“Mifala Laek Go Witim Iufala”

1, 2. (a) Wanem nao Jehovah sei bae happen long taem bilong iumi? (b) Olketa wanem kwestin nao bae iumi ansarem long disfala study? (Lukim piksa long start bilong study.)

JEHOVAH sei olsem abaotem taem bilong iumi: “Long datfala taem tenfala man from evri languis bilong olketa nation bae holem kaleko bilong man wea hem wanfala Jew, and sei: ‘Mifala laek go witim iufala, from mifala herem finis God hem stap witim iufala.’” (Zech. 8:23) Datfala “Jew” piksarem olketa anointed Christian. Bible kolem olketa tu datfala “Israel bilong God.” (Gal. 6:16) “Tenfala man” piksarem olketa wea garem hope for laef olowe long earth. Olketa savve Jehovah hem blessim olketa anointed Christian and olketa luksavve hem privilege for worshipim Jehovah witim olketa.

² Olsem profet Zechariah talem, Jesus tu sei pipol bilong God bae garem wan mind. Hem sei olketa wea luk forward for go long heven, hem wanfala “smol sekson bilong olketa sheepsheep” and olketa wea luk forward for stap long earth, hem “olketa nara sheepsheep.” Nomata olsem, Jesus sei evriwan long olketa hia “wanfala sekson nomoa” and “wanfala man nao bae lukaftarem olketa.” (Luke 12:32; John 10:16) From Bible story abaotem tufala sekson hia, samfala maet garem kwestin olsem: (1) Waswe, olketa nara sheepsheep need for savve long nem bilong evri anointed Christian distaem? (2) Hao nao olketa anointed Christian shud ting long olketa seleva? (3) Sapos wanfala Christian long kongregeson bilong mi start for kaikaim bred and drinkim wine long Memorial, hao nao mi shud ting long hem? (4) Waswe, mi shud wari sapos namba bilong olketa wea kaikaim bred and drinkim wine long Memorial kamap big? Long disfala study iumi bae ansarem olketa kwestin hia.

WASWE, IUMI MAS SAVVE LONG NEM BILONG EVRI ANOINTED CHRISTIAN DISTAEM?

3. Why nao iumi no barava sure long hu nao bae kasem datfala reward for go long heven?

³ Waswe, olketa nara sheepsheep mas savve long hu nao evri anointed Christian wea laef yet long earth? Nomoa. Why nao olsem? Bikos iumi no barava sure hu long olketa bae kasem datfala reward for go long heven.^[1] Nomata God chusim olketa for go long heven, olketa mas gohed faithful long Jehovah for kasem datfala reward. Satan savve long datwan, dastawe hem iusim olketa “laea profet” for trae “trikim olketa wea God chusim.” (Matt. 24:24) Olketa anointed Christian no sure olketa bae go long heven go kasem taem wea Jehovah disaedem olketa fit for kasem datfala reward. Taem Jehovah disaedem datwan, olketa anointed Christian kasem lastfala mark. Datwan hem happen just bifor olketa dae or bifor “datfala big trabol” hem start.—Rev. 2:10; 7:3, 14.

4. Sapos iumi no barava sure hu nao olketa anointed Christian wea stap yet long earth, hao nao iumi savve “go witim” olketa?

⁴ Sapos iumi no barava sure hu nao olketa anointed Christian wea stap yet long earth, hao nao olketa nara sheepsheep savve “go witim” olketa? Bible sei tenfala man wea Zechariah storyim “bae holem kaleko bilong man wea hem wanfala Jew, and sei: ‘Mifala laek go witim iufala, from mifala herem finis God hem stap witim iufala.’” Datfala scripture story abaotem wanfala Jew. Bat taem scripture hia storyim datfala Jew, hem sei tu “iufala.” So datfala Jew hem piksarem evri anointed Christian olsem wanfala grup. Olketa nara sheepsheep savve long datwan, and olketa worshipim Jehovah witim olketa anointed Christian. Olketa nara sheepsheep no need for savve long hu nao evri anointed Christian mekem olketa followim each wan long olketa. Jesus nao hem Leader bilong iumi, and Bible sei iumi mas followim hem nomoa.—Matt. 23:10.

