jesus and datfala 144,000 hem minim?

¹³ Wat nao datfala tokpiksa marit blo Jesus and datfala 144,000 hem minim? Tingim hao wanfala marit hem mekem boy and gele for kam tugeta. Olsem tu, datfala tokpiksa marit blo Jesus Christ, datfala King, and gele wea bae hem maritim, datfala 144,000, showimaot olketa bae kam tugeta for rul. So datfala marit hem start blo wanfala niu gavman wea bae rulim earth for 1,000 year.​—Rev. 20:6.

GUD SAMTING IUMI BAE KASEM FROM NIU JERUSALEM

14-15. Wat nao Revelation chapter 21 storyim wea piksarem datfala 144,000? (Lukim piksa lo front page.)

¹⁴ Revelation chapter 21 storyim “Niu Jerusalem,” wanfala taon wea luk naes tumas wea piksarem datfala 144,000. (Rev. 21:2, 9) Faondeson blo datfala taon hem 12-fala ston wea “twelvfala nem bilong twelvfala aposol bilong datfala Pikinini Sheepsheep” stap long olketa ston hia. Why nao John interest lo datwan? Bikos hem lukim nem blo hemseleva stap lo wanfala lo olketa ston. Datwan hem nambawan privilege!​—Rev. 21:10-14; Eph. 2:20.

¹⁵ Datfala taon hem luk spesol tumas. God wakem main road blo datfala taon lo gold, and 12-fala gate blo taon hia, hem 12-fala pearl. God wakem olketa faondeson and wall lo olketa difren kaen spesol ston, and evri measurement blo olketa samting hia hem stret. (Rev. 21:15-21) Bat John luksavve wanfala samting hem no stap lo datfala taon! Hem sei: “Mi no lukim eni temple long datfala taon bikos Jehovah . . . and datfala Pikinini Sheepsheep, tufala nao temple bilong datfala taon. Datfala taon no needim sun or moon for shaen long hem bikos glory bilong God nao shaen long hem, and datfala Pikinini Sheepsheep nao laet bilong hem.” (Rev. 21:22, 23) So Niu Jerusalem wea piksarem datfala 144,000 no needim temple bikos olketa stap witim Jehovah. (Heb. 7:27; Rev. 22:3, 4) Jehovah and Jesus nao temple blo datfala taon.

16. Olketa wanem gud samting nao olketa wea stap lo earth bae kasem insaed wan thousand year wea Kingdom blo God bae rul?

¹⁶ Masbi olketa anointed wan hapi tumas taem olketa ting abaotem datfala taon. Bat olketa wea garem hope for stap lo earth tu garem gud reason for interest lo datfala taon. Lo wan thousand year wea Kingdom blo God bae rul, iumi bae kasem staka blessing from Niu Jerusalem. John sei olketa blessing hia hem ran kam olsem “wanfala river wea wata bilong hem savve mekem man laef.” And lo tufala saed blo datfala river hem garem “olketa tree wea savve mekem man laef” and “olketa leaf” blo olketa tree hia “hem for healim pipol lo evri kantri.” (Rev. 22:1, 2) Evri samting hia showimaot olketa wea stap lo earth bae kasem olketa gud samting. Olketa bae isisi kamap perfect, and no eniwan bae sik, feelim pain, or krae from olketa sorre.​—Rev. 21:3-5.

17. Olsem Revelation 20:11-13 storyim, hu nao bae kasem olketa blessing insaed datfala Thousand Year Rul?

¹⁷ Hu nao bae kasem olketa gud samting hia? Wanfala grup hem datfala big crowd wea no dae lo Armageddon, and tu, olketa pikinini wea bae born lo niu world. Bat Revelation chapter 20 storyim tu hao olketa wea dae finis bae laef bak lo niu world. (Readim Revelation 20:11-13.) Staka wea dae finis bae laef bak lo earth. Bible sei olketa wea “raeteous” from olketa faithful, and “olketa wea no raeteous” from olketa no garem chance for lane abaotem Jehovah bae laef bak. (Acts 24:15, John 5:28, 29) Bat datwan no minim evriwan wea dae finis bae laef bak lo datfala Thousand Year Rul. Olketa wea disaed for no worshipim Jehovah nomata olketa garem chance for duim datwan, bae no savve laef bak. From olketa no laek worshipim Jehovah olketa no fit for laef lo Paradaes earth.​—Matt. 25:46; 2 Thess. 1:9; Rev. 17:8; 20:15.

DATFALA LAST TEST

18. Lo end blo datfala 1,000 year, laef bae hem hao?

¹⁸ Lo end blo datfala 1,000 year, evriwan lo earth bae perfect. Sin blo Adam bae no affectim eniwan wea stap lo datfala taem. (Rome 5:12) Evri nogud samting wea kamaot from sin blo Adam bae nomoa nao. From evriwan bae perfect lo end blo datfala 1,000 year, hem olsem olketa “laef bak.”​—Rev. 20:5.

19. Why nao wanfala last test mas kamap?

¹⁹ Iumi savve Jesus gohed faithful lo God nomata Satan testim hem. Bat waswe, olketa wea perfect lo datfala taem bae gohed for faithful lo Jehovah tu taem Satan testim olketa? Taem olketa aotem Satan from datfala hol wea deep tumas lo end blo datfala 1,000 year, each wan mas pruvim sapos hem bae faithful lo Jehovah. (Rev. 20:7) Olketa wea faithful lo datfala last test bae kamap free and kasem laef olowe. (Rome 8:21) Satan and olketa demon blo hem, and pipol wea bighed againstim Jehovah bae finis for olowe.​—Rev. 20:8-10.

20. Hao nao iu feel abaotem olketa profesi lo Bible buk Revelation?

²⁰ Hao nao iu feel bihaen iu lane abaotem olketa profesi lo Bible buk Revelation? Waswe, iu hapi for savve iumi stap lo taem wea olketa profesi hia gohed for kamap tru? Diswan mas barava encouragem iu for laek helpem olketa narawan tu for worshipim God witim iumi. (Rev. 22:17) From iumi storyim olketa samting hia wea bae happen lo future, iumi hapi tu and garem sem feeling olsem aposol John wea sei: “Amen! Kam Lord Jesus.”​—Rev. 22:20.