HAO NAO OLKETA ANOINTED CHRISTIAN SHUD TING LONG OLKETA SELEVA?

5. Wanem warning nao olketa anointed Christian shud ting raonem, and why nao olsem?

⁵ Olketa anointed Christian shud ting raonem warning wea stap long 1 Corinth 11:27-29. (Readim.) Maet long wanem wei nao wanfala anointed Christian “no showimaot respect” taem hem kaikaim bred and drinkim wine long Memorial? Sapos hem no gohed fren gud witim Jehovah and no faithful, hem no showimaot respect taem hem kaikaim bred and drinkim wine long Memorial. (Heb. 6:4-6; 10:26-29) Disfala warning helpem olketa anointed Christian for luksavve olketa mas gohed faithful sapos olketa laek for kasem “datfala prize for laef long heven wea God givim.”—Phil. 3:13-16.

6. Hao nao olketa anointed Christian shud ting long olketa seleva?

⁶ Paul sei long olketa anointed Christian: “Mi, wea stap long prison bikos long Lord, encouragem iufala for showimaot long laef bilong iufala, iufala fit for kasem samting wea God markem for iufala.” Hao nao olketa showimaot datwan? Paul sei: “Iufala mas evritaem hambol, garem naesfala wei, no raf. Iufala mas patient and mas lovem narawan, no kros. Iufala mas stap gud tugeta, and traem best for keepim nao wei for wan mind wea holy spirit helpem iufala for garem.” (Eph. 4:1-3) Holy spirit bilong Jehovah helpem pipol bilong hem for hambol and for no praod. (Col. 3:12) So olketa anointed Christian no tingse olketa gud winim olketa nara brata and sista. Olketa no tingse God givim holy spirit long olketa winim wanem hem givim long olketa nara Christian. And tu, olketa no tingse olketa savve gud long Bible winim olketa nara Christian. And olketa bae no talem long nara Christian maet hem tu wanfala anointed Christian so hem shud kaikaim bred and drinkim wine long Memorial. Olketa hambol and luksavve Jehovah nomoa hem chusim olketa wea bae go long heven.

7, 8. Wanem nao olketa anointed Christian bae no duim, and why nao olsem?

⁷ Nomata olketa anointed Christian luksavve hem wanfala privilege for God chusim olketa for go long heven, olketa no tingse olketa brata and sista shud duim spesol samting for olketa. (Eph. 1:18, 19; readim Philippi 2:2, 3.) And tu, olketa luksavve taem Jehovah anointim olketa, hem no talem datwan long olketa narawan. Dastawe, wanfala anointed Christian no sapraes sapos olketa narawan no stretawe bilivim hem kasem anointing. Hem luksavve Bible sei for iumi no kwiktaem bilivim samwan wea sei God givim spesol waka long hem. (Rev. 2:2) From wanfala anointed Christian no tingse olketa brata and sista shud duim spesol samting for hem, hem bae no talem narawan hem wanfala anointed Christian taem hem meetim olketa. Maet hem no talem eniwan hem wanfala anointed Christian. And tu, hem bae no tok praod abaotem hope wea hem garem.—1 Cor. 1:28, 29; readim 1 Corinth 4:6-8.

⁸ Olketa anointed Christian no tingse olketa shud associate nomoa witim olketa nara anointed Christian. Olketa no lukaotem olketa nara anointed Christian mekem olketa savve story tugeta abaotem hope bilong olketa, and olketa no hipap long olketa grup for studyim Bible tugeta. (Gal. 1:15-17) Sapos olketa anointed Christian duim olsem, olketa kongregeson bae no wan mind. Datwan bae againstim wei wea God iusim holy spirit for helpem pipol bilong hem for garem peace and wan mind.—Readim Rome 16:17, 18.

HAO NAO IUMI SHUD TING LONG OLKETA?

9. Why nao iumi mas careful and no mekhae tumas long olketa anointed Christian? (Lukim box “Man wea Garem Love No Showimaot Nogud Wei.”)

⁹ Hao nao iumi shud ting long olketa anointed brata and sista? Jesus sei long olketa disaepol: “Iufala evriwan olketa brata.” Hem sei tu: “Man wea mekhae long hemseleva bae God mekem hem for hambol, bat man wea hambol bae God mekhae long hem.” (Matt. 23:8-12) So hem no stret for mekhae long wanfala man, nomata hem wanfala anointed brata bilong Christ. Bible encouragem iumi for garem sem faith olsem olketa elder, bat hem no talem iumi for mekem wanfala man for kamap leader bilong iumi. (Heb. 13:7) Hem tru, Bible sei hem fitim for samfala “kasem bigfala respect.” Bat Bible sei olsem bikos olketa hia “lead long gudfala wei” and “waka hard for storyim and teachim toktok bilong God,” and no bikos olketa anointed Christian. (1 Tim. 5:17) Sapos iumi ova tumas for praisem olketa anointed Christian and mekhae tumas long olketa, maet datwan savve mekem olketa for feel shame. And samting wea nogud tumas nao, maet datwan mekem hem no isi for olketa hambol. (Rome 12:3) Iumi no laek for duim eni samting wea maet mekem eni anointed Christian for sin!—Luke 17:2.

10. Hao nao iumi savve showimaot iumi respectim olketa anointed Christian?

¹⁰ Hao nao iumi savve showimaot iumi respectim olketa anointed Christian? Iumi bae no askem olketa hao nao olketa savve olketa anointed Christian. Hem samting wea iumi no need for savve. (1 Thess. 4:11; 2 Thess. 3:11) And iumi shud no tingse hasband or waef, dadi and mami, or eniwan long famili bilong olketa, hem anointed Christian tu. Hem no samting wea followim famili laen. (1 Thess. 2:12) And iumi shud no askem kwestin wea bae mekem olketa narawan feel sorre. Olsem example, iumi bae no askem waef bilong wanfala anointed brata hao nao tingting bilong hem abaotem wei wea hem bae laef olowe long earth and hasband bae no stap witim hem. Iumi evriwan savve long niu world Jehovah bae “givim long evri samting wea laef, evri samting wea olketa laekem.”—Ps. 145:16.

11. Hao nao iumi protectim iumiseleva taem iumi no mekhae tumas long olketa nara brata and sista?

¹¹ Taem iumi no mekhae tumas long olketa anointed Christian, iumi protectim iumiseleva tu. Hao nao olsem? Bible sei maet “olketa laea brata” kam insaed long kongregeson and maet olketa sei olketa anointed Christian. (Gal. 2:4, 5; 1 John 2:19) And tu, maet samfala anointed Christian no gohed faithful long Jehovah. (Matt. 25:10-12; 2 Pet. 2:20, 21) Sapos iumi no mekhae tumas long olketa nara brata and sista, iumi bae no followim olketa man nomoa, nomata olketa wea anointed, olketa wea garem staka responsibility long organization, or olketa wea worshipim Jehovah for longfala taem finis. Then, sapos olketa no faithful long Jehovah and lusim kongregeson, datwan bae no spoelem faith bilong iumi or mekem iumi lusim Jehovah.—Jude 16.

WASWE, IUMI SHUD WARI SAPOS NAMBA BILONG OLKETA KAMAP BIG?

12, 13. Why nao iumi shud no wari abaotem namba bilong olketa wea kaikaim bred and drinkim wine long Memorial?

¹² For staka year, namba bilong olketa wea kaikaim bred and drinkim wine long Memorial hem gogo daon. Bat long olketa year wea go pas, datfala namba hem kamap big. Waswe, iumi shud wari abaotem datwan? Nomoa. Bae iumi storyim why nao iumi shud no wari abaotem diswan.

¹³ “Jehovah hem savve gud long olketa bilong hem.” (2 Tim. 2:19) Jehovah hem savve long hu nao olketa anointed Christian. Bat olketa brata wea kaontem olketa wea kaikaim bred and drinkim wine long Memorial no savve hu nao hem wanfala anointed Christian. So insaed long datfala namba hem olketa wea tingse olketa anointed Christian, bat really God no chusim olketa. Olsem example, samfala wea kaikaim bred and drinkim wine bifor, olketa no duim datwan distaem. Olketa narawan maet tingting and feeling bilong olketa no balance and olketa tingse olketa bae rul witim Christ long heven. Dastawe hem hard for iumi savve haomas anointed Christian nao stap yet long earth.

14. Wanem nao Bible talem abaotem namba bilong olketa anointed Christian wea bae stap long earth taem bigfala trabol hem start?

¹⁴ Olketa anointed Christian bae stap long olketa difren ples long earth taem Jesus kam for hipimap olketa for go long heven. Bible sei: “Wanfala trumpet bae krae bigfala and [Jesus] bae sendem go olketa angel bilong hem and olketa bae hipimap olketa wea hem chusim from skae and earth.” (Matt. 24:31) Bible sei tu samfala anointed Christian bae stap yet long earth long olketa last day. (Rev. 12:17) Bat Bible no talem haomas anointed Christian nao bae stap long earth taem bigfala trabol hem start.

15, 16. Wanem nao iumi need for savve long hem abaotem datfala 144,000 wea Jehovah chusim?

¹⁵ Jehovah nao disaedem wanem taem for chusim wanfala anointed Christian. (Rome 8:28-30) Jehovah hem start for chusim olketa anointed Christian bihaen Jesus hem dae and laef bak. Hem luk olsem evri tru Christian long first century, olketa anointed Christian. Bat for plande handred year bihaen datwan, staka wea sei olketa Christian nating followim Christ. Nomata olsem, long datfala taem, Jehovah gohed for anointim samfala tru Christian wea faithful. Olketa hia olsem olketa wheat wea grow tugeta witim olketa rabis grass. (Matt. 13:24-30) Long olketa last day distaem, Jehovah gohed for chusim samfala for insaed long datfala 144,000.^[2] Sapos God hem disaed for chusim samfala for kamap anointed Christian just bifor end hem kam, iumi shud no kwestinim samting wea hem duim. (Isa. 45:9; Dan. 4:35; readim Rome 9:11, 16.)^[3] Iumi mas careful and no olsem olketa wakaman wea komplen long masta bilong olketa abaotem olketa nara wakaman wea start for waka long mek-eleven hour nomoa.—Readim Matthew 20:8-15.

¹⁶ No evri Christian wea garem hope for go long heven nao “wakaman wea faithful and wise.” (Matt. 24:45-47) Olsem long first century, Jehovah and Jesus iusim wanfala smol grup for givimaot spiritual kaikai long staka pipol. And long first century, tu-thri anointed Christian nomoa raetem olketa Christian Greek Scripture. And distaem, wanfala smol grup bilong olketa anointed Christian nomoa givimaot spiritual kaikai long pipol bilong God “long barava taem.”

17. Wanem nao iumi lanem long disfala study?

¹⁷ Wanem nao iumi lanem long disfala study? Datfala “Jew” wea Zechariah storyim hem piksarem olketa wea bae laef long heven for rul witim Jesus. “Tenfala man” wea hem storyim piksarem staka wea worshipim Jehovah wea bae laef olowe long earth. Evriwan wea worshipim Jehovah bae kasem reward, and evriwan long olketa mas obeyim olketa sem law and mas gohed faithful. Evriwan long olketa mas hambol. Olketa mas wan mind for worshipim Jehovah. And evriwan mas waka hard for mekem kongregeson gohed garem peace. Distaem wea end hem klosap, iumi evriwan mas gohed for worshipim Jehovah olsem “wanfala sekson nomoa” wea Christ leadim.